येसु नालुङ हजर्क मांदितुन जेवुन दोस्वल
8
1-2 उंदि दिया येसु वेह्वल बोदा केन्ज्ले वेले मांदि मीरे मातेर.
ते येसु आक्रिता दिवोसुन नेटि तंवुर सिस्यलिरकुन केय्सि, “वीर पर्जत पोरो नाकुन किवुल लाग्सेर मंता.
बारितेके मूंद दिवोस्कनल ना सङन मंवल कीनेके, वीर्गा इंके तिंदन साटि बतय मेय्सि सेले.
3 कहि लोकुर वेले लङनल वातुर मंतेर.
उंदि मोका वीर पर्जतुन उपसे वूरङ रोह्क सारि कीकते, नड्डुम सर्दे बगने चकर वासि अरनिर” इन्जेर इत्तोर.
4 ते सिस्यलिर, “इव बोडि गुटनगा वीर तिंले चंदि बगटल तर्कोम?”
इन्जेर येसुन पूसि कीतेर.
5 ते येसु केन्चि, “मिह्गा बचोङ सारिङ मंतङ?”
इन्जेर सिस्यलिरकुन पूसि कीतोर.
अस्के वूर, “येडुङ” इन्जेर वेह्तेर.
6 ते येसु, “बूड उदट” इन्जेर पर्जतुन आगे सीतोर.
अव येडुङ सारिङ पिय्सि बगवंतन दनेवाद वेह्तोर अनि उरुसि सिस्यलिर्गा अंदुस्तोर.
ते मांदितुन वूर वह्डि कीतेर.
7 वूर्गा इचुङ्सि चुडुक मीन्क गिर मत्तङ.
अवेन साटि गिर दनेवाद वेह्चि, “पर्जतुन वह्डि कीम्ट” इन्जेर सिस्यलिर्गा सीतोर.
8 पर्जा सम्दिर पेटिमेन तित्तेर.
अद आता पेजे, मेय्तङ अव टुक्डेङ मीरि कीतेर.
ते येडुङ डालङ निंतङ.
9-10 अगा जेवुन कीतुरकुन कह्चि सूड्तेके, लग-बग नालुङ हजर्क (4,000) मांदि माय्नलिर मत्तेर.
वूर पर्जतुन सारि कीसि, येसु तंवुर सिस्यलिर सङा, उंदि रूका उच्चि दल्मनूता इंवल येरियते सोत्तोर.
परिसयुल्क येसुन मय्मता काम कीसि तोहा इंवल
11 अगा सोत्ता पेजे कहितुर परिसयुल्क, येसुन परिक्सा कियन साटि, “निमे स्वर्गनल उंदि मय्मता काम कीसि तोहा” इन्जेर पूसि किय्वल मोदोल कीतेर.
12 ते येसु जोर्ते नेस्क्सि, “इद पिडितुर लोकुर ‘स्वर्गनल मय्मता काम कीसि तोहा’ इन्जेर बारि पूसि कीसेर मंतेर?
इद पिडितुरकुन बदे मय्मता काम कीसि तोह्वल सेले.
इद सतेम आंद” इन्जेर वेह्तोर.
13 अद आता पेजे वूर पर्जतुन अगने सुटि कीसि, येसु अनि वोनुर सिस्यलिर रूकतगा उच्चि, हंदा डर्डिते सोत्तेर.
करेबलिर बारेते येसु तंवुर सिस्यलिरकुन दम्कि सिय्वल
14 रूकते सोनेके सिस्यलिर तम्वा सङा तिंले सारिङ तर्वल मरुङ्तेर.
अस्के वूर्गा उंदिय सारि मत्ता.
15 ते येसु, “परिसयुल्क अनि हेरोद राजन बाज्नुर सोवुस्वल चीजुन दात* मंतेर.
वूर बारेते मिरट चोकोट दिहंते मंट” इन्जेर सिस्यलिरकुन दम्कि सीतोर.
16 अद केन्चि सिस्यलिर, “मा सङा सारिङ तर्वा काड्किने इहिन इंतोर” इन्जेर तम्वा तमा चर्चा कीतेर.
17 येसु अद करि कीसि, “सारिङ तर्मकि इन्जेर बारि सोन्च कीसेर मंतिट?
मीकुन उंडे गिर अर्तम आय्मकि बतल?
मिरट सूड्मकि कि बतल?
मीवङ दिल्क मूजोर्क आतङ कि बतल?
18 मीकुन कड्क मंतङ बति, बारि सूड्सेर सेल्विट?
केव्क मंतङ बति, बारि केन्चेर सेल्विट?”
इन्जेर इत्तोर.
19 अनि, “सियुङ हजर्क (5,000) मांदितुन नना सियुङ सारिने जेवुन दोस्तोन.
अस्के मिरट मेय्तङ टुक्डेङ मीरि कीसि, बचोङ डालङ निह्तिट?”
इन्जेर पूसि कीतोर.
ते वूर, “बारा” इन्जेर वेह्तेर.
20 “अह्ने, नालुङ हजर्क (4,000) मांदितुन येडुङ सारिने जेवुन दोस्तोन.
अस्के मिरट मेय्तङ टुक्डेङ मीरि कीसि, बचोङ डालङ निह्तिट?”
इन्जेर पूसि कीतोर.
ते वूर, “येडुङ” इन्जेर वेह्तेर.
