बेतनियतगा येसुन पोरो सेंट वेडिवल
12
1 अदेन साटि, सासि-नेंड्तोर लाजर्ता नार बेतनियतगा पस्का सडदुन सारुङ रोज्क मुनेने येसु वातोर.
2 अगा वोन साटि जेवुन तयर कीतेर.
मार्तल सर्बरेय कीता.
अनि लाजर गिर जेवुन तिंवलिर बरोबर उत्तोर.
3 अस्के मरियल बेय बारिता अनि वेले मह्ग्ना लग-बग अर्दो लीटर सेंट* पिय्सि वाता अनि येसुनङ कालकुन पोरो वेडिसि, तंवङ केल्क्ने उसुम्ता.
अद सेंट्ना गाडि पूरो रोन गम्स्ता.
4 अस्के सिस्यलिर्गटल वोरोर इत्तेके, येसुन दोका सिय्वल इस्करियोत नाट्नोर यूदल,
5 “अरेरे!
इद सेंटुन मूंद नुह्क कूरतङ बिलन* वोम्सि, गरिबुन बारि सिय्मकि?”
इन्जेर तान इत्तोर.
6 वोर गरिबुन मदत कियना इंवल काड्जिते अहन इन्मकि.
बति वोना कले बुदितुन हिंदले अनि कोतना तेय्ला वोन्गन मंवल कीनेके, अगटङ कोतङ कल्सेर मत्ता काड्किने अहन इत्तोर.
7 ते येसु, “अद नावा मेंदोडुन माति किय्वल दिवोसुन साटि सेंटुन वोजि कीसि इर्सि मत्ता.
8 गरिब लोकुर बस्केट मी नड्डुम मंदंतेर.
बति नना बस्केट मेंदोडा रूप्ने मी नड्डुम मनोन” इन्जेर वेह्तोर.
9 अदे वकत्ने, येसु अगा मंतोर इन्जेर करि कीसि, बेय वेलेटिर यूदुल्क, येसुने आय्वा, येसु नेंडुस्तोर वोर लाजरतुन गिर सूड्ले वातेर.
10-11 लाजरतुन हिंदल, यूदुल्क्नगटल वेलेटिर लोकुर येसुन पोरो बरोसा इर्तेर.
अदेन साटि, डगुक कटोडलिर लाजरतुन गिर जव्कना इन्जेर पिलन वाड्तेर.
येसु जेय जेय कार येच्चेर येरुसलेम नेङ्वल
12-13 सडदुन साटि वाता, उंदि डगुर गुब्डतुर, येसु येरुसलेम वांतोर इंवल केन्चि, सींदि मरक्नङ कांदङ पिय्सि वोन मुनेत्क सोत्तेर.
अहन सोन्जि, “जेय जेय कार!
* पर्बुना अदिकार्दे* वाय्वल इज्रयेल पर्जतोर राजने बगवंतल आसिर्वाद सियिर” इन्जेर किलितेर.
14-15 “येरुसलेम्नुर* लोकुर्निट वेरिमट!
इचुला मी राजल गादित पोरो उच्चि वासेर मंतोर” इन्जेर दर्मा-ग्रंत्नगा लिहि कीसि मत्ता तीर, येसु उंदि गादित* पोरो उच्चि वासेर मत्तोर.
16 इव गट्नङ जर्ग्नेके सिस्यलिरकुन सम्जे माय्मकि.
बति येसु मय्मते नेंड्सि स्वर्ग्नगा सोत्ता पेजे, इव गट्नन बारेते दर्मा-ग्रंत्नगा मत्ता तीर सम्दो जर्ग्तङ इन्जेर सम्जे मातेर.
17 येसु लाजरतुन कूर्दल नेंडुस्नेके, वोन सङा मत्तुर
येसु येरुसलेम नेङ्वल
18 येसु इद मय्मता काम कीतोर इन्जेर लोकुर केन्ज्ता काड्किने, वोन बेटे माय्ले मुनेत्क सोत्तेर.
19 अदेन साटिने परिसयुल्क, “सूडट!
