योहन 6

येसु सियुङ हजर्क मांदितुन जेवुन दोस्वल

(मत्तयि 14:13-21; मार्क 6:30-44; लूका 9:10-17)

1 अद आता पेजे, येसु गलिलया सम्दुर्तुन^* हंदा बाज्नेके, तंवुर सिस्यलिर सङा सोत्तोर.

2 बेमरि वालिरकुन येसु चोकोट कीतङ मय्मतङ काम्कुन सूड्सि, वेलेटिर मांदि वोन पेजेय वासेर मत्तेर.

3 ते येसु गुटा तेर्ग्सि, तंवुर सिस्यलिर तोडो उद्तोर.

4 अव दिवोस्क्नगा यूदुल्क्ना पस्का सड करुम वासि मत्ता.

5 अद वकत्ने येसु तला तह्‍चि सिर्मुट सूड्तोर.

ते वेलेटिर मांदि तन्गा वासेर दिस्तेर.

“वीर सम्दिर तिंले बगटल काने येच्चि तर्कट?”

इन्जेर पिलिपुन येसु पूसि कीतोर.

6 तना बतल किय्वल मंतोर इंवल तनकुन टावय.

बति वोर पिलिप्ना मंदे बतल मंतयो करि कियना इन्जेरेन, येसु अहन पूसि कीतोर.

7 ते पिलिपु, “रंड नुह्‍क (200) कूरतङ बिलने^* चंदि येच्चि तत्तेके तेर बति, हर वोरोन जरजरा तिंले गिर येवो” इन्जेर जवब सीतोर.

8-9 अस्के वोनुर सिस्यलिर्गटल सीमोन-पेतुर्तोर तमुर आंद्रेयल, “इगे वोरोर कांडिनगा सियुङ सारिङ अनि रंड चुडुक मीन्क मंतङ.

येसु मांदितुन बोदा वेह्‍वल

बति इचोर वेले मांदितुन इव बेकेन येवोङ” इन्जेर येसुन वेह्‍तोर.

10 ते येसु, अगा उदनल जाडि मत्ता काड्कि, “तान पोरो पर्जतुन उपुसट” इन्जेर वेह्‍तोर.

ते मरि-मियड अनि वेय्लोकुन लेका किय्वके, लग-बग सियुङ हजर्क (5,000) माड्सा पङत उत्तेर.

11 अस्के येसु, अव सारिङ पिय्सि, बगवंतन दनेवाद वेह्‍चि, पङत उद्तुरकुन वह्‍डि किय्ले सीतोर.

अह्‍ने मीनकुन गिर सीतोर.

वूर तिंदनच्चोर तित्तेर.

12 पर्जा पेटिमेन तिता पेजे, “इचुर गिर करब आय्वक्ने, मेय्तङ टुक्डेङ सम्दो मीरि कीम्ट” इन्जेर सिस्यलिरकुन येसु वेह्‍तोर.

13 ते सिस्यलिर, तित्तङ अव सियुङ सारिनल मेय्तङ टुक्डेन मीरि कीतेके, बारा डालङ निंतङ.

14 अद मय्मता कामुन सूड्सि, पर्जा गुल आतेर.

अनि “इद दुनियते वाय्ले मत्तोर वोर करल पर्वक्तल वेरे आंदुर”⁺ इन्जेर पर्जा इत्तेर.

15 ते येसु, वूर पर्जा तनकुन हटुन राजल किय्ले आंतेर इंवल करि कीसि, अद गुटतेके वोरोरे सोत्तोर.

येसु सम्दुर्ता येत पोरो ताक्वल

(मत्तयि 14:22-27; मार्क 6:45-52)

16-17 अद नेटि पोड्द सोनेके, येसुनुर सिस्यलिर गलिलया सम्दुर्ता डर्डित करुम सोन्जि, येसुना सरि सूड्सेर मत्तेर.

अस्के सिकटि आसेर मत्ता तेर बति, येसु वूर्गा वाय्लेके मत्तोर.

ते वूर सिस्यलिर, उंदि रूकतगा उच्चि, सम्दुरतुन हंदा बाजुन मंवल कपेर्नहोम चहर्ते सोंले पेसितेर.

