दर्मतुर अदिकारिरा तपुन येसु तोह्वल
23
1 अद आता पेजे, येसु पर्जत सङा अनि तंवुर सिस्यलिर सङा इहिन वेह्वल मोदोल कीतोर:
2 “सास्तिरिर अनि परिसयुल्क मोसेना कानुंतुन अर्तम आनल वेहन साटि नेमे मासि मंतेर.
3 अदेन साटि वूर वेह्तप मिरट कीम्ट.
बति वूर किय्वलिक काम्क मिरट किय्मट.
बारितेके वूर बोदा किय्वलिक वूर पिय्सि ताकुर.
4 बोरे तोचा परुर अचोर वजन, माय्नलिर पोरो वाटंतेर.
बति वूर अद वजंतुन तोच्चि वोय्ले जरा गिर मदत कियुर.
5 तम्वङ केय्क्नगा बगवंतनङ वचन्क लिहि कीसि मंवलिक रूंद पटिङ केरंतेर.
तम्वङ कप्डिनङ काट्क्नगा मंवलिक पुचुड्कङ लाम दिसनल इरंतेर.
अनि दुस्रुर माय्नलिर तम्वा बक्तितुन सूडनल ईतङ सम्दो काम्क कींतेर.
6 अनि सुनगोक्नगा अनि जेवुन्क्नगा तम्वा डगुर-पान तोहन साटि, वूर सास्तिरिर मुके माय्नलिर उद्वलिक कुर्चिनगा उद्ले पसंद कींतेर.
7 हाटुम्क्नगा पर्जा सम्दिर गिर तम्वकुन दंडोस दोसना इन्जेर अनि गुरुजि इन्जि केयना इन्जेर तम्वा मंदे आसा कींतेर.
8 बति मिरट, गुरुजि इन्जेर मीकुन केयुस्मट.
बारितेके मी सम्दिरकुन वोरोरे बोदा गुरु मंतोर!
मिरट सम्दिर गिर तादल-तमुन मोडितुर आंदिट.
9 अनि इद दुनियतगा मी बरोबर्तोर बोरे दुस्रोर बक्तन बाबल इन्जेर केय्मट.
मी सम्दिरकुन स्वर्ग्नगा वोरोरे बाबो आय्वल बगवंतल मंतोर.
10 अचोरे आय्वा मीवा मीकुन गुरुजि इन्जेर केयुस्मट.
मी सम्दिरकुन वोरोरे गुरु आय्वल किरिस्तु मंतोर.
11 मिह्गटल डगुर-पान वाले मी सेव्कल आसि मंदंतोर.
12 बारितेके तंवा तना डगुर-पान किय्वन बगवंतल चुडुर-पान सींतोर.
अनि बोर्ते चुडुर-पान कींतोरो, वोन डगुर-पान सींतोर.
येसु सास्तिरिरकुन अनि परिसयुलकुन दम्कि सिय्वल
13 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
स्वर्ग्ना राज्नगा नेङ्वल सरि मीकुन टावा.
बति अदेनल मिरट रोपो नेङ्मकि अनि नेङ्ले कोसिद किय्वलिरकुन गिर मिरट नेङा सीसेर सेल्विट.
14 *[“रेय, कपेटलिर सास्तिरिर अनि परिसयुल्क्निट!
रांडे वेय्लोक्नङ रोहकुन लूटि कींतिट.
इदेन मकुसन साटि, पोरो पोरो बक्ति तोह्चेर मांदितुन मुने वेले जेल पार्तनङ कीसेर मंदंतिट.
इव ईतन हिंदल मीकुन बगवंतल उंडे इचुर वेले सिक्सा वाट्सि, नाय्दा तस्वा कींतोर.]
15 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
मीवा दर्मतगा मीरि किय्ले, मिरट सम्दुरतुन अनि बोमितुन तिरिसि वांतिट.
बति वोर मी सङा मीरे माता पेजे, वोन रंड ईसङ अदिक सिक्सा वानल कींतिट.
16 “रेय, सरि तोह्वलिर गुड्डिर्निट!
मीकुन सिक्सा तपो.
‘मंदिर्ता पोरोडे वोट वाड्तेके बतय आयो बति, मंदिरतगा मंवल सोनेत पोरो वोट वाड्तेके मात्रम, अद वोटुन पिय्सि ताका लागर’ इन्जेर मिरट इंतिट.
17 तेलिवि कमि वालिर अनि गुड्डिर्निट!
सोने मुके वाले आंद इंतिट कि, सेलेके सोनेतुन पवित्रा किय्वल मंदिर मुके वाले आंद इंतिट?
18 अचोरे आय्वा, ‘बलिदान सिय्वल बोव्लतुन पोरो वोट वाड्तेके बतय आयो बति, तान पोरो इर्वलिक अर्पनन पोरो वोट वाड्तेके मात्रम, अद वोटुन पिय्सि ताका लागर’ इन्जेर मिरट वेहंतिट.
19 गुड्डिर्निट!
अर्पनङ मुके वालेक आंदुङ इंतिट कि, सेलेके अर्पनन पवित्रा किय्वल बलिदान सिय्वल बोव्ला मुके वाले आंद इंतिट?
20 अदेन साटि बलिदान सिय्वल बोव्लत पोरो वोट वाट्वलिर, तान पोरो मंवलिक अर्पनन पोरो गिर वोट वाड्तपे आंता.
