मत्तयि 26

येसुन पिय्ले कपट्ने पिलन वाट्वल

(मार्क 14:1-2; लूका 22:1-2; योहन 11:45-53)

1 येसु तना वेह्‍वल सम्दो मह्‍चि, तंवुर सिस्यलिर सङा,

2 “रंड रोज्क्ने पस्का सड^* वाय्वल मंता इंवल मीकुन टावा.

अद गट्कते स्वर्ग्नोर माय्नन, वोनुर दुस्मन-दार्क मोद्नगा टाङि कीसि, जीवा येतंतेर” इन्जेर वेह्‍तोर.

3 अद गट्कते डगुक कटोडलिर अनि पेदोल्क, कयपा इंवल पेर्सोर कटोडना महलतगा मीरे मातेर.

4 अनि बोने करे माय्वक येसुन बहन पिय्सि जकुसना इन्जेर कपट्ने पिलन वाट्तेर.

5 बति वूर, “इद सड जर्ग्सेर मनेके वोन पिय्तेके, पर्जत नड्डुम गड-बड आयर” इन्जेर इत्तेर.

बेतनिया इंवल नाटे येसुन सेंट सोक्वल

(मार्क 14:3-9; योहन 12:1-8)

6-7 बेतनिया इंवल नाटे पेर्सा नोपिते मन्जि, चोकोट आतोर वोर सीमोंता, रोन येसु मत्तोर.

येसु तिंदन साटि उच्चि मनेके, उंदि वेय्लो नारिता बंडता कोपतगा गमा गमा गाडि सिय्वल वेले मह्‍ग्ना सेंट पिय्सि रोत रोपो वाता.

अनि येसुना तलत पोरो वेडिता.

8-9 ते अद सूड्सि सिस्यलिरकुन सोङ वाता.

ते वूर, “अरेरे!

वटि आगयेन सेंटुन बारि करब किय्वल?

अद सेंटुन वेले दरतुन वोम्सि, कोतन गरिब लोकुरकुन सिया वचोकि” इन्जेर इत्तेर.

10 ते येसु इद गोस्टि करि कीसि, “तान बारि अहन इंतिट?

अद वेय्लो चोकोट्नय काम कीता.

11 गरिब लोकुर मी नड्डुम बस्केट गिर मंदंतेर.

बति नना मी नड्डुम बस्केट मेंदोडा रूप्ने मनोन.

12 अद वेय्लो इद सेंट ना मेंदोडगा वेडिसि, नावा कूरदुन वीच्नगा माति किय्ले तयर कीता.

13 इद चोकोट्ना कबुर परिपन्चम्नगा बगा-बगते पचर आंतयो, अगा इद वेय्लोन अनि इद वेय्लो कीता कामुन हेतु कींतेर.

इद सतेम आंद” इन्जेर इत्तोर.

येसुन दोका सिय्ले इस्करियोत नाट्नोर यूदल वोप्वल

(मार्क 14:10-11; लूका 22:3-6)

14 अद आता पेजे, बारा जन्क सिस्यलिर्गटल वोरोर इस्करियोत नाट्नोर यूदल डगुक कटोडलिर्गा सोत्तोर.

15 अनि वूरकुन, “नना मीकुन येसुन पिय्सि सीकते, नाकुन बतल सींतिट?”

इन्जेर पूसि कीतोर.

ते वूर कूरतङ तीसा (30) बिलङ कह्‍चि सीतेर.

16 अस्केडल वोर यूदल, येसुन वूरा केय्दे पिय्सि सिय्ले, मोका सूड्सेर मत्तोर.

येसुन सङा आक्रिता रात्ना जेवुन

(मार्क 14:12-21; लूका 22:7-14, 21-23; योहन 13:21-30)

17 तातो पिंडिते सारिङ सुर्सि तिंवल सड वाता.

अद सड्दा मोदोडा दिवोसुन नेटि सिस्यलिर येसुनगा वासि, “पस्का जेवुंतुन^* बगा तयर कियना इंति?”

इन्जेर पूसि कीतेर.

18 ते येसु, “नगुडे मंवल पलना माय्ननगा मिरट सोंट.

