येसु नेंड्वल
24
1 आय्त्वरतुन नेटि बय बय आनेकेन अव वेय्लोक येसुना कूरदुन सोक्ले, तमा तयर कीतङ गमा गमा गाडि सिय्वलिक चीजकुन पिय्सि, वोना कूर इर्ता बुयरितगा सोत्तङ.
2 ते अद बुयरितुन अड्डम इर्ता बंडा, बग्ला कूडुसि दिस्ता.
बुयरितगा इविर दूतलिर पावे माय्वल
3 बति रोपो सोन्जि सूड्तेके, येसु पर्बुना कूर अवेन दिस्मकि.
4 ते अव गुल आसेर मनेके, इचुला केन्जट!
एक्दम इविर माय्नलिर अवेन बग्ला पावे मातेर.
वूरङ पाङुक बेय दव्रलिक मन्जि, जगा जगा मिड्चेर मत्तङ.
5 अव वेय्लोक बेय वेरिसेर मोकोम्क बूड वाड्तङ.
ते वूर माय्नलिर, “जीवते मंवन सानलिर्गा बारि मह्क्सेर मंतिट?
6-7 वोर इगे सेलोर.
वोर नेंड्तोर.
वोर येसु गलिलया मनेके, ‘स्वर्ग्नोर माय्नन पापेस्तलिरा केय्दे हव्लि कींतेर.
वूर वोन मोद्नगा मोलने पासि, जीवा येतंतेर.
अनि मूडवा दिवोस्ने नेंडा लागर’ इंवल गोस्टि मीकुन हेतु सेलेय?”
इन्जेर वेह्तेर.
8 अस्के येसु वेह्चि मत्तङ गोस्टिङ अव वेय्लोकुन हेतु वातङ.
वीचना बुयरितगा दूतल दिस्वल (24:1-8)
9-10 मग्दलेने नाट्ना मरियल, योहंनल, याकोब्ना अवल मरियल अनि उंडे मेय्तङ वेय्लोक अद वीच्ना बुयरितल मल्सि वातङ.
अनि इव सम्दो गोस्टिन अक्रा (11) जन्क अपोस्तुल्कुन अनि अगा मंवलिर दुस्रुर सम्दिरकुन वेह्तङ.
11 बति अव वेय्लोक्नङ गोस्टिन वूर नंमकि.
बारितेके पिसेक वड्क्तपिनय वड्कंतङ इन्जि मत्तेर.
12 तेर बति पेतुरु तेच्चि, कूरदुन इर्ता बुयरितगा विच्चेर सोत्तोर.
अनि माड्क्सि सूड्तेके, सिरिप कूरदुन गूंडि कीतङ कप्डिङे दिस्तङ.
ते, ‘बतल जर्ग्सि मंदर बेहे?’
इन्जेर गुल आसेर मल्सि रोन सोत्तोर.
कालि मन्वल वीच (24:9-12)
एंमायि सोंवल सर्दे इविरकुन येसु दिस्वल
13 अदे नेटि येसुनुर बक्तलिर्गटल इविर एंमायि इंवल नाटे सोन्जेर मत्तेर.
अद नार येरुसलेमनल येडुङ कोस्क लङ मंता.
14 जर्ग्तङ अव सम्दो गट्नन बारेते, वूर वड्क्सेर ताक्सेर मत्तेर.
इविर सिस्यलिर सङा येसु ताक्वल
15 अहन वड्क्सेर, चर्चा कीसेर ताक्सेर मनेके, येसुये वूर्गा वासि, वूर बरोबर ताक्तोर.
16 बति वोरे येसु आंदुर इन्जेर वूर वोड्कि पिया पर्मकि.
बारितेके बगवंतल वूरा नदुर बंद कीसि मत्तोर.
17 येसु वूरकुन, “मिरट सरिय ताक्सेर बततुन बारेते वड्क्सेर मंतिट?”
इन्जेर पूसि कीतोर.
ते अद केन्चि, वूर दुक्सते गट्कमेन आग्तेर.
18 अस्के वूर्गटल केलेयोपा इंवल, “इव दिवोस्क्नगा येरुसलेम्नगा जर्ग्तङ गट्नन बारेते, टावा सेलोर वोर वेर्तनि, निमे वोरोनियो बतलो?”
