परिसयुलकुन दात मंवा
12
1 अद वकत्ने हजर्क कोदि मांदि मीरे माता काड्कि, वोरोन वोरोर वोर्तो-पोर्तो दुर्सेर मत्तेर.
अस्के येसु मोदोल तंवुर सिस्यलिर सङा, “सोवुस्वल चीज बहंते पूरो पिंडितुन सोवुसंतयो, अह्ने कपट्ने मंवलिर परिसयुल्क, सम्दिरकुन पसि कींतेर.
वूर बारेते दिहंते मंट.
2 वूर किय्वलिक काम्क अनि दिल्क्नगा मंवलिक बवे गिर बह्रि अर्वक्ने मक्डिते मनोङ.
बारितेके मुच्चि इर्तङ अव अनि मकुसि इर्तङ अव सम्दो गिर तात्कर दिसनल उंदि वकत वासेर मंता.
3 अदेन साटि मिरट सिकटितगा वेह्ता हर उंदि वेड्चितगा केन्जा वांता.
रोपोडा कम्रनगा कुसये वेह्तङ अव गोस्टिङ रोह्क्नङ चतकुन पोरोडल पचर आंतङ.
माय्नलिरकुन आयो सिरिप बगवंतने वेरियट
4 “ना सोप्तलिर्निट!
मीकुन वेह्वल बतल इत्तेके, मेंदोडुन जक्वलिरकुन मिरट वेरिमट.
साता पेजे, वूर बतय किया परुर.
5 बति साता पेजे गिर, मीकुन पातडतगा वाट्वल अदिकार वाले बगवंतन वेरियट.
सिरिप वोने वेरियना इन्जेर मीकुन वेह्चेर मंतोन.
6 “सियुङ कोट्का पिटेन रंड कोतन येतुरिय?
तप्वक येतंतेर!
बति अवेनल उंदितुन गिर बगवंतल मर्न्गोर.
7 बेय वेले कोट्का पिटेन तेर मिरट अदिक विलुवतुर आंदिट.
मीवा तलतगा मंवलिक सम्दो केल्क गिर कह्चि मंतङ.
अदेन साटि वेरिवक्ने मंट.
नह्गा इर्ता बरोसतुन बारेते लजे माय्मट
8 “नना वेह्वल बतल इत्तेके, पर्जत मुने ना बारेते वोप्वन, स्वर्ग्नोर माय्नल गिर वोर टावा इन्जेर बगवंतनुर दूतलिर मुने वोपंतोर.
9 बति पर्जत मुने, ना बारेते वोपोर वोन, नना गिर बगवंतनुर दूतलिर मुने, वोन वोपोन इन्जि वेह्चेर मंतोन.
10 स्वर्ग्नोर माय्नन बोरे उल्टा वड्कनुर्ते, वोन मापि पुटंता.
बति पवित्रा आत्मतुन बोरे रेह्चि वड्कनुर्ते वोन असले मापि पुटो.
11-12 माय्नलिर मीकुन पिय्सि सुनगोक्नगा, अदिकारिर्गा तस्वा किय्ले वोनेके, बहन वड्कना अनि बतल वड्कना इंवडुन बारेते परेसन आय्मट.
बारितेके मिरट बतल वड्कना इंवल पवित्रा आत्मा अदे गट्कते मीकुन करुसींता” इन्जेर वेह्तोर.
चिक्टल माय्नना नमुना
13 अद मांदितल वोरोर, “गुरुजि!
बाबो कमय कीता जाय्जतुन तूसा इन्जि मा दादन वेहा” इन्जेर इत्तोर.
14 अस्के येसु, “दादा!
मीवा तस्वा किय्ले सेलेके, मी नड्डुम्ना गोस्टि तिवुस्ले नाकुन बोर नेमि कीतोर?”
इन्जेर वोन पूसि कीतोर.
15 अनि येसु मांदित सङा, “केन्जट!
नरिमन्कना पिस्वल वेले दन-दव्लतुन पोरो आदर आसि सेले.
लाल्सलिर आय्वक्ने दिहंते मंट” इन्जेर वेह्तोर.
पिसल दनेवंतना नमुना
16 अनि वूरकुन उंडे उंदि नमुना इहिन वेह्वल सुरु कीतोर: “वोरोर दनेवंतल मत्तोर.
वोना वाव्टे वेले पंटा पंड्ता.
17-18 अस्के वोर इद पंटता रासितुन इर्ले जागा सेले.
इङे बहन कीका?
इन्जेर सोन्च कीनेकेन, इहिन वोना मंदे वाता.
बतल इत्तेके, पडनङ वालेक चुडुक गोदमकुन उल्टि कीसि, अवे जागनगा डगुक गोदम्क दोहुसि, पंटता रासितुन अनि नावङ चीजकुन इरंतोन.
19 अस्के ना परंतुन सङा, ‘ना परंति, वेले सालकुन साटि आस्ति कमय कीसि इर्तोन.
सुक्ने मन, तिन, उन अनि आनंद येता’ इन्जेर वेहंतोन इत्तोर.