अनि वोन सङा, ‘गुरुजिना वकत करुम वाता.

वोर तंवुर सिस्यलिर सङा मीरे मासि, पस्का जेवुन नीवा रोन कियना इंतोर’ इन्जि वोन वेहट” इन्जेर तंवुर सिस्यलिरकुन वेह्‍तोर.

19 ते सिस्यलिर येसु वेह्‍ता तीर, पस्का जेवुन तयर कीतेर.

20 अंटित पोद्रेक्ना येलते येसु तंवुर बारा जन्क सिस्यलिर सङा अगा सोन्जि, जेवुन किय्ले उत्तोर.

21 अहन वूर जेवुन कीसेर मनेके, “मिह्‍गटल वोरोर नाकुन दोका सींतोर.

इद सतेम आंद” इन्जेर येसु वेह्‍तोर.

22 अस्के वूरकुन बेय दुक्सा लाग्ता.

ते वूर्गटल हर वोरोर येसुन सङा, “नना कि बतल पर्बु?”

इन्जेर पूसि कीतेर.

23 अस्के येसु जवब सीसेर, “ना सङा बोर्ते इद कोजतगा केय दोसंतोरो, वोरे नाकुन दोका सिय्वल आंदुर.

24 स्वर्ग्नोर माय्नन बारेते दर्मा-ग्रंत्नगा लिहि कीता तीर वोर परन सुटि कींतोर.

बति वोन दोका सिय्वन वेले दुक्सा वांता.

आतोना जल्मा आय्वक मन्मड इत्तेके चोकोट मंदु” इन्जेर वेह्‍तोर.

25 अस्के दोका सिय्वल यूदल, “गुरुजि!

नना कि बतल?”

इन्जेर पूसि कीतोर.

ते येसु, “हो!

निमे इत्तपे” इन्जेर वेह्‍तोर.

येसु सारितुन अनि आङुर रसतुन बारेते वेह्‍वल

(मार्क 14:22-26; लूका 22:15-20; 1वा कोरंति 11:23-25)

26 वूर जेवुन कीसेर मनेके, येसु उंदि सारि पिय्सि, बगवंतन दनेवाद वेह्‍तोर.

अनि तान उरुसि, वूर सिस्यलिर्गा सीसेर, “इदेन नावा मेंदोल इन्जि तिंट” इन्जेर वेह्‍तोर.

27 अनि आङुर रसता चंबुतुन पिय्सि, बगवंतन दनेवाद वेह्‍तोर.

अनि अदेन वूर्गा सीसेर, “इद रसतुन उंट.

28 बगवंतन अनि पर्जत नड्डुम इद नावा नेतुर पूना नियम आसि मंदंता.

बद इत्तेके, नावा नना बलिदान सिय्वल नेतुडुन हिंदल वेलेटिरा पाप मापि आंता.

29 ना बाबोना राज्नगा मी बरोबर पूना आङुर रसा उंवल दिवोस वेरि, इङेडल अदेन उंनोन इन्जि मी सङा वेह्‍चेर मंतोन” इन्जेर इत्तोर.

30 अद आता पेजे वूर कीर्तन वार्सि, ओलिवा मरक्ना गुटत पोरो सोत्तेर.

पेतुरु लबड वेह्‍वडुन बारेते येसु वेह्‍वल

(मार्क 14:27-31; लूका 22:31-34; योहन 13:36-38)

31 अस्के येसु वूर सङा, “नेटा रातुने नावा गोस्टितुन हिंदल मिरट सम्दिर नाकुन सुटि कीसि परर आंतिट.

बारितेके, ‘नना गोरेङ गाय्किन जकंतोन.

अस्के अव गोरेना मंदा सम्दो बुज्डे मासि बेंदङ हके दांतङ’⁺ इन्जेर लिहि कीसि मंता.

32 बति बगवंतल नाकुन नेंडुस्ता पेजे, मीकुन तेर मुने नना गलिलया येरियते दांतोन” इन्जेर वेह्‍तोर.

