आरम्ना दिवोसुन बारेते चर्चा
6
1 उंदि आरम्ना दिवोसुन नेटि येसु तंवुर सिस्यलिर सङा पंटा मंवलिक वहुकनल वीड्सेर मत्तोर.
अस्के वूर सिस्यलिर इचुङ्सि सेङङ कोय्सि, तित्तेर.
2 अद सूड्सि कहितुर परिसयुल्क “आरम्ना दिवोसुन बारेता हुकुमुन पिय्सि, किय्वा अद कामुन मिरट बारि कीसेर मंतिट?”
* इन्जेर वूरकुन पूसि कीतेर.
3 ते येसु, “दर्मा-ग्रंत्नगा, दाविद राजल अनि वोनुर सोप्तलिर करुसातेर.
अस्के वोर बतल कीतोर इंवल मिरट वाचि किय्मकि कि बतल?
4 वोर राजल बगवंतना पार्तना-विंति किय्वल डेरतगा सोत्तोर.
अनि कटोडलिर आय्वा, बोरे तिंले हक सेले अव निवोद्नङ सारिङ तेंड्सि, तना तित्तोर अनि तंवा सङा मंवलिरकुन गिर सीतोर” इन्जेर वेह्तोर.
5 अहन वेह्ता पेजे येसु, “आरम्ना दिवोसुन पोरो स्वर्ग्नोर माय्नल माल्कल* आसि मंतोर” इन्जेर जवब सीतोर.
केय अर्सि सोत्तोन चोकोट किय्वल
6 उंडे उंदि आरम्ना दिवोसुन नेटि, येसु सुनगोग्नगा सोन्जि, बोदा वेह्चेर मत्तोर.
अगा रोपो तिना केय अर्सि मंवल वोरोर मायनल मत्तोर.
7 अंटित वोर माय्नन चोकोट कींतोरो बतलो इन्जेर, सास्तिरिर अनि परिसयुल्क येसुन नेह्ना सूड्सेर मत्तेर.
चोकोट कीनुर्ते, अद तप्ना कसुर येसुन पोरो वाट्कट इन्जेर वूर पिलंते मत्तेर.
8 बति येसु वूरङ सोन्च्क करि कीसि, वोर केय अर्सि मंवन सङा, “तेच्चि वूर नड्डुम निला” इन्जेर वेह्तोर.
ते वोर तेच्चि निल्तोर.
9 अस्के येसु, “आरम्ना दिवोसुन नेटि चोकोट किय्वल नायम इंतिट कि सेलेके वायुट किय्वल नायम इंतिट?
जीवतुन बचि किय्वल नायम इंतिट कि सेलेके जीवतुन तेंड्वल नायम इंतिट?”
इन्जेर वूरकुन पूसि कीतोर.
10 अनि येसु वूर सम्दिर्के तिरिसि सूड्सि, “नीवा केय चहा” इन्जेर केय अर्सि मंवन सङा इत्तोर.
ते वेह्ता तीर वोर कीतोर.
अस्के वोना केय बर्पुर चोकोट आता.
11 बति वूर बेय सोङ्ने, “वेर येसुन बतल बहन कीकट?”
इन्जेर तम्वा तमा वड्क्तेर.
बारा जन्क सिस्यलिरकुन नेमि किय्वल
12 अद आता पेजे, उंदि दिया येसु पार्तना किय्ले मेटत पोरो सोत्तोर.
अंटित रात पूरो बगवंतन पार्तना कीसेरेन मत्तोर.
13 पोड्द पेसिता पेजे तंवुर सिस्यलिरकुन करुम केय्सि, वूर्गटल बारा जनकुन नेमि कीतोर.
अनि वूरकुन, ‘अपोस्तुल्क’ इन्जेर पोरोल दोस्तोर.
14 वूर बूर इत्तेके
येसु अनि बारा जन्क सिस्यलिर
15 मत्तयि,* तोमल, आल्पयिनोर मरि याकोबु, जेलोते* इन्जेर केय्वल सीमोनु,
16 याकोब्नोर मरि यूदल अनि आक्रित येसुन दोका सिय्वल इस्करियोत नाट्नोर यूदल.
येसु सिस्यलिरकुन नेमि कियवल (5:27-28; 6:12-16)
आसिर्वाद अनि दुक्सा
17 अद आता पेजे येसु, वूर बरोबर गुटतल रेय्सि, सपय जागतगा निल्सि मत्तोर.
अगा सिस्यलिरा गुब्डा मत्ता.
वूरे आय्वा, यूदया येरियतल, येरुसलेम नगुडल, सम्दुर्ता डर्डितगा मंवलिक तूरु अनि सीदोन नगुकनल वातुर वेलेटिर पर्जा अगा मत्तेर.
