पेर्सा नोपितोर मायनल चोकोट आय्वल
8
1 अहन येसु बोदा वेह्चि, गुटत पोरोडल बूड रेय्सि वानेके, गुब्डङ गुब्डङ वेले मांदि वोन पेजेय वासेर मत्तेर.
2 अस्केने अचनक वोरोर पेर्सा नोपि वाले मायनल येसुन मुने मुर-टोङ्रङ कोट्सि, “गुरुजि!
नीकुन इस्टम मत्तेके, नाकुन चोकोट कीसि सुदुड किया परंति”* इन्जेर जुल्मा कीतोर.
बेमरि वालेन येसु इट्सि चोकोट किय्वल
3 ते येसु, “नीकुन सुदुड किय्वल नाकुन इस्टमे” इन्जेर तंवा केय चह्चि, वोन इट्तोर.
ते येंटने वोना पेर्सा नोपि कमि आता.
4 अस्के येसु, “इद गोस्टि बोने वेह्मा.
बति निमे कटोडनगा सोन्जि तोहा.
* अनि सुदुड आतोन इन्जेर सम्दिरकुन तोह्ले, मोसेना कानुंतगा आगे सीता अद सम्दोतुन कियना” इन्जेर हुकुम सीतोर.
नूर जन्क सिपायिरोर अदिकारिना बरोसा
5 येसु कपेर्नहोम इंवल चहर्ते सोत्ता पेजे, नूर जन्क सिपायिरोर वोरोर अदिकारि आय्वल कमंडर येसुनगा वातोर.
6 अनि, “पर्बु!
नावोर वोरोर सेव्कल केय-काल अर्सि, तंवा रोन बेय दुक्सते मींड्सि मंतोर.
वोन चोकोट कीम” इन्जेर जुल्मा कीतोर.
7 ते येसु, “नना वासि चोकोट कींतोन” इन्जेर वेह्तोर.
8 बति वोर कमंडर, “पर्बु!
निमे नावा रोन वाय्ले, नना कामि सियोन.
नीवा सिरिप जबन सीतेके आयर.
ना सेव्कल चोकोट आंतोर.
9 बारितेके, नना उंडे वोरोर अदिकारिन बूड मंवना आंदुन.
ना बूड मंवलिर सिपायिर पोरो नाकुन अदिकार मंता.
नना वोरोन, ‘सोन’ इत्तेके दांतोर.
उंडे वोरोन, ‘वर’ इत्तेके वांतोर.
अनि ना सेव्कन, ‘इद कीम’ इत्तेके कींतोर” इन्जेर येसुन वेह्तोर.
10 अव गोस्टिङ केन्चि, येसु गुल आतोर.
अनि तंवा पेजेय वाय्वलिर सङा, “पूरो इज्रयेल पर्जतगा बोन्गने वेन अचोर बरोसा वालेन सूड्मकि.
इद सतेम आंद.
11 नना वेह्वल बतल इत्तेके, दुस्रोक जातिनल वेलेटिर सिडयिङ, पोरयिङ, काल्वडा अनि तलवडा बाजनल वासि, अब्राहम, इसक अनि याकोब इंवलिर मा तोत्तुर सङा स्वर्ग्ना राज्नगा जर्ग्वल जेवुंतगा उदंतेर.
12 बति तंवा राज्नगा ईसदार्क आय्वलिर यूदुल्क्नगटल वेलेटिर तन्गा बरोसा इर्वा काड्कि, वूरकुन बह्रि लङ सिकटितगा वाडि सींतोर.
अगा वूर आड्सेर, पल्क कोर्क्सेर मंदंतेर” इन्जेर वूरकुन वेह्तोर.
13 अनि वोर कमंडरतुन सङा, “सोन!
निमे बरोसा कीता तीरे जर्गंता” इन्जेर इत्तोर.
अदे वकत्ने वोनोर सेव्कल बर्पुर चोकोट आतोर.
येसु वेलेटिर लोकुरकुन चोकोट किय्वल
14 अद आता पेजे, येसु पेतुर्ता रोन सोत्तोर अनि येड्किते कटुल पिय्सि मंवल पेतुर्ता आतिहरेन सूड्तोर.
15 अनि ताना केयदुन वोर इट्नेकेन येड्कि सुटि कीता.
ते अद बायि तेच्चि, वूरा सर्बरेय किय्वल मोदोल कीता.
16 पोड्द सोत्ता पेजे, बूत्क सोप्रे मातुर वेलेटिरकुन पर्जा येसुनगा पिय्सि वातेर.
येसु तंवा गोस्टितेन अव बूतकुन तेंड्सि पूड्तोर अनि येड्कि-दुक वालिरकुन चोकोट कीतोर.
17 इदेन हिंदल, “मावा येड्कि-दुकुन चोकोट कीतोर.
