विजा वीत्वल
13
1 अद नेटिने येसु तंवा रोतल बह्रि सोन्जि, सम्दुर्ता डर्डितगा उत्तोर.
2 ते येसुन सिर्मुट वेले मांदि गुब्डङ गुब्डङ मीरे माता काड्कि, वोर उंदि रूकतगा उत्तोर.
पर्जा सम्दिर गिर सम्दुर्ता डर्डितगा निल्तेर.
3 अस्के वोर, तीर-तीर्दङ गोस्टिङ नमुनना रूप्ने इहिन बोदा वेह्तोर: “वोरोर केतिदारल विजा वीतन साटि वाव्टे सोत्तोर.
4 अहन वोर विजा वीच्चेर मनेके, इचुसा विजा सरदुन पोरो अर्ता.
अद विजतुन पिटेङ वासि पेर्सि तित्तङ.
5-6 उंडे इचुर विजा पाटा बोमितगा अर्ता.
अद विजा वेय्नेन मोडोका वाता.
बति अगा तोडि वेले कोल सेल्वा सोन्जि, अवेनङ सीर्क कोल पार्मकि.
अदेन साटि बस्केते पोड्द पेसितयो अस्के, येदिते किड्डा-मोड्डा वत्तङ.
7 उंडे इचुसा विजा चह्क्नङ पोदेलनगा अर्ता.
अद विजतङ मोलोकन बरोबर चह्क्नङ पोदेलङ गिर बेर्स्ता काड्कि, मोलोकन अव दाबि कीसि वाड्तङ.
8 अनि उंडे इचुसा विजा चोकोट्ना बोमितगा अर्ता.
अद विजा (पिर्ता, बेर्स्ता, सेन आता, बरे माता अनि दानने निंता) बेर्सि, कहिता बर्पुर नूर पाल्क, कहिता साट पाल्क, उंडे कहिता तीसा पाल्क पंटा पंड्ता.
9 इदेन अर्तम कियना इंद्किट्ते, चोकोट केन्चि तेन बारेते सोन्च कीम्ट!”
इन्जेर वेह्तोर.
येसु नमुनना रूप्ने बोदा किय्वल कारन
10 सिस्यलिर वासि येसुन, “पर्जतुन सङा निमे बारि नमुनना रूप्ने वेह्चेर मंति?”
इन्जेर पूसि कीतेर.
11 ते येसु वूर सङा, “स्वर्ग्ना राजुन बारेता मक्डिते मंवल सत्ना गियंतुन करि किय्वल मोका बगवंतल मीकुन सीतोर बति, दुस्रुर कहितुरकुन सिय्मकि.
12 बोर्ते नावा बोदतुन दिहंते केन्जंतोरो, वोन उंडे अदिक अर्तम आनल बगवंतल गियन सींतोर.
अस्के वोन्गा बर्पुर मंदंता.
अनि बोर्ते दिहंते केन्जोरो, वोर केन्ज्ता अद गिर सोडियंता.
13 अदेन साटि नना नमुनङ येच्चि वेहंतोन.
बारितेके,
‘वूर सूडंतेर बति, वोड्के मायुर.
केन्जंतेर बति वूरकुन अर्तम आयो’+”
इन्जेर सिस्यलिरकुन वेह्तोर.
14 “इदेन हिंदल येसया पर्वक्तल लिहि कीता वचन पूरे माता: अद बतल इत्तेके, ‘मिरट तप्वक केन्जंतिट बति, अर्तम किया पर्विट.
मिरट तप्वक सूंडंतिट, बति करि किया पर्विट.
15 वूर कड्क्ने सूड्सि, केव्क्ने केन्चि, दिलतगा अर्तम कीसि, ना बाजुन तिरितेके नना वूरकुन चोकोट कींतोन.
बति अहन जर्ग्वा इन्जेर वूरङ दिल्क बंडत दात गट आतङ’+ इन्जेर मंता.
