मंदिरतुन नासेडम किय्वडुन बारेते येसु वेह्वल
24
1 येसु मंदिर्तल पेसिसि सोन्जेर मनेके, वोनुर सिस्यलिर, “पेरजति बंडने बातङ रोह्क दोह्तेरो सूडा!”
इन्जेर इत्तेर.
2 बति येसु, “मिरट सूड्वलिक इव सम्दो गिर बंडत पोरो बंडा निल्सि मंवक्ने अर्सि सोंवल दिवोस वांता.
इद सतेम आंद” इन्जेर वूर सङा वेह्तोर.
संकट्क अनि दुक्सङ
3 अद आता पेजे, येसु ओलिवा मरना गुटत पोरो सोन्जि उत्तोर.
अस्के वोनुर सिस्यलिर सिरिप तमय मीरे मासि वोन्गा सोन्जि, “पर्बु, इव सम्दो बस्के जर्गंतङ?
नीवा मल्सि वाय्वडुन अनि दुनियता आक्रि गट्कतुन बारेते बातङ निसनिङ दिसंतङ?”
इन्जेर पूसि कीतेर.
4 ते येसु, “मीकुन बोरे पसि किय्वक्ने सूडट.
5 बारितेके ना पोरोडे वेलेटिर लोकुर मिह्गा वासि, ‘ननय किरिस्तुना आंदुन’ इन्जेर वेलेटिरकुन पसि कींतेर.
6 मिरट लडेय्क जर्ग्वल नांदुन बारेते अनि लडेयकुन बारेतङ कबुक केन्जंतिट.
अद गट्कते दड्कि तिन्मट.
अव सम्दो गिर तप्वक जर्गा लागर.
बति दुनिया मूरे माय्वल आक्रिता गट्का अस्केने वायो.
7 उंदि देस्नुर उंडे उंदि देस्नुर सङा लडेय कींतेर.
उंदि राज्नुर उंडे उंदि राज्नुर सङा लडेय्क कींतेर.
वेले जागनगा बूकंप्क अनि करुङ गिर वांतङ.
8 अव सम्दो बालेंता आयन मुने वाय्वलिक नोपिन मोडि मंदंतङ.
9 अद गट्कते मी सम्दिरकुन अदिकारिरा केय्दे हव्लि कींतेर.
अदिकारिर मीकुन दुक्सा सींतेर.
अनि मीवा जीवा येतंतेर.
नावुर बक्तलिर आता काड्कि,* सम्दो देस्नुर मीकुन मेचुर.
10 वेलेटिर तम्वा बरोसतल बह्के मासि, वोरोन वोरोर पगा-दार्क्ना केय्दे हव्लि कींतेर.
वोरोन वोरोर मेचुर.
11 वेलेटिर लबड पर्वक्तलिर वासि वेलेटिरकुन पसि कींतेर.
12 बारितेके बगड-नियत बडे माय्वल कीनेके, वोरोन पोरो वोरोन मंवल पेर्मा कमि आंता.
13 बति आक्रि वेरि बोर्ते वोर्चि निलंतोरो, वोर बचे मांतोर.
14 अनि वोना राजुन बारेते वेह्वल बगवंतना चोकोट्ना कबुर पूरो दुनियता पर्जत नड्डुम गवत मोडि पग्रे मांता.
अद आता पेजेने, इद दुनियता आक्रि गट्का वांता.
15 “अदेन साटि दानियेल पर्वक्तल वेह्ता अद बे-सुदुड किय्वल बेय करेबल वस्तु पवित्रा जागतगा निल्सि मंवल मीकुन दिस्तेके, इदेन वाचि किय्वल गिर करि कियना.
16 अद वकत्ने, यूदया येरियतगा मंवलिर गुटनेके परर आयना.
17 रोता मिदेतगा मंवल तंवा सामन तर्ले इन्जेर गिर बूड रेय्वा.
18 अह्ने वाव्टे मंवल, तंवङ कप्डिङ तर्का इन्जेर रोन वाय्वा.
