बटेय-दार्क्ना नमुना
12
1 उंडे येसु वूर सास्तिरिरकुन, डगुक कटोडलिरकुन अनि पेदोलकुन नमुनना रूप्ने बोदा वेह्वल मोदोल कीतोर.
“वोरोर मायनल तंवा वाडितगा आङुर्क उर्स्तोर.
अद वाडित सिर्मुट गोडा दोह्पुस्तोर.
आङुर रसा तेंड्ले बंडतुन नार्युस्तोर.
अनि जाग्लि किय्ले, उंदि डङल मंडा गिर वाटुस्तोर.
आङुर्क्ना वाडि
“सम्दो आता पेजे, अद वाडितुन बटेय-दारकुन सीसि, यात्रा कीसेर दुस्रो देस्ने सोत्तोर.
2 अद आङुर्क्ना पंटा कोय्वल कालम्ने तंवा ईसतुन तर्ले, वोरोर सेव्कन बटेय-दार्क्नगा रोह्तोर.
3 बति वूर माल्कनोर सेव्कन पिय्सि पातेर अनि रिकम केय्क्ने सारि कीतेर.
4 अहन आता पेजे, वोर माल्कल उंडे वोरोर सेव्कन बटेय-दार्क्नगा रोह्तोर.
ते वोन वूर तलदगा पासि हिजत तेंड्सि सारि कीतेर.
5 अहन आता पेजे, वोर माल्कल, उंडे वोरोर सेव्कन रोह्तोर.
वोर सेव्कन वूर पासि जक्तेर.
अहन सारि कीतुर्गटल कहितुरकुन जव्क्तेर अनि उंडे कहितुरकुन जह्तेर.
6 माल्कनगा सेव्कलिर बोरे सेल्वक आतेर.
ते आक्रित तंवोर लाड्नोर मरि वोरोरे मेय्सि मत्तोर.
इंके वेरि सम्दिरकुन जह्तेर, जक्तेर बति, ‘नावोर मरिन तेर, वूर चोकोट मानि कीनिर’ इन्जेर सोन्च कीसि, वूर्गा सारि कीतोर.
7 बति वूर बटेय-दारलिर, ‘इचुला!
वेर इद जाय्जतुन ईसदारल आंदुर.
वेन जक्सि, वेना जाय्जतुन इस्का पाकट’ इन्जेर तम्वा तमा इत्तेर.
8 अनि वोन पिय्सि, जीवा येत्तेर अनि वोना कूरदुन आङुर्क्ना वाडित बह्रि वाडि सीतेर.
9 अद आता पेजे वोर आङुर्क्ना वाडितोर माल्कल, वूर बटेय-दारकुन बतल कींतोर इंतिट?”
इन्जेर येसु पूसि कीतोर.
अनि तनय, “वोर तप्वक वूरकुन जकंतोर अनि अद वाडितुन दुस्रुरकुन बटेय्ते सींतोर” इन्जेर वेह्तोर.
10-11 “‘रोन दोह्वलिर इद बंडतुन कामि सियो इन्जि,
वाडि सीता इद बंडा मोस्तुर बंडा आसि निल्ता.
इद मय्मता कार्यतुन बगवंतले कीतोर.
इदेन मरट कड्क्ने सूड्तट!’
+
इंवल गोस्टि दर्मा-ग्रंत्क्नगा मिरट वाचि किय्मकि कि बतल?” इन्जेर पूसि कीतोर.
12 वूर सास्तिरिर, कटोडलिर, पेदोल्क, “येसु मा बारेतेन इद नमुना वेह्तोर” इन्जि करि कीतेर.
अनि अदे गट्कते वोन पिय्ले सूड्सेर मत्तेर.
बति मांदितुन सूड्सि वेरितेर अनि वोन सुटि कीसि सोत्तेर.
महा राजन टेक्सा दोह्वल
13 अद आता पेजे, ‘येसु वड्क्नेके वोन तप्नगा साप्डि कीकट्’ इन्जि हेरोद्ना बाज्नुरकुन अनि परिसयुल्कुन वोन्गा सारि कीतेर.
14-15 ते वूर येसुनगा वासि, “गुरुजि!
निमे वड्क्वल अनि बोदा किय्वल सतेम आंद.
बोनय बेद-बाव सूड्वनि आय्वि.
बगवंतना सते मारग बाता अहन वेह्वनि आंदि इंवल, माकुन टावये.
बति इंके ममोट, सीजर महा राजना रोम सर्कारतुन टेक्सा दोह्वल नायम आंद इंति कि आयो इंति?”