16 “बति मिरट आसिर्वाद येत्तुर लोकुर आंदिट.
बहन इत्तेके मीवङ कड्क सूड्सेर मंतङ.
केव्क केन्चेर मंतङ.
17 बारितेके मिरट सूड्वलिकुन सूडना इन्जेर अनि केन्ज्वलिकुन केन्जना इन्जेर वेलेटिर तोत्तुर पर्वक्तलिर अनि नियत्नुर आसा कीतेर.
बति वूर सूडा पर्मकि अनि केन्जा गिर पर्मकि.
इद सतेम आंद” इन्जेर सिरिप सिस्यलिरकुन वेह्तोर.
विजा वीत्वल केतिदारना नमुनतुन पोडि कीसि वेह्वल
18 अद आता पेजे, “केन्जट!
विजा वीत्वल केतिदारना नमुनता अर्तम वेहंतोन.
19 सरदुन पोरो अर्ता विजा बूर इत्तेके, स्वर्ग्ना राजुन बारेता वचन केन्चि, अर्तम कियुर वूर आंदिर.
अदेन साटि सय्तन वूरङ दिल्कनल अद वचंतुन तेंड्सि वाटंतोर.
20-21 पाटा बोमितगा अर्ता विजा बूर इत्तेके, वचन केन्चि आनंद्ने वोपंतेर.
बति अव गोस्टिङ वूरा मंदगा उद्दोङ.
अदेन साटि इचुसि वकत वेरिन वूर नमंतेर.
तक्लिब्नङ परिक्सङ वानेकेन बक्तितल बह्के मांतेर.
22 चह्क्नङ पोदेलनगा अर्ता विजा बूर इत्तेके, वीर गिर वचन केन्ज्वलिरे आंदिर.
बति दुनियतगा पिस्वडुन बारेतङ सोन्च-विचर्क, दन-दव्लतुन बारेतङ आसङ वूरकुन दाबि कींतङ.
अदेन साटि चह्क्नगा अर्ता विजत मोडि मंवलिर पंटा सिया परुर.
23 चोकोट्ना बोमितगा अर्ता विजा बूर इत्तेके, वचन केन्चि, तम्वा दिलतगा चोकोटे इर्सि, वचन तीर ताक्वलिर आंदिर.
ईतुर नूर पाल्क, साट पाल्क अनि तीसा पाल्क पंटा अदिक सिय्वल चोकोट्ना बोमित मोडि मंदंतेर” इन्जेर वेह्तोर.
पोरेय येह्वल जाडिता नमुना
24 वूर पर्जतुन येसु उंडे उंदि नमुना वेह्तोर: अद बतल इत्तेके, “तंवा पोलम्नगा गोह्क्ना चोकोट्ना विजा वीत्वल माय्नन मोडि स्वर्ग्ना राज मंदंता.
25 सम्दिर नरुम्सेर मनेके, वोनोर पगा-दारल वासि, अव गोह्क्ना विजत नड्डुम बर्टुम जाडिता विजा वीच्चि सोडितोर.
26 ते गोह्क बेर्सि चड दाना आतङ अस्के, अद जाडि गिर बेर्सि दिस्ता.
27 ते काम किय्वलिर वासि, ‘माल्का!
निमे नीवा पोलम्नगा गोह्क्ना चोकोट्ना विजा वीत्ति.
बति अवेनगा जाडि बहन पिर्सि बेर्स्ता?’
इन्जेर पूसि कीतेर.
28 अस्के वोर, ‘इद पगा-दारल कीता काम आंद’ इन्जेर जवब सीतोर.
ते काम किय्वलिर, ‘सोन्जि अद जाडितुन तेर्सि वाटट इंति कि?’
इन्जेर वोन पूसि कीतेर.
29 ते वोर माल्कल, ‘वटिन!
मोका मिरट इंके तेर्किट्ते, जाडित बरोबर गोह्क गिर तेर्सि वाट्किट.