20 बति बगवंतल वोन, ‘ये पिसा!
इद रात नीवा परन दांता.
अस्के निमे कमय कीता आस्ति बोना आंता?’
इन्जेर पूसि कीतोर.
21 बगवंतना बाव-बक्तितगा बडे माय्वक्ने, सिरिप तंवा साटिने आस्ति कमय किय्वन इदे गति वांता” इन्जेर येसु वेह्तोर.
बगवंतना मोदोडा राज
22 अद आता पेजे सिस्यलिर सङा, “अदेन साटि नना मीकुन वेह्वल बतल इत्तेके, ‘ममोट जीवते मंले बतल तिंद्कोम?
मा मेंदोडुन पोरो बतल केर्कोम?’
इन्जेर परेसन आय्मट.
23 बारितेके तिंडितुन तेर परन मंवल मुकेता आंद अनि कप्डिन तेर मेंदोल मुकेता आंद.
24 “अव काककुन सूडट!
अव विजा वीतोङ, पंटा कोयोङ.
अवेन सिबिङ अनि गोदम्क सेलेङ.
तेर बति, बगवंतल अवेन पोसि कीसेर मंतोर.
मिरट्ते अव पिटे-पुरडुन तेर वेले विलुवतुर आंदिट.
25 अवेन साटि रंदि किय्वडुन हिंदल, मिह्गटल बोर पिस्वल कालमुन उंदि गंटमेचा बडि किया परंतोर?
बोरे बडि किया परोर!
26 अद चुडुसि गोस्टितुन गिर किया पर्वेके, मेय्तङ चीजकुन साटि, आगम बारि रंदि कींतिट?
27 “इव पुङक्नङ मरक बहन बेर्सेर मंतङो सूडट.
इव काया-कस्टम कियोङ अनि पाङुकुन साटि नूल गिर तयर कियोङ.
तेर बति अवेन मंता अद सोबा, अचोर डगुर सोलोमोन राजल केर्तङ पाङुक्नगा गिर सेले इन्जेर मीकुन वेह्चेर मंतोन.
28 नेंड पोय्सि, नाडि वच्चि, तड्मितगा वेय्वल जाडितुने बगवंतल इचोर सोबते निव्डि कींतोर.
ते बरोसा कमि वालिर्निट!
मीकुंते पन्चा-पाङुड तप्वक सींतोर.
29 अदेन साटि, ‘बतल तिन्कोम?
बतल उन्कोम?’
इन्जेर मह्क्सेर मन्मट.
अवेन बारेते बस्केट रंदि कीसेर अनुमानम्ने मन्मट.
30 मीकुन इव सम्दोना जुरत मंता इंवल मी बाबो बगवंतन टावये.
दुनियता पर्जा इव सम्दिन साटि पर्पेडे मांतेर.
31 बति मिरट बगवंतना राजुन मह्कट.
अस्के तान बरोबर इव सम्दोन गिर मीकुन सींतोर.
विस्वास अनि पार्तनतुन बारेते बोदा वेह्वल (11:5-13; 12:22-31; 1)
स्वर्ग्नगा मंवल जाय्जत
32 “चुडुर मंदतुन दात्नुर्निट वेरिमट.
मीकुन तंवा राज सिय्वल बाबोन वेले पसंद मंता.
33 मिह्गा मंवडुन वोम्सि, अव कोतन गरिबुन सीम्ट.
अनि पडनङ आय्वक्ने मंवलिक चन्चिङ स्वर्ग्नगा तयर कीम्ट.
अगा बस्केन मारो अद दंतुन कमय कीम्ट.
अगा कलिर अरुर अनि वेलुम गिर पियो.
34 बारितेके मीवा दन-दव्लत बगते मंदंतयो, अगने मीवा दिल गिर मंदंता” इन्जेर येसु वेह्तोर.
माल्कल वानेके बरोसतोर सेव्कल आसि मन
35 अनि येसु, “बगवंतना सेवा किय्ले नर्का, पियल तयर मंट.*
36 तम्वोर माल्कल मर्मिना जेवुंतल वासि, कावड तापि कीनेकेन कावड तेरिले सूड्सेर मंवलिर सेव्कलिर दात मिरट मंट.
37 वोर माल्कल मल्सि वानेके, चेतो मंवलिर आसिर्वाद येतंतेर.
इद सतेम आंद.
वोर माल्कल वासि, नडितगा सेला दोहंतोर अनि तंवुर सेव्कलिरकुन वह्डि कींतोर.
38 माल्कल बेय रात्नेन आयि, बेय सक्रेन आयि बस्के वातेके गिर, बूर्ते सेव्कलिर चेतो दिसंतेरो, वूर वेले आसिर्वाद येतंतेर.
39 इद गोस्टि करि कीम्ट.
बद गट्कते कले वांतोर इंवल रोतोर माल्कन करे मासि मत्तेके, वोर कले तंवा रोन वासि, कला सिय्वक्ने सूडंतोर.
40 अदेन साटि, सोन्च किय्विट आतल गट्कते वोर स्वर्ग्नोर मायनल वाय्वल मत्ता काड्कि, मिरट गिर अद तीर्दे तयर मंदना” इन्जेर वेह्तोर.
