येसु पार्तना किय्वल
17
1-4 येसु इव गोस्टिङ वेह्चि, पोरो हाबडेके सूड्सेर इहिन पार्तना कीतोर: “बाबा!
निमे दुनियतुर सम्दिर माय्नलिर पोरो नाकुन अदिकार सीति.
इदेन हिंदल, निमे नाकुन सीतुरकुन बस्केट पिस्वल जीवा सिया परंतोन.
वोरोनिय सते बगवंतल आय्वल नीकुन अनि निमे रोह्ति वोर येसु किरिसतुन करि किय्वलिर्कुने बस्केट पिस्वल जीवा पुटंता.
बोमित पोरो नाकुन सीता सम्दो कामुन बर्पुर कीसि, नीकुन मय्मा तत्तोन.
अद वकत इंके वासिन मंता.
नाकुन नीवा मय्मा वायुसा.
इद तीर्दे नीकुन नना मय्मा वायुसंतोन.
5 ये बाबा!
इद कलि गडे माय्वक मुने नना निह्गा मनेके, बातल मय्मा मत्तयो, आतले मय्मा इंके नाकुन वाया सीम.
येसु तंवुर सिस्यलिर साटि पार्तना किय्वल
6 “इद दुनियतल नाकुन सीति वूर नीकुन करि कीनल कीतोन.
वूर लोकुर नीवुर आंदिर, बति निमे वूरकुन नह्गा हव्लि कीति.
वूर नीवा वचन पिय्सि ताक्तेर.
7-8 निमे नाकुन सीतङ गोस्टिन वूरकुन वेह्तोन.
अदेन वूर वोप्सि, निमेय नाकुन सारि कीति इन्जेर बरोसा इर्तेर.
नना करलेने निह्गटल वातोन इन्जेर वूरकुन करे माता.
ते नना वड्क्ले गोस्टिङ अनि मय्मतङ काम्क किय्ले सक्ति सम्दो निमेय सीति इन्जेर, इंके वूरकुन करे माता.
9 वूर साटिने पार्तना कीसेर मंतोन.
बति दुनियतुर साटि पार्तना कीसेर सेलोन.
निमे नाकुन सीति वूर, नीवुर आता काड्कि, वूर साटिने पार्तना कीसेर मंतोन.
10 नह्गा मंवलिर सम्दिर नीवुरे आंदिर अनि वूरकुन निमेय नाकुन सीति.
वूर ना पोरो इर्ता बरोसतुन हिंदल नाकुन मान पुट्ता.
11 नना उंडे मुने दुनियतगा मनोन.
बति वीर दुनियतगन मंतेर.
नना निह्गा वासेर मंतोन.
पवित्रा वाले बाबो बगवंता!
मरट इंके उंदि आसि मत्तपे, वीर गिर उंदि आसि मनल, निमे नाकुन सीता नीवा पोरोल्ता सक्तिते वीरकुन काबाडा.
12 नना इगे मनेके, नाकुन सीति वूरकुन नी पोरोल्ता सक्तिते काबाड्तोन.
दर्मा-ग्रंत्ना वचन पूरे मानल नासेडम आय्वल बोर्ते मत्तोरो, वोरे नासेडम आतोर.
13 इंके नना निह्गा वासेर मंतोन.
नावा आनंद वूर्गा बर्पुर आयना इन्जेरेन, नना इद दुनियतगा मनेकेन, इव गोस्टिङ वेह्चेर मंतोन.
14 नीवा वचन वूरकुन वेह्तोन.
नना इद दुनियतोना आयोन.
अह्ने वूर गिर इद दुनियतुर आय्वा काड्कि, इद दुनियतुर वूरकुन मेचुर.
15 इद दुनियतल वीरकुन वोम इन्जेर नीकुन पार्तना कीसेर सेलोन.
बति सय्तन इंवल करेबनगटल वीरकुन काबाडा इन्जेर पार्तना कीसेर मंतोन.
16 नना दुनियतोना बहंते आयोनो, अह्ने वूर गिरे इद दुनियतुर आयुर.
17 नीवय गोस्टि सतेम आंद.
अद सत्ने नीवा सेवा किय्ले, वूरकुन अलग कीम.
18 निमे नाकुन बद तीर्दे दुनियतगा रोह्तियो, अदे तीर्दे नना वूरकुन दुनियतगा रोह्तोन.
19 नावा नना अर्पना आय्वडुन हिंदल, वूर करल पवित्रा आसि, नीवा सेवा कियना इंवले नावा इचा.
येसु सम्दिर बक्तलिर साटि पार्तना किय्वल
20 “नना सिरिप वीर सिस्यलिर साटिने आयो बति, वीरा गोस्टि केन्चि बोर-बोर्ते ना पोरो बरोसा इरंतेरो, वूर सम्दिर साटि पार्तना कीसेर मंतोन.
21 ये बाबा!
नना निह्गा, निमे नह्गा बहन उंदि आसि मंतटो, अह्ने बरोसा किय्वलिर वूर सम्दिर गिर उंदि आसि मंदना इन्जेर पार्तना कीसेर मंतोन.
निमे नाकुन रोह्ति इन्जेर दुनियतुर करि कियना इत्तेके, वूरकुन मह्गा मीरि कीम.
22-23 निमे नह्गा मंति.
नना निह्गा मंतोन.
नाकुन सीति अद मय्मतुन वूरकुन सीतोन.
मरट इंके उंदि आसि मत्तपे, वूर गिर उंदि आसि मंदना.
अस्केन निमे नाकुन सारि कीति इन्जेर अनि नाकुन लाड कीतपे, वूरकुन कीसेर मंति इन्जेर दुनियतुर करि कींतेर.
24 “बाबा!
निमे नाकुन सीति वूर, ना बरोबर मन्जेर, नाक सीता मय्मतुन वूर सूडना इन्जेर कोर्सेर मंतोन.
बारितेके, कलि गडे माय्वक मुनेतले नाकुन लाड कीति.
25 नियत्नोर बाबा!
दुनियतुर नीकुन करि कीसेर सेलुर बति, नना करि कीतोन.
निमेय नाकुन रोह्ति इन्जेर, वीर सिस्यलिर करि कीतेर.
26 निमे बोनि इंवल वूरकुन तोह्चेरेन मंतोन अनि उंडे वेले तोहंतोन.
नाकुन निमे लाड कीति.
अह्ने वूर गिर नाकुन पेर्मा कियना अनि वूरङ दिल्क्नगा नना कुद मंदना इंवले नावा इचा” इन्जेर येसु पार्तना कीतोर.