पूनङ सेलेते कटिन गोस्टिना अर्तम
अपोस्तुल्क बारा (12) जन्क सिस्यलिरकुन येसु तनकुन मदत कियन साटि नेमि कीसि, वूरकुन अपोस्तुल्क इन्जेर पोरोल दोस्तोर. इदेना अर्तम कब्रियलिर. (लूका 6:13)
आक्रितङ दिवोस्क दुनियतङ आक्रितङ दिवोस्क्नगा देसकुन पोरो देस्क, राजकुन पोरो राज्क, वोरोन पोरो वोरोर लडेय्क अनि जग्डङ किय्वल जर्गंता. माय्नलिर रोपो पेर्मा, दया अनि मान इंवलिक गुन्क कमि आसि दांतङ. (2वा तिमोति 3:1)
आत्मा सम्दो जिव्रस्नगटल अलग तोह्ले, सिरिप माय्ननगने बगवंतल तंवा आत्मा इर्तोर. इद आत्मा बस्केट मंदंता. इद आत्मा स्वर्ग्नगा मंवल बगवंतन सङा मंदा लागर सेलेते बगवंतनल पाके मासि पातडतगा सिक्सा बोगे माया लागर. (रोमा 8:16)
आंवल करल जर्ग्ता अदेन तोह्ले वाडकम किय्वले आंवल आंदु. (लूका 2:34)
आमेन इद हेब्रि बासता गोस्टि आंदु. पार्तना कीसि मह्नेके इद गोस्टितुन वाप्रि कींतेर. इद गोस्टिता अर्तम ‘अह्ने जर्गि’. (रोमा 15:33)
आरम्ना दिवोस कलि गडि कीता पेजे, बगवंतल येडवा दिवोसुन नेटि आरम कीतोर. अदेन साटि तना नेमि कीतोर वूर पर्जा गिर अहन कियना इन्जेर आगे सीतोर. अद आरम्ना दिवोस सुकुर वार नुल्पेतल ते सनिवार नुल्पे वेरि मंदंता. इद दिवोसुन नेटि वूर यूदुल्क बदे काम कियुर. इदेन सबत इन्जेर गिर केयंतेर. (लूका 23:56)
कटोडल पर्जतुन हिंदल आसि बगवंतन विंति किय्वल अनि पह्जे मत्तङ अव अर्पनङ सिय्वन कटोडल इंतेर. (हेब्रि 10:11)
कंडि किय्वल बततुने तंवा सोंतम किय्लेन ताना किमतुन दोह्वडुने कंडि किय्वल इंतेर. पाप कीतोर वोन वोना पाप्ना सिक्सतल बचि किय्ले, वोर पापिन बद्लि अद पाप्ना किमतुन येसु पर्बु तंवा परन सीसि, कंडि कीतोर. (1वा तिमोति 2:6)
करब बगवंतनङ आयोङ अव अनि बगवंतन उल्टा मंवलिक काम्क. (मत्तयि 5:39)
कानुन बय्बिल्ता पडना बागम्नगा मोदोडङ सियुङ ग्रंत्क कानुंतुन बारेते लिहि कीसि मंतङ. इवेन मोसे लिहि कीता दर्मा-ग्रंत्ना कानुन इन्जेर गिर केयंतेर. (मत्तयि 4:4)
किरिस्तु किरिस्तु इत्तेके अर्तम राजल आय्ले नेमि मातोर वोर. वेन हेब्रि बासते मेस्सयल गिर इंतेर. बारितेके नरिमन्कन पाप्ना सिक्सतल बचि कीसि, मुक्ति सिय्ले बगवंतल वोन इद दर्तुरित पोरो सारि कीतोर. वेन येसु पर्बु इन्जेर गिर केयंतेर. (लूका 2:11)
किर्चन्क तम्वकुन बचि किय्वल इन्जेर येसुनगा बरोसा इर्सि, वोना बोदा तीर ताक्वलिरकुन किर्चन्क इंतेर. (अपो. का. 11:25-26)
कूरता बिला इद रोम राज्ना तोत्ता कूरता बिला आंदु. तान पोरो सीजर महा राजना मोर अनि मोकोटा मंदु. (मत्तयि 20:2)
कोतन बद्लि किय्वलिर अद मंदिरतगा कोतङ बद्लि किय्वलिरा जुरत मत्ता. बारितेके दुस्रोक देस्क्नङ कोत्तनगा दुस्रोक पेन्क्नङ नक्सङ मत्ता काड्कि, अद मंदिरतगा कामिसियोङ. (योहन 2:14)
