मार्क 14

येसुन जक्ले पिलन वाट्वल

(मत्तयि 26:1-5; लूका 22:1-2; योहन 11:45-53)

1 पस्का^* सडदुन अनि तातो पिंडितङ सारिङ सुर्वल सडदुन रंड रोज्क मुनेतल, डगुक कटोडलिर अनि सास्तिरिर, ‘येसुन मक्डिते पिय्सि जकुसन’ इन्जेर पिलन वाड्सेर मत्तेर.

2 “बति इद येडुङ रोज्क्ना सडदुन रोपो वोन जकुस्वा, उंदि मोका अहन कियुस्तेके पर्जतुन नड्डुम लोलिङ आंतङ” इन्जेर वड्क्तेर.

बारिता सेंटुन येसुना तलत पोरो वेडिवल

(मत्तयि 26:6-13; लूका 12:1-8)

3 अस्के येसु, बेतनिया इंवल नाटे पेर्सा नोपिते मन्जि, चोकोट आतोर वोर सीमोंता रोन तिंदन साटि उच्चि मत्तोर.

अदे वकत्ने उंदि वेय्लो नारिता बंडता कोपतगा वेले मह्‍ग्ना सेंट^* पिय्सि वाता.

अद कोपता मुचडुन वोह्‍चि, अद सेंटुन येसुना तलत पोरो वेडिता.

4-5 अद सूड्सि, अगा मंवलिर कहितुर सोङुन वासि “अरेरे!

वटि आगयेन सेंटुन बारि करब किय्वल?

तान वोम्तेके, मूंद नुह्‍क कूरतङ बिलङ^* वांदुङ.

अवेन गरिब लोकुरकुन सिया वांदु” इन्जेर तान राङ्तेर.

6 बति येसु वूरकुन सूड्सि, “दब मंट!

तान तक्लिब किय्मट.

ना साटि अद वेय्लो चोकोट्नय काम कीता.

7 गरिब लोकुर मी नड्डुम बस्केट गिर मंदंतेर.

मीकुन बस्के पसंद वांतयो अस्के, वूरकुन मिरट मदत किया वचो.

बति नना बस्केट मेंदोडा रूप्ने मी नड्डुम मनोन.

8 नावा मेंदोडुन वीच्नगा मिस्ले वोयन साटि सेंट वेडिसि सजि कीता.

अद वेय्लो तना बतल किया परनल मत्तयो अद कीता.

9 इद चोकोट्ना कबुर परिपन्चम्नगा बगा-बगते पचर आंतयो, अगा इद वेय्लोन अनि इद वेय्लो कीता कामुन हेतु कींतेर.

इद सतेम आंद” इन्जेर इत्तोर.

इस्करियोत नाट्नोर यूदल येसुन हव्लि किय्ले वोप्वल

(मत्तयि 26:14-16; लूका 22:3-6)

10 अद आता पेजे बारा जन्क सिस्यलिर्गटल वोरोर इस्करियोत नाट्नोर यूदल डगुक कटोडलिर्गा सोत्तोर.

अनि “येसुन मी केय्दे हव्लि कींतोन” इन्जि वूरकुन वेह्‍तोर.

11 ते अद केन्चि वूर बेय कुसि आतेर.

अनि “नीकुन कोतङ सींतोम” इन्जेर वोप्तेर.

अस्केडल वोर यूदल, येसुन वूरा केय्दे पिय्सि सिय्ले मोका सूड्सेर मत्तोर.

येसु आक्रिता रात्ना जेवुन किय्वल

(मत्तयि 26:17-25; लूका 22:7-14, 21-23; योहन 13:21-30)

12 तातो पिंडिते सारिङ सुर्सि तिंवल सड वाता.

अद सड्दा मोदोडा दिवोसुन नेटि, गोरे पिलतुन कोय्वल रिवज ताक्सेर मत्ता.

अंटित सिस्यलिर येसुनगा वासि, “पस्का जेवुंतुन बगा तयर कियना इंति?”

इन्जेर पूसि कीतेर.

