योहंता मरंतुन बारेते हेरोद्ना सोन्च
14
1 अद गट्कते गलिलया येरियतगा राज ताकुसिय्वल हेरोद अंतिपस* येसुन बारेते केन्ज्तोर.
2 अस्के वोर तंवुर सेव्कलिर सङा, “वेर करलेन बाप्तिस्मा सिय्वल योहन आंदुर.
सातुर्गटल नेंड्तोर.
अदेन साटि वोन्गा मय्मतङ काम्क किय्वल सक्ति मंता.
3-4 बारितेके इदेन मुने, ‘नीवोर तमुर पिलिप्ना वेय्लो हेरोदियन निमे तुङ्वल नायम आयो’ इन्जि योहन नाकुन वेह्तोर” इन्जेर इत्तोर.
ते हेरोदियना जुल्मतुन हिंदल, वोन जेलतगा कोंडि कीसि इर्तोर.
5 योहंता जीवा येतना इन्जि मत्तोर बति, पर्जतुन वेरितोर.
बारितेके योहंतुन वूर पर्वक्तल इन्जेर मानि कींदिर.
6 ते हेरोद राजना पुड्ता दिवोसुन नेटि दावत तिंले वातुर मुने, हेरोदियना मियड येन्चि, हेरोदुन आनंद सीता.
7 अदेन साटि, “नीकुन पह्जे मत्ता अद कोरा.
अदेन सींतोन” इन्जेर वोट वाट्सि वाग्दन कीतोर.
8 अस्के अद पेडि विच्चेर अवनगा सोन्जि, “बतल तल्कका बेये?”
इन्जेर पूसि कीता.
ते अवल, “‘बाप्तिस्मा सिय्वल योहंता तला इद देडियतगा इर्सि नाकुन सीम’ इन्जि तल्का” इन्जेर वेह्ता.
अद पेडि अह्ने तल्क्ता.
9 इद केन्चि हेरोद राजन दुक्सा लाग्ता.
तना सम्दिर मुने वोट वाड्ता काड्कि, अद वोटुन निपुस्ले, वोर मियडा आसत पूरि कियन साटि वोप्तोर.
10 अनि सिपायिन केय्सि, योहंता तला नट्क्सि तरा इन्जेर सूचना कीतोर.
11 ते वोर उंदि देडियतगा अद तलतुन इर्सि, राजनगा तत्तोर.
ते मियड अदेन पिय्सि तंवा अवनगा सोत्ता.
12 अदे गट्कते योहन तेर सिस्यलिर करि कीसि, अगटल वोना कूरदुन वोसि माति कीतेर.
अनि येसुनगा सोन्जि, अद गोस्टि वेह्तेर.
सियुङ हजर्क मांदितुन जेवुन सिय्वल
13 येसु जर्ग्ता अदेन केन्चि, सिरिप तंवुर सिस्यलिर सङा रूकतगा उच्चि, बोरे मनुर अद जागतगा सोत्तोर.
बति अद कबुर केन्चि, गुब्डङ गुब्डङ मांदि चहर्कनल ताक्सेर, वोन पेजेय सोत्तेर.
14 ते येसु रूकतल रेय्सि सूड्तेके वोन वेलेटिर मांदि दिस्तेर.
अस्के वूर पोरो येसुन किवुल लाग्ता.
ते वूर नड्डुम येड्कि-दुक्ने मंवलिरकुन चोकोट कीतोर.
15 पोद्रेक्ना येलते, सिस्यलिर येसुनगा वासि, “मरट बोरे मनुर अद जागतगा मंतट.
इंद्केट्के कोरुम आता.
अदेन साटि मांदितुन आजु-बाजुतङ नह्क्नगा सारि कीम.
अस्के वूर तम्वा चंदिता अनि मंवडा सव्लत सूडंतेर” इन्जेर वेह्तेर.
16 बति येसु, “वूर सोंवल जुरत सेले.
मिरटे वूरकुन तिंदन साटि चंदिता इंतजम कीम्ट” इन्जेर इत्तोर.
17 ते वूर, “मह्गा सिरिप सियुङ सारिङ अनि रंड मीन्के मंतङ” इन्जेर वेह्तेर.