इन्जेर वोन इत्तेर.
19 अस्के येसु, “बव गट्नङ?”
इन्जेर पूसि कीतोर.
ते वूर, “नजरेत्नोर येसुन बारेतङ गट्नङ.
बगवंतना अनि सम्दिर पर्जता नदुडे, वड्क्वडगा अनि काम्क कीसि तोह्वडगा, वोर सक्तिवंतल पर्वक्तल आतोर.
20-21 मावुर डगुक कटोडलिर, अदिकारिर वोन मरंता सिक्सा वाटुस्तेर.
अनि वोसि मोद्नगा टाङि कीसि, जीवा येत्तेर.
बति इज्रयेल लोकुरकुन सुटि किय्वल वोरे आंदुर इन्जि, आसा कीसि मत्तोम.
इव गट्नङ जर्ग्सि मूंद रोज्के आतङ.
22-23 अचोरे आय्वा, मा सङा मत्तङ अव बायिक, ममोट गुल आनल उंदि गोस्टि वेह्तङ.
बतल इत्तेके, नेंड बेय सक्रेन कूर इर्ता बुयरितगा अव सोत्तङ अले.
ते येसुना कूर अवेन दिस्मकि.
अस्के अव बायिक मह्गा वासि, ‘बगवंतनुर दूतलिरकुन सूड्तोम.
ते वूर माकुन, “पर्बु नेंड्तोर” इन्जेर वेह्तेर’ इन्जि माकुन वेह्तङ.
24 मा सङा मंवलिर कहितुर+ अद बुयरितगा सोन्जि, सूड्तेर.
वेय्लोक वेह्ता तीरे सम्दो मत्ता.
बति वूरकुन येसु दिस्मकि” इन्जेर वेह्तेर.
25 अस्के येसु, “पिसलिर्निट!
जर्गंतङ इन्जेर पर्वक्तलिर वेह्तङ सम्दो नम्ले, कोरुम किय्वलिर्निट!
26 किरिस्तु इव सम्दो बोगे मासि, सासि-नेंडा लागर अनि स्वर्ग्नगा मय्मा वायय लागर” इन्जेर वूरकुन वेह्तोर.
27 अद आता पेजे तोले मोसेनल मोदोल कीसि, मेय्तुर सम्दिर पर्वक्तलिर तंवा बारेते दर्मा-ग्रंत्क्नगा बतल लिहि कीतेरो, वूरकुन अर्तम आनल पोडि कीसि वेह्तोर.
28 वूर सोंवल नाटुन करुम येव्तेर.
अस्के येसु उंडे गिर यात्रा किय्वन मोडि, मुने सोंले आतोर.
29 बति वूर, “दादा!
पोड्द सोन्जि, सिकटि आसेर मंता.
नेंड मा सङन आरम कीम” इन्जेर बेय जुल्मा कीतेर.
ते अदेन वोप्सि, वूर बरोबर रोतगा नेङ्तोर.
30-31 बस्केते जेवुन किय्ले उत्तोरो, अस्के उंदि सारि पिय्सि बगवंतन दनेवाद वेह्तोर.
अनि उरुसि, वूरकुन सीतोर.
ते बगवंतल वूरा नदुर कोलि कीता काड्कि, वोर येसु आंदुर इन्जेर वोड्कि पिय्तेर.
बति वोर मयड आतोर.
32 अस्के वूर, “हो करले!
सरिय वानेके, माकुन वोर दर्मा-ग्रंत्क्नगा लिहि कीतङ गोस्टिन पोडि कीसि वेह्नेके, उंडे जरसि केन्ज्तेके चोकोटोय बतलो इत्तप मावङ दिल्क्नगा लाग्ता सेलेय?
*” इन्जेर वोरोन वोरोर इत्तेर.
33 अनि अदे गट्कते तेच्चि येरुसलेम मल्सि सोत्तेर.
अगा अक्रा (11) जन्क सिस्यलिरकुन अनि मेय्तुर वूरकुन बेटे मातेर.
34 अनि, “हो!
पर्बु नेंड्तोर इंवल सतेम आंद.
सीमोन-पेतुरतुन गिर दिस्तोर” इन्जेर वूर अपोस्तुल्क वेह्तेर.
