केय-काल्क अर्सि सोत्तोन चोकोट किय्वल
5
1 अद आता पेजे, यूदुल्क्ना उंदि सड करुम वाता काड्कि, येसु येरुसलेम नगुडे, वर्सि सोत्तोर.
2 येरुसलेम्ना गोरेना पाटक इंवल जागतुन करुम हेब्रि बासते बेतेस्ता इंवल कोनेर मत्ता.
अद कोनेरतगा सियुङ मंडोप्क मत्तङ.
3-4 *[अद कोनेरतगा कहि येलने बगवंतनोर दूतल रेय्सि येतुन हालि कींदुर.
अस्के बोर मुने रेयंतोरो वोर बातल बेमरि मत्तेके गिर चोकोट आंदुर.]
अव मंडोप्क्नगा गुड्डिर, लेङ्डल-तुङ्डलिर अनि केय-काल्क अर्सि सोत्तुर, सम्दि तीर्क्नङ बेमरिङ वालिर जागा पिय्सि मंदिर.
5 वूर रोपो तीसा आट (38) साल्कनल बेमरिते मंवल वोरोर मायनल मत्तोर.
6 वोर माय्नन येसु सूड्सि, वेले साल्कनल बेमरिते मंतोर इंवल करि कीसि, “चोकोट आयना इंति कि?”
इन्जेर वोन पूसि कीतोर.
7 ते वोर मायनल, “पर्बु!
अद कोनेर्ता येर हाले मानेके, नाकुन अगा रेह्वलिर बोरे सेलुर.
अदेन साटि नना रेय्ले वानेकेते, नाकुन तेर मुनेन दुस्रोर बोर्तेर अगा रेयंतोर” इन्जेर जवब सीतोर.
8 अस्के येसु, “तेदा!
अनि नीवा चाप्रतुन पिय्सि रोन सोन” इन्जेर इत्तोर.
9 अहन इत्ता बरोबर, वोर चोकोट आसि, तंवा चाप्रतुन पिय्सि ताक्सेर सोत्तोर.
इद गट्ना यूदुल्क्ना आरम्ना दिवोसुन नेटि जर्ग्ता.
10 ते यूदुल्क्नुर अदिकारिर, “नीवा चाप्रा पिय्सि ताक्वल, नेंड आरम्ना दिवोस आता काड्कि, दर्मता कानुंतुन उल्टा ताक्तप आंता” इन्जेर चोकोट आतोन सङा इत्तेर.
11 बति वोर, “नाकुन चोकोट किय्वल, ‘नीवा चाप्रा पिय्सि सोन इत्तोर’” इन्जेर वूरकुन वेह्तोर.
12 ते वूर, “‘नीकुन चाप्रा पिय्सि सोन’ इन्जेर बोर वेह्तोर?”
इन्जि पूसि कीतेर.
13 बति वोर वेहा पर्मकि.
बारितेके अगा वेले मांदि मत्तेर अनि येसु मांदितगा मिस्डे मासि सोत्तोर.
14 अद आता पेजे येसु, वोन मंदिर्ता आव्रतगा सूड्सि, “इचुला केन्जा!
निमे चोकोट आति.
उंडे वेले दुक्सा वाय्वक्ने मंले, पाप्नङ काम्क किय्मा” इन्जेर वेह्तोर.
15 अस्के, वोर मायनल यूदुल्क्नुर अदिकारिर्गा सोन्जि, “नाकुन चोकोट किय्वल येसु आंदुर” इन्जेर वेह्तोर.
16 येसु आरम्ना दिवोसुन नेटि ईतङ काम्क कीततुन हिंदल, वूर यूदुल्क्नुर अदिकारिर येसुन दुक्सा सिय्वल मोदोल कीतेर.
17 बति येसु, “ना बाबो हर गट्का काम कीसेर मत्ता काड्कि, नना गिर काम कीसेर मंतोन” इन्जेर वेह्तोर.
18 इद कारंतुन हिंदल, यूदुल्क्नुर अदिकारिर, “वेर सिरिप आरम्ना दिवोस्ना मा नेकितुन बह्के माय्वले आय्वा, बगवंतन तंवोर बाबो इन्जेर वेह्चि, तनकुन बगवंतन बरोबर बडि कीसेर मंतोर” इन्जि, इव रंड कारनकुन हिंदल, येसुन जकना इन्जेर वूर निर्नय कीतेर.
बगवंतना अदिकार येसुनगा मंता
19 ते येसु इहिन पोडि कीसि वेह्तोर: “इद सतेम आंद.
बगवंतनोर मरि तंवा तना बतय किया परोर.
बाबो बतल कींतोरो, सिरिप अदेने सूड्सि मरि कींतोर.
बाबो बगवंतल बतङ बहन कींतोरो, अवेन मरि अह्ने कींतोर.
20 बाबो मरिन लाड कीता काड्कि, तना किय्वलिक सम्दो कामकुन मरिन तोह्चेर मंतोर.
उंडे वेले डगुक काम्क मुने बविसत्ने मरिन सङा बाबो कियुस्वल सूड्सि, बेय गुल आकिट.
21 बाबो सातुरकुन बहन नेंडुसंतोरो, अह्ने मरि गिर तना नेमि कीतुरकुन पिसुसंतोर.
22 बाबो बोने तस्वा कियोर.
बति तस्वा किय्ले बर्पुर अदिकार तंवोर मरिन सीतोर.
23 तनकुन बहंते सम्दिर मानि कींतेरो, अह्ने मरिन गिर मानि कियना इन्जेरेन, अद अदिकार मरिना केय्दे बगवंतल सीतोर.
