लूका 23

पिलातुन मुने येसु निल्वल

(मत्तयि 27:1-2, 11-14; मार्क 15:1-5; योहन 18:28-38)

1 अहन इत्ता पेजे, वूर सम्दिर तेच्चि, येसुन पिय्सि, रोमा सर्कार्तोर गवर्नर पिलातुनगा वोतेर.

2 अनि पिलातुन, “मा पर्जतुन सरि बह्‍कि किय्वल वेरे आंदुर.

‘महा राजन टेक्सा दोह्‍वा’ इन्जेर इंवल अनि ‘राजल आय्वल किरिस्तुना’ इन्जेर वेह्‍वल वेरे आंदुर” इन्जि पिरदि कीतेर.

पिलातुन मुने येसु निल्वल

3 अद केन्चि पिलातु, “निमे यूदुल्क्नोर राजनि आंदि कि?”

इन्जेर पूसि कीतोर.

अस्के येसु, “निमेय अहन इंति” इन्जेर जवब सीतोर.

4 ते पिलातु डगुक कटोडलिर अनि मांदितुन सङा, “वेर माय्ननगा नाकुन बदे गल्ति दिसेर सेले” इन्जेर वेह्‍तोर.

5 बति वूर पट पिय्सि, “वेर तंवा बोदते यूदया येरियतगा मंवलिर सम्दिरकुन बुज्डि कीसेर मंतोर.

वेर तंवा बोदा करुस्वल, गलिलया येरियतगा सुरु कीसि, इंके इगे वातोर” इन्जेर वेह्‍तेर.

6-7 अद केन्चि पिलातु, “वेर गलिलया येरियतोर आंदुर बेहेते, वेना गोस्टि अगटोर हेरोद राजले सूड्सि येता लागर.

अनि इंके हेरोद वासि, उंडे गिर येरुसलेम्नगन मंतोर.

वेन वोन्गने वोम्ट” इन्जेर वेह्‍तोर.

पिलातुन मुने येसु निल्वल (23:1-7)

हेरोदुन मुने येसु निल्वल

ते वूर हेरोद्नगा येसुन वोतेर.

8 अस्के हेरोदु वोन सूड्सि, बेय कुसि आतोर.

बारितेके बस्केडलेयो वोन सूड्का इन्जेर मत्तोर.

येसु किय्वलिक मय्मतङ काम्कुन केन्चि मत्ता काड्कि, तंवा मुने बदे उंदि मय्मता काम किय्मड मंदर इन्जेर आसा कीसि मत्तोर.

9 येसुन वोर वेले सवल्क पूसि कीतोर.

बति येसु उंदितुन गिर जवब सिय्मकि.

10 ते अगा निल्सि मंवलिर डगुक कटोडलिर अनि सास्तिरिर बेय सोङ्ने, वोन पोरो आयोङ-सोनोङ अव कसुक वाट्सेर मत्तेर.

11 अस्के हेरोद अनि वोनुर सिपायिर येसुन, राजलिर पोंड्वलिक बारितङ पाङुक पोंडुसि, कमि-पांदे सूड्सेर, चेह्‍टेङ कीतेर.

अद आता पेजे, मल्सि पिलातुनगा वोन सारि कीतोर.

12 अस्केडल हेरोद अनि पिलातु सोप्तलिर आतेर.

अदेन मुने वूर इविरकुन अर्सि वाय्वेके सोंदु.

हेरोदुन मुने येसु निल्वल (23:8-12)

येसुन मरंता सिक्सा वाट्वल

(मत्तयि 27:15-26; मार्क 15:6-15; योहन 18:39–19:16)

13 पिलातु डगुक कटोडलिरकुन, अदिकारिरकुन अनि पर्जतुन केयुस्तोर.

14 अनि वूर सङा, “सर्कारदुन उल्टा तिरिनल पर्जतुन हक्लि कीसेर मंतोर इन्जेर, वेर माय्नन मिरट नह्‍गा पिय्सि वातिट.

मी मुनेने वेन सवल्क पूसि कीतोन.

बति केन्जट!

मिरट पिरदि किय्वलिक बदे कसुर वेन्गा नाकुन दिस्मकि.

15 अनि हेरोदुन गिर बदे तप वेन्गा दिस्वा काड्कि, वेन मल्सि नह्‍गा सारि कीतोर.

इदेन कुद मिरटे सूड्तिट.

मरंता सिक्सा वाटनल वेर बदे तप किय्मकि.

16 अदेन साटि, वेन चाटल्क्ने पायुसि सुटि कियुसंतोन” इन्जेर वेह्‍तोर.

17 ^*[हर साल पिलातु यूदुलकुन साटि, पस्का सड्दा जेवुंतुन नेटि टानेतल बोर्तेर वोरोन सुटि किय्वल रिवज ताक्सेर मत्ता.]

18 बति वूर सम्दिर मीरे मासि उंदि तीर, “वेन जकट अनि मा साटि बरबन सुटि कीम्ट!”

इन्जेर किलितेर.

19 वोर बरबल सर्कारदुन उल्टा तेच्चि, माय्नना जीवा येच्चि, जेल्दे अर्सि मंवल आंदुर.