18 अस्के येसु, “अव सारिङ अनि मीनकुन नह्गा पिय्सि वरट” इन्जेर इत्तोर.
19 अनि जाडित पोरो उदट इन्जेर पर्जतुन सूचना सीतोर.
अस्के अव सियुङ सारिन अनि रंड मीनकुन पिय्सि, पोरो हाबडेके सूड्सेर, बगवंतन दनेवाद वेह्तोर.
अनि अवेन टुक्डेङ कीसि, सिस्यलिरकुन सीतोर.
ते वूर मांदितुन जेवुन वह्डि कीतेर.
20 वूर सम्दिर पेटिमेन तिता पेजे, मेय्तङ टुक्डेङ सिस्यलिर मीरि कीसि, बारा डालङ निह्तेर.
21 अद जेवुन तित्तुर वूर मरि-मियड अनि वेय्लोकुन सुटि कीसि, सिरिप माय्नलिरे लग-बग सियुङ हजर्क (5,000) मांदि मत्तेर.
येसु सम्दुर्ता येत पोरो ताक्वल
22 अद आता बरोबर, येसु तंवुर सिस्यलिरकुन रूकतगा उपुसि, तनकुन तेर मुने हंदा बाज्ना डर्डिते सोनल आगे सीतोर.
अनि तना सम्दिरकुन सारि कीसेर पेजे आग्तोर.
23 मांदितुन सारि कीता पेजे, तना वोरोरे पार्तना किय्ले, गुटत पोरो सोत्तोर.
पोड्द सोन्जि सिकटि आनेके, तना वोरोरे अगा मत्तोर.
24 अद गट्कते सिस्यलिरा रूका डर्डितल लङ मत्ता.
वडि-दूंदड अनि हेल्वङ रूकतुन मुनेत्क पासि, वोसेर मत्तङ.
25 लग-बग सक्रे नालुङ नेक्नेके, येसु सम्दुर्ता येत पोरो ताक्सेर, सिस्यलिर करुम वातोर.
26 अहन येतुन पोरो ताक्वल सूड्सि, सिस्यलिर बेय वेरितेर.
अनि दड्कि तिन्जि, “अद बोरडिय आंद!”
इन्जेर जोर्ते किलितेर.
27 अस्के येसु येंटने, “वेरिमट!
ननय आंदुन.
दर्यम्ने मंट” इन्जेर इत्तोर.
28 ते पेतुरु, वोन सङा, “पर्बु!
निमेय आंदि बेहेते, नी वेरि नना गिर येतुन पोरो ताक्सेर वाया सीम!”
इन्जेर इत्तोर.
29 अस्के येसु, “हो!
वरा” इन्जेर इत्तोर.
ते पेतुरु रूकतल रेय्सि, येत पोरो ताक्सेर येसुन बाज सोत्तोर.
30 बति वडि-दूंदडेके सूड्सि वेरिसि, येतगा मुडुङ्सेर, “पर्बु!
नाकुन बचि कीम!”
इन्जेर जोर्ते किलितोर.
31 येसु येंटने तंवा केय चह्चि वोन पिय्तोर.
अनि “ना पोरो नीकुन गट बरोसा सेले.
बारि अनमिना आसेर मंति?”
इन्जेर पूसि कीतोर.
32 अनि वूर इविर्ते अद रूकतगा तेर्ग्ता पेजे वडि-दूंदड आग्ता.
33 अस्के रूकतगा मंवलिर सिस्यलिर, “निमे करलेन बगवंतनोर मरिनि आंदि” इन्जेर पार्तना-विंति कीतेर.
येसुनङ पाङुक इट्तुर चोकोट आय्वल
34 वूर अद सम्दुर्ता हंदा बाज्ना डर्डिते मंवल गेनेसरेतु इंवल येरियतगा येव्तेर.
35 अगटुर लोकुर येसुन वोड्कि पिय्सि, सिर्मुट मंवलिक नह्क्नुरकुन कबुर सारि कीसि, बेमरिने मंवलिर सम्दिरकुन वोन्गा तरुस्तेर.
36 अनि येसुन, “नीवा पाङुडा काटुन तेर वूरकुन इटा सीम” इन्जेर जुल्मा कीतेर.
अहन वोनङ पाङुक इट्तुर वूर सम्दिर गिर चोकोट आतेर.