33 ते पेतुरु, “सम्दिर परर आनिर बति, नना नीकुन बस्केन सुटि कीसि सोनोन” इन्जेर इत्तोर.

34-35 अस्के येसु वोन सूड्सि, “ना बारेते निमे, ‘वोर बोर आंदुरो टावा सेले’ इन्जेर, मूंद जोकङ लबड वेहा बीगर, नेटा रातुन असले गोग्डि कूसो.

इद सतेम आंद” इन्जेर वोन इत्तोर.

बति पेतुरु, “नना नी बरोबर उंदि मोका परन सुटि किय्वल गट्का वातेके, सुटि कीका बति असले अहन वेहोन” इन्जेर वेह्‍तोर.

ते मेय्तुर सम्दिर सिस्यलिर गिर येसुन अदे तीर्दे वेह्‍तेर.

गेत्सेमने वाडितगा येसु पार्तना किय्वल

(मार्क 14:32-42; लूका 22:39-46)

36 अद आता पेजे, येसु कड्मतुर सिस्यलिर सङा गेत्सेमने इंवल वाडितगा सोत्तोर.

अनि वूर सङा, “नना अगा सोन्जि पार्तना कीसि वानल मिरट इगे उदट” इन्जेर वेह्‍तोर.

37 अनि तंवा सङा पेतुरतुन अनि जेबेदयिनुर इविर मर्क आय्वलिर याकोबुन अनि योहंतुन वोतोर.

येसु तंवा मंदगा बेय दुक्सा अनि पिकर किय्वल सुरु कीतोर.

38 अनि वूर सङा, “नावा परन दांता इत्तपिनय नाकुन बेय दुक्सा अनि पिकर लाग्सेर मंता.

मिरट इगे आगट अनि ना बरोबर चेतो मंट” इन्जेर वोर वेह्‍तोर.

39 वूर्गटल जरसि लक सोन्जि, मुर-टोङ्रङ कोट्सि, “ना बाबा!

निह्‍गा उंडे दुस्रो सरि बदे मंदर्ते, इद दुक्सते निन्चि मंवल कोजतुन नह्‍गटल तेंड्सि वाटा.

नावा इस्टम्ने आयो बति, नीवा पसंद्नेन जर्गुसा” इन्जेर पार्तना कीतोर.

40 अनि मल्सि वासि सूड्तेके, वूर सिस्यलिर नरुम्सेर दिस्तेर.

ते वोर पेतुरतुन सङा, “उंदि गंटमेन गिर ना बरोबर चेतो मंदा पर्विय?

41 कटिंता परिक्सा वानेके, तान्गा कोंडे माय्वक मंले बगवंतन दिहंते पार्तना कीम.

आत्मा तयर मंता बति, मेंदोडगन जिगि सेले” इन्जेर इत्तोर.

येसु तंवोर बाबोन पार्तना किय्वल

42 अनि उंडे उंदि जोका मल्सि सोन्जि, “ना बाबा!

दुक्सते निन्चि मंवल इद कोजतगा मंवडुन नना उंडा बीगर आयो इंद्किते, नीवा इचा तीरे जर्गि” इन्जेर पार्तना कीतोर.

43 अनि मल्सि वासि सूड्तेके, वूर उंडे गिर नरुम्सेरेन दिस्तेर.

वूर बेय जप्ने अर्सि जोपुन आपुसिया पर्मकि.

44 ते येसु वूरकुन सुटि कीसि सोन्जि, बगवंतन मूडवा जोका गिर, अह्‍ने पार्तना कीतोर.

45 अद आता पेजे सिस्यलिर्गा तिरिसि वासि, “मिरट उंडे गिर नरुम्सेर आरम येच्चेर मंतिट कि?

सूडट!

स्वर्ग्नोर माय्नन पापिरा केय्दे हव्लि किय्वल गट्का वाता.

46 तेदट, देट दाकट!

इचुला नाकुन दोका सिय्वल वासेर मंतोर” इन्जेर वूरकुन वेह्‍तोर.

येसुन पिय्सि वोय्वल

(मार्क 14:43-50; लूका 22:47-53; योहन 18:3-12)

47 येसु अहन वड्क्सेर मनेकेन, बारा जन्क सिस्यलिर्गटल वोरोर सिस्यल आय्वल यूदल वातोर.

