करल सुदुड-पांदुन बारेते येसु वेह्वल
7
1 उंदि दिया येरुसलेमनल वातुर वूर परिसयुल्क अनि सास्तिरिर येसुन सिर्मुट मीरे मातेर.
2 अस्के वूरकुन, येसुनुर सिस्यलिर्गटल कहितुर केय्क बरोबर नोर्वक्ने तिंवल दिस्ता.
3 (परिसयुल्क आयि, वूर यूदुल्क सम्दिरे आयि, तम्वुर तोत्तुरङ नेकिन पिय्सि केय्क चोकोट नोरा बीगर काने तिनुर.
4 अनि हाटुमनल बतय येच्चि तत्तेर इत्तेके तान चोकोट नोरा बीगर तिनुर.
इदे आय्वा उंडे वूर तिंवलिक-उंवलिक देडियङ-तालिङ सम्दोय येतगा नोर्वलिक ईतङ वेले नेकिङ पिय्सि ताक्ंदिर.)
5 ते परिसयुल्क अनि सास्तिरिर, “नी सिस्यलिर बरोबर केय्क नोर्वके तिन्जेर मंतेर.
तोत्तुर वेह्तङ नेकिन बारि पिय्सि ताकुर?”
इन्जेर येसुन पूसि कीतेर.
केय्क नोर्सि सुदुड-पान आय्वल
6-7 ते येसु, “दर्मा-ग्रंत्नगा,
‘वीर लोकुर सिरिप तम्वङ सिव्लिने नाकुन मानि कींतेर.
बति वीरङ दिल्क नह्गटल वेले लक मंतङ.
बगवंतनङ आगेन बद्लि तमो निव्डि कीता अद बोदा वेहंतेर.
अदेन साटि बततुने कामि सियो अद वूरा पार्तना-विंति नाकुन वटिने’+
इन्जेर येसया पर्वक्तल मी दात्नुर कपेटलिरङ गुनकुन बारेते वेह्वल बरोबरे आंद.
8 बगवंतनङ आगेन सुटि कीसि, माय्नलिर तोत्तल वाय्वलिक नेकिन मिरट पिय्सि ताक्सेर मंतिट” इन्जेर परिसयुलकुन अनि सास्तिरिरकुन इत्तोर.
9 अनि उंडे गिर, “मिरट बगवंतनङ आगेन आयो इन्जि, मीवङ नेकिन पिय्सि ताक्वडगा वेले जेटिर मंतिट.
10 “नमुनतुन मोसे पर्वक्तल, ‘मी अवल-बाबोन मान सीम्ट अनि अवने आयि बाबोने आयि राङ्तोर वोन मरंता सिक्सा वाटा लागर’ इन्जेर आगे सीतोर.
11-12 बति उंदि मोका बोरे, ‘नावुर अवल-बाबोन सिय्वलिक कोतन, बगवंतन सींतोन’* इन्जेर वेह्तेके, अहन वोर अवल-बाबोन मदत किय्वेके गिर ‘बतय आयो’ इन्जेर वोन वेहंतिट.
13 इहिन मी तोत्तुरङ नेकिङ पिय्सि ताक्सेर, बगवंतना वचंतुन कामि सिय्वक कींतिट.
ईतङ उंडे वेले नेकिङ पिय्सि ताकंतिट” इन्जेर वेह्तोर.
माय्नन अस्ट बस्ट किय्वलिक
14 येसु उंडे उंदि जोका अद मांदितुन तन्गा केय्सि, “अर्तम कियना इंद्किट्ते, चोकोट केन्चि तेन बारेते सोन्च कीम्ट!
15-16 बह्रिता बदे वस्तु गिर माय्नना पेटितगा सोन्जि अस्ट बस्ट कियो.
बति माय्नना दिल्तल बव्ते बह्रि वांतङो अवे माय्नन अस्ट बस्ट कींतङ” इन्जेर वेह्तोर. [*]
17 अहन वेह्चि, येसु पर्जतुन सुटि कीसि, रोन सोत्तोर.
अस्के वोनुर सिस्यलिर अद वेह्ता नमुनता अर्तम पूसि कीतेर.
18 ते येसु, “ये पिसलिर्निट!
मीकुन गिर अर्तम आय्मकिय?
तिंवलिक सम्दो तोड्दल रोपो पेटितगा दांतङ.
अनि अव अगा जीरे मासि, मेय्दडा रूप्ने बह्रि अर्वलिक बवे गिर माय्नन अस्ट बस्ट कियोङ इंवल मीकुन टावा सेले कि?”
इन्जेर इत्तोर.
19 अनि, “काने तिनेके, अद दिलतुन रोपो सोनो बति, पेटितगा सोन्जि बह्रि अरंता.