20 येसुन सुटि कियना इन्जि, पिलातु पर्जतुन सङा उंडे उंदि जोका वड्क्तोर.

21 बति वूर पर्जा, “वेन मोद्नगा टाङि कीसि जकनये!

मोद्नगा टाङि कीसि जकनये!”

इन्जेर जोर्ते किलिसेरेन मत्तेर.

22 तेर बति पिलातु, मूडवा जोका वूर सङा, “बारि?

वेर बतल तप कीतोर?

वेन मरंता सिक्सा वाटनल नाकुन बदे कसुर दिसेर सेले.

अदेन साटि, वेन चाटल्क्ने पायुसि सुटि कियुसंतोन” इन्जेर वेह्‍तोर.

23 बति वूर सम्दिर येसुन मोद्नगा मोलने पासि जकनये इन्जेर जोर्ते किलिसेरेन मत्तेर.

आक्रित वूर किलिसिन मेय्तेर.

24 ते पिलातु वूर पट पिय्ततुन वोप्सि, निर्नय येत्तोर.

25 अनि वूरा इचा तीर किय्ले, येसुन वूर्गा हव्लि कीतोर.

बति सर्कारदुन उल्टा तेच्चि, माय्नना जीवा येत्वल बरबन वूर कोर्ता काड्कि, वोन सुटि कीतोर.

येसुन मरनता सिक्सा वाट्वल (23:13-25)

येसुन मोद्नगा मोलने पासि टाङि कीसि जक्वल

(मत्तयि 27:32-44; मार्क 15:21-32; योहन 19:17-19)

26 अद आता पेजे, सिपायिर येसुन जक्ले नगुडुन बह्‍रि वोसेर मत्तेर.

अस्केने कुरेनि चहर्तोर सीमोन बहिडल नगुडे वासेर मत्तोर.

ते वोन नड्डुम सर्दे पिय्सि, येसु कान्ज्ता मोदुन जुल्मते वोन कान्जुसि, येसुन पेजेय ताकुस्तेर.

27 बेय वेले मांदि येसुन पेजेय सोत्तेर.

अद मांदितगा कहितङ वेय्लोक गिर मत्तङ.

येसुन साटि अव वेय्लोक सातिङ पासेर, बेय आड्सेर, पेजेये सोन्जेर मत्तङ.

28 ते येसु अवेनेके तिरिसि, “येरुसलेम्नङ बायिक्निट!

ना साटि आड्मट.

बति मी साटि, मी मरि-मियडुन साटि आडट.

29 बारितेके, ‘बस्केन पीटे मन्मकि अनि बस्केन तम्वङ बोम्क्ने पाल सिय्मकि, अव गोड्डु वेय्लोक आसिर्वाद येत्तङ’ इन्जेर वेह्‍वलिक दिवोस्क वांतङ.

30 अद गट्कते पर्जा, तक्लिब्क बोगे माय्वडुन तेर साय्वले नयम इन्जि, ‘मा पोरो अरट’ इन्जेर डङलिक गुटन सङा इंदनिर.

‘माकुन मुचट’⁺ इन्जेर गुटन सङा इंदनिर.

31 ‘नह्‍गा बतय तप सेल्वेके गिर इचोर इहिन कींतेर ते, तप कीतोर वोन उंडे बचोर-बहन कींतेरेयो?’

^*” इन्जेर येसु इत्तोर.

येसुन इविर तप कीतुर नड्डुम मोद्नगा टाङि किय्वल

येसु मोदुन कांचि वोय्वल (23:26-31)

32 येसुन बरोबर जक्ले, तप कीसि मंवलिर दुस्रुर इविरकुन गिर सिपायिर पिय्सि वातेर.

33 अहन वूर कल्वरि (तला-टोक्रे) इंवल जागतगा येव्तेर.

अनि अगा येसुन मोद्नगा मोलने पासि टाङि कीतेर.

तप कीसि मंवलिर दुस्रुर इविरकुन येसुना तिना बग्ला वोरोन अनि डेमा बग्ला वोरोन मोद्नगा मोलने पासि टाङि कीतेर.

34 अस्के येसु तनकुन दुक्सा सिय्वलिर साटि, “बाबगो!

वीर बतल कीसेर मंतेरो, वीरकुन टावा सेले.

अदेन साटि वीरकुन मापि कीम” इन्जेर पार्तना कीतोर.

वोनङ पाङुकनल बोन बद ईसा वांता इन्जेर चिटिङ वाट्सि, तूस्तेर.

येसुन मोदनगा मोलाने पासि टांगि कीसि जक्वल (23:32-34)

येसुनंग पांगुकुन साटि सिपायिर चिटिंग वाट्वल (23:34)

35 पर्जा अगा जर्ग्वडुन निल्सि सूड्सेर मत्तेर.

बति अदिकारिर, “वेर दुस्रुरकुन बचि कींतोर अले!

उंदि मोका बगवंतल नेमि कीतोर किरिस्तु वेरे मंदनुर्ते, अद मोदनल बूड रेय्सि, वेना वेर बचि कियिर” इन्जेर चेडि कीतेर.

