येसुये करल वेलि आंदुर
15
1 सिस्यलिर येसुन सङा अहन सोन्जेर मनेके, “नना करल आङुर वेलिता आंदुन.
ना बाबो अद आङुर वाडितुन माल्कल आंदुर.
2 नह्गटल
आङुर वेलि
साद्वलिक कांदन उंडे इचुर वेले सादना इन्जेर अवेनङ कोड्डिङ कत्रि कींतोर.
3 नना मीकुन वेह्तङ गोस्टिन हिंदल, मीवङ पाप्क इंवलिक कोड्डिङ कत्रे मासि, सुदुड आसि तयर मंतिट.
4 नह्गा उंदि आसि मंट.
मिह्गा नना मंदंतोन.
कांदा आङुर वेलितगा जोडे मासि मंदा बीगर बहंते सादोयो, अह्ने नह्गा उंदि आसि मंदा बीगर मिरट चोकोट्नङ काम्क किया पर्विट.
5 “नना आङुर वेलिता आंदुन.
मिरट नह्गा कोड्स्तङ कांदङ आंदिट.
बोर्ते नह्गा मंदंतोरो अनि वोन्गा नना मंदंतोनो, वोर उंडे वेले चोकोट्नङ काम्क कींतोर.
नाकुन टूटे मासि मिरट बतय किया पर्विट.
6 बोर्ते नह्गा मनोरो, वोर पासि वाड्ता कांदा वत्तपिनय वत्तंतोर.
आतङ वत्तङ कांदन माय्नलिर मीरि कीसि तड्मितगा वाटंतेर अनि अव वेंतङ.
7 नह्गा मिरट अनि मिह्गा नावङ गोस्टिङ मत्तेके, मीकुन इस्टम वाततुन कोरट.
अद मीकुन पुटंता.
8 मिरट चोकोट्नङ काम्क किय्वडुन हिंदल, ना बाबोन मय्मा वांता.
इव सूड्सि, मिरट ना सिस्यलिर इन्जेर दुस्रुर करि कींतेर.
9 बाबो नाकुन बहन लाड कीतोरो, अह्ने नना मीकुन लाड कीतोन.
नावा लाड्दगा निल्सि मंट.
10 नना बहंते बाबोनङ हुकुम्क पिय्सि, ताक्सेर बाबोना लाड्दगा निल्सि मत्तोनो, अह्ने मिरट गिर नावङ हुकुम्क पिय्सि ताककिट्ते, नावा लाड्दगा निल्सि मंदंतिट.
11 नावा आनंद मी रोपो मंदना अनि अद आनंद बर्पुर आयना इन्जेरेन, इव गोस्टिङ मीकुन वेह्चेर मंतोन.
12 “नना मीकुन लाड्दे सूड्ता तीरे, मिरट गिर वोरोन वोरोर पेर्मते सूडना.
इदे नावा हुकुम आंद.
13 सोप्तलिर साटि तंवा परन सिय्वडुन तेर अदिक पेर्मा किय्वल बोरे सेलोर.
14 नना मीकुन हुकुम सीता तीर ताक्तेके, मिरट नावुर सोप्तलिर आसि मंदंतिट.
15 नना इङेडल मीकुन दासिर इन्जि केय्वक्ने, सोप्तलिर इन्जेर केयंतोन.
बारितेके माल्कनङ पिलन्क दासिरकुन टावा मनो.
बति नना ना बाबोनल केन्ज्तङ सम्दो गोस्टिङ मीकुन वेह्तोन.
16 नाकुन मिरट आच्मकि बति, ननय मीकुन आच्चि, नेमि कीतोन.
बस्केट निच्चि मंवल पंडि सीनल मिरट चोकोट्नङ काम्क कियना इंवले नावा इचा.
अहन कीतेके, ना पोरोडे बाबोन बतल तल्क्तेके गिर, अद मीकुन पुटंता.
17 मिरट वोरोन वोरोर पेर्मा कियना इन्जेरेन इद हुकुम मीकुन सीतोन.
दुनियतुर मीकुन मेचुर
18 “दुनियतुर मीकुन मेच्वेके, मीकुन तेर मुने नाकुन मेच्मकि इन्जेर हेतु इरट.
19 मिरट दुनियतुर दात मन्मड इत्तेके, वूर मीकुन पसंद कींदिर.
बति मिरट दुनियतुर आय्विट.
बारितेके मीकुन दुनियतुर्गटल आच्तोन.
अदेन साटिने इद दुनियतुर मीकुन पसंद कियुर.
20 ‘दासि तंवोर माल्कन तेर डगुर आयोर’ इन्जि, इदेन मुने वेह्ता गोस्टितुन हेतु इरट.
लोकुर नाकुने दुक्सा बोगि कियुस्ता काड्कि, मीकुन गिर दुक्सा बोगि कियुसंतेर.
वूर नावा गोस्टि पिय्सि ताक्तेके, मीवा गिर गोस्टि पिय्सि ताकंतेर.
21 नाकुन रोह्तोर बाबोन वूर वोड्कि किय्वा काड्कि, ना हिंदल इव सम्दो मीकुन कींतेर.
22 “नना बोदा वेह्ले वाय्वक इत्तेके, वूर पोरो पाप्ना कसुर मंवेके सोंदु.
बति नना वाता काड्कि, इंके वूरकुन तम्वा पाप्ना कसुडल तपुसिय्ले मोका सेले.
23 नाकुन मेचोर वोर, ना बाबोन गिर मेचोर.
24 बोरे कियुर अव चमत्कार्क नना किय्वक इत्तेके, वूर्गा पाप्ना कसुर मंवेके सोंदु.
बति नना कीतङ चमत्कार्क वूर सूड्तेर.
तेर बति नाकुन अनि ना बाबोन मेच्चेर सेलुर.
25 ‘बतय कारन सेल्वेके गिर नाकुन मेच्चेर सेलुर’ इन्जेर दर्मा-ग्रंत्ना वचन बर्पुर आयन साटिने इहिन जर्ग्ता.
26 बाबोनगटल मीकुन मदत किय्ले पवित्रा आत्मतुन रोहंतोन.
अद वाता पेजे ना बारेता सत्ना गवा मीकुन वेहंता.
27 मिरट गिर ना बारेते गवा वेहंतिट.
बारितेके, मोदोडल ना सङा मत्तुर आंदिट.