स्वर्ग्ना राज्नगा बातोन डगुर-पान वांता?
18
1 अद आता पेजे, सिस्यलिर येसुनगा वासि, “स्वर्ग्ना राज्नगा सम्दिर्गटल बोर डगुर आंतोर?”
इन्जेर पूसि कीतेर.
2 ते येसु वोरोर चुडुर-कांडिन तन्गा वरा इन्जेर केय्सि, वोन वूर नड्डुम निपुसि इहिन वेह्वल मोदोल कीतोर:
3 “मीवङ गुन्क मारिसि चुडुर मरि-मियडुन मोडि आया बीगर स्वर्ग्ना राज्नगा वोरोर गिर नेङा पर्विट.
इद सतेम आंद इन्जेर वेह्चेर मंतोन.
4 बति बोर्ते वेर चुडुर-कांडिन दात तंवा तना चुडुर-पान कींतोरो, वोन स्वर्ग्ना राज्नगा डगुर-पान वांता.
5 अचोरे आय्वा, ईतोर चुडुर-कांडिन ना पोरोडे बोर्ते करुम कींतोरो, वोर नाकुन गिर करुम कीता लेकतेन वांतोर.
पाप कियुस्वलिरकुन दम्कि सिय्वल
6 “बति ना पोरो बरोसा इर्वलिर ईतुर चुडुर-पांदे मंवलिर्गटल वोरोर पाप कियन साटि, उंदि मोका बोरे कारन आनुर्ते, आतोर माय्नना गोटितगा उंदि डगुर जत्ततुन दोह्चि, सम्दुरतगा वाट्वल चोकोट मंदंता.
7 दुनियतुर लोकुर दुस्रुरा केय्दे पाप कियुसंतेर.
पाप्नगा कोंडि किय्वलिक तप्वक वांतङ.
बति अव बोन हिंदल वांतङो वोन सिक्सा तपो.
8 उंदि मोका मीवा केये आयि, काले आयि, पाप किय्ले कारन आयर्ते, तान नट्क्सि वाटट.
बारितेके केय-काल्क मन्जि, बस्केट पोच्चेर मंवल पातड्ता तड्मितगा अरन बद्लि, कूटल आसि सेलेके लेङ्डल आसि, बस्केट जीवते मंले, स्वर्ग्नगा सोंवल चोकोट मंदंता.
9 अह्ने मिरट पाप किय्ले, मीवा कड कारन आयर्ते, अदेन तेंड्सि वाटट.
बारितेके, रंड कड्क्ने पातड्ता तड्मितगा अरन बद्लि, वोंटि कड्दे बस्केट जीवते मंले, स्वर्ग्नगा सोंवल चोकोट मंदंता.
10 “वीर चुडुर मरि-मियडुन बोरे गिर कमि-पांदे सूड्वक्ने दिहंते मंट.
बारितेके वीरुर दूतलिर स्वर्ग्नगा नावोर बाबोना मोकोमुन बस्केट सूड्सेर मंदंतेर इन्जि मीकुन वेह्चेर मंतोन.
बूले माता अद गोरेता नमुना
11 *[स्वर्ग्नोर मायनल बूले मासि मंवलिरकुन बचि किय्ले वातोर.]
12 “वोरोर माय्ननगा नूर (100) गोरेङ मंतङ इंट.
अवेनगटल उंदि गोरे बूले मातेके, अव नोवद नोव (99) गोरेन बोडि गुटनगा सुटि कीसि, तप्सि सोत्ता अद गोरे पुटनल वेरि मह्क्ले सोनोर इंतिट कि?
तप्वक मह्क्ले दांतोर!
13 अनि वोर, बूले माय्मकि अव नोवद नोव (99) गोरेन हिंदल पुट्वल आनंदुन तेर, बूले मासि पुड्ता उंदितुन हिंदल अदिक आनंद येतंतोर.
इद सतेम आंद इन्जेर मीकुन वेह्चेर मंतोन.
14 अह्ने वीर चुडुर मरि-मियडल वोरोर गिर बूले माय्वा इंवले मीवोर स्वर्ग्नोर बाबोना इचा मंता.
पाप कीतोर वोर बक्तन बहन मल्सि तरना
15 “मोका नी बरोबर्तोर बक्तल नीकुन उल्टा आसि, बतय पाप कीनुर्ते, वोर वोरोरे मनेके, निमे सोन्जि, कुसये अद गल्तितुन बारेते वोन दम्कि सियना.
उंदि मोका वोर नीवा गोस्टि केन्जनुर्ते निमे वोन बचि कीतोनि आंति.
16 बति उंदि मोका नीवा गोस्टि केन्ज्वेके दानुर्ते, उंडे वोरोर सेलेके, इविरकुन पिय्सि वोन्गा सोन.
बारितेके इविर-मुविर गवदार्क्ना गोस्टित पिय्सिने, जर्ग्ता अद करले आंद इन्जेर निर्नय येतना इन्जि दर्मा-ग्रंत्नगा मंता.
17 उंदि मोका वूरा गोस्टि गिर वोर केन्ज्वेके दानुर्ते, सोन्जि चर्चिनुरकुन वेहट.
