योहन 4

कुहितगा येसु वेय्लोन सङा वड्क्वल

1 योहंतुन तेर अदिक सिस्यलिरकुन येसु तयर कीसि, वूरकुन बाप्तिस्मा सीसेर मंतोर इन्जेर परिसयुल्क केन्ज्तेर.

2 (करल बतल इत्तेके, येसु बाप्तिस्मा सिय्मकि.

बति वोनुर सिस्यलिर सीसेर मत्तेर.)

3 इद गोस्टितुन येसु केन्ज्ता पेजे, यूदया येरियतुन सुटि कीसि, गलिलया येरियते सोंले पेसितोर.

4 बति इंके समरया येरियतुन वीड्सि सोंदा लागर.

5 अहन अद समरया येरियतल वीड्सि सोन्जेर मनेके, याकोब तंवोर मरि योसेपुन सीता, ईसता बोमित⁺ करुम मंवल सुकरु इंवल चहरतगा येव्तोर.

6 अगा याकोब काचुस्ता कुहि मत्ता.

लङनल ताक्सेर वाता काड्कि, येसु अविसि दुपरिता येलते अद कुहित बग्ला उच्चि मत्तोर.

7-8 अद वकत्ने, वोनुर सिस्यलिर काने येत्ले चहर्ते सोत्तेर.

अद गट्कतेन

समरयता वेय्लोन सङा येसु वड्क्वल

समरया जातिता उंदि वेय्लो येर वोय्ले, कुहितगा वाता.

ते येसु, “बायि, नाकुन उंडन साटि येर सीम” इन्जेर अद वेय्लोन तल्क्तोर.

9 यूदुल्क अनि समरया जातितुर अलग पिसेर मंदिर.

अदेन साटि येसुना गोस्टि केन्चि अद वेय्लो गुल आसि, “येया!

निमे यूदुल्क्ना जातितोनि आंदि.

नना समरया जातितोना आंदुन.

उंले येर सीम इन्जि, नाकुन बहन तल्कंति?”

इन्जेर येसुन इत्ता.

10 अद केन्चि येसु, “‘उंले येर सीम’ इन्जेर तल्क्वन बारेतेन आयि अनि बगवंतना वरमुन बारेतेन आयि नीकुन टावा सेले.

इव टावा मन्मड इत्तेके, निमेय उल्टा अदेन नाकुन तल्क्ंदि अनि नीकुन जीवा वाले येर सींदुन” इन्जेर तान सङा वेह्‍तोर.

11 अस्के अद वेय्लो, “साब!

निह्‍गा येर चेंदि किय्ले पोह्‍रय आयि नोडेय आयि सेले.

इद कुहि बेय कोल मंता.

अद जीवा वाले येर नीकुन बगटल पुटर?

12 मा तोत्तोर बाबो याकोब इद कुहि माकुन सीतोर.

इद कुहिता येर तना, तंवुर मर्क उटेर अनि वूरङ पियङ-काल्क गिर उट्टङ.

निमे याकोबुन तेर डगुनि कि बतल?”

इन्जेर येसुन पूसि कीता.

13 ते येसु, “इद येर उंवल हर वोरोर उंडे वट्कंतोर.

14 बति नना सिय्वल येर उंवन बस्केट्के वट्का वसो.

नना सिय्वल येर बस्केट जीवते मंदन साटि, वोन रोपो बस्केट गिर पोङ्सेर मंवल जलत दात मंदंता” इन्जेर वेह्‍तोर.

15 ते अद वेय्लो, “साब!

बस्केट येर वट्क्वक्ने अनि चेंदि किय्ले वाय्वक्ने, अद येर नाकुन सीम” इन्जेर येसुन तल्क्ता.

16 अस्के येसु, “निमे सोन्जि, नी माड्सोन केय्सि, तरा” इन्जेर वेह्‍तोर.

17 ते अद वेय्लो, “नाकुन माड्सो सेलोर” इन्जेर वेह्‍ता.

अद केन्चि येसु, “हो करले,

18 मोदोल नीकुन सिय्विर माड्सुर मत्तेर.

इंके नी सङा मंतोर वोर, नीवोर माड्सो आयोर.

बायि, निमे मत्ता अदेन करल वेह्‍ति” इन्जेर अद वेय्लोन इत्तोर.

19 अस्के अद वेय्लो, “साब!

निमे पर्वक्तनि आंदि इन्जेर सम्जे मासेर मंतोन.