मरट वाड्तङ पिलन्क बतय कामि सिय्मकि.
दुनियतुर सम्दिर वोन पेजेय सोन्जेर मंतेर” इन्जेर तम्वा तमा वड्क्तेर.
येसु तंवा मरंतुन बारेते वेह्वल
20 अद सडदुन रोपो पार्तना-विंति किय्ले, वातुर्गटल कहितुर यूदुल्क आयुर वूर* गिर मत्तेर.
21 वूर गलिलया येरियता बेत्सयिदा नाट्नोर पिलिपुन बेटे मासि, “साब!
ममोट येसुन बेटे माय्ले वातोम” इन्जेर वोन वेह्तेर.
22 इद गोस्टितुन पिलिप सोन्जि, आंद्रेयन वेह्तोर.
वूर इविर आसि अद गोस्टि येसुनगा सोन्जि वेह्तेर.
23 अद केन्चि येसु, “स्वर्ग्नोर माय्नन मय्मा वाय्वल वकत इंके करुम वाता.
24-26 गोह्क्ना दानतुन बोमितगा उर्स्वेके उंदिय मंदंता.
अद दाना उर्स्नेके सातपिनय दिसंता.
बति बोमितल अद मोलोका आसि पिरंता अनि बेर्सि, गोल्कमेन दानङ सींता.
अदे तीर्दे नावा परन सीतेकेन, वेलेटिरकुन पूना जिन्गनि पुटंता.
अह्ने मिह्गटल बोरे आयि, तंवा जीवतुन बचि कीका इंवल, तान सुटि किया लागर.
बति बोरे आयि इद कलितङ आसन कात्रि किय्वक्ने मंवल, बस्केट पिस्ले तंवा जीवतुन बचि किया परंतोर.
नावा सेवा कीका इंवल ना सरि-मारग्ने ताकना.
अस्केने नना बगा मंदंतोनो, अगा ना सेवा किय्वल गिर मंदंतोर.
ना सेवा किय्वन ना बाबो मानि कींतोर.
इद सतेम आंद” इन्जेर सिस्यलिरकुन वेह्तोर.
27 “इंके नावा दिल पूरो तकपिका आसेर मंता.
बतल इन्जेर वेह्का?
ना बाबा!
इद गंडम ना पोरो वाय्वक्ने नाकुन बचि कीम.
तेर बति, इद गंडमुन सोसि किय्लेने नना वातोन.
28 बाबगो!
नीवा पोरोडुने मानि कियुसा” इन्जेर वेह्तोर.
अस्के पोरोडल,* “इदेन मुने डगुर-पान वायुस्तोन.
उंडे गिर डगुर-पान वायुसंतोन” इन्जेर उंदि लेङ केन्जा वाता.
29 ते अद केन्चि अगा निल्सि मंवलिर कहितुर, “गर्ज्ता” इन्जेर इत्तेर.
उंडे कहितुर, “बगवंतनोर वोरोर दूतल वोन सङा वड्क्तोर” इन्जेर इत्तेर.
30 अदेन साटि येसु, “इद लेङ नाकुन मदत किय्ले वाय्मकि.
मीकुन मदत किय्लेने वाता.
31 इद दुनियतुरकुन तस्वा किय्वल वकत वाता.
इद दुनियतुन आगुटि कीसि, मंवल अदिकारिन तेंड्सि पूड्वल वकत वाता.
32 बस्केते नाकुन बोमितल पोरो तहंतेरो, अस्के ना बाजुन सम्दिरकुन ऊमंतोन” इन्जेर वेह्तोर.
33 तंवा मरन बहन जर्ग्वल मंतयो अदेन बारेते इद गोस्टि वेह्तोर.
34 ते पर्जता गुब्डा, “‘किरिस्तु बस्केट जीवते मंदंतोर’ इन्जि, दर्मा-ग्रंतनल केन्ज्तोम.
बति निमे स्वर्ग्नोर माय्नन बोमितल पोरो तह्चि बहन जकंतेर इंति?
वेर स्वर्ग्नोर मायनल बोर आंदुर?”
