मार्क 9

1 उंडे येसु वूर सङा, “इगे निल्सि मंवलिर कहितुर, पर्जतङ दिल्क्नगा बगवंतल सक्तिते राज ताकुस्वल सूडंतेर.

इदेन मुने वूरा मरन आयो.

नना वेह्‍वल इद सतेम आंद” इन्जेर वेह्‍तोर.

मोसे अनि येलियन सङा येसु वड्क्वल

येसुना रूप मारिवल

(मत्तयि 17:1-13; लूका 9:28-36)

2 सारुङ रोज्क आता पेजे, येसु तंवा सङा, पेतुरतुन, याकोबुन अनि योहंतुन पिय्सि डङल गुटत पोरो सोत्तोर.

अगा सिरिप वूर मुविर मनेके, येसु तंवा रूप मार्युसीतोर.

3 अस्के दर्तुरित पोरोडोर बोरे वर्टल सुका परुर अहन येसुनङ कप्डिङ चक दव्रलिक आसि मिड्चेर मत्तङ.

4 अस्के मोसे अनि येलिया इंवलिर तोत्तुर पर्वक्तलिर पावे मासि येसुन सङा वड्क्वल वूर सिस्यलिर सूड्तेर.

5-6 अद सूड्सि वूर दड्कि तित्तेर.

ते पेतुरतुन बतल इंदनयो अर्तम आय्वा सोन्जि, “गुरुजि!

मरट इगेन मंवल चोकोट दिसंता.

नी साटि, येलियन अनि मोसेन साटि ममोट मूंद गुड्सेङ वाटंतोम” इन्जेर येसुन सङा वेह्‍तोर.

7 अस्के वूरकुन उंदि टेपा वासि कप्ता.

अद टेपतल, “वेर नावोर लाड्नोर मरि आंदुर.

वेर वेह्‍वडुन मिरट केन्जट” इन्जेर उंदि लेङ केन्जा वाता.

8 ते येंटने वूर सिर्मुट सूड्तेर बति, दुस्रुर बूरे दिस्मकि.

सिरिप येसुय वूरकुन दिस्तोर.

9 वूर अद गुटतल रेय्सि वानेके, “स्वर्ग्नोर माय्नल सासि-नेंडनल वेरि, मिरट इद गट्नतुन बारेते बोने वेह्‍मट” इन्जेर येसु सिस्यलिरकुन आगे सीतोर.

10 इदेन वूर सिस्यलिर तम्वा मंदगा इर्सि, “सासि-नेंड्वल इत्तेके बतल मंदर बेहे?”

इन्जेर तम्वा तमय चर्चा कीतेर.

11 अस्के सिस्यलिर, “किरिसतुन तेर मुने येलिया पर्वक्तल वाया लागर इन्जेर, बारि सास्तिरिर वेहंतेर?”

इन्जि येसुन पूसि कीतेर.

12 ते वोर, “येलियल तप्वक मोदोल वासि, इव सम्दोना तयर कींतोर.

इद गोस्टि करले आंद.

बति स्वर्ग्नोर मायनल गिर तक्लिब्क बोगे मायना अनि दुस्रुर वोन दुस्मन आसि, वोप्वक्ने मंदना इन्जेर बारि ग्रंत्नगा लिहि कीसि मंता?

13 येलिया पर्वक्तल वातोर.

ग्रंत्नगा लिहि कीतप पर्जता केय्दे बहन दुक्सङ बोगे मायनयो, अहन बोगे मासि सोत्तोर” इन्जेर येसु सिस्यलिरकुन वेह्‍तोर.

बूत सोप्रे मातोर कांडिन चोकोट किय्वल

(मत्तयि 17:14-20; लूका 9:37-43)

14 येसु अनि वोन सङा मत्तुर वूर मल्सि, मेय्तुर सिस्यलिर्गा वासेर मत्तेर.

अस्के बूड मंवलिर सिस्यलिर सङा सास्तिरिरा^* जट-पट ताक्सेर मत्ता अनि वूर्गा सिर्मुट वेले मांदि गेर-पासि मत्तेर.

15 येसु वाय्वल सूड्तुर वूर गुल आसेर, विच्चेर सोन्जि दंडोस दोस्तेर.

16 अस्के येसु, “मिरट बततुन बारेते वूर सङा जट-पट लाग्तिट?”

इन्जेर सिस्यलिरकुन पूसि कीतोर.

17 ते, “गुरुजि, मुक्डि बूत सोप्रे मासि मंवल नावोर मरिन निह्‍गा तरना इन्जेर पिय्सि वातोन.

18 अद बूत, बगते वोन सोप्रे मांतयो, अगने बूड अरुसींता.