गमा गमा गाडि सिय्वलिक चीज्क यूदुल्क्नगा बोरे आयि मार्तोर इत्तेके, वोना कूरदुन गमा गमा गाडि सिय्वलिक चीज्क्ने सजि किय्वल रिवज ताक्सेर मत्ता. (लूका 23:56)
गवा करल करल जर्ग्ततुन बारेते कुद सूड्सि वेह्वल. (मत्तयि 19:18-19)
चुक चुके माय्वल वोरोर तना कीतङ पापकुन बारेते अय्यो! नना तप कीतोन इन्जि अवेन सुटि किय्वल. इदेन चुक चुके माय्वल सेलेके कब्ले माय्वल इंतेर. (मत्तयि 11:20)
चोकोट्ना कबुर पाप्ने ताक्वल नरिमन्कल पातड्ते सोन्जि सिक्सा बोगे माया लागर. आतुरकुन अद सिक्सतल बचे माय्ले येसुन हिंदल, बगवंतल नरिमन्कन तोह्ता सरिये चोकोट्ना कबुर आंदु. (रोमा 1:16-17)
जीवा जीवा-रासितुन ताकुस्वल सक्ति. इद जीवा मनल वेरि मेंदोल मेलियंता. मेंदोडल अद जीवा पेसिसि सोत्ता इत्तेके मेंदोल कूरदुन दात मारियंता. (योहन 14:6)
डगुक कटोडलिर वीर कटोडा कुटुंबतुर अनि कटोडलिर्गटल मुके वालिर आंदिर. (मत्तयि 21:23)
डगुर-पान सिय्वल उंडे वोरोन बारेते इचोर चोकोट्नोनि, दया तोह्वनि, किवुल वालेनि, सक्तिवंतनि, पेर्मा तोह्वनि इन्जेर ईतङ गुनकुन बारेते वेह्चेर मंवडुन डगुर-पान सिय्वल इंतेर. (लूका 13:13)
डेरना सड यूदुल्क इद सडदुन आट रोज्क येरुसलेम्नगा जर्पुसींतेर. इद सडदुन साटि दुस्रो दुस्रो देस्कनल यूदुल्क्ना जातितुर बक्तलिर वासि, डेरङ वाट्सि बगवंतल तम्वुर तोत्तुर डेरनगा मनेके बहन काबाड्तोर इंवल हेतु कींतेर. (योहन 7:2)
तस्वा किय्वल दिवोस पर्जता पिस्ता तरिकतुन पिय्सि दुनियता आक्रिता गट्कते वूरा तस्वा बगवंतना केय्दे जर्गंता. (2वा पेतुरु 2:9)
तातो पिंडिते सारिङ सुर्सि तिंवल सड पस्का सड अनि तातो पिंडितङ सारिङ सुर्वल जेवुंता सड इव रंड गिर दुस्रोक सड्क आंदुङ. इव रंड सडकुन आट (8) रोज्क जर्पुसींतेर. बगवंतल वूरुर तोत्तुरकुन ईजिप्ट्ना दासि-पांदल बचि कीनेके, वेय्ने पेसियना मत्ता. ते वूर तोत्तुर पिंडितुन सोवुस्वक्ने तातो पिंडिते सारिङ सुर्सि तित्तेर. अदेन साटि इज्रयेल लोकुर पस्का सड कीता पेजे तातो पिंडितङ सारिङ सुर्वल जेवुंता सड गिर जर्गुसंतेर. इद सडदुन नेटि तातो सारिङ तिंतेर. अद सड्दा मोदोल दिया पोद्रेक साल मेटा गोरे पोरितुन कोय्सि तिंतेर. (मत्तयि 26:17)
तोल कत्रि किय्वल संसारता मुनेता तोल कत्रि किय्वल इद कार्या मोड्डलिरकुन कींतेर. इद यूदुल्क्ना जातितुरा निसनि आंदु. बगवंतल नेमि कीतुर लोकुर इन्जेर इद तोहंता. इद कार्यतुन बगवंतल आगे सीता तीर अब्राहम्ना संतांदुर कींतेर. (अपो. का. 7:8)
दर्मा गुरुर वीर माय्नलिर पडना बागम्नगा मोसे लिहि कीतङ ग्रंत्क्नङ नेकिन बारेते वेह्वलिर आंदिर. वीरकुन सास्तिरिर इन्जेर गिर केयंतेर. (लूका 7:30)