बोरे आयि मरिन मानि किय्वेके, मरिन सारि कीतोर बाबोन गिर मानि कीता लेकतगा वायोर.
24 नावा गोस्टि केन्चि, नाकुन सारि कीतोनगा बरोसा इर्वन, बस्केट पिस्वल जीवा पुटंता.
आतोन पापकुन हिंदल, वाय्वल सिक्सा तपंता.
मरंतल तप्सि, वोन बस्केट पिस्वल जीवा पुट्ता.
25 “इद सतेम आंद.
सानलिर बगवंतनोर मरिना गोस्टि केन्ज्वल वकत वासेर मंता.
अद इंके वासिन मंता.
अद गोस्टि केन्चि, ताक्वलिर बस्केट पिसंतेर.
26 बहंते बगवंतल जीवतोर माल्कल आंदुरो, अह्ने बस्केट पिस्वल जीवतुन सिय्वल अदिकार मरिन सीतोर.
27 वोर मरि स्वर्ग्नोर माय्नल आता काड्कि, लोकुरकुन तस्वा किय्वल अदिकार बाबो वोन सीतोर.
28 मिरट गुल आय्मट!
उंदि वकत वासेर मंता.
अद वकत्ने वीच्क्नगा मंवलिर सानलिर सम्दिर गिर बगवंतनोर मरिना गोस्टि केन्चि, नेंड्सि बह्रि वांतेर.
29 नेंड्सि बह्रि वातुर सम्दिरकुन वोर मरि तस्वा कीसि, वूर्गटल पुनेवंतलिरकुन बस्केट पिस्वल जीवा सींतोर अनि पापेस्तलिरकुन सिक्सा वाटंतोर.
30 अद तस्वा नावा इचतुन पिय्सि आयो बति, नाकुन सारि कीतोना इचतुन पिय्सिन कींतोन.
नावा नना बतय किया परोन.
बाबल नाकुन वेह्ता तीरे, लोकुरकुन नाय्दा तस्वा कींतोन.
नना किय्वल तस्वा नाय्दा आंद.
येसुन बारेतङ गवङ
31 “मोका ना बारेते ननय गवा वेह्कते, नावा गवतुन करल इन्जेर वोपुर.
32 ना बारेते गवा वेह्ले वोरोर मंतोर.
वोर वेह्वल गवा सतेम इन्जेर नाकुन टावा.
33 “मिरट योहंतगा कहितुरकुन रोह्तिट.
वोना गवा सतेमे आंद.
34-35 योहन डिवेत दात पोच्चेर वेड्चि सीसेर मत्तोर.
मिरट वोना वेड्चिते जुलुक वेरि, बेय आनंद्ने मत्तिट.
मिरट बचे मायना इन्जेरेन इव गोस्टिङ वेह्चेर मंतोन.
“बति नाकुन नरिमन्कना गवा जुरत सेले.
36 बारितेके योहंतुन तेर डगुर गवा नह्गा मंता.
अद बतल इत्तेके: नना कीतङ मय्मतङ काम्क.
इव कामकुन बगवंतल नाकुन कीम इन्जेर हव्लि कीतोर.
इवे नाकुन बाबो सारि कीतोर इन्जेर निरुपन कींतङ.
37 वोरे बाबो ना बारेते इद गवा वेह्चेर मंतोर.
बति मिरट बस्केन वोना वचन केन्ज्मकि अनि बस्केन वोना रूप सूड्मकि.
38 सारि किय्वन पोरो मिरट बरोसा इर्वा काड्कि, वोना बोदा मीवङ दिल्क्नगा मनो.
39 बस्केट पिस्वल जीवा दर्मा-ग्रंत्नगा पुटंता इन्जेर सोन्च कीसि, मिरट चोकोटे मह्कंतिट.
बति अवे वचन्क ना बारेते गवा वेह्चेर मंतङ.
40 तेर बति मिरट अद बस्केट पिस्वल जीवतुन साटि नह्गा वाय्ले वोप्विट.
41 “नाकुन माय्नलिर सिय्वल डगुर-पान लागो.
42 बारितेके मिरट बगवंतन पेर्मा किय्विट इंवल नाकुन टावये.
43 नना नावोर बाबोना पोरोडे वातोन.
नाकुन मिरट वोप्मकि.
बति उंडे बोरे तंवा पोरोडे तनय वातेके, वोन मिरट आनंद्ने वोपंतिट.
44 मीकुन दुस्रुर डगुर-पान सिय्वल इस्टम बति, वोरोरे मंवल बगवंतल सिय्वल डगुर-पांदुन साटि कोसिद किय्विट.
ते ना पोरो बहन बरोसा इरा पर्किट?
45 नना बाबोनगा मी पोरो पिरदि कींतोन बतलो इन्जेर सोन्च किय्मट.
बति दर्मता कानुंतुन लिहि कीतोर मोसे पर्वक्तन पोरो मिरट आसा इर्तिट.
वोर मोसेय मी पोरो पिरदि कींतोर.
46 वोर मोसे ना बारेते लिहि कीता काड्कि, मिरट मोका वोन बरोसा कींदिट्ते, नाकुन गिर बरोसा कींदिट.
47 बति मोसे लिहि कीता दर्मता कानुंतङ गोस्टिने मिरट नम्विट्ते, नावङ गोस्टिन बहन नमा पर्किट?”
इन्जेर यूदुल्क्नुर अदिकारकुन वेह्तोर.