बरोसतुर सेव्कलिर
41 अस्के पेतुरु, “पर्बु!
इद नमुना मा साटिने वेह्ति कि, सम्दिर साटि वेह्ति?”
इन्जेर येसुन पूसि कीतोर.
42 ते येसु पर्बु, “तंवुर सेव्कलिरकुन बरोबर येलते तिंडि दोस्ले, माल्कल नेमि किय्वल बरोसतोर गियन वाले कारोबारि बोर आंदुर?
43 माल्कल मल्सि वाता पेजे, अद काम कीसेर दिस्वल सेव्कल वेले आसिर्वाद येतंतोर.
44 इद सतेम आंद.
माल्कल तंवा जाय्जत सम्दोत पोरो वोर सेव्कन नेमि कींतोर.
45 बति उंदि मोका वोर सेव्कल, ‘नावोर माल्कल वाय्ले कोरुम आंता’ इन्जि, तंवा बरोबर मंवलिर दासिरकुन पाय्वल सुरु कीतोर.
अचोरे आय्वा कल-पिदेडलिर सङा तिन्जेर-उन्जेर निसते मंवल सुरु कीतोर इंट.
46 वोर सेव्कल सोन्च कियोर अद दिवोस्ने, अद गट्कते माल्कल वांतोर.
अनि वोन नट्क्सि रंड टुक्डेङ कियुसि, बरोसा कियुर वूर बरोबर सिक्सा वाटंतोर.
47 तंवोर माल्कना इचतुन करि कीसि गिर, तयर मंवक्ने, अद इचा तीर ताकोर वोर सेव्कल वेले दन्कङ तिंदा लागर.
48 बति करे माय्वा सोन्जि, तप काम कीतोन, कमि दन्कङ अरंतङ.
बोंते वेले सींतलेयो, वोन्गटल वेलेने कोरंतोर.
अनि बोंते वेले हव्लि कींतोरेयो, वोन्गटल उंडे अदिक तल्कंतोर.
पर्जत नड्डुम बेद-बाव पुटंता इन्जेर येसु वेह्वल
49 “नना बोमित पोरो तड्मि वाट्ले वातोन.
* अद इंके निरुसि पोच्चेर मंदना इन्जेर कोर्सेर मंतोन.
50 नना वेले दुक्सङ बोगे मासि,* परन सिय्वल मंतोन.
अद जर्गनल वेरि नना इद डगुर वजन तोचा लागर.
51 इद दर्तुरित पोरो सांति सियन साटि वातोन इन्जेर सोन्च कींतिटिय?
अहन सोन्च किय्मट.
सांतितुन बद्लि, पर्जत नड्डुम बेद-बाव पुटुस्लेने वातोन इन्जेर वेह्चेर मंतोन.
52 “इङेडल उंदि कुटुंबतगा सिय्विर जन्क मत्तेके, वूरकुन अर्सि वाय्वा उंदि बाजुन इविर, उंडे उंदि बाजुन मुविर पाके मांतेर.
53 बाबो मरिन उल्टा, मरि बाबोन उल्टा, मियड अवन उल्टा, अवल मियडुन उल्टा, कोर्यड पोरडुन अनि पोरड कोर्यडुन उल्टा तेच्चि बय्मन आंतेर+” इन्जेर वेह्तोर.
बगवंतन बारेते बरोबर सम्जे मासेर सेल्विट
54 अनि पर्जत सङा येसु, “पोरयिङ्नेके टेपङ आय्वल दिसंता.
अस्के येंटने मिरट, ‘पिर वांता’ इन्जेर इगे इंतिट.
इत्ता तीर गिर जर्गंता.
55 अह्ने काल्वडा बाजनल वडि वाय्वल सूड्सि, ‘जडप लागंता’ इंतिट.
इत्ता तीर गिर जर्गंता.
56 ये!
कपेटलिर्निट!
दर्तुरि अनि हाबडुन सूड्सि, मुने जर्ग्वलिकुन वेहंतिट.
बति बगवंतल इंके किय्वलिकुन सूड्सि, बारि बरोबर सम्जे मासेर सेल्विट?”
इन्जेर वूरकुन वेह्तोर.
मीकुन उल्टा तिरिवन सङा सांतिते मंट
57 उंडे येसु, “मीवा मिरट बद नायम इंवल बारि निर्नय कीसेर सेल्विट?
58 नी पगा-दारल नीकुन तस्वा किय्वल अदिकारिनगा येरिसेर वोनेके, नड्डुम सर्दे मनेकेन वोन सङा रजु आम.
सेलेते नीकुन वोर अदिकारिनगा हव्लि कींतोर.
वोर अदिकारि नीकुन जेल्दोर अदिकारिना केय्दे हव्लि कींतोर.
जेल्दोर अदिकारि नीकुन वोसि जेल्ते वाटंतोर.
59 अस्के आक्रिता कोता बर्पेय कीनल वेरि, जेल्दल असले निमे पेसिवि” इन्जेर वूरकुन वेह्तोर.