20 ते नाकुन इद गोस्टि वेहा: ममोट इद गेराजिम गुटत पोरो पार्तना-विंति कींतोम.

इगेने मा तोत्तुर गिर पार्तना-विंति कीतेर.

बति मी यूदुल्क सिरिप येरुसलेमे करल पार्तना-विंति किय्वल जागा इन्जेर बारि वेहंतिट?”

इन्जेर येसुन सङा इत्ता.

21-23 ते येसु, “बायि!

बोना पार्तना-विंति कींतिट इंवल, मी समरयतुरकुन टावा सेले.

बति बोना पार्तना-विंति कींतोम इंवल माकुन टावा.

बारितेके मा यूदुल्क्नगटले बचे माय्वल कार्या वाय्वल मंता.

अद वकत्ने इद गुटत पोरोन आयि, येरुसलेम्नगन आयि, मिरट बाबो बगवंतना पार्तना-विंति किय्विट.

बति करल पार्तना-विंति किय्वलिर तम्वा आत्मतगा सत्ने पार्तना-विंति कींतेर.

अद वकत इंके वासिन मंता.

इद नना वेह्‍ता गोस्टित पोरो बरोसा इरा.

तनकुन पार्तना-विंति किय्वलिर आतुर मंदना इन्जेर, बाबो बगवंतल सूड्सेर मंतोर.

24 बगवंतल आत्मा रूप्ने मंवल आता काड्कि, पार्तना-विंति किय्वलिर तम्वा आत्मतगा सत्ने वोना पार्तना-विंति कियना” इन्जेर अद वेय्लोन वेह्‍तोर.

25 अस्के अद वेय्लो, “किरिस्तु^* वांतोर इंवल नाकुन टावा.

वोर वाता पेजे, सम्दिरकुन सम्दो कुला कुला वेहंतोर बेरे” इन्जेर येसुन वेह्‍ता.

26 ते, “ननय वोना आंदुन” इन्जेर येसु तान वेह्‍तोर.

27 अदे वकत्ने वोनुर सिस्यलिर अगा वातेर.

वोर येसु उंदि वेय्लोन सङा वड्क्वल सूड्सि, बेय गुल आतेर.

बति, ‘नीकुन बतल पह्‍जे?’

इन्जेर अद वेय्लोने आयि, ‘निमे अद वेय्लोन सङा बारि वड्क्ति?’

इन्जेर वोर येसुने आयि, वूर्गटल वोरोर गिर पूसि किय्मकि.

28 अद वेय्लो बुड्डितुन अगने सुटि कीसि, चहर्ते सोत्ता.

29 अनि पर्जतुन सङा, “इंके वेरि नना कीता सम्दोतुन बारेते वेह्‍तोर.

वोरे मायनल मोका किरिस्तु आंदुरेय बतलो?

मिरट वासि सूडट” इन्जेर वेह्‍ता.

30 ते वूर चहर्तल पेसिसि येसु मंवल जागतगा वासेर मत्तेर.

31 अद गट्कते वूर सिस्यलिर, “गुरुजि!

जरतेर तिन” इन्जेर येसुन जुल्मा कीतेर.

32 बति येसु, “मीकुन टावा सेले अद चंदि तिंदन साटि, नह्‍गा मंता” इन्जेर वेह्‍तोर.

33 ते सिस्यलिर, “गुरुजिन तिंदन साटि, बोरे चंदि ततेरेय बतलो?”

इन्जेर तम्वा तमा इत्तेर.

34 अस्के येसु, “नाकुन सारि कीतोर बगवंतना इचा पिय्सि ताक्वल अनि वोना कामुन बर्पुर किय्वले नावा चंदि आसि मंता.

35 नमुनतुन मिरट, ‘वाव्टे विजा वीत्ता पेजे, उंडे नालुङ महिनने पंटा कोय्ले वांता’ इंतिट.

बति वहुक्नेके सूडट.

इंके अद पंटा कोय्लेन तयर मंता^*” इन्जेर मीकुन वेह्‍चेर मंतोन.

36 “पंटा कोय्वलिरकुन इंके बूति पुट्सेरेन मंता.

बस्केट पिस्वल जीवतगा लोकुरकुन तर्वले, अद पंटा कोय्वलिरकुन पुट्वल पंडि.

इदेन हिंदल, विजा वीत्वलिर अनि पंटा कोय्वलिर आनंद्ने मंदा परंतेर.

37 ‘विजा वीत्वल वोरोर अनि पंटा कोय्वल उंडे वोरोर’ इंवल सास्तुर करल आंद.

