मत्तयि 27

यूदल तंवा तना सर्पासा वाट्सि साय्वल

(मार्क 15:1; लूका 23:1-2; योहन 18:28-32; अपो. का. 1:18-19)

1 बेय सक्रेन डगुक कटोडलिर, पेदोल्क सम्दिर मीरे मासि येसुना परन येत्ले निर्नय कीतेर.

2 अनि वोनङ केय्क दोह्‍चि, अद येरियतुन गवर्नर आय्वल पिलातुनगा वोसि हव्लि कीतेर.

3 अस्के वोन दोका सीसि पिय्सि सिय्वल यूदल, येसुन सिक्सा वाट्वल करि कीसि, वोना मंदे बेय कला कला आतोर.

ते वोर तना येत्तङ कूरतङ तीसा बिलन डगुक कटोडलिर्गा अनि पेदोल्क्नगा वोसि सीसेर,

4 “नना वोर बोलल माय्नन मीकुन हव्लि कीसि, पाप कीतोन” इन्जेर इत्तोर.

ते वूर, “अदेन बारेते ममोट पटि किय्वल जुरत सेले.

नीवा निमेय सूडा” इन्जेर जवब सीतेर.

5 अस्के यूदल अव कोतन मंदिरतगा पेकि कीसि, सोन्जि तंवा तना सर्पासा वाट्सि, जीवा सुटि कीतोर.

6 वूर डगुक कटोडलिर अव कूरतङ बिलङ पेर्सि, “इव कोतङ नेतुर तुह्‍चि, जीवा येत्ले सीतङ आंदुङ.

मंदिर्ता हुंडितगा इर्वल नायम आयो” इन्जेर इत्तेर.

7 अनि तम्वा तमा चर्चा कीसि, अव कोतने पर्देसिरकुन माति किय्ले, कुमना पोलम येतना इन्जेर निर्नय कीतेर.

8 अदेन साटि, नेंड वेरि गिर अदेन, “नेतुडा बोमि” इन्जेर केयंतेर.

9-10 इद तरिकते बगवंतल तोले इर्मिया पर्वक्तना केय्दे, “वूर तीसा कूरतङ बिलङ वोसि, इद वोना दरा आंद इन्जि, कहितुर इज्रयेल पर्जा निर्नय कीतेर.

अनि बगवंतल हुकुम सीतप वूर अव बिलने कुमना पोलम येत्तेर”⁺ इन्जेर लिहि कियुस्ता वचन पूरे माता.

पिलातुन मुने येसु निल्वल

(मार्क 15:2-5; लूका 23:3-5; योहन 18:33-38)

11 अद आता पेजे, येसु रोमा सर्कार्तोर गवर्नर पिलातुन मुने निल्तोर.

अस्के वोर अदिकारि, “निमे यूदुल्क्नोर राजनि आंदि कि?”

इन्जेर पूसि कीतोर.

ते येसु, “निम इत्तपे” इन्जेर जवब सीतोर.

12 डगुक कटोडलिर, पेदोल्क येसुन पोरो कसुक वाट्सेर मत्तेर.

बति येसु वूरकुन मल्सि जवब सिय्मकि.

13 ते पिलातु, “वूर नी पोरो बचोङ वेले कसुक वाट्सेर मंतेरेय सूडा.

निमे केन्चेर सेल्वि कि?”

इन्जेर पूसि कीतोर.

14 बति येसु अवेन बारेते जवब सिय्मकि.

ते वोर गवर्नर बेय गुल आतोर.

येसुन मरंता सिक्सा वाट्वल

(मार्क 15:6-15; लूका 23:13-25; योहन 18:39–19:16)

15 हर पस्का सड जर्ग्नेके जेलतगा अर्सि मंवलिर्गटल पर्जा सुटि कीम्ट इन्जेर कोर्तोन, वोर गवर्नर सुटि किय्वल रिवज ताक्सेर मत्ता.

16 अद गट्कते बरबल इंवल वेले गल्तिङ कीसि पोरोल सोत्तोर वोर, जेल्दगा कोंडे मासि मत्तोर.

