लूका 22

येसुन जक्ले कुट्रा किय्वल

(मत्तयि 26:1-5, 14-16; मार्क 14:1-2, 10-11; योहन 11:45-53)

1 तातो पिंडितङ^* सारिङ सुर्वल सड करुम वासेर मत्ता.

अद सडदुन, ‘पस्का’ इंतेर.

2 अद गट्कते, डगुक कटोडलिर अनि सास्तिरिर पर्जतुन वेरिसि, येसुन बहन जकुसना इन्जेर मोका सूड्सेर मत्तेर.

3 बारा जन्क सिस्यलिर्गटल वोरोर इस्करियोत नाट्नोर यूदना मंदगा सय्तन वासि, उत्ता.

4 अदेन साटि, वोर डगुक कटोडलिर्गा अनि मंदिरतुन केप्वलिरुर अदिकारिर्गा सोन्जि, तना बद तरिकते येसुन पिय्सि सिया परंतोर इंवल गोस्टितुन वेह्‍तोर.

5 अद गोस्टि केन्चि वूरकुन आनंद लाग्ता.

ते, ‘नीकुन कोतङ सींतोम्’ इन्जेर गोस्टि सीतेर.

6 ते अद गोस्टितुन वोर वोप्तोर.

अनि मांदि मनुर अस्के, येसुन वूरा केय्दे पिय्सि सिय्ले, मोका सूड्सेर मत्तोर.

पस्का सड्दा जेवुंता तयरि

(मत्तयि 26:17-25; मार्क 14:12-21; योहन 13:21-30)

7 तातो पिंडितङ सारिङ सुर्सि तिंवल सड वाता.

अद सडदुन नेटि साल्मेटङ गोरे पिलन बलिदान⁺ सीसि, पस्का जेवुन कियना इंवल रिवज ताक्सेर मत्ता.

8 येसु पेतुरतुन अनि योहंतुन मुने येरुसलेम नगुडे सारि कीसेर, “मिरट सोन्जि पस्का जेवुंतुन तयर कियना” इन्जेर वेह्‍तोर.

9 ते वूर, “ममोट बोना रोन अद जेवुन तयर कियना इंति?”

इन्जेर पूसि कीतेर.

10 ते येसु, “मिरट नगुडे नेङ्नेकेने, वोरोर मायनल बुड्डिते येर तोच्चि, मीकुन बेटे मांतोर.

वोर माय्नन पेजेय सोन्जि, वोर नेङ्वल रोतगा मिरट गिर नेङट.

11-12 अनि अद रोतोर माल्कन तोडो, ‘“ना सिस्यलिर सङा पस्का सड्दा जेवुन कीनल, कम्रा बगा मंता?”

इन्जि मा गुरुजि पूसि कीसेर मंतोर’ इन्जेर, वोन पूसि कीम्ट.

अस्के वोर, सम्दो सव्लत्ने तयर मंवल मिदेता डगुर कम्रतुन तोहंतोर.

अगा मिरट सड्दा जेवुंतुन तयर कीम्ट” इन्जेर वेह्‍तोर.

13 ते वूर सोन्जि, येसु तमकुन वेह्‍ता तीरे सम्दो मंवल सूड्तेर.

अगा वूर पस्का सड्दा जेवुंता तयर कीतेर.

सिस्यलिर सङा येसु आक्रिता जेवुन किय्वल

(मत्तयि 26:16-30; मार्क 14:22-26; 1वा कोरंति 11:23-25)

14 जेवुन किय्वल वकत वाता अस्के, येसु तंवुर बारा जन्क अपोस्तुल्कुन सङा अद कम्रतगा सोन्जि, उत्तोर.

अपोस्तुलकुन सङा येसु जेवुन किय्वल

15 अनि येसु वूर सङा, “नना दुक्सा बोगे मायन मुने, मी सम्दिर तोडो मीरे मासि इद पस्का सड्दा जेवुन कियना इन्जेर वेले आसते मंतोन.

16 बारितेके बगवंतना राज्नगा इदेना अर्तम बर्पुर जर्गनल वेरि, उंडे बस्केने इद जेवुन तिनोन इन्जि, मीकुन वेह्‍चेर मंतोन” इन्जेर इत्तोर.

17 अहन वेह्‍ता पेजे, येसु आङुर रसते निन्चि मंवल उंदि चंबुतुन पिय्सि, बगवंतन दनेवाद वेह्‍तोर.

अनि, “इदेन मी सम्दिर तूसि उंट.

18 बारितेके, बगवंतना राज वानल वेरि, उंडे बस्केन इद आङुर रसा उंनोन इन्जि, मीकुन वेह्‍चेर मंतोन” इन्जेर इत्तोर.

19 अद आता पेजे, उंदि सारि पिय्सि, बगवंतन दनेवाद वेह्‍तोर.

