कब्ले माय्वन बतल कियना
17
1 उंदि दिया येसु तंवुर सिस्यलिर सङा, “पाप्नगा कोंडि किय्वलिक तप्वक वांतङ.
बति अव बोन हिंदल, वांतङो वोन सिक्सा तपो.
2 ना पोरो बरोसा इर्वलिर ईतुर चुडुर-पांदे मंवलिर्गटल वोरोर पाप कियन साटि, उंदि मोका बोरे कारन आनुर्ते, आतोर माय्नना गोटितगा उंदि डगुर जत्ततुन दोह्चि, सम्दुरतगा वाट्वल चोकोट मंदंता.
3 अदेन साटि, मीवा मिरट दिहंते मंट.
मिह्गटल बोरे आयि पाप कीनुर्ते, वोन दम्कि सीम्ट.
अनि वोर पापनल कब्ले मातेके, मापि कीम्ट.
4 उंदि मोका वोर उंदि दियत रोपो येडुङ जोकङ *मीकुन उल्टा पाप कीसि, अंटित्के येडुङ जोकङ मिह्गा वासि, ‘नना कब्ले मासेर मंतोन’ इंदनुर्ते, वोन मापि कीम्ट” इन्जेर वेह्तोर.
पापनगा अरुस्वावलिर पोरो सिक्सा वायवल (17:1-4)
विस्वासुन बारेते
5 अपोस्तुल्क, “मावा बरोसतुन बडि कीम” इन्जेर पर्बुन कोर्तेर.
6 ते पर्बु, “मीकुन मोवेरा दानतचोर बरोसा मत्तेके गिर आयर.
इद डगुर मरत सङा, ‘ये!
मरति सीर्क मिसडि सम्दुरतगा सोन्जि अरा’ इत्तेके गिर, अद मी गोस्टि केन्चि अरंता” इन्जेर वेह्तोर.
सेव्कना जिमेदारि
7 येसु उंडे गिर इहिन वेह्तोर: “नीवा पोलम ऊड्वल सेव्कले आयि, सेलेके नीवङ गोरेङ मेह्वल गाय्किय आयि, कामनल रोन वातोर इत्तेके वोन सङा, ‘वेय्ने वासि जेवुन किय्ले उदा!’
इन्जेर इंति कि?
असले इंवि.
8 अहन इंदन बद्लि, ‘ना साटि गाटो-कुस्रि अटा.
सेलते नडि दोह्चि, नाकुन वह्डि कीम.
नना तिंवल आता पेजे निमे तिंद्कि’ इन्जेर इंति.
9 निमे वेह्तप वोर सेव्कल कीतोर इन्जेर, वोन निमे दनेवाद वेहंति कि?
निमे असले वेह्वि.
10 “मिरट गिर वेह्ता तीर निबि कीता पेजे, ‘ममोट सादरन सेव्कलिर आंदुम.
मा पोरो मंवल जिमा निबि कीतोम अचोरे’ इन्जि वेहना” इन्जेर वेह्तोर.
बगवंतन दनेवाद वेह्वल
11 येसु येरुसलेम सोंले यात्रा कीनेके, गलिलया अनि समरया येरियना सिवत नड्डुमनल सोन्जेर मत्तोर.
12 अहन सर्दे मंवल उंदि नाटे नेङ्ले आनेके, पेर्सा नोपिते मंवलिर दहा जन्क वोन मुनेत्क वासेर मत्तेर.
13 अनि वूर येसुन सूड्सि, लङ निल्तेर.
अनि, “येसु!
मा माल्का!
मा पोरो दया तोह्चि, माकुन चोकोट कीम” इन्जेर जोर्ते किलितेर.
14 ते येसु वूरकुन सूड्सि, “मिरट सोन्जि कटोडलिरकुन तोहट”+ इन्जेर वेह्तोर.
अहन सोन्जेर मनेकेने, वूर चोकोट आतेर.
15 अस्के वूर्गटल वोरोर तंवा नोपि कमि आय्वल सूड्सि, जोर्ते “बगवंतने डगुर-पान वायि!”
इन्जेर, पेजे मल्सि वातोर.
16 वोर मायनल समरया येरियतोर आंदुर.
वोर वासि येसुनङ काल्क कर्सि, दनेवाद वेह्तोर.
17 अस्के येसु, “पूरो दहा जन्क चोकोट आतिट कि?
मन्जे मेय्तुर नोव जन्क बेंदिर?
18 बगवंतन डगुर-पान सिय्ले, वेर समरया जातितोन सुटि कीसि, मेय्तुर चोकोट आतुर बोरे वाय्मकिय?”
इन्जेर वोन पूसि कीतोर.
