बाबोनगा वोय्वल सरि येसु आंदुर
14
1 “मिरट मी दिलकुन परेसन आया सिय्मट.
बगवंतनगा बरोसा इरट अनि नह्गा गिर बरोसा इरट.
2 ना बाबोना रोन वेले कम्रङ मंतङ.
अवेन तयर कीसि इर्ले, मुने सोन्जेर मंतोन.
अहन सेल्वक इत्तेके, मीकुन वेह्चि मनोन.
3 नना सोन्जि मी साटि जागा तयर कीता पेजे, नना बगते मंदंतोनो, अगा मिरट गिर मंले, उंदुंदि जोका वासि, मीकुन वोंतोन.
4 नना सोंवल जागता सरि मीकुन टावये” इन्जेर वूरकुन वेह्तोर.
5 अस्के तोमल, “पर्बु!
निमे बगा दांतियो माकुन टावा सेले.
ते अगा सोंवल सरि माकुन बहन वोड्कि आयर?”
इन्जेर इत्तोर.
6 अस्के येसु, “ननये सरिता, सतेम्ना अनि जीवता आंदुन.
ना बीगर बाबोनगा बोरे वाया परोर.
7 मिरट नाकुन वोड्कि कींदिट्ते, ना बाबोन गिर वोड्के मांदिट.
इंके वोन सूड्तिट अनि वोर मीकुन टावये” इन्जेर वेह्तोर.
8 अस्के पिलिप, “माकुन बाबोन तोहा पर्बु.
अचोरे माकुन आयर” इन्जेर इत्तोर.
9 ते येसु पिलिपुन, “इंके वेरि मी सङने मंतोन तेरे नाकुन वोड्कि किय्विटिय?
नाकुन सूड्तोर वोर, बाबोन सूड्तपे.
‘बाबोन माकुन तोहा’ इन्जेर बहन पूसि कीसेर मंति?
10 नना बाबोनगा अनि बाबो नह्गा मंतोर इन्जेर बरोसा किय्वि कि बतल?
नना मी सङा वेह्वलिक गोस्टिङ ना इचते वेह्चेर सेलोन.
ना रोपो मंवल बाबोये तंवङ काम्क कियुसेर मंतोर.
11 बाबोनगा नना अनि नह्गा बाबो मीरे मासि मंतोम इन्जेर बरोसा कीम्ट.
नना वेह्तङ गोस्टिन पिय्सि बरोसा किय्वेके, नना कीतङ मय्मतङ काम्क सूड्सि तेर बरोसा कीम्ट.
12 नना बाबोनगा सोंवडुन हिंदल, नह्गा बरोसा इर्वल नना कीतङ मय्मतङ काम्क कींतोर.
वोर नना कीतन तेर डगुक काम्क कींतोर.
इद गोस्टि सतेम आंद.
13 ना पोरोडे बतल तल्ककिट तेर मरिन हिंदल, बाबोन मान पुटन साटि, मिरट कोर्ता तीर कींतोन.
14 मिरट ना पोरोडे बतल कोर्तेके गिर अदेन कींतोन.
येसु पवित्रा आत्मतुन बारेते वेह्वल
15 “मिरट नाकुन पेर्मा कीकिट्ते, नावा हुकुम पिय्सि ताकंतिट.
16 ना बद्लि मीकुन मदत कीसेर, बस्केट मी सङा मंले, उंदितुन सारि कीम इन्जेर नना बाबोन विनंति कींतोन.
17 अद मदत किय्वल पवित्रा आत्मा आंद.
सतेमुन बारेते अद मीकुन वेहंता.
इदेन हिंदल, मीकुन बगवंतना आत्मा टावा.
अद आत्मा इंके मी सङा मंता अनि मर्ला मी रोपो मंदंता.
बति दुनियतुर तान सूड्सेर सेलुर अनि करि कीसेर सेलुर.
अदेन साटि वूर, अद आत्मतुन वोपुर.
18 “मीकुन पोसटिर दात सुटि कियोन.
मिह्गा वांतोन.
19 उंडे कहि रोज्क्ने इद दुनियतुर नाकुन बस्केने सूडुर.
बति मिरट नाकुन सूडंतिट.
बारितेके नना पिस्ता तीरे, मिरट गिर पिसंतिट.
20 अद नेटि नना बाबोनगा, मिरट नह्गा अनि नना मिह्गा मंतोन इन्जेर करि कींतिट.
21 नावङ हुकुम्क वोप्सि, अवेन पिय्सि ताक्वल नाकुन लाड कींतोर.
नाकुन पेर्मा किय्वन ना बाबो पेर्मा कींतोर.
नना गिर वोन लाड कीसि, नावा ननय वेह्चि तोहंतोन” इन्जेर वेह्तोर.
22 अस्के यूदल (वेर इस्करियोत नाट्नोर यूदल आयोर), “पर्बु!
दुनियतुन आय्वा सिरिप माके बारि पावे मांतोन इंति?”
इन्जेर येसुन पूसि कीतोर.
23 ते येसु, “नाकुन पेर्मा किय्वल नावा गोस्टि पिय्सि ताकंतोर.
आतोन ना बाबो लाड कींतोर.
वोन्गा वासि ममोट मंदंतोम.
24 बति नाकुन पेर्मा कियोर वोर, नावा गोस्टि पिय्सि ताकोर.
मिरट केन्ज्वलिक गोस्टिङ नावङ आयोङ बति, नाकुन सारि किय्वल बाबोनङ आंदुङ.
25 नना मी सङा मनेकेने, इव गोस्टिङ मीकुन वेह्तोन.
26 बति बाबो ना पोरोडे सारि किय्वल पवित्रा आत्मा मीकुन सम्दो करुसंता.
अनि अद नना वेह्तङ सम्दोन गिर मीकुन हेतु कियुसंता.
27 “सांतितुन मीकुन सीसि दांतोन.
नावा सांतितुने मीकुन सीसेर मंतोन.
* दुनिया सीसेर मत्ता तीर नना मीकुन सीसेर सेलोन.
मीवङ दिलकुन तकपिका आया सिय्मट अनि वेरिमट.
28 ‘नना सोन्जि, मिह्गा वांतोन’ इन्जेर वेह्ता गोस्टि केन्ज्तिट.
बाबो नाकुन तेर डगुर-पान वाले आता काड्कि, मिरट नाकुन लाड कीतेके, बाबोनगा सोन्जेर मंतोर इन्जेर वेले आनंद्ने मंदिट.
29 मिरट बरोसा इर्किट इन्जेर इव जर्ग्वक मुनेन, वेह्चेर मंतोन.
30 इद दुनियतोर अदिकारि सय्तन वासेर मंतोर.
अदेन साटि उंडे वेले जेल मी सङा वड्कोन.
ना पोरो वोन बतय अदिकार सेले.
31 बति नना बाबोन लाड कीसेर मंतोन इन्जेर, इद दुनियतुरकुन करे मानल, बाबोना हुकुमुन पिय्सिने इहिन कीसेर* मंतोन.
तेदट!
इगेटल दाकट” इन्जेर इत्तोर.