येसु नेंड्वल
28
1 w आरम्ना दिवोस\w* आता तेलरि आय्त्वरतुन नेटि, बय बय आनेके मग्दलेने नाट्ना मरियल अनि उंडे उंदि मरियल वीच्ना बुयरितगा सूड्ले सोत्तङ.
2 अस्के अचनक बेय डगुर बूकंप वाता.
अदे गट्कते स्वर्गनल बगवंतनोर दूतल बूड रेय्सि वातोर.
अनि अड्डम इर्ता बंडतुन बग्ला कूडुसि, तान पोरो उत्तोर.
3 वोर दूतल हाबडगा मिड्च्वडुन मोडि जगर्ने दिस्तोर.
वोनङ पाङुक बेय दव्रलिक मत्तङ.
4 अद वीचुन केप्वलिर सिपायिर वोन सूड्सि, बेय दड्कि तिन्जि, सातपिनय अर्सि मत्तेर.
5-6 ते वोर दूतल अव वेय्लोकुन सङा, “वेरिमट!
मोद्नगा टाङि कीसि जीवा येत्तेर वोर येसुन साटि, मिरट मह्क्सेर मंतिट इंवल नाकुन टावय.
वोर इगे सेलोर.
मोदोले मीकुन वोर वेह्ता तीर नेंड्तोर.
वरट!
पर्बुना कूरदुन इर्ता जागा सूडट.
7 अहन सूड्ता पेजे, वेय्ने सिस्यलिर्गा सोन्जि, ‘येसु सासि-नेंड्तोर.
मीकुन तेर मुने गलिलया येरियते सोन्जेर मंतोर.
मिरट अगा वोन सूडंतिट’ इन्जि वेहट.
इद गोस्टि नना मीकुन वेह्तोन” इन्जेर दूतल अवेकुन वेह्तोर.
8 ते अव वीच्ना बुयरितल वेरिसेर पेसिसि, बेय आनंद्ने सिस्यलिरकुन वेह्ले, विच्चेर सोत्तङ.
9 अचनक येसु अवेन बेटे मासि, “मीकुन चोकोट आयि” इन्जेर वेह्तोर.
ते अव येसुनङ काल्क कर्सि, पार्तना-विंति कीतङ.
10 अस्के येसु अवेन सङा, “मिरट वेरिमट!
सोन्जि नावुर तादल-तमुकुन सङा, ‘मिरट गलिलया येरियते सोंट.
अगा पर्बुन सूडंतिट’ इन्जि कबुर वेहट” इन्जेर वेह्तोर.
डगुक कटोडलिर बुका दोसि लबड वेहुस्वल
11 अहन अव वेय्लोक सोन्जेर मनेके, केप्वलिर्गटल कहितुर सिपायिर नगुडे सोन्जि, जर्ग्ता अद सम्दोतुन डगुक कटोडलिरकुन वेह्तेर.
12 ते वूर डगुक कटोडलिर, पेदोलकुन सङा मीरे मासि कुट्रते पिलन वाट्तेर.
अद बतल इत्तेके, सिपायिरकुन वेले बुका दोसि,
13 वूर सङा, “‘ममोट नरुम्सेर मनेके, वोनुर सिस्यलिर रात्ने वासि, वोना कूरदुन कल्सि वोतेर’ इन्जेर वेहट.
14 अनि इद कबुर गवर्नरतुन करे मातेके, मीकुन बतय जर्ग्वक्ने ममोट वोन सांति कींतोम” इन्जेर वेह्तेर.
15 अस्के वूर सिपायिर कोतना बुका तिन्जि, तमकुन वेह्ता तीर कीतेर.
इद लबड गोस्टि, नेट्क वेरि गिर यूदुलकुन नड्डुम पग्रे मासि मंता.
येसु तंवुर सिस्यलिरकुन दिस्वल
16 अद आता पेजे, वूर अक्रा जन्क सिस्यलिर येसु मोदोले वेह्चि मत्ता गलिलया येरियता गुटत पोरो सोत्तेर.
17 अगा येसुन सूड्सि, वोन पार्तना-विंति कीतेर.
बति वूर्गटल कहितुर, ‘करल वेरे मंदर कि?’
इन्जेर अनमिना आतेर.
18 अस्के येसु वूर करुम सोन्जि, “स्वर्ग्नगा अनि दर्तुरित पोरो नाकुन सम्दो अदिकार सीसि मंता.
19 अदेन साटि ना अदिकार्दे मिरट सोन्जि, सम्दो जातिनल सिस्यलिरकुन तयर कीम्ट.
अनि बाबोना, मरिना अनि पवित्रा आत्मता पोरोडे वूरकुन बाप्तिस्मा सीम्ट.
20 बव बव गोस्टिङ पिय्सि ताकना इन्जेर मीकुन आगे सीतोनो, अव सम्दोन पिय्सि ताकना इन्जेर वूरकुन करुसट.
इचुला!
नना दुनियता आक्रि गट्का वेरि, बस्केट मी सङन मंदंतोन इंवल हेतु इरट” इन्जेर वेह्तोर.