18 येसु वेह्वल बोदा केन्ज्ले अनि तम्वङ बेमरिनल चोकोट आय्ले, वूर सम्दिर अगा वातेर.
बूत्क लाग्तुर गिर बर्पुर चोकोट आतेर.
19 पर्जा सम्दिर वोन इटना इन्जेर पर्पेडे मासेर मत्तेर.
बारितेके येसुनगटल सक्ति बह्रि वासि, सम्दिरकुन चोकोट कींदु.
20 अस्के येसु तंवुर सिस्यलिर बाजुन सूड्सि,
“गरिब लोकुर्निट!
मिरट आसिर्वाद येतंतिट.
बगवंतना राज मीवय आंद.
21 इंके करुसाय्वलिर्निट!
मिरट आसिर्वाद येतंतिट.
मीवा पेटि निंदंता.
इंके आड्वलिर्निट!
आसिर्वाद येतंतिट.
मिरट कव्सेर मंद्किट.
22 स्वर्ग्नोर माय्नन हिंदल
पर्जा मीकुन पसंद किय्वक्ने, अलदि वाट्सि,
मीवा हिजत वोसेर, सापेना सीनिर्ते मिरट आसिर्वाद येत्वलिर आंतिट.
23 अंटित बेय कुसिते येंदट!
बारितेके मीकुन स्वर्ग्नगा डगुर इनम पुटंता.
इद तीर्दे वूर मीकुन तेर मुने तोत्तुर पर्वक्तलिर्कुन दुक्सा सीतेर.
24 रेय!
दनेवंतलिर्निट!
मीकुन दुक्सा तपो.
मिरट इदेन मुनेने सुक-बोग येत्तिट.
25 रेय!
इंके पेटि निन्चि मंवलिर्निट!
मीकुन दुक्सा वांता.
मिरट करुसांतिट.
रेय!
इंके कव्वलिर्निट!
मीकुन दुक्सा वांता.
अद दुक्सते मिरट आडंतिट.
26 रेय!
मीकुन पर्जा सम्दिर वनि कीनेके, मीकुन दुक्सा तप्वक वांता!
वूरुर तोत्तुर लबड पर्वक्तलिरकुन अदे तीर्दे कीतेर”
इन्जेर वेह्तोर.
आसिर्वाद अनि दुक्सा (6:17-26)
पगा-दारकुन पेर्मते सूड्वल
27 बति सिस्यलिर सङा येसु, “नावङ गोस्टिन मिरट केन्चेर मंतिट.
मीकुन वेह्वल बतल इत्तेके, मी दुस्मन-दारकुन पेर्मते सूडट.
मिरट इत्तेके अर्सि वायो वूरकुन चोकोट कीम्ट.
28 मीकुन सापेना सिय्वलिरकुन आसिर्वाद सीम्ट.
मीकुन दुक्सा सिय्वलिर साटि पार्तना कीम्ट.
29 नीवा उंदि कोर्वितुन पाय्वन उंडे उंदि कोर्वि गिर तोहा.
नीवा पोरोडा सेलतुन ऊंद्वन, नीवा आङ्डेतुन ऊंद्ले आतेके गिर आपुसिय्मा.
30 नीकुन तल्क्वल हर वोरोन सीम.
नी वस्तु वोतोर वोन, ‘तान मल्सि तरा’ इन्जेर इन्मा.
31 मी साटि दुस्रुर बतल कियना इन्जेर आसा कींतिटो, अवेकुन मिरटे वूर दुस्रुर साटि कीम्ट.
32 “मीकुन पेर्मते सूड्वलिर्कुने मिरट पेर्मते सूड्तेके, तान्गा डगुर-पान बतल मंता?
पापेस्तलिर गिर तम्वकुन पेर्मा किय्वलिरकुन पेर्मा कींतेर.
33 मीकुन चोकोट किय्वलिरकुन मिरट चोकोट कीकिट्ते, तान्गा डगुर-पान बतल मंता?
पापेस्तलिर गिर अह्ने कींतेर.
34 बाकि मल्सि कंडि कींतेर इन्जि आसा कीसि सीतेके, तान्गा डगुर-पान बतल मंता?
पापेस्तलिर गिर, ‘बाकि सम्दो वसुलि किया वचो’ इन्जेर पापेस्तलिरकुन बाकि सींतेर.
35 “बति मिरट मी पगा-दारकुन पेर्मते सूडट.
वूरकुन चोकोट कीम्ट.
मल्सि मीवा बाकि कंडि कीनिर इन्जेर आसा किय्वक्ने, वूरकुन बाकि सीम्ट.
अस्के मीकुन डगुर इनम पुटंता.