21 अदे तीर्दे मंदिरतुन पोरो वोट वाट्तेके, तान्गा मंवन पोरो गिर वोट वाड्तपे आंता.
22 अद तीर्दे स्वर्गुन पोरो वोट वाट्तेके अगा मंवल राजा-गादितगा उद्वल बगवंतन पोरो गिर वोट वाट्तप आंता.
23 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
बारितेके मिरट पुदिनतल, सोपनल, जीरनल नूटल दहा ईसङ तचि बगवंतन अर्पना सींतिट.
बति दर्मता कानुंतगा वेह्तप मुके वालेक आय्वलिक नायदुन, दयतुन अनि बरोसतुन सुटि कीतिट.
मिरट अवेन सुटि किय्वक इवेन गिर पिय्सि ताक्मड इत्तेके चोकोट मंदु.
24 सरि तोह्वलिर गुड्डिर्निट!
मिरट नुलेतुन गरि कीसि उंटिट बति, डगुर हूटडुन मिङंतिट!
25 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
बारितेके मिरट देडियन अनि तालिन बहिडल चक नोरंतिट.
बति अवेन रोपो कर्का पिय्सि मंदंता.
अह्ने मिरट गिर पोरो पोरो चक-पक दिसंतिट.
बति मी रोपो लाल्सल अनि करेबलिक* गुन्क्ने निन्चि मंदंतिट.
26 गुड्डि परिसयुल्क्निट!
मोदोल मीवङ देडियङ, तालिनगा मंवल रोपोडा कर्का चक ऊटि कीम्ट.
अस्के अवेनगा बह्रि मंवल गिर चक्ने आंता.
27 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
मिरट चुना पातङ गोरिन दात्नुर आंदिट!
बहिडल अव बेय सोबा चक दिसंतङ.
बति अव सातुरङ बोकने अनि सडे मातङ कूर्क्ने निन्चि मंदंतङ.
28 अदे तीर्दे मिरट पोरो सूड्लेक माय्नलिरकुन नियत्नुर दात दिसंतिट.
बति मिरट रोपो पसि किय्वलिक अनि करेबलिक आसने निन्चि मंतिट.
29 “रेय, कपेटलिर सास्तिरिर अनि परिसयुल्क्निट!
मीकुन सिक्सा तपो.
मिरट पर्वक्तलिर साटि गोरिङ दोहंतिट.
अनि नियत्नुरङ गोरिन सोबते तयर कींतिट.
30 अचोरे आय्वा, ‘ममोट गिर मावुर तादुर-बाबुर मंवल गट्कते पिसि मन्मड इत्तेके, वूर बरोबर मीरे मासि पर्वक्तलिरा नेतुडुन तुह्चि मनोम’ इन्जेर मीवा मिरट इंतिट.
31 इहिन मिरट पर्वक्तलिरा जीवा येत्वलिरा संतान आंदुम इन्जेर वोप्सि, मी पोरो मिरटे उल्टा गवा वेह्चेर मंतिट.
32 मी तादुर-बाबुर किय्वडल मेय्सि मंवल लेकतुन मिरट गिर पूरि कीम्ट.
33-34 अदेन साटिने इचुला!
नना मिह्गा पर्वक्तलिरकुन, गियन वालिरकुन अनि सास्तिरिरकुन सारि कीसेर मंतोन.
वूर्गटल कहितुरकुन मोद्नगा मोलने पासि, जकंतिट.
उंडे कहितुरकुन सुनगोक्नगा वोसि चाटल्क्ने पायुसंतिट.
उंडे कहितुरकुन उंदि नाटनल उंडे उंदि नाटे पूड्सेर दुक्सा सींतिट.
विक वाले तरस्क अनि अवेना संतांदुन मोडितुर्निट!
मिरट वेले करेबलिर आंदिट.
पातड्ता सिक्सतुन बहन तपुसा पर्किट?
35 इद तीर्दे नियत्नोर हेबेल्ता नेतुडल मोदोल आसि, बलि चडि किय्वल बोव्लत अनि मंदिरतुन नड्डुम तूर्ता बरकियनोर मरि जकरियना नेतुर वेरि, मिरट दर्तुरित पोरो तुह्ता सम्दिरा नेतुडा जिमा मिरटे येता लागर.
36 इद सम्दो इद पिडितुर पोरो वांता.
इद सतेम आंद इन्जेर मीकुन वेह्चेर मंतोन.
येरुसलेमुन बारेते दुक्सा लाग्वल
37 “येरुसलेम्नुर लोकुर्निट!
मिरट पर्वक्तलिरकुन जक्सेर, बगवंतल मिह्गा सारि कीतुरकुन बंडने पासेर मंवलिर आंदिट.
कोर तंवङ मारेलकुन बूड पिलन करुम कीतपिनय, बचोङो जोकङ मीकुन करुम कियना इन्जेर नना सूड्तोन.
बति मिरट वोप्मकि.
कोर तंवङ पिलन करुम किय्वल
38 केन्जट!
मी नगुडुन पाड आसि सोंले* सुटि कीसेर मंतोन.
39 ‘पर्बुना अदिकार्दे वाय्वन बगवंतल आसिर्वाद सियिर’ इन्जेर मिरट वेहनल वेरि, नावा मोकोम उंडे उंदि जोका सूड्विट” इन्जेर इत्तोर.