30 अदेन साटि पंटा कोय्ले वानल वेरि, गोहकुन बरोबर बर्टुमुन बेर्सा सीम्ट.
अद पंटा कोय्नेके नना कोय्वलिर सङा, “मोदोल बर्टुमुन कोय्सि, कट्टङ दोह्चि, डुंडुसट.
अनि गोहकुन नावा गोदम्नगा निहट” इन्जि वेहंतोन’” इन्जेर इत्तोर.
मोवेरा दाना
31 वूरकुन उंडे उंदि नमुना इहिन वेह्तोर: “स्वर्ग्ना राज मोवेरा दानत मोडि मंदंता.
वोरोर मायनल तंवा वाडितगा मोवेरा दानतुन उर्स्तोर.
32 अद दाना सम्दि दाननल वेले चुडुरे बति, अद बेर्सि सम्दि बाजि-पालनल वेले डगुर मरा आंता.
पिटेङ तानङ कांदनगा गूडङ कींतङ” इन्जेर इत्तोर.
सोवुस्वल चीज
33 येसु उंडे उंदि नमुना इहिन वेह्तोर: “स्वर्ग्ना राज बततुन दात मंता इन्जेर वेह्का?
अद इहिन मंदंता: उंदि वेय्लो मूंद अड्डेङ नह्ता पिंडितगा सोवुस्वल चीज इचुसि वाड्ता.
ते अद पूरो पिंडितगा पग्रे माता.
अदे तीर्दे स्वर्ग्ना राज मंता” इन्जेर वेह्तोर.
34 येसु इव सम्दो गोस्टिङ नमुनना रूप्ने वेह्तोर.
नमुनङ येत्वक वूर पर्जतुन बतय गिर वेह्मकि.
35 बारितेके,
“कलि गडे मातगटल मक्डिते मंवलिक गोस्टिन,
वूर सङा सिरिप नमुनङ येच्चिने वेहंतोन”+
इन्जेर तोत्तोर पर्वक्तल वेह्ता गोस्टित पूरि किय्ले अहन वेह्तोर.
गोह्क अनि जाडिता नमुनता अर्तम
36 अद आता पेजे, येसु पर्जतुन सारि कीसि, रोन सोत्तोर.
अस्के वोनुर सिस्यलिर वोन्गा वासि, “गोह्क अनि जाडिता नमुनता अर्तम माकुन वेहा” इन्जेर पूसि कीतेर.
37 ते येसु इहिन वेह्वल मोदोल कीतोर: “चोकोट्ना विजतुन वीत्वल स्वर्ग्नोर माय्नल आंदुर.
38 पोलम इद परिपन्चम आंद.
चोकोट्ना विजा स्वर्ग्ना राज्नुर आंदिर अनि अद पोलम्नगा बेर्स्ता जाडि सय्तंदा राज्नुर आंदिर.
39 अद जाडिता विजा वीत्वल दुस्मन-दारल सय्तन आंदुर.
पंटा कोय्वल कालम इद दुनियतगा आक्रि गट्का आंद.
अद पंटा कोय्वलिर बगवंतनुर दूतलिर आंदिर.
40 जाडितुन मीरि कीसि तड्मितगा डुंडुसीतपे, इद दुनियता आक्रि गट्कते जर्गंता.
41-42 स्वर्ग्नोर मायनल तंवुर दूतलिरकुन सारि कींतोर.
वूर वासि, स्वर्ग्ना राज्नगा पाप कियुस्वलिक सम्दोन अनि करेबलिर सम्दिरकुन मीरि कीसि, पोत्वल तड्मिता गुंडम्नगा वाटंतेर.
अगा वूर आड्सेर, पल्क कोर्क्सेर मंदंतेर.
43 बति नियत्नुर तम्वोर बाबोना राज्नगा पोडदुन मोडि मिड्चेर मंदंतेर.
