16
1 “मिरट बरोसतल बह्के माय्वक्ने मंदना इन्जेरेन इव गोस्टिङ वेह्तोन.
2 वूर मीकुन समाज्नल* अलदि वाटंतेर.
मीकुन जक्वल हर वोरोर तना बगवंतना सेवा कीसेर मंतोन इंवल वकत वासेर मंता.
3 बाबोन अनि नाकुन वूर करि किय्वा काड्कि, इहिन कींतेर.
4 इहिन जर्ग्नेके, इवेन बारेते मुनेने मीकुन वेह्तोन इन्जेर हेतु कीकिट, इन्जि वेह्चेर मंतोन.
पवित्रा आत्मतङ काम्क
“इचोङ रोज्क नना मी सङने मत्ता काड्कि, मोदोल इव गोस्टिन बारेते वेह्मकि.
5 बति इंके नना नाकुन रोह्वल बाबोनगा सोन्जेर मंतोन.
तेर बति, मिह्गटल वोरोर गिर ‘निमे बगा दांति?’
इन्जेर पूसि कीसेर सेल्विट.
6 इव गोस्टिङ नना मीकुन वेह्ता काड्कि, मीवङ दिल्क पूरो दुक्सते निन्चि मंतङ.
7 नना सोत्तेकेन, मीकुन पाय्दा आंता.
नना सोंदा बीगर, मी सङा मन्जि मदत किय्वल पवित्रा आत्मा मिह्गा वायो.
नना सोत्तेकेन अद आत्मतुन मिह्गा रोहंतोन.
इद सतेम आंद.
8 अद पवित्रा आत्मा वासि, पापुन बारेते, नियतुन बारेते अनि तस्वतुन बारेते दुनियतुरकुन तोहंता.
9 ना पोरो बरोसा इर्वा काड्कि, वूर पाप कीतेर इन्जेर पवित्रा आत्मा तोहंता.
10 नना बाबोनगा दांतोन* अनि इङेडल नाकुन मिरट सूड्वा काड्कि, नना नियत्नोना इन्जेर अद पवित्रा आत्मा तोहंता.
11 इद दुनियतोर अदिकारि सय्तंदुन तस्वा जर्ग्ता.
अदेन साटि, बगवंतल गिर इद दुनियतुरकुन तस्वा कींतोर इन्जेर पवित्रा आत्मा तोहंता.
12 नना मीकुन वेह्वलिक उंडे वेले गोस्टिङ मंतङ बति, मिरट अवेन सोसि किया पर्विट.
13 अद पवित्रा आत्मा वासि, सतेमुन बारेते वेहंता.
अद मीकुन बर्पुर सत्नेके ताकुसंता.
अद तंवा तनय बतय वेहो.
तना केन्ज्तङ अवेने वेहंता.
बविसत्ने जर्ग्वलिकुन बारेते गिर वेहंता.
14 अद आत्मा नना वेह्तङ गोस्टिङ येच्चि मीकुन वेह्ता काड्कि, नाकुन मान पुटंता.
15 बाबोनगा मंवलिक सम्दो गिर नावङ आंतङ.
अदेन साटि, पवित्रा आत्मा नना वेह्तनल येच्चि वेहंता इत्तोन.
दुक्सा सोन्जि आनंद वाय्वल
16 “कहि रोज्क आता पेजे नाकुन मिरट सूड्विट.
बति उंडे कहि रोज्क आता पेजे नाकुन सूडंतिट” इन्जेर सिस्यलिरकुन वेह्तोर.
17 इद गोस्टि केन्चि कहितुर सिस्यलिर, “‘कहि रोज्क आता पेजे नाकुन मिरट सूड्विट.
बति उंडे कहि रोज्क आता पेजे नाकुन सूडंतिट.
नना बाबोनगा दांतोन’ इन्जेर मा सङा बततुन साटि वेह्चेर मंतोर?”
इन्जेर तम्वा तमा वड्क्तेर.
18 “‘कहि रोज्क आता पेजे’ इन्जेर बततुन बारेते वेह्चेर मंतोर?
