पापनल कब्ले मायोर वोर नासेडम आंतोर
13
1 अद वकत्ने अगा मंवलिर्गटल कहितुर येसुन सङा, “गलिलयतल कहितुर मंदिरतगा जंवरकुन बलिदान सीसेर मनेके, पिलातु वूरा जीवा येतुस्तोर” इन्जेर वेह्तेर.
2 ते येसु, “वूरा परन अहन सोत्ता काड्कि, वूर गलिलयतुर सम्दिर्गटल अदिक पाप कीतेर इंतिट कि?
3 बति वूर किय्मकि इन्जेर नना इंतोन.
पापनल कब्ले माय्वेके मिरट गिर अह्ने नासेडम आंतिट.
4 अह्ने सिलोयम्ना बुरुज उल्टे मासि, सातुर वूर अट्रा (18) जन्क्ना गोस्टित बतल इंतिट?
येरुसलेम्नगा मंवलिर सम्दिर्गटल अदिक वूर पाप कीतेर इंतिट कि?
5 बति वूर किय्मकि इन्जेर नना इंतोन.
पापनल कब्ले माय्वेके मिरट गिर अह्ने नासेडम आंतिट” इन्जेर वेह्तोर.
सादो अद अन्जुरि मरता नमुना
6 अहन वेह्ता पेजे येसु इद नमुना: “वोरोर मायनल तंवा वाडितगा उंदि अन्जुरि मरा उर्स्तोर.
अद बेर्स्ता पेजे अस्के अस्के तान्गा सोन्जि, पंडिन साटि सूड्ंदुर.
बति वोन बस्केन पंडिङ दिस्मकि.
7 ते वोर माल्कल, गडियन सङा, ‘इचुला!
मूंद साल्कनल इद अन्जुरि मरतगा पंडिन साटि वासेर मंतोन.
बति उंदि गिर पंडि साद्मकि.
इद मरा बेर्सि वटि आगय वाडिता जागतुन आपुसेर मंता.
तेन नट्क्सि वाटा!’
इन्जेर वेह्तोर.
8 ते वोर गडियल, ‘माल्का!
इद साल अद मंदा सीम.
अद मरतुन सिर्मुट वोपा ताड्सि, येर अनि कात वेडियंतोन.
9 वाय्वल साल सादर्ते, चोकोट्ना गोस्टि.
साद्वेके दायर्ते निमे तान नट्क्सि वाटा वचो’ इन्जि वेह्तोर” इन्जेर वेह्तोर.
आरम्ना दिवोसुन नेटि उंदि वेय्लोन चोकोट किय्वल
10 उंदि आरम्ना दिवोसुन नेटि येसु सुनगोग्नगा बोदा वेह्चेर मत्तोर.
11 अगा अट्रा (18) साल्कनल बूत सोप्रे मासि, बेमरिते मंवल उंदि वेय्लो मत्ता.
अद बेमरिते सड्कल निला वाय्वक्ने नडि वरिसिन मंदु.
12 ते येसु तान सूड्सि, तंवा करुम केय्सि, “बायि नी बेमरितल चोकोट आम!”
इन्जेर वेह्तोर.
13 अनि तान पोरो केय्क इर्तोर.
अहन इर्नेकेन अद सड्कल निल्ता.
अनि बगवंतन डगुर-पान सिय्वल सुरु कीता.
14 आरम्ना दिवोसुन नेटि येसु अद वेय्लोन चोकोट कीता काड्कि, सुनगोग्नोर अदिकारिन सोङ वाता.
ते वोर मांदितुन सङा, “वारम्नगा सारुङ (6) रोज्क काम किय्लेके* मंतङ.
अव दिवोस्क्नगा बंटि गिर उंदि दिया वासि, चोकोट आम्ट.
बति आरम्ना दिवोसुन नेटि आय्मट” इन्जेर वेह्तोर.
15 अस्के पर्बु, “ये!
कपेटलिर्निट!
मिह्गटल बोरे कोंदतुने आयि, गादितुने आयि आरम्ना दिवोसुन नेटि कोट्कतल रेह्चि, येर उह्ले वोय्विटिय?
तप्वक वोंतिट!
16 अट्रा साल्कनल बूत सोप्रे मासि मंवल इद वेय्लो, अब्राहम्ना संतान आय्वल इद वेय्लो, आरम्ना दिवोसुन नेटि सय्तंता केय्दल सुटे माय्वा कि?”
इन्जेर पूसि कीतोर.
17 अव गोस्टिङ केन्चि वोनुर पगा-दार्क सिर्मिंदिङ आतेर.
बति अगा मंवल मांदि वोर कीतङ मय्मतङ कामकुन सूड्सि आनंद येत्तेर.
आरमना दिवोसुन नेटि उंदि वेय्लोन चोकोट कियवल (12:32-34; LUK 13:10-)
मोवेरा दानता नमुना
18 अद आता पेजे येसु, “बगवंतना राज बहन मंदंता?
अद बततुन दात मंता इन्जेर वेह्का?
19 अद इहिन मंदंता: वोरोर मायनल तंवा वाडितगा मोवेरा दानतुन उर्स्तोर.