17-18 वूर कपट्ने येसुन तंवा केय्दे हव्लि कीतेर इंवल पिलातु करि कीतोर.

अदेन साटि पर्जा सम्दिर मीरे मासि वाता पेजे, पिलातु वूरकुन, “नना जेल्दल बोन सुटि कियना इंतिट?

बरबन कि सेलेते, किरिस्तु इंवल येसुन?”

इन्जेर पूसि कीतोर.

19 अहन वोर गवर्नर नाय्दा तस्वा किय्वल राजा-गादितगा उच्चि मनेके, वोना वेय्लो, “वेर नियत्नोना जोलित सोन्मा.

सोत्ता रातुन वोन बारेते सप्ना दिस्ता.

अद सप्नतगा नना वेले दुक्सा बोगे मातोन” इन्जेर कबुर सारि कीता.

20 बति अद वकत्ने बरबन सुटि कियना, येसुन जकना इन्जेर कोरना इन्जि डगुक कटोडलिर अनि पेदोल्क पर्जतुन हक्लि कीतेर.

21 तेर बति पिलातु, “वीर इविर्गटल नना बोन सुटि कियना इंतिट?”

इन्जेर पर्जतुन पूसि कीतोर.

ते वूर, “बरबन” इन्जेर किलितेर.

22 ते पिलातु, “अहन बेहेते किरिस्तु इंवल येसुन बतल कियना?”

इन्जेर पूसि कीतोर.

अस्के वूर सम्दिर, “मोद्नगा मोलने पासि जकना” इन्जेर जवब सीतेर.

23 बति पिलातु, “बारि?

वेर बतल तप कीतोर?”

इन्जेर पूसि कीतोर.

बति वूर, “मोद्नगा मोलने पासि जकनये” इन्जेर उंडे जोर्ते हंकत कीसेर मत्तेर.

24 ते पिलातु तंवा कोसिदुन हिंदल, उंडे अदिक गड-बड आसेर मंता बति, पाय्दा बतय सेले इन्जेर करि कीतोर.

अनि येर तरुसि, पर्जतुन मुने केय्क नोर्सि, “वेर नियत्नोना मरंतुन बारेते नना जिमेदारना आयोन.

मिरटे जिमेदारलिर आंदिट” इन्जेर वेह्‍तोर.

25 ते वूर पर्जा सम्दिर, “वोना मरंता जिमा मा पोरो अनि मा मरि-मियड पोरो मनि” इन्जेर जवब सीतेर.

26 अस्के पिलातु, वूर कोर्ता तीर बरबन सुटि कियुसि, येसुन चाटल्क्ने पायुसि, मोद्नगा मोलने पासि जक्ले, हव्लि कीतोर.

सिपायिर येसुन चेडि किय्वल

(मार्क 15:16-20; योहन 19:2-3)

27 ते पिलातुनुर सिपायिर येसुन गवर्नर्ता महलतगा वोतेर.

अनि सिपायिर तम्वा दलम्नुर सम्दिरकुन वोन्गा मीरि कीतेर.

28 येसुना पाङुड तेंड्सि, राजलिर पोंड्वल रगल वाले लाम पाङुड पोंडुस्तेर.

29 अद आता पेजे, चह्‍क्ना कांदते उंदि किरिट सरिसि, वोना तलत पोरो केरुस्तेर.

अनि तिना केय्दगा उंदि बेड्डे सीतेर.

अनि वोन मुने मुर-टोङ्रङ कोट्सि, “यूदुल्क्नोर राजा!

नीकुन जेय जेय कार” इन्जेर चेडि कीतेर.

30 अहन कीता पेजे, वोन पोरो वूर सिपायिर उस्क्तेर अनि वोना केय्दल बेड्डेतुन येच्चि, तलत पोरो पातेर.

31 अहन वोन चेडि कीता पेजे, वोन पोंडुस्ता पाङुडुन तेंड्सि, वोना पाङुडुन वोन पोंडुसीतेर.

अद आता पेजे, मोद्नगा टाङि किय्ले, वोन पिय्सि बह्‍रि वोतेर.