अनि मावङ दुक्सङ बोगे मातोर”+ इंवल येसया पर्वक्तल वेह्ता बगवंतना वचन पूरे माता.
येसुना चर्ना पिय्ले बतल सुटि किया लागर?
18 येसु तन सिर्मुट मंवल मांदितुन सूड्सि, तंवुर सिस्यलिर सङा, “इद सम्दुर्ता हंदा डर्डिते दाकट देट” इन्जेर वेह्तोर.
19 अदे गट्कते वोरोर सास्तिरि येसुनगा वासि, “बोदा गुरु!
निमे बगा दाकि अगा नना गिर वांतोन” इन्जेर इत्तोर.
20 ते येसु, “कोय्ललिक मंले डोब्रङ मंतङ अनि पिटेन मंले गूडङ मंतङ.
बति स्वर्ग्नोर माय्नन मात्रम नरुम्ले जागा गिर सेले” इन्जेर वोन जवब सीतोर.
21 उंडे वोरोर सिस्यल, “पर्बु!
ना बाबोना जीवा सोंवल गट्का करुम वासेर मंता.
वोर मार्ता पेजे माति कीसि वाय्ले, मोदोल नाकुन सोंदा सीम” इन्जेर इत्तोर.
22 ते येसु, “सातपिनय मंवलिरे* तम्वुर सातुरकुन माति किया सीम.
अनि निमे कोरुम किय्वक ना पेजेय वरा” इन्जेर वोन जवब सीतोर.
येसु वडि-दूंदडुन दम्कि सिय्वल
23 अहन वेह्चि वोर अनि वोनुर सिस्यलिर रूकतगा उच्चि सोत्तेर.
24 अस्के अचनक अद सम्दुरतगा बेय डगुर तुपान तेत्ता.
ते अद रूकतुन हेल्वङ जोर्ते पासेर मत्तङ.
बति येसु अद गट्कते मस्त नरुम्सेर मत्तोर.
25 ते सिस्यलिर वोन करुम सोन्जि, जोपनल तेह्चेर, “पर्बु!
माकुन बचि कीम.
ममोट मुडुङ्सेर मंतोम” इन्जेर इत्तेर.
26 ते येसु, “ये, बरोसा कमि वालिर्निट!
बारि वेरिसेर मंतिट?”
इन्जेर वूरकुन इत्तोर.
अनि तेच्चि, अद तुपांतुन अनि अव हेल्वन, “दब मंट” इन्जेर दम्कि सीतोर.
ते येंटने अद तुपान अनि सम्दुर्तङ हेल्वङ सम्दो सिम-सम दबे मातङ.
27 अद सूड्सि, वूर सिस्यलिर, “वेर बोर मंदर बेहे?
वेना गोस्टि वडि अनि सम्दुर गिर केन्चि ताक्सेर मंतङ!”
इन्जेर गुल आतेर.
बूत्क सोप्रे मातुरकुन चोकोट किय्वल
28 येसु अद सम्दुरतुन हंदा बाज मंवल गदरीन इंवल येरियतगा येव्तोर.
ते बूत्क सोप्रे मासि मंवलिर इविर माय्नलिर वीच्क्ना जागतल बह्रि वासि, वोन बेटे मातेर.
वूरा ताक्वल बेय आड्मुट मत्ता काड्कि, अद सरिय बोरे सोंवेके सोंदिर.
29 अनि वूर बूत्क्ना सक्तिते, “बगवंतनोर मरिनि!
मा जोलित बारि वासेर मंति?
बगवंतल नेमि कीता वकत निंद्वक मनेकेन, माकुन सिक्सा किय्लेक वातिय?”
इन्जेर जोर्ते किलितेर.
30 अद गट्कते वूर्गटल जरसि लङ पदिना डगुर मंदा मेय्सेर मत्ता.
31 ते अव बूत्क येसुन, “निमे माकुन तेंड्सि पूड्का इंद्किते, अव पदिना मंदतगा सारि कीम” इन्जेर जुल्मा कीतङ.
32 अस्के येसु अवेन सङा, “सोंट” इन्जेर इत्तोर.
ते अव वूर्गटल बह्रि पेसिसि, पदिना मंदतगा नेङ्तङ.
येंटने अद मंदा पूरो गुटत पोरोडल सड्कल विच्चेर सोन्जि, सम्दुरतगा मुडुङ्सि सातङ.
33 ते अव पदिङ मेह्वलिर अगटल परर आसि, चहर्ते सोन्जि, अगा जर्ग्तङ गट्नन बारेते अनि बूत्क सोप्रे मातुरा गोस्टि गिर कपुस्तेर.
34 अद केन्चि अद चहर्तुर सम्दिर गिर येसुन बेटे मायन साटि वातेर.
अनि वोन सूड्सि, तम्वा येरियतुन सुटि कीसि सोडियना इन्जेर जुल्मा कीतेर.