येसुनुर मोदोडुर सिस्यलिर
5
1 उंदि दिया येसु गेनेसरेतु* इंवल सम्दुर्ता डर्डितगा निल्सि मत्तोर.
पर्जा सम्दिर बगवंतना बोदा केन्जन साटि वोरोन वोरोर दुर्सेर वोन सिर्मुट मीरे मातेर.
2 येसुन अद डर्डितगा रंड रूकङ दिस्तङ.
बोयलिर अव रूकनल रेय्सि तम्वङ जार्क नोर्सेर मत्तेर.
3 ते येसु, अवेनल उंदि रूकतगा तेर्ग्तोर.
अद रूका सीमोंता आंद.
डर्डितल तान जरसि रोपो दुर्सा इन्जेर सीमोंतुन येसु कोर्तोर.
अहन दुर्स्ता पेजे रूकतगा उच्चि मांदितुन बोदा वेह्तोर.
4 वेह्वल आता पेजे येसु, “नीवा रूकतुन कोल येतगा वोसि, मीन्क पिय्ले जार्क वाटा” इन्जेर सीमोंतुन वेह्तोर.
5 ते सीमोन, “गुरुजि!
ममोट रात पूरो पर्पेडे मातोम.
बति मीन्क साप्डे माय्मकि.
तेर बति, निमे वेह्ता गोस्टित पिय्सि, जार्क वाटंतोन” इन्जेर येसुन वेह्तोर.
6 वूर अहन जार्क वाड्ता पेजे, बेय वेले मीन्क अर्तङ.
अदेन साटि, वूरङ जार्क सर्वल सुरु कीतङ.
7 ते दुस्रो रूकतगा मंवलिर बोयलिरकुन तम्गा वासि, मदत कीम्ट इन्जेर केय्क हालि कीतेर.
ते वूर वासि, रंडुते रूकन मीन्क्ने सिगा सिगा निह्तेर.
अस्के अव रूकङ मुडुङ्वल सुरु कीतङ.
8-10 सीमोन-पेतुरु, वोन बरोबर मंवलिर अव मीन्क्ना कुप्पा सूड्सि, बेय गुल आतेर.
सीमोंतुन सङा बेपरि किय्वलिर जेबेदयिनुर मर्क याकोब अनि योहन गिर बेय गुल आतेर.
अद जर्ग्ता सूड्सि, सीमोन-पेतुरु येसुनङ काल्क कर्तोर.
अनि “पर्बु!
नना पापिना आंदुन.
नाकुन सुटि कीसि सोन” इन्जेर इत्तोर.
ते येसु, “वेरिमा!
इङेडल निमे पर्जतुन नावा चर्नते तर्वनि आंति” इन्जेर सीमोंतुन वेह्तोर.
11 ते वूर रूकन डर्डि वेरि तचि, अव सम्दोन सुटि कीसि, येसुन पेजेय सोत्तेर.
मीन्क पिय्वल मयमता कार्या (5:4-11)
पेर्सा नोपि वालेन चोकोट किय्वल
12 येसु उंदि चहर्ते मनेके, इचुला केन्जट!
मेंदोल पूरो पेर्सा नोपि मंवल वोरोर मायनल वोन्गा वातोर.
येसुन सूड्ता बरोबर सतेलम कालकुन पोरो अर्सि, “पर्बु!
नीकुन इस्टम मत्तेके, नाकुन चोकोट कीसि सुदुड कीम”* इन्जेर जुल्मा कीतोर.
13 ते येसु, “नीकुन सुदुड किय्वल नाकुन इस्टमे” इन्जेर तंवा केय चह्चि, वोन इट्तोर.
ते येंटने वोना पेर्सा नोपि कमि आता.
14 अस्के येसु, “इद गोस्टि बोने वेह्मा.
बति निमे सोन्जि कटोडन तोहा.
* अनि सुदुड आतोन इन्जेर सम्दिरकुन निसनि तोह्ले, मोसेना कानुंतगा आगे सीता अद सम्दोतुन कियना” इन्जेर हुकुम सीतोर.
15 तेर बति येसुन बारेते, कबुर उंडे अदिक कप्ता.
बोदा केन्ज्ले अनि तम्वङ बेमरिनल चोकोट आय्ले, पर्जा गुब्डङ गुब्डङ वोन्गा वासेर मंदिर.
16 बति येसु वूर सङा बस्केट मंवक्ने, पार्तना किय्ले, बोरे मनुर अव मेटनेके सोंदुर.
येसु केय-काल्क अर्सि मंवन चोकोट किय्वल
17 उंदि दिया येसु बोदा वेह्चेर मत्तोर.
अगा परिसयुल्क* अनि सास्तिरिर* गिर उच्चि मत्तेर.
वीर सम्दिर गलिलया, यूदया येरियनङ चहर्कनल अनि येरुसलेम नगुडल वातुर आंदिर.
बेमरिते मंवलिरकुन चोकोट किय्वल बगवंतना सक्ति येसुनगा मत्ता.
18 इचुला केन्जट!
कहितुर, केय-काल्क अर्सि मंवन चाप्रतगा मींडुसि पिय्सि वातेर.
अनि वोन रोत रोपो मंवल येसुन मुने वोयना इन्जेर कोसिद कीतेर.
19 बति पर्जता गुब्डा कीनेके, रोपो वोया पर्मकि.
येसुन मुने वोन रेह्ले रोतुन पोरोडल गदि किय्वल
20 अस्के येसु वूरा बरोसतुन सूड्सि, “दादा!
नीवङ पाप्क मापि आतङ” इन्जेर वोन वेह्तोर.