येसुन मोद्नगा टाङि किय्वल

(मार्क 15:21-32; लूका 23:26-39; योहन 19:17-19)

32 अहन सिपायिर वोन बह्‍रि वोसेर मनेकेन, कुरेनि चहर्तोर सीमोन इंवल वूरकुन दिस्तोर.

वोन पोरो येसु कान्चि मंवल मोदुन जुल्मते कान्जुसीतेर.

33 वूर ‘गोल्गोत’ इंवल जागतगा येव्तेर.

‘गोल्गोत’ इत्तेके तलदा टोक्रे इन्जेर अर्तम.

34 अगा केय्मुल वालेतुन मिस्डि कीता आङुर रसतुन उंले वोन सीतेर.

बति वोर ताना सवद सूड्सि, उंले वोप्मकि.

35 वूर येसुन मोद्नगा मोलने पाता पेजे, वोनङ पाङुकुन साटि बोन बद ईसा वांता इन्जेर चिटिङ वाट्सि, तूस्तेर.

36 अद आता पेजे वूर सिपायिर वोन केप्सेर अगन उच्चि मत्तेर.

37 “वेर येसु यूदुल्क्नोर राजल आंदुर” इन्जेर वोन पोरो वाड्ता कसुडुन उंदि चेकतगा लिहि कीसि येसुना तलत पोरो मोद्नगा टाङि कीतेर.

38 अद आता पेजे, वोन बरोबर इविर कलिरकुन मोलने पासि टाङि किय्ले तत्तेर.

वूर्गटल वोरोन येसुना डेमा बग्ला, उंडे वोरोन तिना बग्ला टाङि कीतेर.

39-40 अस्के अद सरिय सोन्जेर-वासेर मंवलिर तम्वङ तलङ हालि कीसेर, “बगवंतना मंदिरतुन उल्टि कीसि मूंद रोज्क्ने दोह्‍वनि, नीवा निमे बचि कीम.

करल बगवंतनोर मरिनि मंद्किते, नीकुन टाङि कीता मोदनल रेय्सि वरा” इन्जेर येसुना हिजत वोतेर.

41-42 अदे तीर्दे डगुक कटोडलिर, सास्तिरिर अनि पेदोल्क गिर, “वेर दुस्रुरकुन बचि कींतोर बति, तंवा तना बचि किया परोर.

इज्रयेल पर्जतुन वेर राजल आंदुर बेरे, इंके इद मोदनल रेय्सि वायिर.

अस्के वेन्गा बरोसा इरंतोम.

43 एहे!

बगवंतनगा वेर बरोसा इर्तोर अले.

‘नना बगवंतनोर मरिना आंदुन गिर’ इन्जेर वेह्‍तोर अले.

अदेन साटि बगवंतन पसंद मत्तेके, वेन इंके बचि कियिर” इन्जेर चेडि कीतेर.

44 वोन बरोबर मोद्क्नगा टाङे मातुर कलिर गिर अदे तीर्दे चेडि कीतेर.

येसुना मरन आय्वल

(मार्क 15:33-41; लूका 23:44-49; योहन 19:28-30)

45 अंटित दुपरि बारा (12) नेक्नेकेडल्ते मूंद (3) नेकनल वेरि अद देस पूरो सिम्ने सिकटि कप्ता.

46 लग-बग मूंद नेक्नेके येसु, “येलि!

येलि!

लामा सबक्तनि?”

इन्जेर बेय जोर्ते किलितोर.

इदेना अर्तम, “ना बगवंता!

ना बगवंता!

नाकुन बारि सुटि कीति?”

सम्दिरा पापुन साटि येसु तंवा जीवा सिय्वल

47 अगा निल्सि मंवलिर कहितुर अद केन्चि, “वोर येलिया पर्वक्तन केय्सेर मंतोर” इन्जेर इत्तेर.

48 येंटने वोरोर विच्चेर सोन्जि, दूदि तचि, पुलिता आङुर्क्ना रसतगा मुडुस्तोर.

अनि बेड्डेतगा टटुसि उंडन साटि येसुना तोड्दगा अंदुस्तोर.

49 बति मेय्तुर, “आगट!

वोन बचि किय्ले, येलियल वांतोर बतलो सूड्कट” इन्जेर इत्तेर.