वोर वेह्वल गोस्टि माकुन अर्तम आसेर सेले” इन्जेर इत्तेर.
19 तनकुन पूसि किय्ले आय्वल गोस्टितुन येसु करि कीसि, “‘कहि रोज्क आता पेजे नाकुन मिरट सूड्विट.
बति उंडे कहि रोज्क आता पेजे नाकुन सूडंतिट’ इन्जेर वेह्ता गोस्टितुन बारेते मीवा मिरट बतङ वड्क्सेर मंतिट?”
इन्जेर उल्टा वूरकुन पूसि कीतोर.
20 अनि, “मिरट दुक्सते आडंतिट बति, दुनिया आनंद येतंता.
मिरट आडंतिट बति, मी दुक्सा मारिसि आनंद आयर.
इद सतेम आंद.
21 वेय्लो येर पूर्वल गट्का वाता काड्कि, वातङ नोपिना दुक्सतुन बोगे मांता.
बस्केते मोड्डे सेलेके मोड्डन जल्मा सींतयो, अस्के दुनियते उंदि जीवतुन जल्मा सीतोन इंवल आनंद्ने, तना बोगे माता दुक्सतुन मर्न्गंता.
22 अह्ने मिरट इंके दुक्सा येच्चेर मंतिट.
बति मीकुन उंदुंदि जोका सूडंतोन.
अस्के मीवङ दिल्क्ने मंवल आनंदुन बोरे तेंड्सि वाटा परुर.
23 अद येलते मिरट नाकुन बतय पूसि किया लागो” इन्जेर वूरकुन वेह्तोर.
अस्के येसु, “मिरट ना पोरोडे बाबोन बतल तल्क्तेके गिर, अद मीकुन पुटंता.
इद सतेम आंद.
24 इंके वेरि मिरट ना पोरोडे बतय कोर्मकि.
मी आनंद बर्पुर आयन साटि, तल्क्सेरेन मंट.
मीकुन तप्वक सिय्वल जर्गंता.
25 इव गोस्टिङ मी सङा नमुनना रूप्ने वेह्तोन.
बति उंडे बस्केने नमुनना रूप्ने वेहोन.
बाबोन बारेते, मत्ता तीर नना मीकुन अर्तम आनल वेह्वल वकत वासेर मंता.
26-28 नना बाबोनगटल इद दुनियते वातोन.
इंके दुनियतुन सुटि कीसि बाबोनगा सोन्जेर मंतोन.
मिरट नाकुन पेर्मा कीसि, नना बगवंतनल वातोन इन्जेर बरोसा इर्ता काड्कि, बाबोये मीकुन लाड कीसेर मंतोर.
अद वकत्ने नना बाबोन मी साटि कोर्वल जुरत सेले.
बति मिरट ना पोरोडे बाबोन कोरंतिट.
वोर मीकुन सींतोर” इन्जेर वूरकुन वेह्तोर.
29 अस्के सिस्यलिर, “इचुला!
इंके निमे नमुनना रूप्ने आय्वा कुला कुला वेह्चेर मंति.
30 बोरे वोरोर सवल्क पूसि किय्वल जुरत सेले.
इंके नीकुन सम्दि टावा इन्जेर माकुन अर्तम आता.
इदेन हिंदल निमे बगवंतनल वाति इंवडुन बरोसा कींतोम” इन्जेर वेह्तेर.
31 ते येसु, “इंके नह्गा करल बरोसा कीसेर मंतिट कि?
32 सूडट!
नाकुन वोरोने सुटि कीसि, मिरट बेंदुर हके परर आय्वल वकत वासेर मंता.
अद इंके वासिन मंता तेर बति, नना वोरोना आयोन.
बाबो ना सङा मंतोर.
33 ना हिंदल, मीकुन सांति वायना इन्जेर इव गोस्टिङ वेह्चेर मंतोन.
दुनियतगा मीकुन दुक्सङ अनि तक्लिब्क वांतङ.
बति अव सम्दिन नना मेय्सि मंतोन.
अदेन साटि मिरट गटि-दीर्यते मंट” इन्जेर वूरकुन वेह्तोर.