अनि तान उरुसि वूर्गा सीसेर, “इद मीकुन बचि किय्ले नना अर्पना सिय्वल नावा मेंदोडा निसनि आंद.

मीरे मासि तिंवल इद कार्या नावा हेतुत साटि कीसेर मंट” इन्जेर वेह्‍तोर.

20 अनि अद तीर्दे तिता पेजे, आङुर रसता चंबु पिय्सि, “इद रसा मी लासि, नावा नना बलिदान सिय्वल नेतुडा निसनि आंद.

इद नावा नेतुर बगवंतन अनि पर्जत नड्डुम पूना नियम आसि मंदंता.

21 बति सूडट!

पगा-दार्क्ना केय्दे नाकुन हव्लि किय्वल ना बरोबर तिंले उच्चि मंतोर.

22 बगवंतल वेह्‍ता तीर, स्वर्ग्नोर माय्नल परन सुटि कींतोर.

बति वोन दोका सिय्वन वेले दुक्सा वांता” इन्जेर वेह्‍तोर.

23 ते वूर सिस्यलिर, “मह्‍गटल आतल काम बोर किय्मड मंदर?”

इन्जेर तम्वा तमा पूसि कीतेर.

सिस्यलिर सङगा येसु आक्रिता जेवुन कियवल (22:7-23)

बोर डगुर आंतोर?

24 अद आता पेजे सिस्यलिर, “मह्‍गटल बोर डगुर मंदना?”

इंवल गोस्टितुन बारेते जट-पट लाग्तेर.

25 अस्के येसु वूर सङा, “इद दुनियतुर राजलिर, जुल्मते पर्जत पोरो राज ताकुसंतेर.

‘पर्जतुन मदत किय्वलिर आंदुम’ इन्जेर तम्वा तमा इंतेर.

26 बति मिरट अहन मंवा.

मिह्‍गटल डगुर-पान वाले चुडुर-पान किया लागर.

अदिकारि सेव्कन मोडि मंदा लागर.

27 जेवुंतगा तिंले उद्वल डगुर कि, सेलेके वोन वह्‍डि किय्वल डगुर?

सादरंते तिंले उद्वले डगुर इंतट.

बति नना मी नड्डुम सेवा किय्वन मोडि मंतोन.

28 मिरट ना बरोबर तक्लिब्क बोगे मासेर, नाकुन सुटि किय्मकि.

29 अदेन साटि, ना बाबो राज ताकुस्ले, नाकुन बहंते अदिकार सीतोरो, अह्‍ने नना गिर मीकुन अद अदिकार सींतोन.

30 अस्केने नावा राज्नगा, मिरट ना बरोबर उन्किट-तिन्किट.

अनि मिरट राजा-गादिनगा उच्चि, इज्रयेल लोकुरङ बारा कांदान्कुन^* पोरो राज ताकुस्वलिर आंतिट” इन्जेर वेह्‍तोर.

सीमोनु-पेतुरतुन बारेते येसु वेह्‍वल

(मत्तयि 26:31-35; मार्क 14:27-31; योहन 13:36-38)

31 अनि येसु सीमोन-पेतुरतुन सङा, “सीमोन!

सीमोन!

दिहंते केन्जा!

केतिदारल बहंते पोटनल गोह्‍क अलदि कींतोरो, अह्‍ने सय्तन मी सम्दिरकुन बरोसतल बह्‍कि कियना इन्जेर सूड्तोर.

32 बति निमे बरोसतल बह्‍के माय्वक मंदना इन्जेर, नी साटि बगवंतन पार्तना कीतोन.

अदेन साटि निमे बस्केते बरोसतेके मल्सि वांतियो, अस्के नी बरोबर मंवलिर बक्तलिरकुन गटि-दीर्या सीम” इन्जेर वेह्‍तोर.

33 बति सीमोन-पेतुरु, “पर्बु!

नना नी सङा जेल्दगा अर्ले अनि नी बरोबर नावा परन सिय्ले गिर तयर मंतोन” इन्जेर इत्तोर.

34 ते येसु, “पेतुरु!

^* ना बारेते निमे, ‘वोर बोर आंदुरो टावा सेले’ इन्जेर, निमे मूंद जोकङ लबड वेहा बीगर, नेटा रातुन गोग्डि कूसो” इन्जेर वोन वेह्‍तोर.

वाय्वलिक तक्लिब्क

35 अहन वेह्‍वल आता पेजे येसु, “चन्चिय आयि, तेय्लय आयि, सेलेके चेपुल्क आयि, सेल्वक्ने मीकुन सारि कीतोन अस्के, मिह्‍गा बतय कमि मत्ता कि?”

इन्जेर पूसि कीतोर.

ते वूर, “बततय कमि मन्मकि” इन्जेर जवब सीतेर.