19 अनि, “निमे तेच्चि सोन.
नीवा बरोसय नीकुन चोकोट कीता” इन्जेर वेह्तोर.
स्वर्ग्नोर मायनल मल्सि वाय्वल
20 कहितुर परिसयुल्क, “बगवंतना राज बस्के वांता?”
इन्जेर येसुन पूसि कीतेर.
ते येसु, “बगवंतना राज पर्जतुन दिसनल वायो.
21 ‘इचुला!
इगे मंता.
अचुला!
अगा मंता’ इन्जेर बगवंतना राजुन बारेते वेहा वायो.
बारितेके, इंके बगवंतल मी नड्डुम मन्जि, पर्जतङ दिल्क्नगा राज ताकुसेर मंतोर” इन्जेर वेह्तोर.
22 अद आता पेजे तंवुर सिस्यलिर सङा, “बविसत्ने स्वर्ग्नोर माय्नल वाय्वल दिवोसुन मिरट सूडना इन्जेर बेय आसा कींतिट.
बति अद दिवोसुन सूड्विट.
23 अस्के पर्जा मी सङा, ‘इचुला!
इगे मंतोर.
सेलेके अचुला!
अगा मंतोर’ इन्जेर वेहंतेर.
बति वूरा गोस्टि केन्ज्मट अनि वूर पेजेय विच्चेर सोन्मट.
24 हाबडगा मिड्च्ततुन सम्दिर बहंते सूडंतेरो, अह्ने स्वर्ग्नोर मायनल, उंडे उंदि जोका मल्सि वानेके, सम्दिर सूडंतेर.
25 बति इव सम्दो जर्गन मुने, इद पिडितुर नाकुन उल्टा आया लागर अनि नना वेले दुक्सङ बोगे माया लागर.
26 “नोवहुना कालम्ने जर्ग्ता तीरे स्वर्ग्नोर माय्नना वाय्वल गट्कते गिर जर्गंता.
27 वोर नोवहु रूकतगा नेङनल वेरि, पर्जा तिन्जेर-उन्जेर, मर्मिङ आसेर, मर्मिङ कीसेर मत्तेर.
अद गट्कते जल्ता गंडम वासि, नोवहुना कुटुंबतुरकुन आय्वा मेय्तुर सम्दिरकुन नासेडम कीता.
28 “लोतुना कालम्ने जर्ग्ता तीर गिर जर्गंता.
अस्के वूर तिन्जेर-उन्जेर, येच्चेर-वोम्सेर, उर्सेर, रोह्क दोह्चेर पिसेर मत्तेर.
29 बति लोतु सोदोमा नगुडुन सुटि कीसि सोत्ता नेटिने, हाबडल पोत्वल गंदोक अनि तड्मि गोकङ पिरदुन मोडि अरुसि, लोतुना कुटुंबतुरकुन आय्वा, मेय्तुर सम्दिरकुन नासेडम कीता.
30 स्वर्ग्नोर मायनल वाय्वल दिवोस गिर, अह्ने जर्गंता.
31 अंटित रोता मिदेतगा मंवल, तंवा सामन तर्ले इन्जेर गिर बूड रेय्वा.
अह्ने वाव्टे मंवल, बततुने तर्ले रोन वाय्वा.
बारितङ चीजकुन बारेते गिर रंदि किय्मट.
32 लोतुना वेय्लो बहन मार्तयो* हेतु कीम्ट!
33 तंवा दन-दव्लतुन अनि तंवा जीवतुन बचि कीका इंवन बस्केट मंवल जीवा पुटो.
बति ना साटि तंवा जीवतुन सुटि किय्वन, बस्केट मंवल जीवा पुटंता.
34 मीकुन वेह्वल बतल इत्तेके, अंटिता रातुन इविर कटुड पोरो मंदंतेर.
वूर्गटल वोरोन सुटि कीसि, उंडे वोरोन वोय्वल जर्गंता.
35 रंड वेय्लोक जत्ता नोर्सेर मंदंतङ.
उंदितुन सुटि कीसि, उंडे उंदितुन वोय्वल जर्गंता.
36-37 *[इविर उंदिय पोलम्नगा मंदंतेर.
वूर्गटल वोरोन सुटि कीसि, उंडे वोरोन वोय्वल जर्गंता]” इन्जेर येसु वेह्तोर.
ते सिस्यलिर, “इव सम्दो बगा जर्गनुङ पर्बु?”
इन्जेर पूसि कीतेर.
अस्के येसु, “बगते जंवर्ता चेत्ता मंदंतयो अगा रायलिक मीरे मांतङ”* इन्जेर जवब सीतोर.