50 येसु उंडे उंदि जोका बेय जोर्ते किलंडि वाट्सि, तंवा परन सुटि कीतोर.

51 अस्केने येरुसलेम्नगा मंवल बगवंतना मंदिर्ता पड्दा पोरोडल्ते बूड वेरि, सर्सि रंड टुक्डेङ आता.

बूकंप वाता अनि पेर्सङ बंडङ पय्तङ.

52 वीच्क उग्डो आतङ.

बगवंतनुर बक्तलिर वेलेटिर नेंड्तेर.

53 अनि वूर अव वीच्कनल बह्‍रि वासि, येसु नेंड्ता पेजे येरुसलेम^* नगुडे सोत्तेर.

अनि अगा वेलेटिर लोकुरकुन वूर दिस्तेर.

54 नूर जन्क सिपायिरोर कमंडर अनि वोन बरोबर मंवलिर सिपायिर, वाता बूकंपुन अनि जर्ग्तङ अवेन सूड्सि, दड्कि तित्तेर.

अनि, “वेर करलेन बगवंतनोर मरि आंदुर” इन्जेर इत्तेर.

55 येसुन मदत किय्ले, वोन पेजेय गलिलया येरियतल वातङ अव वेले जनिक वेय्लोक अगा लङ निल्सि सूड्सेर मत्तङ.

56 अवेनगा मग्दलेने नाट्ना मरियल, याकोब अनि योसेप्ना अवल आय्वल मरियल, जेबेदयिनुर मर्क्ना अवल मत्ता.

येसुना कूरदुन माति किय्वल

(मार्क 15:42-47; लूका 23:50-56; योहन 19:38-42)

57 पोड्द सोंदन मुने,^* अरिमतया चहर्तोर योसेप इंवल दनेवंतल वातोर.

वेर गिर येसुनोर सिस्यल आसि मत्तोर.

58 अनि वेर, पिलातुनगा सोन्जि, “येसुना कूरदुन वोया सीम” इन्जेर कोर्तोर.

अस्के पिलातु वोन हव्लि कियना इन्जेर आगे सीतोर.

59 ते योसेप अद कूरदुन रेह्‍चि, बारिता पूना कादि कपिडे गूंडि कीतोर.

60 तना नार्युसीता पेर्सा बंडता पूना वीच्ना बुयरितगा अद कूरदुन इर्सि, अद बुयरितुन अड्डम पेर्सा बंडा कूडुसि सोडितोर.

61 मग्दलेने नाट्ना मरियल, उंडे उंदि मरियल अद बुयरितुन मुने उच्चि मत्तङ.

अद वीचुन केप्सेर मंवल

62 इमुन नेटि आरम येत्वल दिवोस आता काड्कि, वूर डगुक कटोडलिर अनि परिसयुल्क मीरे मासि गवर्नर पिलातुनगा सोत्तेर.

63 अनि वूर, “साब!

वोर पसि किय्वल पिसि मनेके, ‘नना मूंद रोज्क्ने नेंडंतोन’ इन्जेर वेह्‍ता अद गोस्टि माकुन हेतु मंता.

64 अदेन साटि साब, मूंद रोज्क आनल वेरि अद वीच्ना बुयरितुन चोकोट केपन साटि हुकुम सीम.

सेलेते वोनुर सिस्यलिर वोना कूरदुन कल्सि वोसि, सासि-नेंड्तोर इन्जेर पर्जतुन वेहनिर.

अस्के मोदोल पसे माततुन तेर आक्रिता पसे माय्वल वेले करब कींता” इन्जेर वेह्‍तेर.

65 ते पिलातु, “सिपायिरकुन वोसि, मी सङा आता तीर बेय चोकोट केप्वल जिमा मी पोरो मंता” इन्जेर वेह्‍तोर.

66 अस्के वूर सोन्जि, बुयरित अड्डम कूडुस्ता बंडतगा मोर वाट्तेर अनि वीचुन चोकोटे केप्ले सिपायिरकुन इर्तेर.

सिपायिर येसुना कूर इर्ता बुयरितुन केप्वल