येसुन पिय्सि वोय्वल
18
1 येसु पार्तना कीता पेजे, तंवुर सिस्यलिर सङा केद्रोनु लव्डिता लोदितुन वीड्सि सोत्तोर.
अगा उंदि वाडि मत्ता.
अद वाडित रोपो तना अनि वोनुर सिस्यलिर नेङ्तेर.
2 येसु तंवुर सिस्यलिर सङा वेलेन जोकङ अगा सोन्जि मत्तोर.
अदेन साटि, येसुन दुस्रुरा केय्दे हव्लि कीसि, दोका सिय्वल यूदन गिर, अद वाडि टावा मत्ता.
3 डगुक कटोडलिर अनि परिसयुल्क कहितुरकुन आच्चि, यूदन सङा सारि कीतेर.
वूर बूर बूर इत्तेके, यूदल, कहितुर सिपायिर अनि मंदिरतगा केप्वलिर.
वूर डिव्टिङ, कंदिल्क अनि आय्तर्क पिय्सि वातेर.
4 तनकुन मुने बतल जर्ग्वल मंता इंवल येसु करि कीता काड्कि, वूर्गा सोन्जि, “बोन साटि मह्क्सेर मंतिट?”
इन्जेर पूसि कीतोर.
5-6 अस्के वूर, “नजरेत्नोर येसुन साटि” इन्जेर वेह्तेर.
ते येसु, “ननय वोना आंदुन” इन्जेर वेह्तोर.
अद गोस्टि केन्चि, दोका सिय्वल यूदन बरोबर वूर पेजे जर्ग्सि बूड अर्तेर.
7 उंदुंदि जोका येसु, “बोन साटि मह्क्सेर मंतिट?”
इन्जेर पूसि कीतोर.
ते वूर, “नजरेत्नोर येसुन साटि” इन्जेर वेह्तेर.
8 ते येसु, “ननय वोना आंदुन इन्जि, इदेन मुनेने वेह्तोन.
मिरट ना साटिने मह्क्सेर मत्ता काड्कि, मेय्तुरकुन सोंदा सीम्ट” इन्जेर वूरकुन वेह्तोर.
9 बारितेके, ‘निमे नाकुन सीतुर्गटल वोरोन गिर टूटि किय्मकि’ इन्जेर तना वेह्चि मत्ता अद वचन पूरि किय्ले, येसु इहिन वेह्तोर.
10 सीमोन-पेतुरतगा उंदि लाम रूसि मत्ता.
अदेने पेर्सोर कटोडनोर मल्कु इंवल सेव्कना, तिना केवितुन तिवुस्तोर.
11 अस्के येसु, “नीवा रूसितुन टोप्रतगा इरा.
बाबो नाकुन बोगे माम इन्जेर सीता गंडमुन बोगे माय्वक मन्कय?”
इन्जेर पेतुरतुन इत्तोर.
12 अस्के वूर सिपायिर अनि वूरोर अदिकारि, यूदुल्क्ना मंदिरतगा केप्वलिर येसुन पिय्सि, अंनल इंवल पेर्सोर कटोडनगा मोदोल वोतेर.
13 वोर अंनल अद गट्कते पेर्सोर कटोडा-पान किय्वल कयपनोर कास मामल आंदुर.
14 ‘मा जातितुर नासेडम आय्वक्ने, वोरोर मायनल पर्जत साटि परन सिय्वल चोकोट्ना गोस्टि आंद्’+ इन्जेर यूदुलकुन सूचना कीतोर वोर कयपल वेरे आंदुर.
येसु टावा सेलोर इन्जेर पेतुरु लबड वेह्वल
15 अहन येसुन पिय्सि सोनेके, सीमोन-पेतुरु अनि उंडे वोरोर सिस्यल वूर पेजेय सोत्तेर.
वोर सिस्यल पेर्सोर कटोडन टावा मत्ता काड्कि, येसुन बरोबर पेर्सोर कटोडना रोता आव्रतुन रोपो सोत्तोर.
16 बति पेतुरु पेर्सोर कटोडना रोता पाटक्नगा बह्रि निल्सि मत्तोर.
अदेन साटि, वोर सिस्यल पेजे मल्सि वासि, पाटक केप्वल पेडिन सङा वड्क्सि, पेतुरतुन रोपो वोतोर.
17 अद पाटक्नगा केप्वल पेडि, “वोनुर सिस्यलिर्गटल वोरोनि आंदि सेलेय?”
इन्जेर पेतुरतुन पूसि कीता.
ते पेतुरु, “नना आयोन” इन्जेर वेह्तोर.
18 अद गट्कते पीनि मत्ता काड्कि, सेव्कलिर अनि मंदिरतगा केप्वलिर तड्मि मासि, पीनि आर्सेर मत्तेर.
ते पेतुरु गिर सोन्जि, वूर बरोबर पीनि आर्सेर मत्तोर.
पेर्सोर कटोडल येसुन सवल्क पूसि किय्वल
19 अदे येलते पेर्सोर कटोडल अंनल, वोनुर सिस्यलिर बारेते अनि वोना बोदतुन बारेते येसुन पूसि कीतोर.
20 ते येसु, “यूदुल्क मीरे माय्वलिक सुनगोक्नगा अनि मंदिर्तगा मंवलिर सम्दिर मुने कुला कुला बोदा कीतोन.
कटोडलिर येसुन सवल्क पूसि किय्वल
21 इद सवल नाकुन बारि पूसि कींति?
नना बतल बोदा कीतोन इंवल केन्ज्तुर वूरकुन पूसि कीम.
