योहन 13

येसु सिस्यलिरङ काल्क नोर्वल

1 येसु पस्का सडदुन तेर मुनेने इद दुनियतल मल्सि बाबोनगा सोंवल वकत करुम वाता इन्जेर करि कीतोर.

दुनियतगा मंवलिर तंवुरकुन वेले लाड कीतोर.

अद लाडदुन आक्रि वेरि वूरकुन बर्पुर तोह्‍तोर.

2 बति येसुन दोका सियना इंवल सोन्च, सीमोंतोर मरि इस्करियोत नाट्नोर यूदना दिल्ते जेवुन किय्वडुन तेर मुनेतले सय्तन इर्सि मत्तोर.

3 तंवा केय्दे सम्दो अदिकार बाबो सीतोर इंवल, तना बगवंतनल वातोर अनि बगवंतनगा मल्सि दांतोर इंवलिक सम्दो गिर येसुन टावा.

4 अहन टावा मत्ता काड्कि, वूर्गटल तेच्चि तंवा सालुवतुन बग्ला इर्सि, तंवा नडिदुन उंदि सेलते दोह्‍तोर.

5 दोह्‍ता पेजे, उंदि परत्नगा सिस्यलिरङ कालकुन येते नोर्सेर,

येसु सिस्यलिरङ काल्क नोर्वल

नडितुन दोह्‍ता सेलते वूरङ कालकुन उसुम्वल मोदोल कीतोर.

6 अहन कीसेर येसु सीमोन-पेतुरतगा वातोर.

अस्के वोर, “पर्बु नावङ काल्क नोर्ले आंति कि?”

इन्जेर पूसि कीतोर.

7 ते येसु, “नना किय्वल इंके नीकुन अर्तम आयो, बति मुने वाय्वल गट्कते करि कींति” इन्जेर वेह्‍तोर.

8 अस्के पेतुरु, “वटिन पर्बु!

निमे नावङ काल्क बस्केन नोर्वा” इन्जेर इत्तोर.

ते येसु, “नना नीकुन नोरा बीगर ना सङा नीकुन ईसा सेले” इन्जेर पेतुरतुन वेह्‍तोर.

9 ते सीमोन-पेतुरु, “पर्बु!

सिरिप ना काल्के आय्वा, ना केय्क अनि ना तला गिर नोरा” इन्जेर इत्तोर.

10 अस्के येसु, “येर तुङ्तोर वोर सिरिप काल्क नोर्तेके आयर.

दुस्रो बतय नोरा लागो.

वोर सुदुडे मंतोर.

मिरट गिर सुदुड मंतिट बति, मिह्‍गटल सम्दिर सुदुड आय्विट” इन्जेर वेह्‍तोर.

11 तनकुन बोर दोका सिय्वल मंतोर इंवल टावा मत्ता काड्किने, येसु “मिह्‍गटल सम्दिर सुदुड आय्विट” इन्जेर इत्तोर.

12 अनि वूरङ काल्क नोर्सि, तंवा सालुवतुन सेटनगा वाट्सि, इदेन मुने उच्चि मत्ता जागतगा सोन्जि उद्तोर.

अहन उच्चि, “नना इंके कीता अद काम मीकुन अर्तम आता कि?”

इन्जेर सिस्यलिरकुन पूसि कीतोर.

13 “मिरट नाकुन ‘गुरुजि’ अनि ‘पर्बु’ इन्जेर केयंतिट.

नना गुरुना अनि पर्बुना आता काड्कि, मिरट इहिन केय्वल बरोबरे आंद.

14 नना पर्बुना अनि गुरुना आसि गिर मीवङ काल्क नोर्ता काड्कि, मिरट गिर वोरोनङ वोरोर काल्क नोरय लागर.

15-16 दासि तंवोर माल्कन तेर डगुर आयोर.

अह्‍ने कब्रियल तनकुन सारि कीतोन तेर डगुर आयोर.

नना मीवङ काल्क नोर्ता तीर, मिरट गिर कियना इन्जेर मीकुन नमुनता रूप्ने तोह्‍तोन.

इद सतेम आंद.

17 इंके मिरट इव गोस्टिङ करि कीता काड्कि, इवेन पिय्सि ताककिट्ते, बगवंतल मीकुन आसिर्वाद सींतोर” इन्जेर वेह्‍तोर.

तनकुन दोका सिय्वडुन बारेते येसु वेह्‍वल

(मत्तयि 26:20-25; मार्क 14:17-21; लूका 22:21-23)

18 “मी सम्दिर बारेते नना वेह्‍मकि.

नना नेमि कीतुर बारेते नाकुन टावा.

बति, ‘ना सङा सारि तितोर वोर, नाकुन बय्मन आसि दोका सीतोर’ इन्जेर दर्मा-ग्रंत्ना गोस्टि बर्पुर आय्ले इहिन जर्गंता.

