वोना सोंता चहर्तुर येसुन वोप्मकि
6
1 येसु अगटल पेसिसि तंवुर सिस्यलिर सङा, तंवा सोंता चहर नजरेतु सोत्तोर.
2 अनि अगा वोर आरम्ना दिवोसुन नेटि सुनगोग्नगा सोन्जि, पर्जतुन बोदा वेह्वल सुरु कीतोर.
ते वेलेटिर अद केन्चि, “इचोर चोकोट बहन वेह्चेर मंतोर?
इचोर बुदि-गियन वेन बगटल वाता?
मय्मतङ काम्क वेर बहन कीसेर मंतोर?”
इन्जेर गुल आतेर.
3 अनि वूर, “एहे, वेर्ते मरियनोर मरि वाडे आंदुर बेहे कि रा?
याकोबु, योसेस, यूदल अनि सीमोन इंवलिर वेनुर तमुक बेहे कि रा?
इंके मा सङा उच्चि मंवलिक वोनङे सेलक बेहे कि रा?”
इन्जेर येसुन वोप्मकि.
4 ते येसु, “बगवंतनोर पर्वक्तन तंवा सोंता नाटे, तंवुर चुटल-बंद्नगा अनि तंवा रोतुर्गा तपुसि, दुस्रोक सम्दो जागनगा मान पुटंता” इन्जेर वूरकुन वेह्तोर.
5 अनि येसु अगा मंवलिर कहितुर बेमरिने मंवलिरकुन इट्सि चोकोट कीतोर.
इद मय्मता काम तपुसि दुस्रोक बवे मय्मतङ काम्क किया पर्मकि.
6 वूर तंवा पोरो बरोसा इर्वा काड्कि, येसु गुल आतोर.
अद आता पेजे येसु नार-नाटे सोन्जि, बगवंतना बोदा वेह्चेर मत्तोर.
येसु बारा जन्क सिस्यलिरकुन रोह्वल
7-9 उंदि दिया येसु तंवुर बारा (12) जन्क सिस्यलिरकुन केय्तोर.
अनि वूरकुन बे-सुदुड वालेक बूतकुन तेंड्सि पूड्ले अदिकार सीतोर.
इविर-इविरकुन पाकि कीसि, सारि कीसेर, “मिरट मी सङा सिरिप केय्दगा बेड्डे अनि कालकुन चेपुल्के केर्सि सोंदना.
बति चंदिय आयि, तेयिलङे आयि, कोतना चन्चिय आयि, दुस्रोक पाङुके आयि, इव बवे वोय्वा” इन्जेर हुकुम सीतोर.
10 अनि येसु उंडे गिर वूर सङा, “बदे नाटे सोत्ता पेजे बोरे मीकुन केयनुर्ते, अद नाटनल पेसिनल वेरि वोनय रोन तिन्जेर-उन्जेर मंट.
11 बति बगने आयि, बोरे मीकुन करुम किय्वेकेन आयि, सेलेके मिरट वेह्वलिक केन्ज्वेकेन आयि, वोर आतोना रोतल सेलेके वूर आतुरा नाटनल पेसिनेके, अदेना निसनित साटि मीवङ कालकुन तुंड्ता दुबा जडि कीसि वरट” इन्जेर वेह्तोर.
12 ते वूर सिस्यलिर सोन्जि, ‘मीवङ पापकुन वोप्सि, मंदुन मार्युसि ताकन’ इन्जेर पर्जतुन पचर किय्वल सुरु कीतेर.
13 अनि वूर, बूत सोप्रे मातुर्गल अवेन तेंड्सि पूड्तेर.
येड्कि-दुक वालिरकुन निय सोक्सि चोकोट कीतेर.
बाप्तिस्मा सिय्वल योहंता मरन
14 इहिन वूर कीतङ मय्मतङ कामकुन हिंदल येसुन डगुर पोरोल वाता.
इद गोस्टितुन बारेते हेरोद राजन गिर करे माता.