दर्मा-ग्रंत मोसे अनि दुस्रुर पर्वक्तलिरा केय्दे तोले बगवंतल लिहि कियुसीता काड्कि, इदेन दर्मा ग्रंत इंतेर. येसु किरिस्तु जल्मा आता पेजे, मोदोडा पिडितगा लिहि कीतङ पुस्तक गिर इदेनगा मीरि कीतेर. (2वा तिमोति 3:16)
दासि बोरे आयि माल्कल वोरोर दासिन कोतने येत्तोर इत्तेके, जीतम येत्वक्ने सानल वेरि काम कीसेर मंदा लागर. माल्कन वोर दासिन पोरो सम्दो अदिकार मंदंता. (रोमा 6:16)
दूतल दूतल इत्तेके, तंवा वेह्ता कार्या किय्ले बगवंतल स्वर्गनल सारि कीतोर वोर कब्रियल आंदुर. (मत्तयि 2:19)
नियम इद नरिमन्कन अनि तंवा नड्डुम बगवंतल वोप्ता गोस्टि आंदु. इदेन बगवंतले नोवहुन सङा मोदोल कीतोर. बति ईतङ नियम्क यूदुलकुन नड्डुम वेले मंदुङ. (मत्तयि 26:28)
निय सोक्वल तोले ओलिवा नियदुन तलतगा वेडिसि बदे उंदि कार्या किय्ले, वोरोन नेमि कींदिर. उंडे येड्कि-दुक वालिर चोकोट आय्ले गिर निय सोक्सि पार्तना कींतेर. (याकोब 5:14)
निसनि उंदि गोस्टि सेलेके कार्या करल जर्ग्ता कि सेले इन्जेर तोह्वले निसनि आंदु. (योहन 2:18)
नेंड्वल सासि तिरिसि अदे मेंदोडे जीवते तेद्वडुन नेंड्वल इंतेर. सातुर वूर वेलेटिर लोकुरकुन येसु नेंडुस्तोर. अह्ने येसुनुर बक्तलिर गिर साता पेजे, बस्केट मंवल आत्मता मेंदोडे नेंडंतेर. (1वा कोरंति 15:12-34)
परिक्सा पाप कियुस्ले सेलेके करब कियुस्ले वाय्वल गट्का. (मत्तयि 4:7)
परिसयुल्क यूदुल्क्ना जातितल उंदि वर्गतुर पेदोल्क वीर परिसयुल्क आंदिर. बगवंतनङ नेकिङ ममोट पिय्सि ताकंतोम इन्जेर पोक्डा वेह्ंदिर. अनि वूर तमकुन मंदे वातङ नेकि-बदिङ अनि रीति-रिवज्क वेले तयर कीसि, पिय्सि ताकना इन्जेर जुल्मते दुस्रुर पोरो वाट्ंदिर. बति वूर अवेन बस्केन पिय्सि ताक्वेके सोंदिर. (मत्तयि 12:2)
पर्बु तन्गा मंवल जाय्जतुन पोरो सम्दो अदिकार वालेन माल्कल इन्जेर केयंतेर. अह्ने जग्दुनियतगा मंवल सम्दोत पोरो अदिकार वाले माल्कन पर्बु इन्जेर केयंतेर. वोर माल्कल येसु पर्बु आंदुर. (रोमा 10:9)
पर्वक्तल बगवंतल वेह्ता अदेन पर्जतुन वेह्वले पर्वक्तल आंदुर. ईतुर पर्वक्तलिर तोले वेलेटिर मत्तेर. नमुनतुन मोसे पर्वक्तल, यूदुल्क्ना दर्मता-कानुंतुन वेना केय्दे बगवंतल सियुस्तोर. पूना नियम्ना कालम्ने गिर बाप्तिस्मा सिय्वल योहन पर्वक्तल मत्तोर. (अपो. का. 3:24)
पवित्रा बगवंतन साटि अलदि मंवल. पवित्रा इत्तेके वड्क्वडगा आयि सूड्वडगा आयि काम किय्वडगा आयि बतय कसुर सेल्वक मंवल. (1वा पेतुरु 1:15)