डगुक कटोडलिर अनि पेदोल्क सारि कीतुर वूर पर्जता डगुर गुब्डा वोन पेजेय वातेर.

वूरङ केय्क्नगा तल्वर्क अनि डुड्डुङ मत्तङ.

48 वोर दोका सिय्वल, “नना सोन्जि बोंते मुका बुरंतोनो, वोन मिरट पियट” इन्जेर मुनेने अदेन बारेते वेह्‍चि, पिलंते वातोर.

49-50 वोर सड्कल येसुनगा वासि, “गुरुजि!

नीकुन दंडोस” इन्जेर मुका बुर्तोर.

अस्के येसु, “ना सोप्ता, निमे बतल कियना इंतियो, अदेन सप्ने कीम” इन्जेर वेह्‍तोर.

अस्के पिय्ले वातुर वूर मुने वासि, येसुन पोरो मुच्लि अर्सि गटा-गिटा पिय्तेर.

51 बति अस्केने येसुन सङा मंवलिर्गटल वोरोर तंवा लाम रूसि तेंड्सि पेर्सोर कटोडनोर सेव्कना केवितुन तिवुस्तोर.

52 ते येसु, “नीवा रूसि निमे टोप्रतगा इरा.

रूसि पिय्सि मंवल रूसितेन सांतोर.

53 नना नावोर बाबोन मदत कीम इन्जेर पूसि किया परोन इंति कि बतल?

नना पूसि कीतेके येंटने ना बाबो बारा दलमकुन तेर^* अदिक दूतलिरकुन सारि कींतोर.

54 बति अहन नना कीकते, ‘इहिन जर्गना’ इंवल बगवंतना वचन बहन पूरे मायर?”

इन्जेर वेह्‍तोर.

55 अद गट्कते येसु मांदितुन सूड्सि, “कले-कङ्रन पिय्ले वातपिनय तल्वर्क अनि डुड्डुङ पिय्सि बारि वातिट?

नना हर दिवोस मंदिर्तगा उच्चि बोदा वेह्‍नेके, बारि नाकुन पिय्मकि?

56 बति पर्वक्तलिर दर्मा-ग्रंत्नगा लिहि कीतङ वचन्क पूरे माय्लेने, इद तीर्दे जर्ग्ता” इन्जेर वेह्‍तोर.

अस्के सिस्यलिर सम्दिर सुटि कीसि परर आतेर.

येसुन जुल्मते पिय्सि वोय्वल

येसु संहेद्रिन इंवल राय्सेंटरतुन मुने निल्वल

(मार्क 14:53-65; लूका 22:54-55, 63-71; योहन 18:13-14, 19-24)

57 वूर बल्मिते येसुन पिय्सि पेर्सोर कटोडल कयपना रोन वोतेर.

अगा सास्तिरिर अनि पेदोल्क मीरे मासि मत्तेर.

58 बति पेतुरु, येसुनल लक मन्जेर पेजेय पेजेय पेर्सोर कटोडना आव्रतगा वातोर.

अनि अगा नेङ्सि, येसुन बतल बहन जर्ग्मड मंदर बेहे इन्जेर सूड्ले, सिपायिर सङा उत्तोर.

59 रोपो डगुक कटोडलिर अनि संहेद्रिंतुर मेय्तुर अदिकारिर सम्दिर येसुन जक्ले, लबड गवा वेह्‍वलिरकुन सूड्सेर मत्तेर.

60 वेलेटिर लोकुर लबड गवा वेहन साटि मुने वातेर.

बति येसुना जीवा येतनल उंदि गिर कारन वूरकुन पुट्मकि.

आक्रित इविर माय्नलिर वासि, इद तीर्दे वेह्‍तेर:

61 “वेर मायनल, बगवंतना मंदिरतुन उल्टि कीसि, तिरिसि मूंद रोज्क्ने दोहा परंतोन इत्तोर” इन्जेर वेह्‍तेर.