ते कहितुर, “येते बाप्तिस्मा सिय्वल योहन पर्वक्तले नेंड्तोर.
इदेन हिंदले इव सम्दो मय्मतङ काम्क जर्ग्सेर मंतङ” इन्जेर इत्तेर.
15 उंडे कहितुर, “बगवंतल ‘सारि कींतोन’ इन्जेर वेह्तोर वोर येलिया पर्वक्तल आंदुर” इन्जेर इत्तेर.
उंडे कहितुर, “तोत्तुर पर्वक्तलिर्गटल वोरोर मंदा वचो” इन्जेर इत्तेर.
16 इव केन्चि हेरोद राजल, “वोर येते बाप्तिस्मा सिय्वल योहने आंदुर!
नना सिपायिरा केय्दे वोना तला नट्कुसीतोन बति, इंके वोर नेंड्सि वातोर” इन्जेर इत्तोर.
17-18 इदेना कारन कहि रोज्क मुने, हेरोद तंवोर तमुर पिलिपु पिसि मनेकेन वोना बाय्को हेरोदियन तुङ्तोर.
ते इद गोस्टितुन बारेते, “निमे बगवंतना कानुंतुन बय्मन आसि ताक्सेर मंति” इन्जेर योहन वेलेन जोकङ वेह्तोर.
अदेन साटि हेरोद, हेरोदियन हिंदल, योहंतुन जेल्ते वाटुसीतोर.
19-20 ते हेरोदियल वोर योहंतुन पोरो पगा पिय्सि, वोना जीवा येतना इन्जि सोन्च कींदु.
जेल्ते मनेके हेरोदियन हिंदल वोर योहंतुन बतय आय्वक्ने हेरोद काबाड्तोर.
बारितेके योहन नियत्नोर अनि पवित्रवंतल इन्जेर हेरोद वोन बेय वेरिंदुर.
योहंतङ गोस्टिङ केन्चि, बस्के पुति मंदगा निप्ने आंदुर.
बति हेरोद वोनङ गोस्टिङ केन्जन साटि वेले इस्टम तोह्ंदुर.
21 बति आक्रितुन हेरोदियन योहंता जीवा येत्ले मोका पुड्ता.
बहन इत्तेके, हेरोद राजना पुड्ता दिवोसुन नेटि राज्नगा मंवलिर डगुक लोकुरकुन, सिपायिरुर अदिकारिरकुन अनि गलिलया येरियतुर मुके वालिरकुन केयुसि, दावत सीतोर.
22 अद वकत्ने हेरोदियना मियड वातुर वेर्तलिर अनि हेरोदुन मुने येन्चि वूरकुन आनंद सीसि, पोरोल कमय कीता.
इदेन हिंदल हेरोद राजल मियडुन करुम केय्सि, “मियडि!
नीकुन बतल पह्जेयो अद नाकुन तल्का.
अदेन नीकुन सींतोन” इन्जेर इत्तोर.
23 अनि वोट वाड्सि, “निमे बतल तल्क्तेके गिर सींतोन.
नावा अर्दो राज सिय्ले गिर तयर मंतोन” इन्जेर गोस्टि सीतोर.
24 अस्के अद पेडि विच्चेर अवनगा सोन्जि, “बतल तल्कका बेये?”
इन्जेर पूसि कीता.
ते अवल, “बाप्तिस्मा सिय्वल योहंता तला तल्का!”
इन्जेर वेह्ता.
25 ते अद पेडि सप्ने विच्चेर हेरोद राजनगा सोन्जि, “बाप्तिस्मा सिय्वल योहंता तला उंदि देडियतगा इर्सि नाकुन इंकेने सियुसा” इन्जेर तल्क्ता.
26-27 इद केन्चि हेरोद राजन बेय दुक्सा लाग्ता.
बति तना सम्दिर मुने गोस्टि सीता काड्कि, अद गोस्टित निपुसन साटि वोर, “योहंता तला नट्क्सि तरट” इन्जेर तंवोर सिपायिन हुकुम सीतोर.
