येसुना रूप मारिवल
17
1 सारुङ रोज्क आता पेजे, येसु तंवा सङा सिरिप पेतुरतुन, तादल-तमुर आय्वलिर याकोबुन अनि योहंतुन पिय्सि, डङल गुटत पोरो सोत्तोर.
2 अगा वूर मुने येसुना रूप मारिता.
बहन इत्तेके, वोना मोकोम पोडदुन मोडि मिड्च्ंदु अनि वोनङ पाङुक वेड्चित मोडि बेय चक दव्रलिक आतङ.
3 अस्केने अचनक वोन सङा मोसे अनि येलिया इंवलिर तोत्तुर पर्वक्तलिर वड्क्सेर सिस्यलिरकुन दिस्तेर.
4 ते पेतुरु, “पर्बु!
मरट इगेन मंवल चोकोट दिसंता.
नी साटि, येलियन अनि मोसेन साटि ममोट मूंद गुड्सेङ वाटंतोम” इन्जेर येसुन सङा वेह्तोर.
5 अहन वेह्चेर मनेकेन वूरकुन जगर्ने वेड्चि वाले उंदि टेपा वासि कप्ता.
अद टेपतल, “वेर नावोर लाड्नोर मरि आंदुर.
वेन हिंदल नना वेले आनंद्ने मंतोन.
वेर वेह्वडुन केन्जट” इन्जेर उंदि लेङ केन्जा वाता.
6 अद लेङ केन्चि, वूर सिस्यलिर बेय वेरिसि गप-मुड्गेङ अर्तेर.
7 बति येसु वूर्गा सोन्जि, वूरकुन तापि कीसेर, “तेदट!
मिरट वेरिमट” इन्जेर इत्तोर.
8 ते वूर तला तह्चि सूड्तेके, दुस्रुर बूरे वूरकुन दिस्मकि सिरिप येसुय दिस्तोर.
9 अद गुटतल रेय्सि वानेके, “स्वर्ग्नोर मायनल सासि-नेंडनल वेरि, मिरट इद गट्नतुन बारेते बोने वेह्मट” इन्जेर येसु सिस्यलिरकुन आगे सीतोर.
10 अस्के वोनुर सिस्यलिर, “अहन बेहेते किरिसतुन तेर मुने येलिया पर्वक्तल वाया लागर इन्जेर बारि सास्तिरिर वेहंतेर?”
इन्जि वोन पूसि कीतेर.
11 ते येसु, “येलियल तप्वक मोदोल वासि, इव सम्दोना तयर कींतोर.
12 बति नना मीकुन वेह्वल बतल इत्तेके, येलिया पर्वक्तल वातोर बति, वोन मिरट वोड्के माय्मकि.
उंडे वोर पर्जता केय्दे बहन दुक्सङ बोगे मायनयो, अहन बोगे मासि सोत्तोर.
अदे तीर्दे वूर पर्जा, स्वर्ग्नोर माय्नन गिर तक्लिब सिय्वलिर मंतेर” इन्जेर वेह्तोर.
13 अस्के सिस्यलिर बाप्तिस्मा सिय्वल योहंतुन बारेते येसु वड्क्सेर मंतोर इंवल करि कीतेर.
बूत सोप्रे मासि मंवन चोकोट किय्वल
14-15 मांदितगा वूर करुम येव्नेकेने, वोरोर मायनल येसुन मुने मुर-टोङ्रङ कोट्सि, “गुरुजि!
नावोर मरिन पोरो दया तोहा.
वोर मुन्ज्का अरुस्वल बेमरिते दुक्सा बोगे मासेर मंतोर.
वोर तड्मितगा सेलेके येतगा अर्सेरेन मंदंतोर.
16 ते वोन नीवुर सिस्यलिर्गा तत्तोन बति, वूर चोकोट किया पर्मकि” इन्जेर वेह्तोर.
17 अस्के येसु, “ना पोरो बरोसा सेलुर वूर मूजोर्क्निट!
नना बचेजेल मी सङा मन्जि, मीकुन सोसि कीका?”
इन्जेर वूरकुन इत्तोर.
अनि, “वोन नह्गा पिय्सि वरट” इन्जेर येसु वेह्तोर.
18 अनि वोन पिय्सि वाता पेजे, वोन्गा सोप्रे मासि मंवल बूतुन सङा, “वोन्गटल पेसिसि सोन” इन्जेर येसु दम्कि सीनेकेन, अद सोडिता.
येंटने वोर कांडि बर्पुर चोकोट आतोर.
19 अद आता पेजे, येसु वोरोरे मनेके, सिस्यलिर वोन्गा सोन्जि, “ममोट अद बूतुन बारि तेंड्सि पूडा पर्मकि?”
इन्जेर पूसि कीतेर.
20-21 ते वोर, “बगवंतन पोरो मीकुन गट बरोसा सेल्वा काड्किने, तेंड्सि पूडा पर्मकि.
बति मीकुन मोवेरा दानतचोर बरोसा मत्तेके गिर आंता.
इद गुटतुन सूड्सि, ‘ये!
गुटति इगेटल सोन!’
इत्तेके अद दांता.
इदे आय्वा मी सङा आया परो इंवल बतय सेले.
इद सतेम आंद” इन्जेर वेह्तोर. [*]
येसुना मरंतुन बारेते वेह्वल
22 वूर सम्दिर गिर गलिलयतगा मल्सि मीरे माता पेजे येसु वूर सङा, “स्वर्ग्नोर माय्नन दुस्रुरा केय्दे हव्लि किया लागर.
23 वोन वूर जकंतेर बति, मूंद रोज्क्ने नेंडंतोर” इन्जेर वेह्तोर.
अद केन्चि सिस्यलिरकुन बेय दुक्सा लाग्ता.
टेक्सा वसुलि किय्वल
24 येसु अनि वोनुर सिस्यलिर कपेर्नहोम चहर्ते येव्तेर.
अगटुर टेक्सा वसुलि किय्वलिर पेतुरतगा वासि, “मीवोर बोदा गुरु, इद मंदिर्ता टेक्सा दोहोर कि बतल?”
इन्जेर सवल पूसि कीतेर.
25 ते पेतुरु, “दोहंतोर” इन्जेर जवब सीतोर.
अनि पेतुरु रोत रोपो नेङ्सि, वेह्का इनेकेन येसुय मोदोल, “सीमोनु!
दर्तुरितगा मंवलिर राजलिर तम्वुर मर्क्नगटल टेक्सा वसुलि कींतेर कि, सेलेके दुस्रुर्गटल वसुलि कींतेर?
निमे बतल इंति?”
इन्जेर पूसि कीतोर.
26 अस्के पेतुरु, “दुस्रुर्गटल वसुलि कींतेर” इन्जेर वेह्तोर.
ते येसु, “अहन बेहेते मर्क टेक्सा दोह्वल जुरत सेले!
27 तेर बति, वूर वटि आगय सोङ वाय्वक मंले, निमे सम्दुरतगा सोन्जि गरि वाटा.
गरितगा मोदोल तट्ता मींदुन पिय्सि, ताना तोड्डि तेरिसि सूड्तेके, कूरता उंदि बिला* दिसंता.
तान वोसि मा इविरा टेक्सा दोहा” इन्जेर वेह्तोर.