इन्जेर येसुन पूसि कीतेर.
35 अस्के येसु, “उंडे जरसि कालम वेरिन मी नड्डुम वेड्चि मंदंता.
सिकटि पग्रे माय्वक मुनेने, वेड्चितगा ताकट.
अस्के मिरट कोदा पाय्विट.
सिकटिते ताक्वल तना बगा दांतोरो टावा सेले.
36 मिरट इद वेड्चिता संतान आय्ले, अद वेड्चि मनेकेन मिरट तान्गा बरोसा इरट” इन्जेर येसु वूरकुन वेह्तोर.
अहन वेह्चि, वूरकुन दिस्वक्ने लङ सोडितोर.
वेलेटिर येसुन पोरो बरोसा इर्मकि
37 येसु वूर मुने इचोङ वेले मय्मतङ काम्क कीतोर तेर बति, वोन पोरो बरोसा इर्मकि.
38 “बगवंता!
ममोट वेह्ता कबुडगा बोरे बरोसा इर्मकि.
बगवंता!
नीवा सक्तितुन बोरे वोड्कि किय्मकि”+
इन्जेर येसया पर्वक्तल लिहि कीता बर्पुर आयन साटिने इहिन जर्ग्ता.
39 वूर बरोसा इरा पर्मकि बारितेके, येसया पर्वक्तल उंडे उंदि जागा इहिन लिहि कीतोर:
40 “वूरा नदुर बंद कीता काड्कि,
वूर सूडा पर्सेर सेलुर.
वूरा मंदुन बंद कीता काड्कि,
वूरकुन अर्तम आसेर सेले.
अहन किय्वक इत्तेके, वूर ना बाजुन तिरिंदिर.
नना वूरकुन चोकोट कींदुन”+
इन्जेर मंता.
41 येसया पर्वक्तल बविसत्ने वाय्वल येसुना मय्मतुन सूड्ता काड्किने, वोन बारेते इव गोस्टिङ वेह्तोर.
42 तेर बति येसुन पोरो बरोसा इर्तुर्गटल वेलेटिर अदिकारिर गिर मत्तेर.
बति परिसयुल्क तमकुन समाजनल अलदि वाटनिर इन्जेर वेरिसि बोरे उजगिरि वोप्मकि.
43 वूर बगवंतल सिय्वल डगुर-पांदुन तेर अदिक माय्नलिर सिय्वल डगुर-पांदुन लाड कीतेर.
येसुनङ गोस्टिङ पर्जतुन तस्वा किय्वल
44 अस्के येसु जोर्ते, “ना पोरो बरोसा इर्वल सिरिप नह्गने आयो बति नाकुन सारि कीतोनगा गिर बरोसा इर्सेर मंतोर.
45 नाकुन सूड्वल नाकुन सारि कीतोने सूड्सेर मंतोर.
46 नह्गा बरोसा इर्वल हर वोरोर सिकटितगा निल्सि मंवक्ने, इद दुनियतगा वेड्चित मोडि नना वातोन.
47 बोरे आयि नावङ गोस्टिङ केन्चि, अवेन पिय्सि ताक्वेके, नना वोन तस्वा कियोन.
नना इद दुनियतुरकुन तस्वा किय्ले वाय्मकि.
बति बचि किय्लेने वातोन.
48 नाकुन अनि नावङ गोस्टिन वोपोर वोन, तस्वा किय्वल दुस्रो उंदि मंता.
नना वेह्ता गोस्टिये तस्वा किय्वल दिवोस्ने वोना तस्वा कींता.
49 बारितेके, ना इचते नना वड्क्मकि बति, नना बतल वड्कना इंवडुन बारेते, नाकुन सारि किय्वल बाबोये अहन हुकुम सीतोर.
50 अनि अद हुकुम बस्केट पिस्वल जीवतेके ताकुसींता इन्जेर नाकुन टावा मत्ता काड्कि, नना वेह्वलिक सम्दो गिर बाबो ना सङा वेह्ता तीरे मीकुन वेह्चेर मंतोन” इन्जेर इत्तोर.