35 अस्के वीर इविर, तमा सरिय सोनेके, जर्ग्ता गट्नतुन अनि एंमायितगा सारि उरुस्नेके, तमा पर्बुन बहन वोड्कि पिय्तेर इंवल गोस्टितुन वूरकुन वेह्तेर.
सिस्यलिरकुन येसु पावे माय्वल
येसु पर्बु तंवुर सिस्यलिरकुन दिस्वल
36 अहन अव गट्नन बारेते वड्क्सेर मनेके, येसु वूर नड्डुम पावे मासि, “मीकुन सांति वायि!”
इन्जेर वेह्तोर.
37 बति वूर सम्दिर दड्कि तिन्जि, बूतुन सूड्तपिनय तरा तरा आतेर.
38 अस्के येसु वूर सङा, “मिरट बारि मीवङ दिल्क्नगा परेसन आसेर मंतिट?
नना नेंड्तोन अद गोस्टितुन बारि नम्सेर सेल्विट?
39 नावङ केयकुन अनि कालकुन सूडट.
ननय पर्बुना आंदुन.
नाकुन इट्सि, ननय वोना आंदुन इन्जेर करि किया वचो.
बारितेके नाकुन मत्तपिनय, मेंदोल अनि बोकङ बूतुन मनोङ” इन्जेर वेह्तोर.
40 अहन वेह्ता पेजे, तंवङ केयकुन अनि कालकुन वूरकुन तोह्तोर.
41 ते वूर गुल आसि, आनंद येत्तेर.
बति नम्ले तकपिका आसेरेन मत्तेर.
अदेन साटि येसु, “तिंले मिह्गा बतय मंतय?”
इन्जेर पूसि कीतोर.
42 ते वूर चोकोट बोड्स्ता उंदि मीन अंदुस्तेर.
43 अस्के येसु तान येच्चि, वूर मुनेने तितोर.
44 अनि वूर सङा, “मोसेना कानुंतगा, दुस्रुर पर्वक्तलिरङ ग्रंत्क्नगा अनि कीर्तन्क्नगा ना बारेते लिहि कीतङ सम्दो वचन्क बर्पुर जर्गंतङ इन्जि, मी सङा मनेकेन वेह्चि मत्तोन” इन्जेर वेह्तोर.
45 अनि अस्के दर्मा-ग्रंत्नङ वचन्क अर्तम कीनल, वूरकुन गियन सीतोर.
46 अनि वूर सङा, “‘किरिस्तु तप्वक दुक्सङ बोगे मासि, परन सियना अनि मूंद रोज्क्ने नेंडना.
47 अनि येरुसलेम मोदोल कीसि, सम्दिर कीतङ पापकुन कब्ले माय्वल अनि अवेना मापितुन बारेते वोना पोरोडा अदिकार्दे दुनियतुरकुन बोदा वेहना’ इन्जेर लिहि कीसि मंता.
48 इव सम्दोन मिरटे गवा मंतिट.
49 इचुला केन्जट!
ना बाबल वाग्दन सिय्वल बगवंतना आत्मतुन, मिह्गा रोहंतोन.
बति स्वर्गनल बगवंतना आत्मता सक्ति, मी पोरो रेयनल वेरि, मिरट येरुसलेम नगुडुन सुटि कीसि, असले सोन्मट” इन्जेर वेह्तोर.
येसु पर्बु तंवुर सिस्यलिरकुन दिस्वल (24:36-49)
येसु मल्सि स्वर्ग्नगा सोंवल
50 अहन वेह्वल आता पेजे, वूर सम्दिरकुन अगटल बेतनिया नार वेरि वोसि, तंवङ केय्क तह्चि, वूरकुन आसिर्वाद सीतोर.
51 अहन आसिर्वाद सीसेरेन, वूर्गटल अलग आसि, स्वर्ग्नेके पोरो ताच्चि सोत्तोर.
52 अस्के वूर येसुन पार्तना-विंति कीसि, वेले आनंद्ने येरुसलेम मल्सि सोत्तेर.
53 हर दिवोस वूर मंदिर्ता येरियतगा सोन्जि, बगवंतन डगुर-पान सीसेर मंदिर.
येसु मलसि स्वर्गनगा सोंवल (24:50-53)
येसुन बारेते करि कीका इनद्किते नी साटि कबुर