येसुन सवल पूसि किय्वल
12
1 उंदि आरम्ना दिवोसुन नेटि येसु तंवुर सिस्यलिर सङा, पंटा मंवलिक वहुकनल वीड्सेर मत्तोर.
अस्के तंवुर सिस्यलिर इचुङ्सि कोय्सि तिंवल सुरु कीतेर.
2 अद सूड्सि कहितुर परिसयुल्क, “आरम्ना दिवोसुन बारेता हुकुमुन पिय्सि, किय्वा अद कामुन नीवुर सिस्यलिर बारि कीसेर मंतेर?”
* इन्जेर येसुन पूसि कीतेर.
3-4 ते येसु, “दाविद राजल अनि वोनुर सोप्तलिर करुसातेर.
अस्के, बगवंतना पार्तना-विंति किय्वल डेरतगा वोर सोत्तोर.
अनि कटोडलिर आय्वा, बोरे तिंले हक सेले अव निवोद्नङ सारिङ तेंड्सि, तना तितोर अनि तंवा सङा मंवलिरकुन गिर सीतोर इंवल मिरट दर्मा-ग्रंत्नगा वाचि किय्मकि कि बतल?”
इन्जेर पूसि कीतोर.
5 अनि, “अचोरे आय्वा मंदिर्तगा आरम्ना दिवोसुन नेटि वंत पिय्सि सेवा किय्वलिर कटोडलिर अंटित काम किया वचो.
अद तप आयो इंवल मोसेना कानुंतगा मंता.
अदेन मिरट वाचि किय्मकि कि बतल?
6 अद मंदिरतुन तेर डगुर वाले इगे मंतोर इन्जेर मीकुन वेह्चेर मंतोन.
7 ‘ना साटि बलिदान्क सीम्ट इंवडुन बद्लि, दुस्रुर पोरो मिरट दया तोहना इन्जेर कोरंतोन’+ इंवल वचंता अर्तम करे मासि मन्मड इत्तेके, मिरट बोला-पांदे मंवलिरा तस्वा कीसि मंविट.
8 बति इद आरम्ना दिवोसुन पोरो स्वर्ग्नोर माय्नल माल्कल* आसि मंतोर” इन्जेर जवब सीतोर.
केय अर्सि मंवन चोकोट किय्वल
9 अनि येसु अगटल पेसिसि, वूरा सुनगोग्नगा सोत्तोर.
10 अगा रोपो केय अर्सि मंवल वोरोर मायनल मत्तोर.
येसुन पोरो कसुर वाटना इन्जेर सूड्सेर मंवलिर परिसयुल्क, “वेर माय्नन आरम्ना दिवोसुन नेटि चोकोट किय्वल नायमे आंद इंति कि?”
इन्जेर पूसि कीतेर.
11 ते येसु वूर सङा, “मिह्गटल बोने आयि उंदि गोरे मंता इंटु.
अद आरम्ना दिवोसुन नेटि डोडोतगा अर्तेके, तान पोरो तेंड्विटिय?
तप्वक तेंडंतिट!
12 अद गोरेत तेर मायनल बेय वेले विलुवतोर आंदुर.
अदेन साटि आरम्ना दिवोसुन नेटि माय्नन चोकोट किय्वल नायमे आंद” इन्जेर वेह्तोर.
13 अनि केय अर्सि मंवन सङा, “नीवा केय चहा” इन्जेर इत्तोर.
ते वोर केय चह्नेकेने, वोना उंडे उंदि केयदुन मोडि बर्पुर चोकोट आता.
14 बति वूर परिसयुल्क बह्रि सोन्जि, येसुन जकना इन्जेर पिलन वाट्तेर.
15 ते येसु अद करि कीसि, अद सुनगोगनल सोडितोर.
वोन पेजेय वेले मांदि सोत्तेर.
वूर्गटल बेमरिने मंवलिर सम्दिरकुन चोकोट कीतोर.
16 अनि, “ना बारेते बोने वेह्मट” इन्जेर दम्कि सीतोर.
17 येसया पर्वक्तन तोडो बगवंतल लिहि कियुस्तङ वचन्क पूरे मायन साटि अहन जर्ग्ता.
18 “इचुला!
वेर सेव्कन नना नेमि कीतोन.
वेन हिंदल नाकुन वेले आनंद लाग्सेर मंता.
वेर लाड्नोर सेव्कन पोरो ना आत्मतुन इरंतोन.
वेर दुस्रोक जातिनुरकुन नायमुन बारेते पचर कींतोर.
19 वेर जग्डा कियोर सेलेके जोर्ते किलियोर.