वोना तोड्दल पेस्क पेसियंतङ.

करा करा पल्क कोर्क्सेर कटेनय आंतोर.

ईतल बूतुन वोन्गटल तेंड्सि पूडट इन्जेर नीवुर सिस्यलिरकुन कोर्तोन बति, वूर तान तेंड्सि पूडा पर्मकि” इन्जेर अद मांदिता गुब्डतल वोरोर मायनल येसुन वेह्‍तोर.

19 ते “ना पोरो बरोसा सेलुर वूर मूजोर्क्निट!

नना बचेजेल मी सङा मन्जि, मीकुन सोसि कीका?”

इन्जेर वूरकुन इत्तोर.

अनि, “वोन नह्‍गा पिय्सि वरट” इन्जेर येसु वेह्‍तोर.

20 ते वूर वोर कांडिन येसुनगा तर्नेकेते अद बूत येसुन सूड्सि, वोन गजा गजा हालि कीसि बूड अरुसीता अनि पेस ककुसेर वोर कांडिनङ केय-काल्क विह्‍कुसिय्वल मोदोल कीता.

21 अस्के येसु, “नी मरिन बस्केडल इहिन जर्ग्सेर मंता?”

इन्जेर वोर बाबोन पूसि कीतोर.

ते बाबो, “वोन चुडुर-पांदले अहन जर्ग्सेर मंता” इन्जेर वेह्‍तोर.

22 अनि, “वोना जीवा येतना इन्जेर वेले जोकङ तड्मितगा अरुसीता अनि येतगा मुडुसीता.

बति मा पोरो दया इर्सि, मा साटि बतय मदत किया पर्किते कीम” इन्जेर इत्तोर.

23 अस्के येसु, “‘किया पर्किते कीम’ इन्जेर नाकुन बारि इंति?

ना पोरो बरोसा इर्तुरकुन इत्ता तीर सम्दो जर्गंता” इन्जेर वोन वेह्‍तोर.

24 ते अद केन्चि वोर मायनल, “नी पोरो बरोसा कीसेर मंतोन.

बति ना बरोसा बह्‍के माय्वक्ने सूडा” इन्जेर इत्तोर.

25 वेलेटिर मांदि सूडन साटि तन्गा विच्चेर वाय्वल सूड्सि येसु, “ये!

मुक्डियल चेव्डि बूत्नि!

वेर कांडिनगटल बह्‍रि वरा अनि उंडे बस्केन वेन्गा सोप्रे माय्मा” इन्जेर दम्कि सीतोर.

26 अस्के अद बूत, वोन गजा गजा हालि कीसि, बूड अरुसीता.

अनि जोर्ते किल्युसि पेसिसि सोडिता.

ते वोर कांडि कटेनय अर्सि मत्तोर.

अद सूड्सि मांदि, “वोर कांडि सातोर!”

इन्जेर कुसा कुसा वड्क्तेर.

27 बति येसु वोना केय पिय्सि, वोन निलन साटि मदत कीतोर.

ते वोर कांडि निल्तोर.

28 अद आता पेजे, येसु अनि सिस्यलिर रोन सोत्तेर.

अनि येसु वोरोरे मनेके सिस्यलिर, “ममोट अद बूतुन बारि कांडिनगटल तेंड्सि पूडा पर्मकि?”

इन्जेर पूसि कीतेर.

29 ते येसु, “ईतडुन पार्तना तेन^* तेंड्सि पूडा लागर” इन्जेर वेह्‍तोर.

येसु तंवा मरंतुन बारेते सिस्यलिरकुन वेह्‍वल

(मत्तयि 17:22-23; लूका 9:43-45)

30-31 अद आता पेजे वूर अगटल पेसिसि गलिलया येरियत नड्डुमनल सोन्जेर मत्तेर.

अद गोस्टि दुस्रुरकुन करे माय्वल वोन पसंद सेले.

बारितेके सिस्यलिरकुन तंवा बारेते, “स्वर्ग्नोर माय्नन वोरोर दोका सीसि, दुस्रुरा केय्दे हव्लि कींतोर.

वूर नाकुन जकंतेर बति, मूंद रोज्क्ने नेंडंतोन” इन्जेर इद मुके गोस्टि, वूरकुन वेह्‍वल मत्ता.

32 अद गोस्टितुन केन्ज्तेर बति, सिस्यलिरकुन अर्तम आय्मकि.

अनि अदेन बारेते येसुन पूसि किय्ले गिर वेरितेर.

सम्दिर्गटल बोर डगुर?

(मत्तयि 18:1-5; लूका 9:46-48)

33 वूर कपेर्नहोम येव्सि, रोतगा मनेके, “मिरट सरिय वानेके बद गोस्टितुन बारेते चर्चा कीतिट?”