13 ते येसु तंवुर सिस्यलिर्गटल इविरकुन केय्सि, “मिरट नगुडे नेङ्नेकेने, वोरोर मायनल बुड्डिते येर तोच्चि, मीकुन बेटे मांतोर.

वोर माय्नन पेजेय सोन्जि, वोर नेङ्वल रोतगा मिरट गिर नेङट.

14 अनि अद रोतोर माल्कन तोडो, ‘“ना सिस्यलिर सङा पस्का सड्दा जेवुन कीनल, कम्रा बगा मंता?”

इन्जि मा गुरुजि पूसि कीसेर मंतोर’ इन्जेर, वोन पूसि कीम्ट.

15-16 अस्के वोर, सम्दो सव्लत्ने तयर मंवल मिदेता डगुर कम्रतुन तोहंतोर.

अगा मिरट सड्दा जेवुंतुन तयर कीम्ट” इन्जेर वेह्‍तोर.

ते वूर सिस्यलिर नगुडे सोत्तेर.

येसु वेह्‍ता तीरे सम्दो जर्ग्ता.

अगा वूर पस्का जेवुन तयर कीतेर.

17 अंटित पोद्रेक्ना येलते, येसु तंवुर बारा जन्क सिस्यलिर सङा मीरे मासि अगा सोत्तोर.

18 वूर सम्दिर जेवुन किय्ले उच्चि मत्तेर.

येसु सिस्यलिर सङा आक्रिता जेवुन किय्वल

अस्के येसु “मिह्‍गटल वोरोर इत्तेके, ना सङा तिन्जेर मंवल नाकुन दोका सींतोर. इद सतेम आंद” इन्जेर वेह्‍तोर.

19 अद केन्चि, वूरकुन बेय दुक्सा लाग्ता.

ते, “नना कि बतल?”

इन्जेर वूर्गटल हर वोरोर येसुन पूसि कीतेर.

20 ते, “मी बारा जन्कनल बोर्ते ना बरोबर सारितुन कोजतगा मुडुसि, तिंतोरेय वोरे नाकुन दोका सींतोर.

21 अनि स्वर्ग्नोर माय्नन बारेते दर्मा-ग्रंत्नगा लिहि कीता तीर वोर परन सुटि कींतोर.

बति वोन दोका सिय्वन वेले दुक्सा वांता.

आतोना जल्मा आय्वक मन्मड इत्तेके, चोकोट मंदु” इन्जेर वेह्‍तोर.

येसु तंवा मेंदोल अनि नेतुडुन बारेते वेह्‍वल

(मत्तयि 26:26-30; लूका 22:15-20; 1वा कोरंति 11:23-25)

22 अहन सम्दिरे तिन्जेर मनेके, येसु सारितुन पिय्सि बगवंतन पार्तना कीसि, सिस्यलिर्गा सीसेर, “इदेन नावा मेंदोल इन्जि,^* तिंट” इन्जेर वेह्‍तोर.

23 अह्‍ने उंदि चंबुतगा आङुर्क्ना रसा पिय्सि बगवंतन पार्तना कीसि वूर्गा सीतोर.

अदेन वूर सम्दिर उटेर.

24 अहन वूर उटा पेजे, “बगवंतन अनि पर्जत नड्डुम इद नावा नेतुर पूना नियम आसि मंदंता.

बद इत्तेके, नावा नना बलिदान सिय्वल नेतुडुन हिंदल, वेलेटिरा पाप मापि आंता.

25 बगवंतना राज्नगा मी बरोबर पूना आङुर रसा उंवल दिवोस वेरि, इङेडल अदेन उंनोन इन्जि, मी सङा वेह्‍चेर मंतोन.

इद सतेम आंद” इन्जेर वेह्‍तोर.

26 अद आता पेजे वूर कीर्तन वार्सि, ओलिवा मरक्ना गुटत पोरो सोत्तेर.