मिरट सर्वा सक्तिवंतल बगवंतना संतान आंतिट.
बारितेके बगवंतल चोकोट कीततुन मरुङ्वलिर पोरो अनि करेबलिर पोरो गिर दया तोहंतोर.
36 अदेन साटि, मी बाबो बगवंतल दयते सूड्तपे, मिरट गिर सम्दिरकुन दयते सूडट.
गुटत पोरो वेह्ता बोदा (6:27-36)
तस्वा अनि मापि किय्वल
37 “दुस्रुरकुन तस्वा किय्मट.
अस्के मीकुन बगवंतल तस्वा कियोर.
बोन पोरोन कसुर वाट्मट.
अस्के बगवंतल मी पोरो कसुर वाटोर.
दुस्रुरकुन मापि कीम्ट.
अस्के बगवंतल मीकुन मापि कींतोर.
38 दुस्रुरकुन सीम्ट.
बगवंतल मीकुन सींतोर.
हालि कीसि, अह्चि, बग्ला तूरनल कह्चि मीवङ वोटिनगा वेडियुसंतोर.
मिरट बद इसोब्ने दुस्रुरकुन कह्चि सींतिटो, अदे इसोब्ने बगवंतल गिर मीकुन सींतोर” इन्जेर वेह्तोर.
39 अनि उंडे येसु, “गुड्डि उंडे वोरोर गुड्डिन सरि तोहा परनुर कि बतल?
तोहा परोर.
मोका तोह्तेके गिर इविर्ते डोडोतगा अरंतेर.
40 सिस्यल तंवोर गुरुन तेर डगुर आया परोर.
बति सिक्सान पूरो मार्ता पेजे गुरुन बरोबर आंतोर” इन्जेर उंडे उंदि नमुना वेह्तोर.
41-42 डवरिङ कीसेर, “उंदि मोद नी कड्दगा अर्ता इन.
निमे अदेन तेंड्वक्ने चुडुसि तुकु अर्सि मंवन सङा, ‘नीवा कड्दा तुकु तेंडा सीम’ इन्जि बहन वेहंति?”
इन्जेर येसु पूसि कीतोर.
अनि अदेना अर्तम वेह्चेर, “निह्गा डगुर तप इर्सि, बाजुतोना चुडुर तपुन बारि तोहंति?
नी रोपो डगुर तप इर्सि, ‘नीवा चुडुर तप सुद्रि किया सीम’ इन्जि तप कीतोन बहन वेहंति?
ये कपेटा!
मुने नीवा डगुर तपुन सुद्रि कीम.
अस्के नी बाजुतोना चुडुर तप सुद्रि किया परंति” इन्जेर वेह्तोर.
मरा अनि ताना पंडि
43 अनि येसु, “चोकोट्ना मरतुन करब्नङ पंडिङ सादोङ.
अह्ने करब्ना मरतुन चोकोट्नङ पंडिङ सादोङ.
44 हर मरा बातल इंवल अवेनङ पंडिन पिय्सि करे मांता.
चह्क्नङ वेलिनगा आङुर पंडिङ अनि चह्क्नङ पोदेलनगा अन्जुरि पंडिन कोयुर.
45 चोकोट्नोर मायनल तंवा दिलतगा मंवलिक चोकोट्नङे बह्रि वड्कंतोर.
अनि करेबल तंवा दिलतगा मंवलिक करब्नङे बह्रि वड्कंतोर.
बारितेके दिलतगा निन्चि मंवडुने तोड्डि वड्कंता” इन्जेर वेह्तोर.
रंड तीर्क्नङ रोह्क दोह्वलिर
46 अनि उंडे उंदि जोका, “नना वेह्ता तीर किय्वक्ने मिरट नाकुन ‘पर्बु!
पर्बु!’
इन्जेर बारि केयंतिट?
47 नह्गा वासि नावङ गोस्टिङ केन्चि, अवेन तीर किय्वल बोन दात मंदंतोरो मीकुन वेहंतोन.
48 वोर मायनल कोल ताड्सि, बंडत पोरो बुनदि दोह्चि, रोन दोह्वन दात मंदंतोर.
ऊसा वासि अद रोतुन हेल्वङ पातेके गिर, अद रोन उल्टे मायो.
बारितेके, बंडत पोरो गट दोह्चि मंता.
49 बति बोर्ते नना वेह्ता केन्चि, अद तीर कियोर वोर मायनल बोमित पोरो बुनदि सेल्वक्ने रोन दोह्वन दात मंदंतोर.
ऊसतङ हेल्वङ आतल रोतुन पानेके बहंते उल्टे मांतयो, अह्ने वोर गिरे नासेडम आंतोर” इन्जेर येसु वेह्तोर.