अनि वेना लेङ गिर बाजर्क्नगा बोने केन्जा वायो.
20 नायदुन मेयुसनल वेरि कम-जोर वालिरकुन बूड अरुस्वक मंदंतोर.
अनि जिगि सेले वूर पोरो दया तोहंतोर.*
21 अनि वेना पोरोडगा दुस्रो जातितुर बरोसा अनि आसा इरंतेर”+
इन्जेर मंता.
बूत्क सोप्रे मासि मंवल मूकन चोकोट किय्वल
22 अस्केन कहितुर, बूत सोप्रे मासि, गुड्डि अनि मूकल आसि मंवन वोरोन येसुनगा पिय्सि वातेर.
वोन येसु चोकोट कीतोर.
ते वोर सूड्वल अनि वड्क्वल सुरु कीतोर.
23 अद सूड्सि मांदि सम्दिर गुल आसि येसुन बारेते, “वेर मोका दाविद्ना कांदांतोर आंदुरोय बतलो?”
इन्जेर इत्तेर.
24 बति बस्केते परिसयुल्क अदेन बारेते केन्ज्तेरो, अस्के, “एहे!
वेर्ते बूत्क्नोर राजल, बयल-जेबुल्ता* सक्तितेन बूतकुन तेंड्सि पूड्सेर मंतोर” इन्जेर इत्तेर.
25 ते येसु वूरा मंदा सोन्चुन करि कीसि, “बदे मनि उंदि राज तंवा तनय उल्टा आसि, पाके मायर्ते, अद नासेडम आंता.
हर चहर्तुर सेलेके हर रोतुर तम्वा तमा उल्टा आसि, पाके मानिर्ते, अद चहर अनि रोन नासेडम आंता.
26 ते सय्तन तंवा तनकुने बय्मन आसि तेंड्सि पूडनुर ते, वोना राज बहन निला परर?
असले निला परो!
27 नना मोका बयल-जेबुल्ता सक्तिते बूतकुन तेंड्सि पूडंतोन बेहेते, मी लोकुर बोना सक्तिते अवेन तेंड्सि पूड्सेर मंतेर?
मिरट इंवल तप आंद इन्जेर मीवुरे निरुपन कीसेर मंतेर.
28 मोका नना बगवंतना आत्मता सक्तिते इव बूतकुन तेंड्सि पूड्सेर मंद्कते, बगवंतना राज मिह्गा वासिन मंता इन्जेर करि कीम्ट.
29 बोरे आयि वोरोर सक्तिवंतना रोतगा लूटि किय्ले सोंदना इत्तेके, वोन मोदोल दोह्चि वाटा बीगर वोना रोतुन लूटि किया परोर.
वोन मोदोल दोह्तेकेने, अद रोतुन लूटि किया परंतोर.
30 ना बाजुन मनोर वोर, नाकुन उल्टा तिरिवल आंतोर.
पग्रे मासि मंवलिरकुन ना सङा मीरि कियोर वोर, बुज्डि किय्वल आंतोर.
31 “अदेन साटि नना वेह्वल बतल इत्तेके, माय्नलिर कीता हर पापुन अनि रेह्चि वड्क्ता हर गोस्टितुन बगवंतल मापि किया परंतोर.
बति बगवंतना आत्मतुन बोरे रेह्चि वड्कनुर्ते, वोन असले मापि पुटो.
32 स्वर्ग्नोर माय्नन, बोरे रेह्चि वड्क्तेके, वोन मापि पुटर.
बति बगवंतना पवित्रा आत्मतुन बोरे रेह्चि वड्कनुर्ते, वोन मात्रम इद पिडितगन आयि, वाय्वल पिडितगन आयि, बगवंतल मापि कियोर.
मरा अनि पंडिता नमुना वेह्वल
33 “पंडितुन पिय्सि बातल मरा इंवल करे मांता.
चोकोट्ना मरा मत्तेके, चोकोट्नङे पंडिङ सादंता.
वायुट्ना मरा मत्तेके, वायुट्नङे पंडिङ सादंता.
34 मिरट विक वाले तरस्क्नङ पिलन दात्नुर आंदिट.
मिरट करेबलिर आसि चोकोट्नङ अनि नायम्नङ गोस्टिङ बहन वड्का पर्किट?
बारितेके दिलतगा निन्चि मंवडुने तोड्डि वड्कंता.
35 चोकोट्नोर मायनल तंवा दिलतगा मंवलिक चोकोट्नङे बह्रि अरुसंतोर.
अनि करेबल तंवा दिलतगा मंवलिक करब्नङे बह्रि अरुसंतोर.