येसु पेतुरतुन दम्कि सिय्वल

(मत्तयि 26:31-35; लूका 22:31-34; योहन 13:36-38)

27 अहन सोन्जेर मनेके येसु,

“‘बगवंतल गोरेङ गाय्किन पासि जकंतोर!

अस्के गोरेङ सम्दो गिरे बुज्डे मासि दांतङ!’

⁺

इन्जेर ग्रंत्नगा लिहि कीसि मत्ता तीर, मिरट सम्दिरे नह्‍गटल बुज्डे मासि दांतिट.

28 बति बगवंतल नाकुन नेंडुस्ता पेजे, मीकुन तेर मुने नना गलिलया येरियते दांतोन” इन्जेर वेह्‍तोर.

29 अद केन्चि पेतुरु, “सम्दिर परर आनिर बति, नना नीकुन असले सुटि कीसि सोनोन” इन्जेर इत्तोर.

30 ते, “ना बारेते निमे, ‘वोर बोर आंदुरो टावा सेले’ इन्जेर, मूंद जोकङ लबड वेहा बीगर, नेटा रातुन रंड जोकङ गोग्डि कूसो.

इद सतेम आंद” इन्जेर येसु जवब सीतोर.

31 बति पेतुरु, “नना नी बरोबर उंदि मोका परन सुटि किय्वल गट्का वातेके, सुटि कीका बति, असले अहन वेहोन” इन्जेर वेह्‍तोर.

ते मेय्तुर सम्दिर सिस्यलिर गिर येसुन अदे तीर्दे वेह्‍तेर.

येसु गेत्सेमने वाडितगा पार्तना किय्वल

(मत्तयि 26:36-46; लूका 22:39-46)

32 अस्के येसु कड्मतुर सिस्यलिर सङा गेत्सेमने इंवल वाडितगा सोत्तोर.

अनि वूर सङा, “नना अगा सोन्जि पार्तना कीसि वानल मिरट इगे उदट” इन्जेर वेह्‍तोर.

33 अनि पेतुरतुन, याकोबुन अनि योहंतुन तन सङा उंडे जरसि मुने वोतोर.

येसु तंवा मंदगा दुक्सा अनि पिकर किय्वल सुरु कीतोर.

34 वूर सङा येसु, “नावा परन दांता इत्तपिनय नाकुन बेय दुक्सा अनि पिकर लाग्सेर मंता.

मिरट इगे आगट अनि ना बरोबर चेतो मंट” इन्जेर वेह्‍तोर.

35-36 अनि जरसि लक सोन्जि, दर्तुरित पोरो मुर-टोङ्रङ कोट्सि, “ना बाबा!

इद वकतुन वीडुसनल मोका मत्तेके, नह्‍गटल वीडुसा.

नी सङा आयो अद बतय सेले.

इद दुक्सते निन्चि मंवल कोजतुन नह्‍गटल लङ जर्गुसा.

तेर बति, नावा इस्टम्ने आयो, सिरिप नीवा इचा तीरे जर्गुसा” इन्जेर पार्तना कीतोर.

37 मल्सि वासि सूड्तेके, तंवुर सिस्यलिर नरुम्सेर दिस्तेर.

ते पेतुरतुन सङा, “सीमोनु, नरुम्सेर मंतिय!

उंदि गंटमेन गिर ना बरोबर चेतो मंदा पर्विय?

38 कटिंता परिक्सा वानेके, तान्गा कोंडे माय्वक मंले, बगवंतन दिहंते पार्तना कीम्ट.

आत्मा तयर मंता बति, मेंदोडगन जिगि सेले” इन्जेर पेतुरतुन सङा इत्तोर.

39 येसु उंडे मल्सि सोन्जि, मोदोल कीतपे पार्तना कीतोर.

40 मल्सि वासि सूड्तेके, वूर उंडे गिर नरुम्सेरेन दिस्तेर.

वूर बेय जप्ने अर्सि जोपुन आपुसिया पर्मकि.

ते येसुन बतल इन्जेर जवब सियनयो वूरकुन अर्तम आय्मकि.