इन्जेर येसु सिस्यलिरकुन पूसि कीतोर.

34 बति तमा सम्दिर्गटल बोर डगुर-पान येतनुर इंवल गोस्टितुन बारेते चर्चा कीता काड्कि, दब मत्तेर.

35 अस्के येसु उच्चि वूर बारा जन्क सिस्यलिरकुन केय्सि, “मिह्‍गटल बोर्ते डगुर-पान कोर्सेर मंतोरो, वोर सम्दिर्गटल चुडुर-पान कीसि, सम्दिरा सेवा किय्वल आसि मंदना” इन्जेर वेह्‍तोर.

36-37 अनि वोरोर चुडुर-कांडिन वूर नड्डुम निपुसि, वोन तंवा कोरते येच्चेर, “बोर्ते इहिन चुडुर-पांदे मंवन ना हिंदल करुम कींतोरो, वोर नाकुन गिर करुम कीता लेकतेन वांतोर.

नाकुन करुम किय्वल, नाकुन स्वर्गनल रोह्‍तोर वोर बाबोन गिर, करुम कीता लेकतेन वांतोर” इन्जेर वेह्‍तोर.

येसुना पोरोल मुट्सि बूतकुन तेंड्सि पूड्वल

(लूका 9:49-50)

38 अद केन्चि योहन, “गुरुजि!

नीवा पोरोल मुट्सि, बूतकुन तेंड्सि पूड्सेर वोरोर दिस्तोर.

बति वोर मावोर आयोर इन्जि, अहन किय्मा इन्जि आपु सीतोम” इन्जेर वेह्‍तोर.

39 ते अद केन्चि येसु, “अहन बूतकुन तेंड्सि पूड्वन मिरट आपुसिय्मट.

ना पोरोल मुट्सि, मय्मतङ काम्क कीसि, नाकुन चुडुर-पान कीसि बोरे वड्का परोर.

40 बारितेके माकुन उल्टा ताकोर वोर, मा बाजुन मत्ता लेकतेन वांतोर.

41 मीकुन सूड्सि किरिस्तुनुर सिस्यलिर इन्जि, चंबुमेन येर सीनुर तेर, वोन तप्वक ताना पंडि पुटंता.

इद सतेम आंद” इन्जेर वेह्‍तोर.

पातडतुन बारेते दम्कि

(मत्तयि 18:6-9; लूका 17:1-2)

42 अनि उंडे, “ना पोरो बरोसा इर्वलिर ईतुर चुडुर-पांदे मंवलिर्गटल वोरोर पाप कियन साटि उंदि मोका बोरे कारन आनुर्ते, आतोर माय्नना गोटितगा उंदि डगुर जत्ततुन दोह्‍चि, सम्दुरतगा वाट्वल चोकोट मंदंता.

43-46 उंदि मोका नीवा उंदि केय निमे पाप किय्ले कारन आयर्ते, अद केयदुन नट्क्सि वाडि सीम.

बारितेके रंड केय्क्ने बस्केट पोच्चेर मंवल पातडतगा अरन बद्लि, कूटल आसि, स्वर्ग्नगा जीवते सोंवल चोकोट मंदंता.

अह्‍ने नीवा उंदि काल निमे पाप किय्ले कारन आयर्ते, अद कालदुन नट्क्सि वाडि सीम.

बारितेके रंड काल्क्ने पातडतगा अरन बद्लि, लेङ्डल आसि, स्वर्ग्नगा जीवते सोंवल नीकुन चोकोट मंदंता. [^*]

47 अह्‍ने निमे पाप किय्ले कारन नीवा उंदि कड आयर्ते, अद कडदुन तेंड्सि वाडि सीम.

बारितेके रंड कड्क्ने पातडतगा अरन बद्लि, वोंटि कड्दे बगवंतना राज्नगा सोंवल चोकोट मंदंता.

48 अद पातडतगा, ‘वूरा पुडि बस्केन सायो अनि अगा मंवल तड्मि गिर बस्केन पिरो’”⁺ इन्जेर वेह्‍तोर.

49 अनि उंडे, “बलिदान सीता हर अर्पनतुन बहंते सोवोडे सुदुड कींतेरो, अह्‍ने हर वोरोर गिर तड्मिते सुदुड आया लागर.^*

50 सोवोर सवद मनल वेरि चोकोट कामि सींता.

बति ताना सवद सोडितेके, अदेन मल्सि बहन तरा परंतिट?

अदेन साटि, मिरट गिर सोवोडुन दात चोकोट्ना गुंते सम्दिर सङा सांतिते मीरे मासि मंदना” इन्जेर वेह्‍तोर.