ते वोर सिपायि सोन्जि, जेल्दे मंवल योहंता तलदुन नट्क्तोर.
28 अनि उंदि देडियतगा इर्सि, अद पेडिनगा तचि सीतोर.
ते अद पेडि तलदुन तंवा अवनगा वोसि सीता.
29 इद गोस्टि योहन तेर सिस्यलिरकुन केन्जा वाता.
ते जेल्दगा सोन्जि वोना कूरदुन वोसि, नारिता बंडता बुयरितगा इर्तेर.
येसु सियुङ हजरकुन तेर अदिक मांदितुन जेवुन सिय्वल
30 वूर बारा जन्क अपोस्तुल्क येसुनगा मल्सि वासि, तमा कीतङ सम्दो कामकुन बारेते अनि बोदा कीतङ सम्दोन बारेते वेह्तेर.
31 अस्के येसु वूर सङा, “मिरट जरसि आरम येता लागर.
बोरे मनुर अद जागतगा दाकट देट” इन्जेर वूरकुन वेह्तोर.
बारितेके अद वकत्ने वेले मांदिता वाय्वल-सोंवल दर्गडा मत्ता.
इदेन हिंदल, वूरकुन तिंले गिर वकत सेल्वक आता.
32 अदेन साटि वूर उंदि रूकतगा उच्चि, बोरे मनुर अद जागतगा सोत्तेर.
33 बति अहन सोंवल वेलेटिर सूड्सि, वोन वोड्कि पिय्तेर.
इदेन हिंदल सम्दो चहर्कनल गुब्डङ गुब्डङ मांदि वूरकुन तेर मुने विच्चेर अद जागतगा सोन्जि मत्तेर.
34 रूकतल येसु रेय्सि, अद मांदिता गुब्डतुन सूड्तोर.
ते वूर मांदि गाय्कि सेलोर अव गोरेङ बुज्डे मातपिनय दिस्ता काड्कि, वूर पोरो येसुन किवुल लाग्ता.
अदेन साटि, येसु वूरकुन वेले गोस्टिङ बोदा वेह्वल सुरु कीतोर.
35-36 पोड्द सोन्जेर मनेके, सिस्यलिर येसुनगा वासि, “मरट बोरे मनुर अद जागतगा मंतट.
पोड्द सोडिता.
इंद्केट्के वेले कोरुम आता.
अदेन साटि वीर मांदितुन आजु-बाजुतङ नह्क्नगा सारि कीम.
अस्के वूर तम्वा चंदिता अनि मंवडा सव्लत सूडंतेर” इन्जेर वेह्तेर.
37 बति येसु, “मिह्गने बतङे मत्तेके, तिंले सीम्ट” इन्जेर इत्तोर.
ते वूर, “ममोट सोन्जि रंड नुह्क (200) कूरतङ बिलने* सम्दिरकुन चंदि येच्चि तरना इंति कि बतल?”
इन्जेर पूसि कीतेर.
38 ते येसु, “मिह्गा बचोङ सारिङ मंतङ?
सोन्जि सूडट” इन्जेर इत्तोर.
वूर सोन्जि सूड्सि, “सियुङ सारिङ अनि रंड मीन्क मंतङ” इन्जेर वेह्तेर.
सियुङ सारिङ अनि रंड मीन्क
39 अस्के येसु, “वूर पर्जतुन अद हिर्वल जाडित पोरो सार्निङ उपुसीम्ट” इन्जेर हुकुम सीतोर.
40 सम्दिर पर्जतुन कहि पनस (50) जन्क्नङ अनि नूर (100) जन्क्नङ सार्निङ सार्निङ उपुसीतेर.
41 अस्के येसु अव सियुङ सारिन अनि रंड मीनकुन पिय्सि, पोरो हाबडेके सूड्सेर, बगवंतन दनेवाद वेह्तोर.