41-42 मूडवा जोका गिरे येसु मल्सि वूर्गा वासि, “मिरट उंडे गिर नरुम्सेर आरम येच्चेर मंतिटिय?

सूडट!

स्वर्ग्नोर माय्नन पापिरा केय्दे हव्लि किय्वल गट्का वाता.

अचुला!

नाकुन दोका सिय्वल वासेर मंतोर” इन्जेर वेह्‍तोर.

येसुन पिय्सि वोय्वल

(मत्तयि 26:47-56; लूका 22:47-53; योहन 18:3-12)

43 येसु अहन वेह्‍नेकेते बारा जन्क सिस्यलिर्गटल इस्करियोत नाट्नोर यूदल वातोर.

डगुक कटोडलिर, सास्तिरिर अनि पेदोल्क सारि कीतुर वूर पर्जा तम्वङ केय्क्ने तल्वर्क, डुड्डुङ पिय्सि यूदन पेजेय वातेर.

44 वोर दोका सिय्वल, “नना सोन्जि बोंते मुका बुरंतोनो, वोन मिरट पियट” इन्जेर मुनेने अदेन बारेते वेह्‍चि, पिलंते वातोर.

45 अदेन हिंदल येंटने यूदल येसुन करुम सोन्जि, “गुरुजि!

नीकुन दंडोस” इन्जेर मुका बुर्तोर.

46 ते पिय्ले वातुर वूर येसुन पोरो मुच्लि अर्सि गटा-गिटा पिय्तेर.

47 ते येसुन बग्ला निल्सि मंवल वोरोर, तंवा लाम रूसिते पेर्सोर कटोडनोर सेव्कना केवितुन तिवुस्तोर.

48-49 अस्के येसु, “कले-कङ्रन पिय्ले वातपिनय तल्वर्क अनि डुड्डुङ पिय्सि बारि वातिट?

नना हर दिवोस मंदिर्तगा उच्चि बोदा वेह्‍नेके, बारि नाकुन पिय्मकि?

बति पर्वक्तलिर दर्मा-ग्रंत्नगा लिहि कीतङ वचन्क पूरे माय्लेने, इद तीर्दे जर्ग्ता” इन्जेर वेह्‍तोर.

50 अस्के सिस्यलिर सम्दिर सुटि कीसि ⁺ परर आतेर.

51-52 वोरोर डियोर येसुन पेजेय पेजेय सोन्जेर मत्तोर.

वोन गिरे वूर पर्जा पिय्तेर.

ते तंवा लङुटितुन सुटि कीसि, कुडेकेय वोर गिरे परर आसि सोडितोर.

यूदुल्क्नुर अदिकारिर उच्चि मंवल

येसुन यूदुल्क्नुर अदिकारिर मुने निपुसिय्वल

(मत्तयि 26:57-68; लूका 22:54-55, 63-71; योहन 18:13-14, 19-24)

53 वूर येसुन पिय्सि पेर्सोर कटोडना रोन वोतेर.

अगा वेलेटिर डगुक कटोडलिर, सास्तिरिर अनि पेदोल्क मीरे मासि मत्तेर.

54 पेतुरु, येसुनल लक मन्जेर पेजेय पेजेय पेर्सोर कटोडना आव्रतगा वातोर.

सिपायिर बरोबर वोर गिर पीनि आर्ले, आक्टितगा उत्तोर.

55-58 डगुक कटोडलिर अनि संहेद्रिंतुर मेय्तुर अदिकारिर सम्दिर येसुन जक्ले, लबड गवन साटि मह्‍क्तेर.

बति वूरकुन बवे गवङ पुट्मकि.

^* वेलेटिर लोकुर लबड गवा वेहन साटि मुने वातेर.

बति येसुना जीवा येतनल उंदि गिर कारन वूरकुन पुट्मकि.

आक्रित इविर माय्नलिर वासि, “‘माय्नलिर निव्डि कीता इद मंदिरतुन उल्टि कीसि, मूंद रोज्क्ने माय्नलिर दोहा परुर आतल मंदिर दोहंतोन’ इंवल ममोट केन्ज्तोम” इन्जेर वेह्‍तेर.