18 अदे वकत्ने डगुर वडि-दूंदड तेच्चि, सम्दुर्तङ हेल्वङ बडे मातङ.

19 वूर लग-बग मूंद-नालुङ कोस्क लक रूकतुन ताकुस्ता पेजे, येत पोरो ताक्सेर येसु तम्वा रूकतगा वाय्वल सूड्सि, बेय वेरितेर.

20 बति येसु, “वेरिमट!

ननय आंदुन” इन्जेर वूरकुन वेह्‍तोर.

21 अस्के वोन आनंद्ने अद रूकतगा उपुसीतेर.

अस्के येंटने वूर सोंवल जागते अद रूका येव्ता.

22-23 पर्बु विंति कीसि जेवुन दोस्तोर अद जागते, दुस्रो नेटि कहि रूकङ तिबेरिया नगुडल वातङ.

ते सम्दुर्ता हंदा बाजुन रेहे माय्वलिर लोकुर, सिस्यलिर सिरिप उंदिय रूकते सोत्तेर.

बति वूर तर्सोते येसु सोन्मकि इन्जेर करि कीतेर.

24 वूर मांदि येसुन अनि सिस्यलिरकुन मह्‍क्तेर बति, बोरे पुट्मकि.

ते अव रूकनगा उच्चि, येसुन मह्‍क्सेर कपेर्नहोम सोत्तेर.

25 सम्दुर्ता हंदा डर्डिते येसु वूरकुन दिस्ता पेजे, “गुरुजि!

इगे बस्के वाति?”

इन्जेर पूसि कीतेर.

जीवतुन ताकद सिय्वल काने येसुय आंदुर

26-27 ते येसु, “मय्मतङ कामकुन अर्तम किय्वडुन हिंदल आयो बति, बर्पुर काने तित्ततुन हिंदले मिरट, नाकुन मह्‍क्सेर मंतिट.

सव्सि करब आय्वल कानेतुन साटि पर्पेडे माय्मट.

बति स्वर्ग्नोर माय्नल सिय्वल बस्केट पिस्वल जीवा वाले कानेतुन साटि पर्पेडे माम्ट.

अहन सियन साटिने, बगवंतल तंवा अदिकार्दा मोर ना पोरो वाड्तोर.

इद सतेम आंद” इन्जेर वेह्‍तोर.

28 अस्के वूर, “बगवंतल माकुन बतल कियना इंतोर?”

इन्जेर पूसि कीतेर.

29 ते येसु, “बगवंतल बोंते सारि कीतोरो, वोन्गा बरोसा इरना इन्जेर कोरंतोर” इन्जि वेह्‍तोर.

30-31 अद केन्चि वूर, “मा तोत्तुर ईजिप्टनल वानेके, बोडि गुटनगा मंना इंवल काने तित्तेर.

दर्मा-ग्रंत्नगा लिहि कीता तीरे वोर स्वर्गनल, अद कानेतुन तिंले सीतोर.

⁺ ते ममोट नी पोरो बरोसा इरनल इंके मा साटि, बातल मय्मता काम कीसि तोहंति?”

इन्जेर पूसि कीतेर.

32 अस्के येसु, “अद कानेतुन स्वर्गनल मोसे सिय्मकि बति, ना बाबोये सीतोर.

इंके अद करल कानेतुन, ना बाबो स्वर्गनल सीसेर मंतोर.

33 बाबो स्वर्गनल बततुन सारि कीतोरो, अदे दुनियतुरकुन जीवदान सींता.

बगवंतल सारि कीता करल काने इदे आंद” इन्जेर वेह्‍तोर.

34 ते वूर, “पर्बु!

अद कानेतुन माकुन बस्केट सीम” इन्जेर कोर्तेर.

35 अस्के येसु, “ननय जीवदान सिय्वल कानेता आंदुन.

ना पोरो बरोसा इर्सि, नावा चर्नते वाय्वलिर बस्केट्के वूरङ दिलकुन रोपो करुसायुर अनि वूरकुन बस्केट्के येर वट्का वसो.