अद बेर्सि डगुर मरा आता.
पिटेङ तानङ कांदनगा गूडङ कींतङ.
बगवंतना राज अह्ने मंता” इन्जेर वेह्तोर.
बगवनताना राज मोवेरा दानता नमुनत मोडि मंता (13:18-19)
सोवुस्वल चीज्ना नमुना
20 अनि उंडे गिर येसु, “बगवंतना राज बततुन दात मंता इन्जेर वेह्का?
21 अद इहिन मंदंता: उंदि वेय्लो मूंद अड्डेङ नह्ता पिंडितगा सोवुस्वल चीज इचुसि वाड्ता.
ते अद पूरो पिंडितगा पग्रे माता.
बगवंतना राज अह्ने मंता” इन्जेर वेह्तोर.
बगवंतना राज्ना सरि, काल सरित दात्ना आंद
22 अद आता पेजे येसु चहर्क्नगा अनि नह्क्नगा वेलिसेर, बोदा कीसेर, येरुसलेम सोन्जेर मत्तोर.
23 अस्के वोरोर मायनल, “पर्बु!
पापनल बचे माय्वलिर कहि जन्के कि बतल?”
इन्जेर पूसि कीतोर.
24 ते येसु, “बगवंतना राज्नगा नेङ्वल दर्वजा कुत्लेम मंता.
अद दर्वजतल नेङ्ले, वेले कोसिद कीम्ट.
वेलेटिर अद दर्वजतल नेङ्ले बेय कोसिद कींतेर बति, वूर सङा आया परो.
25 अस्के अद रोतोर माल्कल तेच्चि, कावड केहंतोर.
* अहन केह्ता पेजे मिरट बह्रि निल्सि, ‘पर्बु!
पर्बु!
मा साटि कावड तेरिया’ इन्जेर कावड पाय्वल सुरु कींतिट.
अस्के वोर पर्बु, ‘मिरट बूर आंदिटो, बगटल वातिटो, नाकुन टावा सेले’ इन्जेर जवब सींतोर.
26 अस्के मिरट, ‘नी सङा तितोम-उटोम.
निमे मावङ चहर्क्नगा बोदा गिर कीति’ इन्जेर वेह्वल मोदोल कींतिट.
27 बति वोर पर्बु, ‘मिरट बूर आंदिटो अनि बगटल वातिटो नाकुन टावा सेले.
करेबलिक काम्क किय्वलिर्निट!
मिरट सम्दिर नह्गटल सोंट’ इन्जेर वेहंतोर.
28 “अस्के अगटल सूड्तेके मीकुन, अब्राहम, इसक, याकोब अनि सम्दिर पर्वक्तलिर बगवंतना राज्नगा दिसंतेर.
बति मिरट अगा बह्रि रेहे मासि, वेले नोपिते आड्सेर पल्क कोर्क्सेर मंदंतिट.
29 अनि दुस्रुर लोकुर सिडयिङ, पोरयिङ, काल्वडा अनि तलवडा बाजनल वासि, बगवंतना राज्नगा जर्ग्वल जेवुंतगा उदंतेर.
30 इचुला केन्जट!
आक्रि मंवलिर कहितुर मुने आंतेर.
मुने मंवलिर कहितुर आक्रि आंतेर” इन्जेर येसु जवब सीतोर.
येरुसलेमुन बारेते येसु दिलतगा दुक्सा येत्वल
31 अद गट्कतेन कहितुर परिसयुल्क येसुनगा वासि, “हेरोद राजल नीकुन जकना इन्जि सूड्सेर मंतोर.
इगेटल सोन” इन्जेर वेह्तेर.
32 ते वूर सङा येसु, “‘इव दिवोसकुन रोपो* बूतकुन तेंड्सि पूड्सेर, बेमरिने मंवलिरकुन चोकोट कींतोन.
अव दिवोस्क मार्ता पेजे* नावा कार्या बर्पुर कीसि महंतोन’ इत्तोर इन्जि, कोय्लडुन दात्नोर हेरोद्नगा सोन्जि वेहट.
33 तेर बति नना नेंड, नाडि अनि मने येरुसलेम यात्रा कीसेर सोंदय लागर.
बारितेके, सिरिप येरुसलेम्नगन पर्वक्तलिरकुन जकंतेर.
34 ये!
येरुसलेम्नुर लोकुर्निट!
मिरट पर्वक्तलिरकुन जक्सेर अनि बगवंतल मिह्गा सारि कीतुरकुन बंडने पासेर मंतिट.
कोर तंवङ मारेलकुन बूड पिलन करुम कीतपिनय, बचोङो जोकङ मीकुन करुम कियना इन्जेर नना सूड्तोन.
बति मिरट वोप्मकि.
35 इचुला केन्जट!
बगवंतल मी नगुडुन पाड आसि सोंले, सुटि कीसेर मंतोर.
‘पर्बुना अदिकार्दे* वाय्वन बगवंतल आसिर्वाद सियिर’+ इन्जेर मिरट इनल वेरि, नावा मोकोम उंडे उंदि जोका सूड्विट” इन्जेर वेह्तोर.