इदेन अर्तम कियना इंद्किट्ते, चोकोट केन्चि तेन बारेते सोन्च कीम्ट!”
इन्जेर वेह्तोर.
मकुस्ता अद दन
44 अनि, “स्वर्ग्ना राज उंदि वाव्टुन रोपो मकुस्ता अद दनमुन मोडि मंता.
वोरोर मायनल तान पुटुसि अह्ने मकुसि इर्तोर.
अनि पुड्ता इंवल आनंद्ने सोन्जि, तन्गा मंवल आस्ति सम्दोतुन वोम्सि अद वाव्टुन येत्तोर.
45 “इद स्वर्ग्ना राज बेय बारितङ मुतेल्क्ना बेपरि किय्वन दात गिर मंता.
46 वोर बेपरि दारन उंदि बारिता मुतेम दिस्ता.
ते वोर सोन्जि, तन्गा मंवल आस्ति सम्दोतुन वोम्सि, अद मुतेमुन येत्तोर.
मीन्क पिय्वल जार्दा नमुना
47 “स्वर्ग्ना राज सम्दुरतगा वाट्सि, वेले तीर्क्नङ मीन्क पिय्वल जारदुन मोडि गिर मंता.
48 अद जार निंता पेजे तान डर्डितेके ऊम्सि, चोकोट्नङ मीनकुन तम्वा बुट्टितगा वाटंतेर.
अनि कामि सियोङ अवेन बह्रि वाडि सींतेर.
49 अदे तीर्दे, इद दुनियतगा आक्रि गट्कते, बगवंतनुर दूतलिर वासि, नियत्नुर्गटल पापिरकुन पाकि कींतेर.
50 अनि वूरकुन पोत्वल तड्मिता गुंडम्नगा वाटंतेर.
अगा वूर आड्सेर, पल्क कोर्क्सेर मंदंतेर” इन्जेर नमुनङ येच्चि वेह्तोर.
51 “नना वेह्तङ इव सम्दो अर्तम आतङ कि?”
इन्जेर सिस्यलिरकुन येसु पूसि कीतोर.
ते वूर, “हो!
अर्तम आतङ” इन्जेर वेह्तेर.
52 अस्के येसु वूर सङा, “बहंते रोतोर माल्कल तंवा दनमनल पडनङ, पूनङ वस्तुङ तरंतोरो, अह्ने स्वर्ग्ना राजुन बारेता बोदा करितोर हर सास्तिरि गिर तरंतोर” इन्जेर इत्तोर.
येसु तंवा नाटे बोदा वेह्वल
53-54 येसु इव नमुनङ वेह्वल मह्चि, अगटल तंवा सोंता चहर्ते वातोर.
अनि सुनगोग्नगा पर्जतुन बोदा वेह्तोर.
अद बोदा केन्चि वूर निप्ने आसि, “वेन इचोर बुदि-गियन अनि मय्मतङ काम्क किय्ले सक्ति बगटल वाता?
55 एहे!
वेर्ते वाडेनोर मरि आंदुर बेहे कि रा?
वेना अवल मरियल आंद अनि याकोब, योसेप, सीमोनु, अनि यूदल इंवलिर वेनुर तमुक आंदिर कि रा!
56 अनि वेनङ सेलक गिर सम्दि मावा नाटेन पिसेर मंतङ.
असल!
वेन इद सम्दो गियन अनि सक्ति बगटल वाता?”
इन्जेर इत्तेर.
57 अनि वूर रोपो गर्वा मत्ता काड्कि, वोर वेह्वलिक नंमकि अनि वोन्गा बरोसा गिर इर्मकि.
ते येसु वूर सङा, “पर्वक्तन तंवा रोन अनि तंवा नाटे तपुसि, दुस्रोक सम्दो जागनगा मान पुटंता” इन्जेर वेह्तोर.
58 अनि वूर तंवा पोरो बरोसा इर्वा काड्कि, अगा वेले मय्मतङ काम्क येसु किय्मकि.