पवित्रा आत्मा इद पवित्रा आत्मा कलि गडि कियन मुनेतले मंता अनि इंके कलितगा गिर काम कीसेर मंता. अनि लोकुरकुन बगवंतना जुरत मंता इन्जेर मंदगा वायुसंता. अह्ने येसुनगा बरोसा इर्सि ताक्वलिरकुन वेले तीर्क्ने मदत कीसेर वूर सङा मंदंता. (अपो. का. 1:8)
पस्का सड इज्रयेल लोकुरकुन मोसेना गट्कते बगवंतल ईजिप्ट्नुरा केय्दल बहन बचि कीतोर इंवडा हेतु कियन साटि इद पस्का सड तुङंतेर. तोले जीवा येत्वल दूतल ईजिप्ट देस्नुरेर मडनुर मरकुन जक्तोर. बति इज्रयेल लोकुर तम्वङ डेरोटनगा नेतुर सोक्ता काड्कि, वूर्गटल बोने जक्मकि. इदेन हेतु इर्ले इज्रयेल पर्जा वेले देस्कनल वासि, येरुसलेम्नगा इद सडदुन हर साल जर्गुसींतेर. (मत्तयि 26:2)
पातड पापिरकुन, करेबलिरकुन, केतड-बूतकुन सिक्सा वाट्वल जागा. (मत्तयि 10:28)
पाप बगवंतना इचतुन अनि वचंतुन बय्मन आसि ताक्वले पाप आंदु. (मत्तयि 3:6)
पार्कत आड-माड्सो नाल्विरा नियमुन पिय्सि सेलेके कानुंतुन पिय्सि पाके माय्वडुन पार्कत इंतेर. (1वा कोरंति 7:13)
पार्तना कडकुन दिसोर वोर बगवंतन सङा वड्क्वल तरिकतुने पार्तना इंतेर. (योहन 17:1-4)
पार्तना-विंति बगवंतन डगुर-पान सिय्ले किय्वल पार्तना सेलेके काम आंदु. (योहन 4:24)
पार्तना-विंति किय्वल डेरा इज्रयेल लोकुर उंदि जागतल उंडे उंदि जागा चालिस (40) साल्क यात्रा कीसेर तिरितेर. इद पार्तना-विंति किय्वल डेरतुन तमा बेके सोत्तेके हके वोंदिर. येरुसलेम्नगा मंदिर दोहनल वेरि, अद डेरतगा वूर पर्जा बगवंतन पार्तना-विंति कींदिर. अनि वूरेर कटोडलिर बगवंतन साटि अर्पनङ सींदिर. (हेब्रि 9:21)
पीर किय्वल आड-माड्सा तम्वा जोडतुन सङा आय्वा, दुस्रोन सङा मींड्वडुन पीर किय्वल इंतेर. (याकोब 4:4)
पेर्मता-दया बगवंतल माकुन वेले लाड कीता काड्कि, वोर सिय्वलिक आसिर्वाद्क येत्ले, मरट कामि सिय्वेके गिर मा पोरो तंवा पेर्मता-दया तोह्चि, पाप्ना सिक्सतल बचि कीतोर. (एपेसि 2:8)
पेर्सा नोपि इद नोपि वातुरकुन पुन्क आंतङ. केय्क काल्क्नङ बोट्टङ इचुर इचुर सडे मासेर दांतङ. मोसेना कानुंतुन पिय्सि वीरकुन नाटुन रोपो इर्वेके सोंदिर. (लूका 5:12)
पेर्सोर कटोडल वोर कटोडल सम्दिर कटोडलिर्गटल डगुर आंदुर. वोर सालदुन उंदि दिया बगवंतना मंदिरतुन रोपो मंवल बेय पवित्रा जागतगा सोन्जि, सम्दिर पर्जतङ पाप्क्ना मापितुन साटि बलिदान सीता जंवर्ता नेतुडुन वोसि वाट्ंदुर. (हेब्रि 9:7)
बगवंतना राज बगवंतल नरिमन्कना दिल्ते वासि तंवा इचा तीर माय्नन ताकुस्वडुने बगवंतना राज इंतेर. बगवंतना राज इत्तेके स्वर्ग सेलेके वोर राज ताकुस्वल जागा इन्जेर अर्तम. (लूका 7:20-21)
बगवंतल कलितुन अनि तान्गा मंवल सम्दोन गडि किय्वल आंदुर. वोरे कलितुन ताकुस्वल अनि कलितगा मंवलिर सम्दिरकुन तस्वा किय्वल आंदुर. जरा गिर कसुर अनि पाप सेल्वक मंवल पवित्रा वाले आंदुर. (योहन 3:16)