21 बति अद केन्चि, परिसयुल्क अनि सास्तिरिर, ‘बगवंतल तपुसि दुस्रोर बोरे पापकुन मापि किया परोर.
इहिन-बहन बगवंतन वेर रेह्चि वड्क्सेर मंतोर!’
इन्जेर तम्वा मंदगा सोन्च कीसेर मत्तेर.
22 वूरा मंदा सोन्चुन येसु करि कीसि, “मीवा मंदे बारि अहन सोन्च कीसेर मंतिट?
23 ‘नीवङ पाप्क मापि आतङ’ इन्जेर वेह्वल हल्को कि?
सेलेके, ‘निमे तेच्चि ताका’ इन्जेर वेह्वल हल्को?
24 बति स्वर्ग्नोर माय्नन* इद दर्तुरित पोरो पापकुन मापि किय्वल अदिकार मंता इन्जि, करि कियना” इन्जेर वेह्तोर.
अनि येसु वोर केय-काल्क अर्सि मंवन सङा, “‘तेदा!
नीवा चाप्रतुन पिय्सि, रोन सोन’ इन्जि नना नीकुन वेह्चेर मंतोन” इन्जेर हुकुम सीतोर.
25 ते वोर येंटने वूर मुनेने निल्तोर.
अनि तना मींड्सि मत्ता अद चाप्रा पिय्सि, बगवंतन डगुर-पान सीसेर तंवा रोन सोत्तोर.
26 अगा मंवलिर सम्दिर बेय गुल आतेर अनि बगवंतन डगुर-पान सीसेर, “नेंड बेय मय्मता गट्ना सूड्तट” इन्जेर इत्तेर.
मत्तयि येसुन पेजेय सोंवल
27 अद आता पेजे, येसु अगटल पेसिसि, टेक्सा वसुलि किय्वल कम्रतगा उच्चि मंवल लेविन* सूड्तोर.
वेर टेक्सा वसुलि किय्वल आंदुर.
अनि “ना पेजेय वरा!”
इन्जेर वोन वेह्तोर.
28 वोर मत्तयि तेच्चि, अगा मंवल सम्दोतुन सुटि कीसि, येसुन पेजेय सोत्तोर.
29 अद गट्कते वोर लेवि इंवल मत्तयि येसुन साटि तंवा रोन उंदि डगुर जेवुन सीतोर.
ते वीर बरोबर वेलेटिर टेक्सा वसुलि किय्वलिर अनि दुस्रुर गिर जेवुन किय्ले उच्चि मत्तेर.
30 अद सूड्सि, परिसयुल्क अनि वूरा दर्मतुर सास्तिरिर, “मिरट टेक्सा वसुलि किय्वलिर अनि दुस्रुर पापिर सङा* बारि मीरे मासि तिंतिट-उंटिट?”
इन्जेर येसुनुर सिस्यलिर पोरो गोल्ग्तेर.
31 ते येसु, “बेमरिते मंवन वय्दुना जुरत मंदंता.
बति जीवत चोकोट मंवन जुरत मनो.
32 अह्ने नियत्नुर आंदुम इन्जेर सोन्च किय्वलिर साटि नना वाय्मकि.
बति पापिर आंदुम इन्जेर करि कीसि, चुक चुके माय्वलिर साटिने दर्तुरित पोरो वातोन” इन्जेर वूरकुन जवब सीतोर.
येसु पापेस्तलिर सङगा मन्वल (5:30-32)
उपसुन बारेते चर्चा
33 ते वूर्गटल कहितुर, “योहंतुर सिस्यलिर बस्केट उपस मन्जेर पार्तना कीसेर मंदंतेर.
अह्ने परिसयुल्क्नुर सिस्यलिर गिर अह्ने कीसेर मंतेर.
बति नीवुर सिस्यलिर बस्केट तिन्जेर-उन्जेर मंदंतेर.
वीर बारि उपस पियुर?”
इन्जेर येसुन पूसि कीतेर.
34 अस्के येसु, “नोव्रल तंवुर चुटल-बंदुन तोडो मनेके, बोरे उपस पियुर.
अह्ने नना गिर वीर सङा मनेके, वीर बारि उपस पियना?
35 बति बस्केते वोर नोव्रन वूर्गटल जुल्मते वोय्वल गट्का वांतयो, अस्के वूर उपस पियंतेर” इन्जेर जवब सीतोर.
36 पडनङ बोदन पूननगा मिस्डि किया वायो इन्जेर तोह्ले, येसु नमुनता रूप्ने, “बोरे गिर आयि, पूना कपिडे पडना कपिडुन अत्क वाट्सि कोटोर.
उंदि मोका अहन बोरे वाटनिर्ते, पडना कपिडुन अद सरुसंता अनि पडना कपिडगा पूना अत्क कूले गिर मायो.
37 अदे तीर्दे, आङुर्क्ना पूना कल पडना तितितगा* बोरे वेडियोर.
उंदि मोका वेडितेके आङुर्क्ना पूना कल तितितुन वोहंता.
अद कल तूरंता अनि अद तिति गिर करब आंता.
38 अदेन साटि आङुर्क्ना पूना कलदुन पूना तितितगने वेडिया लागर.
अस्के रंड गिर करब आय्वक्ने मंदंतङ.
39 आङुर्क्ना पडना कल उटोर बोरे गिर आयि, आङुर्क्ना पूना कलदुन कोरोर.
‘नाकुन पडनय पह्जे; अदे चोकोट मंता’ इंतोर” इन्जेर वूरकुन वेह्तोर.