19 अय्यो!
अव दिवोस्क्ने पीटे मंवलिक वेय्लोकुन अनि बालेंता वेय्लोकुन वेले कस्टम आंता.
20 अव दिवोस्क्नगा वेले कस्टम मंदंता.
अदेन साटि मिरट परर आसि सोंले, पीनि-गालुमे आयि, आरम्ना दिवोसुन नेटिन आयि ईतल गति वाय्वा इन्जेर बगवंतन पार्तना कीम्ट.
21 ईतङ कस्टा-कालम्नङ दिवोस्क कलि गडे माता अगटल्ते नेंड वेरि गिर बस्केन वाय्मकि.
अनि उंडे बस्केन ईतल गति वायो.
22 इव कस्टा-कालम्नङ दिवोस्क कमि किय्वक इत्तेके, बोरे मायनल गिर पिसि मन्जि मनुर.
बति बगवंतल तना नेमि कीतुर साटि इव दिवोसकुन कमि कीतोर.
23 “इव दिवोस्क्नगा, ‘इचुला!
किरिस्तु इगे मंतोर’ सेलेते ‘अचुला!
अगा मंतोर’ इन्जेर बोरे वेह्तेके गिर बरोसा किय्मट.
24 बारितेके लबड किरिस्तुर, लबड पर्वक्तलिर बगवंतल नेमि कीतुरकुन पसि कियना इंवल उदेस्ने, बेय डगुक चमत्कार्क अनि मय्मतङ काम्क गिर कींतेर.
25 सूडट!
मीकुन मुनेने इवेन बारेते वेह्चेर मंतोन.
26 अदेन साटि बोरे आयि मी सङा, ‘इचुला!
बोडि गुटनेके मंतोर’ इन्जेर वेह्तेके गिर सोन्मट.
‘इचुला!
रोपोडा कम्रतगा मंतोर’ इन्जेर वेह्तेके गिर बरोसा किय्मट.
27 बारितेके पोड्द पेसिवल बाज्नल्ते पोड्द अर्वल बाज वेरि, हाबडगा मिड्च्वल सम्दिरकुन बहंते दिसंतयो, अह्ने स्वर्ग्नोर माय्नल उंडे उंदि जोका मल्सि वानेके दिसंतोर.
28 बगते साता जंवर्ता चेत्ता मंदंतयो अगन रायलिक मीरे मांतङ.
29 “इव कस्टा-कालम्नङ दिवोस्क वीड्ता पेजे, पोड्द सिकटि आसि दांता अनि नेलेन्ज तंवा वेड्चि सिय्वक आंता.
हाबडङ सुकुक सम्दो बूड अर्सि दानुङ.
इहिन हाबडङ सम्दो सक्तिङ हाले मासि दांतङ.
30 अस्के हाबडगा स्वर्ग्नोर माय्नना निसनि दिसंता.
अद सूड्सि, दर्तुरित पोरो मंवलिक सम्दि जातिनुर वेरिसि साति पासेर आडंतेर.
अद वकत्ने स्वर्ग्नोर मायनल सक्तिते अनि मय्मता वेड्चिते टेपन पोरो उच्चि वाय्वल वूर सूडंतेर.
31 अद वकत्ने वोर तंवुर दूतलिरकुन तुरता आवज्ने, ‘दर्तुरितङ नालुङ कोन्क्नगा, हाबडा काट वेरि पग्रे मासि मंवलिर बगवंतल नेमि कीतुरकुन मीरि कीसि तरट’ इन्जेर सारि कींतोर.
अस्के वूर मीरि कीसि तरंतेर.
मरक कोड्स्वडल करिवल उंदि गोस्टि
32 “इंके मिरट मरकनल उंदि गोस्टि करियना इन्जेर अवेन बारेते मीकुन वेहंतोन.
बतल इत्तेके, अवेनङ कांदङ कोड्स्वल सूड्सि, पिर गालुम करुम वाता इन्जेर मिरट करि कींतिट.*
33 अदे तीर्दे इव सम्दो गट्नङ जर्ग्वल सूड्सि, वोर वेले करुम मंतोर, कावडुन करुमे मंतोर इंवल करि कीम्ट.