59 बति वोरोना गवा वोरोन कट्मकि.

60 अद आता पेजे, पेर्सोर कटोडल तेच्चि सम्दिर मुने निल्सि, “नी पोरो इव कसुक वाट्सेर मंतेर.

बारि बतय जवब सीसेर सेल्वि?”

इन्जेर येसुन पूसि कीतोर.

61 बति येसु जवब सिय्वक दब मत्तोर.

ते उंडे वोर पेर्सोर कटोडल, “निमे बगवंतनोर मरि आय्वल किरिस्तुनि आंदि कि?”

इन्जेर पूसि कीतोर.

62 ते येसु, “हो!

ननय आंदुन.

सर्वा सक्ति वाले बगवंतना तिना बग्ला^* राजा-गादितगा उच्चि मंवल स्वर्ग्नोर मायनल, हाबडङ टेपन पोरो रेय्सि वाय्वल मिरट सूडंतिट” इन्जेर वेह्‍तोर.

63 पेर्सोर कटोडल सोङुन वासि तंवङ कप्डिङ सरुसि, “माकुन दुस्रोक उंडे बव गवङ पह्‍जे?

64 वोर बगवंतन रेह्‍चि वड्क्वल मिरटे कुद केन्ज्तिट.

ते इंके बतल कीकट इंतिट?”

इन्जेर वूरकुन उल्टा पूसि कीतोर.

सम्दिर गिरे, “वोन मरंता सिक्सा वाटना” इन्जेर निर्नय कीतेर.

65 अद आता पेजे, कहितुर येसुन पोरो उस्क्तेर.

उंडे कहितुर वोनङ कडकुन दोह्‍चि मुटि कीसि पासि, “बोर पातोमो पुंदा?”

इन्जेर चेडि कीतेर.

केप्सेर मंवलिर सिपायिर येसुन वोसि पातेर.

येसु नाकुन टावा सेले इन्जेर पेतुरु इंवल

(मत्तयि 26:69-75; लूका 22:56-62; योहन 18:15-18, 25-27)

66 पेतुरु अद रचतगा उच्चि मनेके, पेर्सोर कटोडनगा काम किय्वल पेडि करुम वाता.

67 अनि पेतुरतुन दिहंते सूड्सि, “निमे गिर नजरेत्नोर येसुन सङा मत्तोनिय आंदि सेलेय?”

इन्जेर पूसि कीता.

68 ते वोर पेतुरु, “निमे बतल इन्जेर मंतियो नाकुन अर्तम आसेर सेले” इन्जेर वेह्‍तोर.

अस्के येंटने गोग्डि कूस्ता^*.

69 अद काम किय्वल पेडि, मर्ला वोर पेतुरतुन सूड्सि, “वोर तप्वक येसुन सङा मत्तोर वोरे आंदुर” इन्जेर सिर्मुट मंवलिर सङा उंडे उंदि जोका वेह्‍ता.

70 ते पेतुरु उंडे उंदि जोका, “सेले-सेले, नना आयोन” इन्जेर इत्तोर.

जुलुक आता पेजे पेतुरतुन सङा अगा निल्सि मत्तुर वूर, “निमे गलिलयतोनि आता काड्कि, तप्वक वोर येसुन सङा मत्तोनिय आंदि” इन्जेर इत्तेर.

71 अहन इनेकेन, पेतुरु वोट वाड्सेर तंवा तनकुन सापेना सीसेर, “वोर माय्नन बारेते नाकुन टावा सेले” इन्जेर वेह्‍तोर.

72 अस्केने रेंडवा जोका गोग्डि कूस्ता.

ते पेतुरतुन तंवा सङा येसु, “गोग्डि रंड जोकङ कूस्वक मनेके, नना बोना आंदुनोयो टावा सेले इन्जि मूंद जोकङ लबड वेहंति” इन्जेर वेह्‍ता गोस्टि हेतु वाता.

ते वोर, बेय दुक्सते आड्वल मोदोल कीतोर.