36 बति नना इदेन मुने वेह्‍तपिनय, मिरट नाकुन सूड्ता पेजे गिर ना पोरो बरोसा इर्मकि.

37 तेर बति, बोन बोंते बाबो नह्‍गा सारि कींतोरो, वूरे नह्‍गा वांतेर.

नह्‍गा वातुरकुन बस्केने बह्‍रि डग्लि कियोन.

38 बारितेके, नना नावा इचा तीर किय्ले स्वर्गनल रेय्सि वाय्मकि.

बति नाकुन सारि कीतोना इचा तीर किय्लेने वातोन.

39 नाकुन सारि कीतोना इचा बतल इत्तेके, नह्‍गा सारि कीतुर्गटल वोरोर गिर तप्सि सोंवक्ने नना काबाडा लागर.

वूरकुन तस्वा किय्वल दिवोसुन नेटि नना नेंडुसा लागर.

40 बारितेके, तंवोर मरिन बाज सूड्सि, बरोसा किय्वन बस्केट पिस्वल जीवा पुटना इंवले बाबोना इचा आंद.

अहन बरोसा इर्वन तस्वा किय्वल दिवोसुन नेटि नेंडुसंतोन” इन्जेर वूरकुन वेह्‍तोर.

41-42 अस्के वूर यूदुल्क्ना जातितुर, “‘नना स्वर्गनल रेय्सि वाता कानेता’ इंतोर.

वेर येसुते योसेप्नोरे मरि आंदुर कि रा!

वेनुर अवल-बाबो माकुन टावय.

‘नना स्वर्गनल रेय्सि वातोना आंदुन’ इन्जेर बारि इंतोर?”

इन्जि गोल्ग्तेर.

43 ते येसु, “मीवा मिरट गोल्ग्मट” इन्जेर वूरकुन इत्तोर.

44 “नाकुन सारि कीतोर वोर बाबो, बूरा दिलतगा इचा पुटुसंतोरो, वूरे नह्‍गा वांतेर.

दुस्रुर वायुर.

नह्‍गा वातुरकुन तस्वा किय्वल दिवोसुन नेटि नेंडुसंतोन” इन्जेर वेह्‍तोर.

45 “‘बगवंतले वूरकुन करुसींतोर’⁺ इन्जेर पर्वक्तलिर लिहि कीतेर.

बूर्ते अव गोस्टिङ करिसि, अवेन पिय्सि ताकंतेरो, सिरिप वूरे नह्‍गा वांतेर.

46 बगवंतन सूड्तोर वोर बोरे सेलोर इन्जेर वेह्‍चेर मंतोन.

सिरिप ननय बगवंतन सूड्सि, वातोना आंदुन.

47 बोर्ते नह्‍गा बरोसा इरंतोरो, वोन बस्केट पिस्वल जीवा पुटंता इंवल सतेम आंद.

48 ननय जीवदान सिय्वल कानेता आंदुन.

49 मी तोत्तुर अद बोडि गुटनगा मंना इंवल काने तित्तेर तेर बति मार्तेर.

50 बति इद स्वर्गनल रेय्सि वाता कानेतुन बोर्ते तिंतेरो, वोन बस्केट मरन मनो.

51 स्वर्गनल रेय्सि वाता जीवदान सिय्वल कानेता ननय आंदुन.

बोर्ते इद कानेतुन तिंतोरो, वोर बस्केट पिसंतोर.

अद काने ना मेंदोल आंद.

अद मेंदोडुन दुनियतुरकुन बस्केट पिसुसि इर्ले, अर्पना सींतोन” इन्जेर वेह्‍तोर.

52 इद केन्चि वूर यूदुल्क, “मरट तिंले वेर तंवा मेंदोडुन बहन सिया परंतोर?”

इन्जेर तम्वा तमा सोङ्ने चर्चा कीतेर.

53 ते येसु, “स्वर्ग्नोर माय्नना मेंदोल तिंवेकेन आयि, वोना नेतुर उंवेकेन आयि, मीकुन बस्केट पिस्वल जीवा पुटा परो.

इद सतेम आंद.