19 इव जर्ग्ता पेजे, ‘किरिस्तुना ननये आंदुन’ इन्जेर बरोसा कीकिट इन्जेर, मुनेने मीकुन वेह्‍चेर मंतोन.

20 इद सतेम आंद.

नना बोंते सारि कींतोनो, वोन करुम किय्वल, नाकुन गिर करुम कींतोर.

नाकुन करुम किय्वल, नाकुन रोह्‍तोर वोर बाबोन गिर करुम कींतोर इन्जि वेह्‍चेर मंतोन” इन्जेर इत्तोर.

21 इव गोस्टिङ वेह्‍ता पेजे येसु, आत्मतगा तल्मेले मासि, “मिह्‍गटल वोरोर नाकुन पगा-दार्क्ना केय्दे हव्लि कींतोर.

इद गवा सतेम आंद” इन्जेर वेह्‍तोर.

22 बोन बारेते वेह्‍तोरो इन्जेर सिस्यलिर करि किय्वा सोन्जि, वोरोना मोकोम वोरोर सूड्तेर.

23 सिस्यलिर्गटल येसुन वेले पेर्मा किय्वल येसुना तिना बग्ला बेय करुम उच्चि मत्तोर.

24 ते सीमोन-पेतुरु वोर सिस्यन, “येसु बोन बारेते वेह्‍तोरो पूसि कीम” इन्जेर केय्दे इसरा कीतोर.

25 अस्के वोर सिस्यल येसुन करुम उंडे इचुर उर्न्गे मासेर, “पर्बु!

वोर बोर आंदुर?”

इन्जेर पूसि कीतोर.

26 ते येसु, “कोजतगा मुडुसि बोंते नना सारि टुक्डे सींतोनो वोरे” इन्जेर वेह्‍तोर.

अहन वेह्‍चि, सारि टुक्डे मुडुसि सीमोंतोर मरि इस्करियोत नाट्नोर यूदन सीतोर.

27-30 अस्के वोर सारि टुक्डे येत्ता पेजे, “निमे कीका इंवल काम सप्ने कीम” इन्जेर येसु वोन वेह्‍तोर.

येसु अहन बारि वेह्‍तोरेय, जेवुन उद्तुर्गटल वोरोन गिर टावा सेले.

यूदनगा कोतना तेय्ला मत्ता काड्कि येसु, ‘सडदुन पह्‍जे मत्तङ चीज्क येत’ इन्जि इत्तोर बतलो इन्जेर कहितुर सोन्च कीतेर.

‘गरिब लोकुरकुन बतय सीम्’ इन्जि इत्तोर बतलो इन्जेर, उंडे कहितुर सोन्च कीतेर.

वोर सारि टुक्डे येत्ता पेजे सय्तन सोप्रे मासि, बह्‍रि सोडितोर.

अस्के रात आसि मत्ता.

येसु पूना हुकुम सिय्वल

(मत्तयि 26:31-35; मार्क 14:27-31; लूका 22:31-34)

31 यूदल सोत्ता पेजे येसु, “इंके स्वर्ग्नोर माय्नन मान पुट्वल वकत वाता.

वेर तादन हिंदल बगवंतन डगुर-पान वांता.

32 मोका बगवंतन मरिन हिंदल डगुर-पान वातेके, बगवंतल तंवोर मरिन मान सींतोर.

अद डगुर-पान येंटने वोर मरिन सींतोर.

33 ना मर्क्निट!

उंडे जरसि कालम वेरि मी सङा मंदंतोन.

अद आता पेजे, मिरट नाकुन मह्‍कंतिट.

बति नना बगा दांतोन अगा मिरट इंके वाया पर्विट इन्जेर यूदुलकुन वेह्‍ता तीरे, मीकुन गिर वेह्‍चेर मंतोन.

34 इंके मीकुन उंदि पूना हुकुम सीसेर मंतोन.

नना मीकुन लाड कीतपे, मिरट गिर वोरोन वोरोर लाड्दे सूडट.

35 वोरोन वोरोर लाड्दे सूड्वडुन हिंदले, मिरट ना सिस्यलिर आंदिट इन्जेर सम्दिर करि कींतेर” इन्जेर येसु वेह्‍तोर.

36 सीमोन-पेतुरु, “पर्बु!

निमे बगा दांति?”

इन्जेर पूसि कीतोर.

ते येसु, “नना सोंवडगा निमे इंके वाया पर्वि.

बति पेजेटल वांति” इन्जेर जवब सीतोर.

37 अस्के पेतुरु, “पर्बु!

नना बारि वाया परोन?

नी साटि परन सिय्ले गिर तयर मंतोन” इन्जेर वेह्‍तोर.

38 अस्के येसु, “अबा!

निमे ना साटि परन सींतिय?

ना बारेते निमे, ‘वोर बोर आंदुरो टावा सेले’ इन्जेर, मूंद जोकङ लबड वेहा बीगर, नेटा रातुन असले गोग्डि कूसो.

इद सतेम आंद” इन्जेर पेतुरतुन वेह्‍तोर.