अनि अवेन उरुसि, “पर्जतुन वह्डि कीम्ट” इन्जेर सिस्यलिर्गा सीतोर.
अह्ने अव रंड मीनकुन गिर पाकि कीसि सीतोर.
42 वूर सम्दिर पेटिमेन तित्तेर.
43 अहन तिता पेजे सिस्यलिर मीनकुन अनि सारि टुक्डेन मीरि कीतेर.
ते बारा (12) डालङ निंतङ.
44 अद जेवुन तित्तुर वूर मरि-मियड अनि वेय्लोकुन सुटि कीसि, सिरिप माय्नलिरे सियुङ हजर्क (5,000) मांदि मत्तेर.
येसु सम्दुर्ता येतुन पोरो ताक्वल
45 अद आता पेजे येसु तंवुर सिस्यलिर सङा, “मिरट रूकतगा उच्चि, इद सम्दुरतुन हंदा बाज मंवल बेत्सयिदा चहर्दे नाक्तेर मुने सोंट” इन्जेर लह्कि कीतोर.
अनि तना वोरोरे अगा मंवल पर्जतुन बोनङ रोह्क वूरकुन सारि कीसेर आग्तोर.
46-47 वूरकुन सारि कीता पेजे, तना पार्तना कियन साटि गुटत पोरो सोत्तोर.
पोड्द सोन्जि सिकटि आनेके, सिस्यलिरा रूका सम्दुरतुन नड्डुम मत्ता.
48 वडि-दूंदड रूकतुन मुनेत्क वाय्वल कीनेके, वूर सिस्यलिर रूकतुन ताकुस्वल कटिन आता अद येसु सूड्तोर.
अनि वोर सक्रे लग-बग नालुङ नेक्नेके, येतुन पोरो ताक्सेर सिस्यलिर करुम सोत्तोर.
अनि वूरकुन वीड्सि सोंले आतोर.
49-50 अद सूड्सि वूर सिस्यलिर, “अद बोरडिय आंद!”
इन्जि बेय वेरिसि किलितेर.
सिस्यलिरा रूका वडि-दूंदडे कोंडे माय्वल
ननय आंदुन.
दर्यम्ने मंट!”
इन्जेर येसु वेह्तोर.
51 अनि अद रूकतगा तेर्ग्तोर.
अस्के येंटने वडि-दूंदड कमि आसि सोडिता.
वूर सिस्यलिर अहन कमि आय्वल सूड्सि बेय निप्ने आतेर.
52 बारितेके येसु सियुङ हजर्क (5,000) मांदितुन जेवुन सीता अद कार्यतुन अर्तम किय्वक्ने, वूरङ दिल्क मूजोर-पांदे निन्चि मत्तङ.
गेनेसरेत्नगा दुक्ने मंवलिरकुन चोकोट किय्वल
53 वूरा रूका सम्दुर्ता हंदा डर्डितगा मंवल गेनेसरेतु येरियतगा येव्ता.
ते वूर तम्वा रूकतुन आपुसि, रेय्तेर.
54 अस्केने वेलेटिर मांदि सूड्सि, येसुन वोड्कि पिय्तेर.
55 अनि बोनङ नह्क्ने वूर विच्चेर सोन्जि, बेमरिने मंवलिरकुन कटुलकुन पोरो मींडुसि वोन्गा पिय्सि वातेर.
56 अहन येसु बदे उंदि नाटे सोत्तेके गिर, उंदि चहर्ते नेङ्तेके गिर, उंदि जागते येव्तेके गिर बति, अव हाटुम्क्नङ बाजर्क्नगा बेमरि वालिरकुन तचि मींडुसींदिर.
अनि, “नीवा पाङुडा काटुन तेर वूरकुन इटा सीम” इन्जेर वूर जुल्मा कींदिर.
बोर-बोर्ते वोन इट्ंदिरो, वूर सम्दिर गिर चोकोट आतेर.