बचे माय्वल कीतङ पाप्क्ना सिक्सतल मोक्डो आय्वल. (लूका 8:12)
बस्केट मंवल जीवा येसुनगा बरोसा इर्सि, वोना इचा तीर ताक्वलिरकुन बस्केट मंवल जीवा पुटंता. (मत्तयि 7:13-14)
बाप्तिस्मा बाप्तिस्मा इत्तेके (पवित्रा आङुडित दात) नरिमन्कना जिन्गनित रोपो उंदिय जोका येतगा मुडुसि तेंड्वल कार्या आंदु. इद कार्या सिरिप बह्रि तोह्वल आंदु. बति बगवंतना चर्नते वातोर इंवडा निसनि गिर आंदु. अदे आय्वा, पवित्रा आत्मा माय्नन रोपो वाय्वडुन गिर आत्मता बाप्तिस्मा इंतेर. (अपो. का. 19:4-6)
बूत सय्तंदा अदिकार्दे ताक्वल करब्ना आत्मा. (लूका 9:42)
मंदिर तोले इज्रयेल देस्नगा यूदुल्क बगवंतन पार्तना-विंति किय्ले अनि अर्पनङ सिय्ले, उंदि पेरजति मंदिर मत्ता. इद मंदिरतुन सिर्मुट डगुर आव्रा गिर मत्ता. इद मंदिर सिरिप येरुसलेम्नगन मत्ता. (योहन 2:20)
मन-दिल मा रोपोडल बद करल अनि बद लबड इन्जेर मन-दिल माकुन वेहंता. (अपो. का. 24:16)
मय्मतङ काम्क सादरन तरिकते सेलेके बुदि-गियन वाले तरिकते गिर किया वायो अहन जर्ग्तङ गट्नङ. (मार्क 6:2)
मापि किय्वल बोन पोरोन आयि पगा पिय्वक्ने अनि वोन सिक्सा वाट्वक्ने मंवल गुन आंदु. (मत्तयि 6:15)
मुक्ति बगवंतन सङा बस्केट मंवले मुक्ति आंदु. बोरे आयि येसुन पोरो विस्वास इर्तेके, वोर कीतङ पाप्क्ना सिक्सतल बचे मांतोर अनि स्वर्ग्नगा मुक्ति पुटंता. (लूका 1:68)
मोद अद गट्कते रोमा अदिकारिर गल्ति कीतुरकुन मोद्नगा मोलने टाङि कीसि जीवा येत्ंदिर. निलु उंदि लाम मोद अनि अड्डम उंदि आकुड मोदुन जोडि कीसि इदेन तयर कींदिर. (1वा कोरंति 1:18)
यूदुल्क वीर पर्जा अब्राहम्नोर मरि इसक अनि तङ्मरि याकोब्ना कांदांतुर आंदिर. वीरकुन हेब्रियुल्क सेलेके इज्रयेल पर्जा सेलेके यूदुल्क इन्जेर केयंतेर. येसु वीर यूदुल्क्ना जातितगा जल्मा आतोर. (रोमा 3:29)
यूदुल्क आयुर वूर बगवंतल यूदुल्क्ना जातितुरकुन तंवा पर्जा इन्जेर नेमि कीतोर. वीर आय्वा मेय्तङ सम्दो जातिनुर, यूदुल्क आयुर वूरा लेकते वांतेर. (अपो. का. 15:7)
रेह्चि वड्क्वल माय्नने आयि, बगवंतने आयि कमि-पान कीसि वड्क्वडुन रेह्चि वड्क्वल इंतेर. (उजगिरि अरुस्वल 13:6)
लंका सम्दुरकुन नड्डुम मंवल बोमितुन लंका इंतेर. अदेन सिर्मुट येर गेर-पासि मंदंता. (अपो. का. 27:26)
लङर रूकता लङर लोकोंड्ने तयर कीसि मंदंता. रूकतुन आपुस्ले अद लङरतुन येतगा बूड सुटि कींतेर. अस्के अद बंडनगा आयि गट बोंमितगा आयि तट्सि, रूका हके हिके पोङ पोङ सोंवक्ने उंदि जागतगा मंले कामि सींता. (अपो. का. 27:29)