34-35 इव सम्दो जर्गनल वेरि, इद इंके मंवल नरिमन्कना जनोबा मूरे मासि सोनो.
हाबर अनि दर्तुरि सम्दो मूरे मासि दानुङ बति, नावङ वचन्क बस्केट निल्सि मंदनुङ.
इद सतेम आंद.
स्वर्ग्नोर मायनल मल्सि वाय्वल दिवोसुन बारेते
36 “अद दिवोस अनि अद गट्कतुन बारेते सिरिप बाबो बगवंतने टावा.
अचोरे बति, स्वर्ग्नुर दूतलिर्कुने आयि, बगवंतनोर मरिने आयि, बोने गिर टावा सेले.
37 नोवहुना कालम्ने जर्ग्ता तीरे स्वर्ग्नोर माय्नना वाय्वल गट्कते गिर जर्गंता.
38 वोर नोवहु तंवा रूकतगा नेङनल वेरि, इत्तेके अद जल गंडमुन मुने सम्दिर पर्जा तिन्जेर, उन्जेर, मर्मिङ कीसेर अनि मर्मिङ आसेर पिसेर मत्तेर.
39 अद जल गंडम वासि सम्दिरकुन मूरि कीनल वेरि, वूर करि किय्मकि.
स्वर्ग्नोर मायनल वाय्वल दिवोस गिर अह्ने जर्गंता.
40 अद गट्कते इविर माय्नलिर पोलम्नगा काम कीसेर मंदंतेर.
वोरोन तंवा सङा वोंतोर.
उंडे वोरोन सुटि कींतोर.
41 रंड वेय्लोक जत्ता नोर्सेर मंदंतङ.
उंदितुन तंवा सङा वोंतोर.
उंडे उंदितुन अगन सुटि कींतोर.
42 अदेन साटि मीवोर पर्बु आय्वल माल्कल बंटि वांतोरो, मीकुन टावा सेल्वा काड्कि, मिरट दिहंते मंट.
43 बद गट्कते कले वांतोर इंवल रोतोर माल्कन करे मासि मत्तेके, वोर कले तंवा रोन वासि, कला सिय्वक्ने चेतो मन्जि वोर माल्कल केपंतोर.
44 अदेन साटि, सोन्च किय्विट आतल गट्कते वोर स्वर्ग्नोर मायनल वाय्वल मत्ता काड्कि, मिरट गिर अद तीर्दे तयर मंदना.
माल्कल वेह्ता तीर किय्वल अनि कियोर वोर सेव्कल
45 “तंवुर सेव्कलिरकुन बरोबर येलते तिंडि दोस्ले, माल्कल नेमि किय्वल बरोसतोर गियन वाले कारोबारि बोर आंदुर?
46 वोर माल्कल मल्सि वाता पेजे, अद काम कीसेर दिस्वल सेव्कल वेले आसिर्वाद येतंतोर.
47 माल्कल तंवा जाय्जत सम्दोत पोरो वोर सेव्कन नेमि कींतोर.
इद सतेम आंद.
48 बति करेबल सेव्कल, ‘नावोर माल्कल वाय्ले कोरुम कीसेर मंतोर’ इन्जि,
49 तंवा बरोबर मंवलिर सेव्कलिरकुन पाय्वल सुरु कीतोर.
अचोरे आय्वा, कल-पिदेडलिर सङा उन्जेर-तिन्जेर मंवल सुरु कीतोर इंट.
50-51 वोर सेव्कल सोन्च कियोर अद दिवोस्ने, अद गट्कते माल्कल वांतोर.
अनि वोन रंड टुक्डेङ कोयुसि, पसि किय्वलिर बरोबर सिक्सा वाटंतोर.
अद जागतगा वोर आड्सेर, पल्क कोर्क्सेर, दुक्सा बोगे मांतोर.