अद चर्चितुरा गोस्टि गिर केन्ज्वेके दानुर्ते, नंमकि वोन मोडि अनि टेक्सा वसुलि किय्वल पापेस्तन मोडि इन्जि चर्चितुर बक्तलिरा लेकतल वोन तेंड्सि वाटट.
18 “इद दुनियतगा मिरट बवेंते वोप्विटो, अवेन स्वर्ग्नगा गिर नना वोपोन.
इगे मिरट बवेंते वोपंतिटो, अवेन स्वर्ग्नगा गिर नना वोपंतोन.
इद सतेम आंद इन्जेर मीकुन वेह्चेर मंतोन.
19 अचोरे आय्वा, मिह्गटल बोरे आयि इविर मीरे मासि, बगवंतन बतल तल्कना इंवल दर्तुरित पोरो निर्नय कीसि, पार्तना कीकिट्ते, स्वर्ग्नगा मंवल ना बाबो मीवा इचतुन पूरि कींतोर इन्जेर मीकुन वेह्चेर मंतोन.
20 बारितेके, ना पोरोडे बगते इविर-मुविर मीरे मांतेरो, अगा वूर नड्डुम नना गिर मंदंतोन” इन्जेर येसु वेह्तोर.
मापि कियोर वोर सेव्कना नमुना
21 अस्के पेतुरु येसुन करुम सोन्जि, “पर्बु!
कसुर कीसि नाकुन नुक्सन किय्वन, बचोङ जोकङ मापि कियना इंति?
येडुङ जोकङ कि बतल?”
इन्जेर पूसि कीतोर.
22 ते येसु, “येडुङ जोकङ मापि किय्वल आयो बति, लेका पर्वट अचोङ* जोकङ मापि किया लागर इन्जि मीकुन वेह्चेर मंतोन” इन्जेर इत्तोर.
23 “अदेन साटि, स्वर्ग्ना राज तंवुर सेव्कलिरकुन केय्सि, बोर बचोर बाकि मंतेर इंवल लेका सूड्वल राजन मोडि मंदंता इन्जेर मरट वेहा वचो.
24 वोर राजल तनकुन बाकि मत्तुरङ लेकङ सूड्वल मोदोल कीता पेजे, दहा हजर्क कूरतङ बिलङ बाकि मंवन वोन मुने तचि निपुस्तेर.
25 अद बाकि कंडि किय्ले, वोर सेव्कनगा बतय सेले मत्ता.
अदेन साटि वोर राजल, नीवा निमे, नीवा बाय्कोन, नीवुर मरि-मियडुन अनि नीवा जाय्जत सम्दोतुन वोम्सि, नावा बाकि कंडि कीम इन्जेर हुकुम सीतोर.
26 ते वोर सेव्कल राजन मुने मुर-टोङ्रङ कोट्सि, ‘राजा!
नाकुन जरसि वकत सीम.
नीवा बाकि पूरो कंडि कींतोन’ इन्जेर वेह्तोर.
27 अस्के राजन वोर सेव्कन पोरो किवुल लाग्ता.
ते वोना बाकितुन मापि कीसि, वोन सुटि कीतोर.
28 “वोर सेव्कल बह्रि वासि, तंवा सङा काम किय्वल वोरोर सेव्कन सूड्तोर.
अनि वोन गटा-गिटा पिय्सि गोटितुन पिच्कि कीसेर, ‘नावा बाकि कंडि कीम’ इन्जेर तक्लिब सीतोर.
29 अस्के बाकि मंवल सेव्कल वोनङ कालकुन पोरो गप्ने अर्सि, ‘नाकुन जरसि वकत सीम.
नीवा बाकि पूरो कंडि कींतोन’ इन्जेर कोर्तोर.
30 बति बाकि सीतोर वोर सेव्कल वोन वोप्मकि.
अचोरे आय्वा तंवा बाकि कंडि कीनल वेरि, जेल्दगा वाटुस्तोर.
31 इद सम्दोतुन वोन बरोबर मंवलिर सेव्कलिर सूड्तेर.
वूरकुन बेय दुक्सा लाग्ता.
ते जर्ग्ता अद सम्दोतुन राजनगा सोन्जि वेह्तेर.
32 अस्के राजल, वोर सेव्कन केय्सि सोङ्ने, ‘अरे करेबा!
निमे नाकुन कोर्ति अस्के, नना नीकुन सीता बाकि सम्दोतुन मापि कीतोन.
33 नना नी पोरो दया तोह्तपे, नी बरोबर्तोर सेव्कन पोरो गिर निमे दया तोहा मत्ता’ इन्जेर इत्तोर.
34 अद आता पेजे वोर राजल, ‘तंवा बाकि पूरो कंडि कीनल वेन सुटि किय्मट’ इन्जेर दुक्सा सिय्वलिर सिपायिरा केय्दे वोन हव्लि कीतोर.
35 मिह्गटल हर वोरोर मी सङा मंवल बक्तन बर्पुर दिल्ते मापि किय्वेके दाकिट्ते, स्वर्ग्नोर ना बाबो गिर मीकुन अह्ने कींतोर” इन्जेर वेह्तोर.