21 अस्के, “अवेन बारेते आयो इन्जेर मिरट बारि अर्तम कीसेर सेल्विट?”
इन्जेर पूसि कीतोर.
बेत्सयिदा चहरतगा गुड्डिन चोकोट किय्वल
22 वूर बेत्सयिदा इंवल चहरतगा येव्ता पेजे, कहितुर वोरोर गुड्डिन पिय्सि येसुनगा वातेर.
अनि, “निमे इट्सि वोन चोकोट कीम” इन्जेर जुल्मा कीतेर.
23 ते येसु, वोर गुड्डिना केय पिय्सि नाटुन बह्रि वोसि, वोनङ कड्क्नगा उस्क्तोर अनि तंवङ केय्क वोन पोरो इर्सि, “इंके नीकुन बतय दिसंता कि?”
इन्जेर पूसि कीतोर.
24 ते वोर गुड्डि तला तह्चि सूड्सि, “माय्नलिर दिसेर मंतेर.
बति वूर मरक ताक्तपिनय दिसेर मंतेर” इन्जेर वेह्तोर.
25 ते येसु उंडे उंदि जोका वोनङ कडकुन तंवङ केय्क्ने इट्तोर.
ते येंटने वोनङ कड्क कोले मासि, नदुर वाता.
अस्के वोर सम्दितुने तात्कर सूडा पर्तोर.
26 अस्के येसु, “निमे नाटे तिरिवक्ने सड्कल नीवा रोन सोन” इन्जेर वोन सारि कीतोर.
पेतुरु येसुन, किरिस्तु इन्जेर वोप्वल
27 बेत्सयिदतगटल येसु तंवुर सिस्यलिरकुन सङा, सिजरिया पिलिपि चहरतुन सिर्मुट मंवलिक नह्क्नगा सोंले पेसितोर.
अहन सरिय सोनेके, “पर्जा नाकुन बोर आंदुर इन्जेर मंतेर?”
इन्जि पूसि कीतोर.
28 ते वूर, “कहितुर, येते बाप्तिस्मा सिय्वल योहन इन्जेर मंतेर.
उंडे कहितुर, येलिया पर्वक्तल इन्जेर मंतेर.
उंडे कहितुर, तोत्तुर पर्वक्तलिर्गटल वोरोर मंदा वचो इन्जेर मंतेर” इन्जेर वेह्तेर.
29 अस्के येसु, “ते मिरट नाकुन बोर आंदुर इन्जेर मंतिट?”
इन्जि वूरकुन पूसि कीतोर.
ते पेतुरु, “निमे बचि किय्वल किरिस्तुनि* आंदि” इन्जेर जवब सीतोर.
30 अस्के येसु, “ना बारेते बोने वेह्मट” इन्जेर दम्कि सीतोर.
येसु तंवा मरंता गोस्टितुन मुनेने वेह्वल
31 अद आता पेजे येसु, “स्वर्ग्नोर माय्नल वेले दुक्सङ बोगे मांतोर.
यूदुल्क्नुर पेदोल्क, डगुक कटोडलिर अनि सास्तिरिर वोन वोप्वक्ने उल्टा तिरियंतेर.
वोना जीवा येतंतेर बति, बगवंतल मूंद रोज्क्ने वोन नेंडुसंतोर” इन्जेर सिस्यलिरकुन बोदा वेह्वल सुरु कीतोर.
32-33 इद गोस्टि वूरकुन अर्तम आनल तात्कर वेह्तोर.
ते पेतुरु येसुन बग्ला वोसि, “अहन इन्मा!”
इन्जेर राङ्तोर.
बति येसु पेजे मल्सि सिस्यलिर्के सूड्सि, पेतुरतुन सङा, “ये सय्तंदि!
ना मुनेतल सोडिया.
निमे माय्नलिर दात सोन्च कीसेर मंति.
बति, बगवंतन दात सोन्च कीसेर सेल्वि” इन्जेर दम्कि सीतोर.
34 अद आता पेजे येसु तंवुर सिस्यलिरकुन अनि पर्जतुन तन्गा केय्सि, “मिरट ना बरोबर ताककोम इंद्किट्ते, मीवा मीकुन पटि किय्वक्ने तक्लिबकुन बोगे मासेर* ना पेजेय ताका लागर.
35 बारितेके, तंवा जीवतुन बचि कीका इंवल, तान सुटि किया लागर.
बति ना साटि अनि चोकोट्ना कबुडुन साटि बोर्ते तंवा जीवा सुटि कींतोरो, वोर तंवा जीवतुन दकुसंतोर.
36 दुनिया सम्दोतुन मेय्सि, तंवा जीवा सुटि कीतोर वोन, बतल पाय्दा पुटंता?
बतय पुटो!
37 तंवा सुटि कीता जीवतुन मल्सि येतन साटि मायनल बतल सिया परंतोर?
बतय सिया परोर!
38 इद पीर कीसेर मंवल पाप्ना पिडितुर्गटल बोरे मनि ना बारेतेन आयि, नावङ गोस्टिन बारेतेन आयि, लजे मानुर्ते, स्वर्ग्नोर मायनल, बाबोना मय्मता वेड्चिते अनि पवित्रा दूतलिर सङा मल्सि वानेके, वोर आतोन बारेते गिर लजे मांतोर” इन्जेर वेह्तोर.