लेवियुल्क याकोब्नुर बारा जन्क मर्क्नगटल वेर लेवि इंवल वोरोर मरि आंदुर. वेर लेविना कांदांतुर्कुने लेवियुल्क इन्जेर केयंतेर. वीर बगवंतना मंदिरतगा सेवा किय्ले नेमे मातुर वूर आंदिर. (योहन 1:19)
वोट वाट्वल वेल्लेटिर लोकुर बगवंतना पोरोल येच्चि उंदि मोका बोर्ते लबड वेहंतोरो वोन सिक्सा वायि इन्जेर वोट वाटंतेर. (मत्तयि 5:34)
सदुकयुल्क वीर यूदुल्क्ना जातितल उंदि वर्गतुर पेदोल्क आंदिर. माय्नलिर सासि-नेंड्वल, दूतलिर अनि आत्मङ इंवलिक मंतङ इन्जेर वीर वोपुर. (मार्क 12:18)
संहेद्रिन इद संहेद्रिंतुर पेदोल्क इत्तेके, राय सेंटर्तुर मोडि मंदिर. वीर बदे मुके गोस्टितुन चर्चा कीसि, निर्नय कींदिर. इदेनगा यूदुल्क्नगटल, परिसयुल्क अनि सदुकयुल्क्नगटल पेदोल्क नेमि मासि मंदिर. (अपो. का. 5:21)
समरया यूदया अनि गलिलया येरियन नड्डुम मंवल येरियतुन समरया इंदिर. अगा मंवलिर इज्रयेल लोकुर यूदुल्क आयुर वूरकुन तुङ्वल कीनेके, वूरा जाति कल्ति जाति आता. अदेन हिंदल, वूर मोसे वेह्तङ बोदङ अनि दुस्रुरङ नेकि-बदिन मिस्डि कीसि ताक्ंदिर. अदेन साटि यूदुल्क अनि समरयतुर वोरोन वोरोर पसंद किय्वेके सोंदिर. (योहन 4:5)
सय्तन सय्तन इत्तेके, चोकोट कियुस्वक्ने, पाप कियुस्ले सूड्वल करब्ना आत्मा. वेर केतड-बूत्क्नोर माल्कल आंदुर. (याकोब 4:7)
साना लोकम मरन आतुर वूर सम्दिरा आक्रिता तस्वा जर्गन मुने, सातुर वूरङ आत्मङ मंवल जागा आंदु. (लूका 10:15)
सापेना बोने वोरोन आयि सेलेके बततुने आयि करब जर्ग्वडुन सापेना लाग्वल इंतेर. (गलति 1:8)
सास्तिरिर इत्तेके दर्मा ग्रंतकुन सूड्सि लिहि किय्वलिर आंदिर. अव ग्रंत्क्नङ नेकिन अनि नियमकुन बारेते वेल्ले करि कीतुर आंदिर. (मत्तयि 23:2)
सिस्यलिर सिस्यलिर इत्तेके बोरे वोरोर गुरुन पेजेय मन्जि, वोर करुसीता तीर करिसेर मंवलिर. येसुना गट्कते वेलेटिर लोकुर सिस्यलिर आसि वोना चर्ना पिय्सि ताक्तेर. (लूका 6:20)
सुनगोग सुनगोग इत्तेके यूदुल्क बगवंतना आरदना अनि सम्दो तीर्क्नङ गोस्टिङ केन्ज्ले अनि वड्क्ले मीरे माय्वल रोन. ईतङ रोह्क यूदुल्क्ना हर नाटे सेलेके चहर्ते मत्तङ. (योहन 18:20)
सोवुस्वल चीज पिंडितुन सोवुस्ले वाट्वल चीज आंदु. (मत्तयि 16:6)
स्वर्ग बगवंतल तन्गा बरोसा इर्वलिर साटि तंवा सङा बस्केट मंले, इद जागतुन तयर कीतोर. सासि-नेंड्ता पेजे येसु स्वर्ग्नगा सोत्तोर. (पिलिपि 3:20)
स्वर्ग्नोर माय्नल कलि गडे मायन मुनेतले बगवंतनोर मरि आंदुर. वेरे माय्नना रूप्ने जल्मा येत्तोर येसु आंदुर. येसु तंवा तना दुस्रुरकुन वेह्नेके इद पोरोलदुन वाप्रि कींदुर. (मत्तयि 10:23)
हेरोद रोमा राज्नगा मंवल इज्रयेल्ता येरिया अनि आजु-बाजुतङ येरियन राज ताकुस्वल राजन हेरोद इंवल पोरोडे केय्ंदिर. ईतुर राजलिर वेलेटिर मत्तेर.