36 अस्के येसु वूर सङा, “बति इंके चन्चि मंवल चन्चि वोयना अनि तेय्ला मंवल तेय्ला गिर वोयना.

रूसि^* सेलोर वोर तंवा मुच्वडुन वोम्सि तेर बति, उंदितुन येतना.

37 बारितेके ना बारेते दर्मा-ग्रंत्नगा, ‘करेबलिर्गटल वोरोन दात वोन सूड्तेर’⁺ इन्जि लिहि कीता तीर, नाकुन करल करल जर्ग्वल मंता” इन्जेर वेह्‍तोर.

38 ते वूर सिस्यलिर, “पर्बु!

इचुला, इगे रंड रूसिङ मंतङ” इन्जेर वेह्‍तेर.

अस्के येसु, “आयर!

इङेडल रूसिन बारेते वड्क्मट” इन्जेर इत्तोर.

पोरोडा कम्रातगा वेह्ता बोदा (22:24-38)

ओलिवा मरक्ना गुटत पोरो येसु पार्तना किय्वल

(मत्तयि 26:36-46; मार्क 14:32-42)

39 येसु तनकुन आदत मत्ता तीर ओलिवा मरक्ना गुटत पोरो सोत्तोर.

सिस्यलिर गिर वोन पेजेय सोत्तेर.

40 अद गुटतगा येव्ता पेजे, “बरोसतल मीकुन बह्‍कि किय्वल आसतगा कोंडे माय्वक्ने पार्तना कीम्ट” इन्जेर सिस्यलिरकुन वेह्‍तोर.

41 अनि वूर्गटल जरसि लङ^* सोन्जि, मुर-टोङ्रङ कोट्सि, इहिन पार्तना कीतोर:

42 “ना बाबा!

उंदि मोका नीवा इचा मत्तेके, इद वाय्वल तक्लिबुन^* नह्‍गटल वीडुसा.

तेर बति, नावा इचते आयो.

नीवा इचा तीरे जर्गुसा” इन्जेर पार्तना कीतोर.

43-44 ^*[अस्के स्वर्गनल वोरोर दूतल पावे मासि, येसुन गटि-दीर्या सीतोर.

येसु उंडे अदिक तल्मेले मासेर पार्तना कीतोर.

अस्के वोन उक्डे माता.

ते अव टेम्क नेतुडुन दात बूड अर्तङ.]

45 पार्तना कीता पेजे, वोर तंवुर सिस्यलिर्गा सोत्तोर.

वूर दुक्सते अविसि, नरुम्सेर दिस्तेर.

46 ते येसु, “मिरट बारि नरुम्सेर मंतिट?

बरोसतल मीकुन बह्‍कि किय्वल आसतगा कोंडे माय्वक्ने पार्तना कीम्ट” इन्जेर वेह्‍तोर.

येसुन पिय्सि वोय्वल

(मत्तयि 26:47-56; मार्क 14:43-50; योहन 18:3-11)

47 येसु अहन वड्क्सेर मनेकेने, बारा जन्क सिस्यलिर्गटल वोरोर आय्वल यूदल तंवा सङा मांदितुन पिय्सि वासेर दिस्तोर.

वोर वासि, येसुन मुका बुरन साटि करुम सोत्तोर.

48 अस्के येसु, “यूदा!

स्वर्ग्नोर माय्नन मुका बुर्सि दुस्रुरा केय्दे पिय्सि सिय्ले वाति कि?”

इन्जेर पूसि कीतोर.

49 मुने बतल जर्ग्वल मंता इंवल सिस्यलिरकुन अर्तम आता.

ते वूर, “पर्बु!

वीरकुन रूसिने कोय्कोमिय?”

इन्जेर पूसि कीतेर.

50 अचोड रोपोने, वूर्गटल वोरोर सिस्यल, पेर्सोर कटोडनोर सेव्कना तिना केवितुन तिवुस्तोर.

51 ते येसु, “इचोट्के आयर!”

इन्जेर वेह्‍चि, वोना केवितुन इट्सि, चोकोट कीतोर.

52 अद गट्कते येसु तनकुन पिय्ले वातुर डगुक कटोडलिर, मंदिर्तुन केप्वलिरुर अदिकारिर अनि पेदोलकुन सङा, “कले-कङ्रन पिय्ले वातपिनय तल्वर्क अनि डुड्डुङ पिय्सि बारि वातिट?

53 नना हर दिवोस मंदिरतगा मी सङने मंदुन बति, नाकुन पिय्ले कोसिद किय्मकि.

ना पोरो अदिकार ताकुस्ले, बगवंतल इद गट्कतुन मी केय्दे सीतोर.

अनि सय्तन करब्ना काम जर्गुस्ले वोन इंके बगवंतल मोका सीतोर” इन्जेर इत्तोर.