36-37 अनि सिपायिर गिर पुलिता आङुर रसा सीसेर, “निमे यूदुल्क्नोर राजनि मंद्किते, नीवा निमे बचि कीम!”

इन्जेर वोन चेडि कीतेर.

38 “वेर यूदुल्क्नोर राजल” इन्जेर लिहि कीता चेकतुन गिर, येसुना तलत पोरो मोद्नगा पातेर.

येसुना वाले मोदनगा पाटितुन पाय्वल (23:35-38)

39 तप कीतुर इविरकुन गिर येसुन बरोबर दुस्रोक मोद्क्नगा टाङि कीतेर.

वूर्गटल वोरोर, “निमे किरिस्तुनि मंद्किते, नीवा निम बचि कीसि, माकुन गिर बचि कीम!”

इन्जेर येसुना हिजत वोतोर.

40 उंडे वोरोर मोदोडोन राङि सीसेर, “निमे बगवंतन वेरिवि कि?

मरट गिर अदे सिक्सा बोगे मासेर मंतट.

41 मरट कीता तपुन साटि, इद सिक्सा बोगे माय्वल बरोबर आंद.

बति वेर बतय तप किय्वक्नेन, बोगे मासेर मंतोर” इन्जेर वेह्‍तोर.

42 अनि वोर, “येसु!

निमे राजन मोडि वानेके, नाकुन हेतु इरा” इन्जेर इत्तोर.

43 ते येसु, “इद सतेम आंद.

निमे नेंड ना सङा बस्केट मंवल सोबता वाडितगा^* मंदंति” इन्जेर वेह्‍तोर.

गल्ति कीतुर्कुन मोदनगा मोलाने पासि टांगि कीसि जक्वल (23:39-43)

येसुना मरन आय्वल

(मत्तयि 27:45-56; मार्क 15:33-41; योहन 19:28-30)

44-45 अस्के पोड्द दिस्वक आता काड्कि, दुपरि लग-बग बारा (12) नेक्नेकेडल्ते मूंद (3) नेकनल वेरि, अद देस पूरो सिम्ने सिकटि आता.

अद वकत्ने मंदिर्ता पड्दा नड्डुमनल सर्सि, रंड टुक्डेङ आता.

46 अस्के येसु, “बाबगो!

नावा आत्मतुन नीवा केय्दे इर्सेर मंतोन” इन्जेर बेय जोर्ते किलिसि, तंवा परन सुटि कीतोर.

47 अद सम्दो सिपायिरोर कमंडर कुद सूड्सि, बगवंतन डगुर-पान सीसेर, “वेर मायनल करलेन नियत्नोर आंदुर” इन्जेर वोप्तोर.

48 अगा वातुर वूर लोकुर जर्ग्ता अद सम्दो सूड्सि, दुक्सते सातिङ पासेर आड्सेर मल्सि सोत्तेर.

49 बति येसुनुर वोड्क्यलिर अनि गलिलया येरियतल वोन पेजेय वातङ अव वेय्लोक गिर, इद जर्ग्वल सम्दोतुन लङ निल्सि सूड्सेर मत्तङ.

येसुना मरन आय्वल (23:44-49)

येसुना कूरदुन बंडता बुयरितगा इर्वल

(मत्तयि 27:57-61; मार्क 15:42-47; योहन 19:38-42)

50-51 अरिमतया चहर्तोर योसेप इंवल चोकोट्नोर मायनल मत्तोर.

वोर संहेद्रिंतुर अदिकारिर्गटल वोरोर आसि गिर, बगवंतना वेरेते मंवल नियत्नोर आंदुर.

संहेद्रिंतुर निर्नय कीता अदेन वोर वोप्मकि.

अनि वाय्वल बगवंतना राजुन साटि सूड्सेर मंवल आंदुर.

52 वोर योसेपु पिलातुनगा सोन्जि, “येसुना कूरदुन वोया सीम” इन्जेर पूसि कीतोर.

53 ते पिलातु वोप्तोर.

अस्के येसुना कूरदुन अद मोदनल बूड रेह्‍चि, बारिता कादि कपिडे गूंडि कीतोर.

अनि इदेन मुने बोनय कूर इर्मकि अद, नार्युसीता बंडता पूना वीच्ना बुयरितगा वोसि इर्तोर.

54 इद कार्या सपा-सिपा कीतोर.

बारितेके, अद नेटि आरम्ना दिवोस सुरु आय्वल मत्ता.

^* तान साटि सम्दो तयरि किय्वल मत्ता.

55 गलिलयतल वातङ अव वेय्लोक योसेपुन पेजेय सोन्जि, येसुना कूरदुन वीच्ना बुयरितगा बहन इर्तोर इंवल सूड्तङ.

56 अद आता पेजे, अव रोन सोन्जि, येसुना कूरदुन सोक्ले, सेंट अनि गमा गमा गाडि सिय्वलिक चीज्क तयर कीतङ.

बगवंतल सीता आगे तीर आरम्ना दिवोसुन नेटि रोम्तङ.

येसुना कूरदुन बनडता बुयरितगा इर्वल (23:50-56)