62 बगवंतनोर पेर्सोर कटोडल तेच्चि येसुन सङा, “नी पोरो इव कसुक वाट्सेर मंतेर.

बारि बतय जवब सीसेर सेल्वि?”

इन्जेर पूसि कीतोर.

63 बति येसु दब मत्तोर.

ते वोर पेर्सोर कटोडल, “निमे बगवंतनोर मरिनि आय्वल बचि किय्वल किरिस्तुनि^* आंदि कि?

जीवा वाले बगवंतन पोरोडे वोट वाट्सि, माकुन वेहा” इन्जेर पूसि कीतोर.

64 ते येसु, “हो!

ननय आंदुन.

इङेडल सर्वा सक्ति वाले बगवंतना तिना बग्ला उच्चि मंवल स्वर्ग्नोर मायनल, हाबडङ टेपन पोरो वाय्वल तप्वक सूडंतिट” इन्जेर जवब सीतोर.

65 अद केन्चि बगवंतनोर पेर्सोर कटोडल सोङ्ने तंवङ कप्डिङ सरुसि, “वेर मायनल बगवंतन रेह्‍चि वड्क्सेर मंतोर.

माक उंडे दुस्रोक बव गवङ पह्‍जे?

सूडट!

वोर इत्ता अदेन मरटे कुद केन्ज्तट.

66 ते इंके मिरट बतल निर्नय येत्तिट?”

इन्जेर संहेद्रिंतुर अदिकारिरकुन पूसि कीतोर.

ते वूर, “वोन मरंता सिक्सा वाटना इन्जि निर्नय येत्तोम” इन्जेर वेह्‍तेर.

67 वूर्गटल कहितुर वोना मोकोम्नगा उस्क्सि, उंडे कहितुर कोर्विनगा ताप्डङ पासि,

68 “ये किरिस्तु!

नीकुन बोर पातेरो पुंदा!”

इन्जेर चेडि कीतेर.

येसु बोर आंदुरेय नाकुन टावा सेले इन्जेर पेतुरु वेह्‍वल

(मार्क 14:66-72; लूका 22:56-62; योहन 18:15-18, 25-27)

69 पेतुरु अगा वोर कटोडना आव्रतगा उच्चि मनेके, काम किय्वल पेडि वोन करुम वासि, “निमे गिर गलिलयतोर येसुन सङा मत्तोनिय आंदि” इन्जेर इत्ता.

70 बति वोर सम्दिर मुने अद गोस्टितुन वोप्वक्ने, “निमे बततुन बारेते वड्कंतियो नाकुन टावा सेले” इन्जेर इत्तोर.

71 अद आता पेजे, अगटल तेच्चि वोर पाटकुन करुम सोत्तोर.

ते वोन उंडे उंदि काम किय्वल पेडि सूड्सि, “वेर मायनल नजरेत्नोर येसुन सङा मत्तोर वोरे आंदुर” इन्जेर अगा मंवलिर सङा वेह्‍ता.

72 बति इद जोका गिर वोर पेतुरु वोप्वक्ने, बगवंतना पोरोल मुट्सि, “वोर बोर आंदुरोय करलेन नाकुन टावा सेले” इन्जेर वेह्‍तोर.

73 जुलुक आता पेजे अगा निल्सि मंवलिर पेतुरतगा वासि, “करलेन निमे वूर्गटल वोरोनि आंदि.

नीवा वड्क्वल तरिकये नी बारेते गवा वेह्‍चेर मंता” इन्जेर इत्तेर.

74 अस्के पेतुरु वोट वाड्सेर तंवा तनकुन सापेना सीसेर, “वोर माय्नन बारेते नाकुन टावा सेले” इन्जेर वेह्‍तोर.

अस्के येंटने गोग्डि कूस्ता.

75 अद केन्चि, “गोग्डि कूस्वक मुनेने नना बोना आंदुनोय टावा सेले इन्जि, मूंद जोकङ लबड वड्कंति” इन्जेर येसु वेह्‍ता अद गोस्टि, पेतुरतुन हेतु वाता.

ते वोर चुक चुके मासेर आव्रतल बह्‍रि सोन्जि बेय दुक्सते आड्तोर.