येसुन पिय्सि वोय्वल (22:39-53)

येसु टावा सेलोर इन्जेर पेतुरु लबड वेह्‍वल

(मत्तयि 26:57-58, 69-75; मार्क 14:53-54, 66-72; योहन 18:12-18, 25-27)

54 अस्के वूर येसुन पिय्सि, पेर्सोर कटोडना रोन वोतेर.

ते पेतुरु, येसुनल लक मन्जेर पेजेय पेजेय कटोडना रोता आव्रतगा नेङ्तोर.

55 अगा सोत्ता पेजे वूर्गटल कहितुर नड्डुम रचतगा आक्टि कीसि, पीनि आर्सेर उत्तेर.

ते पेतुरु गिर वूर बरोबर उत्तोर.

56 अहन पेतुरु आक्टितगा उच्चि मंवल काम किय्वल पेडिना नदुडे अर्ता.

ते वोन नेह्‍ना सूड्सि, “वेर मायनल येसुन सङा मत्तोरे आंदुर” इन्जेर वेह्‍ता.

57 बति पेतुरु, “बायि!

वोर बोर आंदुरो नाकुन असले टावा सेले” इन्जेर वेह्‍तोर.

58 अहन जुलुक आता पेजे, उंडे वोरोर, “निमे गिर वोनुर सिस्यलिर्गटल वोरोनि आंदि सेलेय?”

इन्जेर पूसि कीतोर.

बति पेतुरु, “नना आयोन दादा!”

इन्जेर जवब सीतोर.

59 लग-बग उंदि गंटा आता पेजे, उंडे वोरोर मायनल गिर, “वेर गलिलया येरियतोर आता काड्कि, येसुन सङा तप्वक मत्तोरे आंदुर!”

इन्जेर जोर्ते इत्तोर.

60 अद केन्चि पेतुरु, “दादा!

निमे बततुन बारेते वड्क्सेर मंतियो, नाकुन टावा सेले” इन्जेर इत्तोर.

अहन इनेकेन गोग्डि कूस्ता.

61 अस्के येसु तिरिसि नीटम पेतुरतुन सूड्तोर.

ते, “नेंड गोग्डि कूस्वक मुने, नना बोना आंदुनो टावा सेले इन्जि ना बारेते मूंद जोकङ लबड वेहंति” इन्जेर पर्बु वेह्‍चि मत्ता अद गोस्टि, पेतुरतुन हेतु वाता.

62 अस्के पेतुरु बह्‍रि सोन्जि, बेय दुक्सते जोडा जोडा आड्तोर.

येसु टावा सेलोर इंजेर पेतुरु लबड वेह्वल (22:54-62)

सिपायिर येसुन चेह्‍टेङ किय्वल

(मत्तयि 26:67-68; मार्क 14:65)

63-64 येसुन केप्सेर मंवलिर सिपायिर वोन चेडि कीसेर पाय्वल सुरु कीतेर.

अहन वोनङ कडकुन कपिडे मुच्चि पासेर, “मह्‍गटल नीकुन बोर पातोमो, पुंदा?”

इन्जेर पूसि कीतेर.

65 येसुना हिजत वोसेर, इंवा आतङ गोस्टिङ इत्तेर.

पन्चुन मुने येसु निल्वल

(मत्तयि 26:59-66; मार्क 14:55-64; योहन 18:19-24)

66 पोड्द पेसिता पेजे पेदोल्क, डगुक कटोडलिर अनि सास्तिरिर मीरे मासि उत्तेर.

अद पन्च्नगा येसुन केयुसि निपुस्तेर.

संहेद्रिन पन्च्नुर येसुन सवल्क पूसि किय्वल

67 अस्के वूर पन्च्नुर, “बचि किय्वल किरिस्तुनि^* करल मंद्किते माकुन वेहा!”

इन्जेर इत्तेर.

ते येसु, “नना वेह्‍तेके मिरट नम्विट.

68 अनि नना उंदि सवल मीकुन पूसि कीतेके, तान जवब सिय्विट.

69 बति इङेडल सर्वा सक्ति वाले बगवंतना तिना बग्ला स्वर्ग्नोर मायनल उच्चि मंदंतोर” इन्जेर जवब सीतोर.

70 अस्के वूर सम्दिर, “अहन ते निमे, बगवंतनोर मरिनि आंदि कि?”

इन्जेर पूसि कीतेर.

ते येसु, “मिरटे अहन इंतिट” इन्जेर जवब सीतोर.

71 अस्के वूर, “माकुन दुस्रोक उंडे बव गवङ पह्‍जे?

वोर इत्ता अदेन, कुद मरटे केन्ज्तट कि?”

इन्जेर वेह्‍तेर.

येसुन् पंचनुर चेह्टेंग कीसेर सवल्क पूसि कियवल (22:63-71)