इहिन तिंवलिक बदे गिर वस्तु अस्ट बस्ट कियो.
20 बति माय्नना दिल्तल बव्ते बह्रि वांतङो, अवे माय्नन बे-सुदुड कींतङ.
21-22 रोपोडल वाय्वलिक इत्तेके दिल्तल वाय्वलिक: करब सोन्च, लन्जेतनम, कले काम, माय्नलिरकुन जक्वल, पीर किय्वल, लाल्सल गुन, करब काम, कपट, मेंदोडा आसा, पगा, दुस्रुरकुन रेह्चि वड्क्वल, गर्वा-गमंडि अनि पिसल गुन्क इंवलिक बह्रि वांतङ.
23 ईतङ सम्दो करब गुन्क दिल्तल बह्रि वासि माय्नन बे-सुदुड कींतङ” इन्जेर वेह्तोर.
दुस्रो जातिता वेय्लोना बरोसा
24 येसु अद गलिलया येरियतल काल्वडा बाज्नेके मंवलिक तूरु (अनि सीदोन) येरियनगा सोत्तोर.
अगा उंदि रोन सोन्जि, तना वातोर अद कबुर बोने करे माय्वा इन्जि मत्तोर.
बति अद गोस्टितुन मकुसि इरा पर्मकि.
25-26 ग्रीकु देस्ना उंदि वेय्लो मत्ता.
ताना जल्मा सिरियता पोयेनिसिया इंवल येरियतगा आता.
ताना मियडुन बूत सोप्रे मासि मत्ता.
अद वेय्लो, येसुन बारेते केन्चि, वोन बेटे माय्ले वासि, वोनङ कालकुन पोरो गप्ने अर्ता.
अनि “नावा पेडिनगा सोप्रे माता अद बूतुन तेंड्सि पूडा” इन्जेर येसुन जुल्मा कीता.
27 ते येसु ताना बरोसतुन करि कियन साटि सास्तुर्ता रूप्ने, “मरि-मियडा मोदोल बर्पुर पेटि निंदा लागर.
वूर मरि-मियड तिंवल कानेतुन ऊन्चि नेयकुन वाट्वल बरोबर आयो” इन्जेर तान वेह्तोर.
28 ते अद वेय्लो केन्चि, “हो, पर्बु!
वाटा वायो.
बति मरि-मियड तिनेके बूड तूर्तङ टुक्डेङ नेय्क तिंतङ कि!”
इन्जेर वेह्ता.
29 अद केन्चि येसु, “निमे इहिन वेह्ता काड्कि, रोन सोन.
नीवा मियडुन सोप्रे माता अद बूत पेसिसि सोडिता” इन्जेर इत्तोर.
30 अद वेय्लो रोन सोन्जि सूड्तेके, तंवा मियड बीडड पोरो दब मींड्सि दिस्ता.
ते बूत पेसिसि सोत्ता इन्जेर करि कीता.
तोते अनि चेव्डि माय्नन चोकोट किय्वल
31 अद आता पेजे येसु अद तूरु येरियतल, सीदोन येरियते सोन्जि, अगटल देकपोलि येरियतुन* वीड्सि गलिलयता सम्दुरतगा वातोर.
32 अगा कहितुर तोते अनि चेव्डि माय्नन येसुनगा पिय्सि वासि, “नीवङ केय्क वेन पोरो इर्तेके वेर चोकोट आंतोर” इन्जेर जुल्मा कीतेर.
33 येसु वोर तोते अनि चेव्डि माय्नन मांदितल बग्ला वोतोर.
वोनङ केव्क्नगा तंवङ बोटङ दोसि तेंड्तोर अनि येसु अवेनगा उस्क्सि वोना वेन्जेडुन इट्तोर.
34 अनि पोरो हाबडेके सूड्सेर जोर्ते नेस्क्सि, “एपता” इन्जेर इत्तोर.
कोले माम्टु इन्जेर इदेना अर्तम.
35 येंटने वोर माय्नना वेन्जेर पत्लो आसि चड वड्क्वल अनि केव्क कोले मासि केन्ज्वल सुरु कीतोर.
36 अस्के येसु, इदेन बारेते बोने वेह्मट इन्जेर, वूरकुन आगे सीतोर.
बति वूर बहन बहन वेह्मट इत्तोरो, वूर अहन अहन उंडे इचुर अदिक पचर कीसेर सोत्तेर.
37 ते अद केन्चि पर्जा सम्दिर गुल आसेर, “वेर मायनल मूकलिरकुन वड्कनल अनि चेव्डिरकुन केन्जा वानल सम्दो तीर्क्नङ मय्मतङ काम्क कींतोर” इन्जेर इत्तेर.