38 मिरट कस्टम कीसि वीत्मकि अद पंटा कोय्ले, मीकुन सारि कीतोन.

अद विजा वीत्ले दुस्रुर कस्टम कीतेर.

वूरा कस्टम्ना पंडितुन मिरट येच्चेर मंतिट” इन्जेर इत्तोर.

39 “नना कीता सम्दोतुन बारेते, नना वेह्‍वक मनेकेन नाकुन वेह्‍तोर” इन्जेर अद वेय्लो वेह्‍ता.

ते अद गवतुन पिय्सि, समरया येरियता चहर्तुर वेलेटिर लोकुर येसुन पोरो बरोसा इर्तेर.

40 वूर समरयतुर वोन्गा वासि, “गुरुजि!

निमे मह्‍गा वासि, मंदय लागर” इन्जेर जुल्मा कीतेर.

ते येसु वूर्गा रंड रोज्क मत्तोर.

41 येसु वेह्‍तङ गोस्टिङ कुद केन्चि, उंडे वेलेटिर बक्तलिर आतेर.

42 “निमे वेह्‍ता गोस्टि पिय्सिन आयो बति, ममोट वोनङ गोस्टिङ कुद केन्चि, वेरे दुनियतुन बचि किय्वल किरिस्तु इन्जेर करि कीसि, नम्तोम” इन्जि वेय्लोन वेह्‍तेर.

येसु अदिकारिनोर मरिन चोकोट किय्वल

(मत्तयि 8:5-13; लूका 7:1-10)

43 रंड रोज्क आता पेजे, येसु गलिलया येरियते सोंले पेसितोर.

44 (अस्के येसु, ‘पर्वक्तन तंवा सोंता येरियतगा मान पुटो’ इन्जेर मुनेने वेह्‍चि मत्तोर.)

45 तेर बति वोर गलिलया येव्ता पेजे, अगटुर लोकुर चोकोट मान सीसि, वोन करुम कीतेर.

बारितेके पस्का सड जर्ग्नेके, वूर येरुसलेम्नगा सोन्जि मत्तेर अनि येसु कीतङ मय्मतङ काम्क सूड्सि मत्तेर.

46 अहन सोनेके सोनेके, इदेन मुने येतुन आङुर्क्ना रसत दात मार्युसीतोर अद, गलिलयता काना चहर्दे येव्तोर.

कपेर्नहोम इंवल चहर्ते राजनोर वोरोर अदिकारि मत्तोर.

वोनोर मरि बेमरिते सानल मींड्सि मत्तोर.

47 ते वोर अदिकारि, यूदयतल गलिलया येरियते येसु वातोर इन्जेर केन्चि, येसुनगा सोत्तोर.

अनि, “ना मरि बेमरिते सानल मींड्सि मंतोर.

निमे वासि, चोकोट कियय लागर” इन्जेर येसुन विनंति कीतोर.

48 ते येसु, “चमत्कार्क अनि मय्मतङ काम्क सूडा बीगर, ना पोरो बरोसा किय्विट सेलेय?”

इन्जेर इत्तोर.

49 तेर बति वोर अदिकारि, “पर्बु!

ना मरिना परन सोंवक मनेकेन वरा” इन्जेर इत्तोर.

50 अस्के, “निमे रोन सोन.

नी मरि पिसंतोर” इन्जेर येसु वेह्‍तोर.

ते वोर अदिकारि, येसुना गोस्टित पोरो बरोसा इर्सि पेसितोर.

51 वोर अहन सरिय सोन्जेर मनेकेन, वोनुर सेव्कलिर मुनेत्क वासि, “नीवोर मरि चोकोट आतोर” इन्जेर वेह्‍तेर.

52 ते वोर अदिकारि, “बद वकत्ने चोकोट आतोर?”

इन्जेर सेव्कलिरकुन पूसि कीतोर.

अस्के वूर, “निने दुपरि उंदि नेक्नेके, चोकोट आतोर” इन्जेर वेह्‍तेर.

53 बरोबर अदे वकत्ने येसु तनकुन, ‘नीवोर मरि पिसंतोर्’ इंवल गोस्टि वेह्‍तोर इन्जेर सम्जे मासि, वोर अदिकारि अनि वोना रोतुर येसुन पोरो बरोसा इर्तेर.

54 यूदया येरियतल गलिलया वासि, येसु कीता रेंडवा मय्मता काम इद आंद.