36 बति नना वेह्वल बतल इत्तेके, माय्नलिर वड्क्वल हर उंदि करब गोस्टिता लेका तस्वा जर्गन नेटि वेहा लागर.
37 बारितेके निमे वड्क्वलिक गोस्टिन पिय्सि, निमे नियत्नोनि सेलेके करेबनि इंवल तस्वा कियन नेटि निर्नय जर्गंता” इन्जेर येसु वेह्तोर.
योना पर्वक्तन बारेता निसनि
38 अद आता पेजे, कहितुर सास्तिरिर अनि परिसयुल्क येसुन सङा, “बोदा गुरु!
निमे माकुन उंदि मय्मता काम कीसि तोहना इन्जि कोरंतोम” इन्जेर इत्तेर.
39 बति येसु, “इद पिडितुर करेबलिर अनि पीर किय्वलिर* मय्मता कामुन साटि पूसि कीसेर मंतेर.
सिरिप योना* पर्वक्तना निसनितुन तपुसि, दुस्रो बदे निसनि वूरकुन तोह्वल जुरत सेले.
40 बहंते योना पर्वक्तल डगुर मींदा पेटितगा मूंद रात्क, मूंद दिहङ मत्तोरो, अह्ने स्वर्ग्नोर मायनल मूंद रात्क, मूंद दिहङ, दर्तुरित रोपो मंदंतोर.
41 योनल बोदा वेह्नेकेने निनेवतुर तम्वङ दिल्क्नगा चुक चुके मातेर.
इंके इगे निल्सि मंवल योनन तेर डगुर वाले आंदुर.
तेर बति मिरट चुक चुके मासेर सेल्विट.
अदेन साटि तस्वा किय्वल दिवोसुन नेटि, निनेवा नगुडुर सम्दिर, इद पिडितुर बरोबर निल्सि, वीर तप कीतेर इन्जेर पिरदि कींतेर.
42 “अदे तीर्दे काल्वडा बाज्नेके मंवल देस्ना रानि+ सोलोमोंतङ गियन वाले गोस्टिङ केन्ज्ले बेय लङ्ना देसनल वाता.
इंके इगे निल्सि मंवल, सोलोमोन* राजन तेर डगुर वाले आंदुर.
तेर बति मिरट नावङ गोस्टिङ केन्चेर सेल्विट.
अदेन साटि तस्वा किय्वल दिवोसुन नेटि, अद रानि इद पिडितुर बरोबर निल्सि, वीर तप कीतेर इन्जेर पिरदि कींता” इन्जेर वेह्तोर.
करब माय्नलिर बारेते वेह्वल
43-44 “बूत वोरोन्गटल पेसिसि सोत्ता पेजे, येर सेले अव जागनगा आरम येत्का इन्जेर अद तिरियंता.
बति आरम बगने पुट्वा काड्कि, ‘सुटि कीसि वाता अदे रोन मल्सि दाका’ इन्जेर इंता.
अनि अगा सोन्जि सूड्तेके, अद रोन चोकोट चक्ने सिय्सि, सम्दो सव्रि कीसि, मंवल तान दिसंता.
45 अस्के तनकुन तेर वेले करेबलिक उंडे येडुङ बूतकुन तंवा सङा पिय्सि वांता.
अव सम्दो अद रोतगा मंवल सुरु कींतङ.
इदेन हिंदल, वोर माय्नना गति मोदोडुन तेर उंडे अदिक करब आंता.
करब्ना बुदिते ताक्वलिर इद पिडितुरकुन ईतले गति वांता” इन्जेर वेह्तोर.
अवल अनि तमुक येसुनगा वाय्वल
46 येसु पर्जत सङा अहन वेह्चेर मनेके, वोना अवल अनि तमुक वोन सङा वड्कना इन्जेर वासि अगा बह्रि निल्सि मत्तेर.
47 ते मांदितल वोरोर येसुन सङा, “नीवा अवल अनि तमुक नी सङा वड्कना इन्जि, बह्रि निल्सि मंतेर” इन्जेर इत्तोर.
48 बति येसु, “बद नावा अवल आंद?
बूर नावुर तमुक आंदिर?”
इन्जेर इन्जि,
49 तंवुर सिस्यलिर बाजुन केय सूट्सि, “इचुला!
नावुर तमुक अनि अवल आंदिर.
50 बोर्ते स्वर्ग्नगा मंवल ना बाबो बगवंतना इचतुन पिय्सि ताकंतेरो, वूरे नावुर तमुक, नावा सेलड अनि नावा अवल आंद” इन्जेर वेह्तोर.