54 बति बोर्ते नावा मेंदोडुन तिन्जि, नावा नेतुडुन उंटोरो, वोर बस्केट जीवते मंदंतोर.

वोर सातेके गिर, तस्वा किय्वल दिवोस्ने नना वोन नेंडुसंतोन.

55 बारितेके नावा मेंदोल करल तिंवल काने आंद अनि नावा नेतुर करल उंवल चीज आंद.

56 बोर्ते नावा मेंदोडुन तिन्जि, नावा नेतुडुन उंटोरो, वोन्गा नना नह्‍गा वोर उंदि आसि, मंदंतोम.

57 जीवते मंवल बाबो नाकुन सारि कीता काड्कि, नना जीवते मंतोन.

अह्‍ने नावा मेंदोडुन, बोर्ते तिंतोरो वोर, ना हिंदल जीवते मंदंतोर.

58 स्वर्गनल रेय्सि वाता करल कानेता ननय आंदुन.

तोत्तुर मंना इंवल काने तिन्जि गिर मार्तेर.

बति इद कानेतुन तित्तुर बस्केट जीवतेन मंदंतेर इन्जि, मीकुन वेह्‍चेर मंतोन” इन्जेर इत्तोर.

59 इव गोस्टिङ कपेर्नहोम्ना सुनगोग्नगा^* बोदा कीनेके येसु वेह्‍तोर.

बस्केट पिस्वल जीवतुन बारेते बोदा

60 इव गोस्टिङ केन्चि वूर बक्तलिर, “इद बोदा वेले कटिंता मंता.

इद बोदतुन बोर वोपनिर?”

इन्जेर गोल्ग्तेर.

61-62 ते येसु अद करि कीसि, “मिरट इद गोस्टि केन्चिन सोङुन वातेके, स्वर्ग्नोर मायनल, वाता जागतेके ताच्चि सोंवल सूड्तेके, उंडे बहन आंतिटो?”

इन्जेर बक्तलिरकुन इत्तोर.

63 “मेंदोल जीवतुन सिया परो.

सिरिप बगवंतना आत्मतुन हिंदले, जीवते मंतिट.

नना वेह्‍वलिक जीवा सिय्वल आत्मतङ गोस्टिङ आंदुङ.

64 बति मी रोपो कहितुर बरोसा कियुर वूर मंतेर” इन्जेर वूरकुन वेह्‍तोर.

बारितेके, तनकुन बोर नंमोर अनि बोर पसि कींतोर इंवल येसुन मोदोडले टावा मत्ता.

65 अनि उंडे येसु, “मीकुन ना बाबो सारि कीतेके तपा, नह्‍गा बोरे वाया पर्विट.

अदेन साटिने इव गोस्टिङ मी सम्दिरकुन वेह्‍तोन” इन्जेर इत्तोर.

66 अस्केडल येसुनुर वेलेटिर बक्तलिर पेजे मल्सि सोत्तेर अनि वूर उंडे बस्केन वोना बक्ति पिय्मकि.

67 अदेन साटि, येसु बारा जन्क सिस्यलिर बाजुन मल्सि, “मिरट गिर दाकोम इंतिट कि बतल?”

इन्जेर पूसि कीतोर.

68 अस्के सीमोन-पेतुरु, “बोन्गा इन्जेर दाकोम पर्बु?

बस्केट पिस्वल जीवा सिय्वलिक गोस्टिङ वेह्‍वनि निमेय आंदि.

69 ‘बगवंतल रोह्‍तोर वोर पवित्रा वालेनि निमेय आंदि’ इन्जि बरोसा इर्सि करि कीतोम” इन्जेर वेह्‍तोर.

70 ते येसु, “मी बारा जनकुन ननय नेमि कीतोन कि सेले?

बति मिह्‍गटल वोरोनगा सय्तंदा मन मंता” इन्जेर वेह्‍तोर.

71 सीमोंतोर मरि इस्करियोत नाट्नोर यूदल, बारा जन्क सिस्यलिर्गटल वोरोर आसि गिर दोका सिय्वल आतोर.

अदेन साटिने वोन बारेते इद गोस्टि वेह्‍तोर.