इचुला!
नना वेह्ता वीरकुन टावये” इन्जेर जवब सीतोर.
22 येसु अहन जवब सीतोर अस्के, मंदिरतुन केप्वलिर्गटल करुम निल्सि मंवल वोरोर, “वोरोर पेर्सोर कटोडन अहन जवब सींति कि?”
इन्जेर कोर्वितगा पातोर.
23 अस्के येसु, “नना बतय तप वड्क्तेके वेहा.
बरोबरे वड्क्सि मत्तेके बारि नाकुन पाति?”
इन्जेर मंदिरतगा केप्वन पूसि कीतोर.
24 अस्के अंनल, दोह्तङ नोडेङ रेह्वक्ने, इंके मंवल पेर्सोर कटोडल कयपनगा येसुन रोह्तोर.
पेतुरु लबड वेह्ता बरोबर गोग्डि कूस्वल
25 सीमोन-पेतुरु तड्मितगा पीनि आर्सेर मनेके, वूर सूड्सि, “करलेन वोनुर सिस्यलिर्गटल वोरोनि आंदि सेलेय?”
इन्जेर इत्तेर.
ते पेतुरु, “नना आयोन.
वोर नाकुन टावा सेले” इन्जेर वूरकुन वेह्तोर.
26 बति पेतुरु बोनते केवितुन कोय्तोरो, वोना चुटम्नोर वोरोर पेर्सोर कटोडनगा सेवा कीसेर मत्तोर.
वोर सेव्कल, “येसुन सङा वाडितगा मनेके, नना नीकुन सूड्मकि कि बतल?”
इन्जेर पेतुरतुन इत्तोर.
27 अस्के पेतुरु, “नाकुन टावा सेले” इन्जेर उंडे उंदि जोका वेह्तोर.
अस्केने गोग्डि कूस्ता.
गवर्नर पिलातुन मुने येसु निल्वल
28 अस्के उज्डे माता पेजे, कयपनगटल येसुन वूर रोमा गवर्नर्ता महलतगा वोतेर.
तमो अस्ट बस्ट आय्वक्ने पस्का सड्दा जेवुन कियना इन्जेर, अद महलतुन रोपो वूर नेङ्मकि.
29 ते पिलातुय बह्रि वासि, “वेर माय्नन पोरो बद कसुर वाट्सेर मंतिट?”
इन्जेर पूसि कीतोर.
30 अस्के वूर, “वेर तप किय्वक इत्तेके, निह्गा बारि पिय्सि वांदुम?”
इन्जेर वेह्तेर.
31-32 ते पिलातु, “मिरटे वोन वोसि, मीवा दर्मता कानुन पिय्सि तस्वा कीम्ट” इन्जेर इत्तोर.
अद केन्चि यूदुल्क, “मी मोडि दुस्रोन मरंता सिक्सा वाट्वल अदिकार माकुन सेले” इन्जेर वेह्तेर.
अदेन हिंदल, येसु बातल मरन आय्वल मंतोर इंवल गोस्टि पूरे माता.
33 अस्के पिलातु महलतगा रोपो सोन्जि, येसुन केयुसि, “निमे यूदुल्क्नोर राजनि आंदि कि?”
इन्जेर पूसि कीतोर.
34 ते येसु, “निमेय कुद इहिन इंति कि?
सेलेके, दुस्रुर बोरे ना बारेते नीकुन वेह्तेर?”
इन्जेर उल्टा पूसि कीतोर.
35 अदेन साटि पिलातु, “नना यूदुल्क्ना जातितोना आंदुन कि बतल?
नी लोकुर अनि डगुक कटोडलिरे, नीकुन नह्गा सारि कीतेर.
निमे बतल कीति?”
इन्जेर पूसि कीतोर.
36 अस्के येसु, “नावा राज इद दुनियतुन बारेता आयो.
उंदि मोका नावा राज दुनियतुन बारेता आय्मड इत्तेके, यूदुल्क नाकुन पिय्सि वोय्वक्ने, नावुर सेव्कलिर लडेय कींदिर.
बति नावा राज इगेटा आयो” इन्जेर वेह्तोर.
37 अद केन्चि पिलातु, “ते निमे राजनि आंदि कि?”
इन्जेर पूसि कीतोर.
ते येसु, “निमेय नाकुन ‘राजनि आंदि’ इन्जेर इत्ति.
ननते सतुन बारेते गवा वेह्ले जल्मा येत्तोन.
इद कारंतुन हिंदले दुनियते वातोन.
सतुन पेर्मा किय्वलिर ना गोस्टि केन्जंतेर” इन्जेर वेह्तोर.
38 ते पिलातु, “सतेम इत्तेके बतल?”
इन्जेर चेडि कीसेर, पूसि कीतोर.
अनि बह्रि मंवलिर यूदुल्क्नगा सोन्जि, “वोन्गा नाकुन बदे गल्ति दिसेर सेले.
39 बति मीवा पस्का सड जर्ग्नेके, नना जेल्दगा अर्सि मंवलिर्गटल वोरोन सुटि किय्वल रिवज ताक्सेर मंता.
ते वेर यूदुल्क्नोर राजन सुटि किय्वल मीकुन इस्टमे कि?”
इन्जेर पूसि कीतोर.
40 अस्के वूर जोर्ते, “वोन वटिन, बति बरबन सुटि कीम” इन्जेर किलितेर.
वोर बरबल लूटि कीसि जेल्दगा अर्सि मत्तोर आंदुर.