इन्जेर पूसि कीतेर.
कूरतङ बिलङ
येसु वूरा मंदा कपेटल गुंतुन करि कीसि, “‘तप्नगा साप्डि कीकोम’ इन्जि बारि इंतिट? नह्गा कूरता उंदि बिला पिय्सि वरट” इन्जेर इत्तोर.
16 ते वूर कूरता उंदि बिला पिय्सि वातेर.
ते येसु, “तेन्गा बोना पोरोल अनि बोना मोकोटता मोर मंता?”
इन्जेर वूरकुन पूसि कीतोर.
ते वूर “सीजर महा राजना” इन्जेर वेह्तेर.
17 अस्के येसु, “सीजर महा राजनङ महा राजन सीम्ट, अनि बगवंतनङ बगवंतन सीम्ट” इन्जेर वेह्तोर.
अद केन्चि वूर बेय गुल आसि सोडितेर.
सदुकयुल्क येसुन सवल पूसि किय्वल
18 सातुर वूर नेंडुर इन्जेर जट-पट लाग्वलिर सदुकयुल्क येसुनगा वासि इहिन सवल पूसि कीतेर.
19 “गुरुजि!
मोसेना कानुंतगा, ‘तादल मरि-मियड आय्वके मार्तेके, वोनोर तमुर अद तङेन तुङ्सि, तंवोर तादन साटि मरि-मियड आया लागर.
वूर मरि-मियड तादना संतांदा लेकते वांतेर’ इन्जेर लिहि कीतोर.
20 नमुनतुन येड्विर तादल-तमुर मत्तेर इंट.
वूर्गटल मडनोर वाले मर्मिङ आतोर बति, मरि-मियड आय्वक्नेन वोर मार्तोर.
21 ते वोन पेजेटोर नट्पे अद तङेन तुङ्तोर.
बति मरि-मियड आय्वक्नेन वोर गिर मार्तोर.
अह्ने वोन पेजेटोर तमुर गिर तान तुङ्तोर.
वोर गिर अह्ने मरि-मियड आय्वक्नेन मार्तोर.
22 अहन वूर येड्विर तादल-तमुक मरि-मियड आय्वक्नेन मार्तेर.
आक्रित अद वेय्लो गिर मार्ता.
23 ते वूर येड्विर सासि-नेंड्ता पेजे, अद वेय्लो वूर येड्विर्गटल बोना बाय्को आंता?”
इन्जेर पूसि कीतेर.
24 ते येसु, “मिरट इंवल बेय डगुर तप आंद.
बारितेके मीकुन दर्मा-ग्रंत्क्नगा लिहि कीसि मंवलिके आयि, बगवंतना सक्तितुन बारेतेन आयि, टावा सेले.
25 बहन इत्तेके सासि-नेंड्ता पेजे वेय्लो-मायनल मर्मिङ आयुर.
वूर सम्दिर गिर स्वर्ग्नुर दूतलिर दात मंदंतेर.
26 सातुर वूर नेंड्वडुन बारेते, दर्मा-ग्रंत्नगा पोत्वल पोदेलता गट्नतगा, ‘नना अब्राहम, इसक अनि याकोब सेवा किय्वल बगवंतना आंदुन’ इन्जेर मोसेना केय्दे लिहि कियुसीतोर.
अद वाचि किय्मकि कि बतल?
27 इत्तेके सानलिर्क आयो बति, जीवते मंवलिर्कुने बगवंतल इन्जेर करि कियना.
मिरट वेले तप सोन्च कीसेर मंतिट” इन्जेर इत्तोर.
सम्दिनगटल डगुर हुकुम
28 अदे वकत्ने येसु वूरकुन चोकोट जवब सीतोर इन्जि, सास्तिरिर्गटल वोरोर वासि, “गुरुजि!
बगवंतल सीतङ अव आगेनल बद आगे मुके वाले आंद?”
इन्जेर येसुन पूसि कीतोर.
29 ते येसु, “‘इज्रयेल लोकुर्निट!
इद नावा गोस्टि केन्जट.
सिरिप वोरोरे मा पर्बु आय्वल बगवंतल मंतोर.
30 नी पर्बु आय्वल बगवंतन नीवा बर्पुर दिल्ते, बर्पुर मंदे, बर्पुर सक्तिते, बर्पुर बुदि-गियंते पेर्मा कियना’ इंवले सम्दिनल मुके हुकुम आंद” इन्जेर वेह्तोर.
31 “उंडे दुस्रो वाले बद इत्तेके, ‘नीवा निमे पेर्मते सूड्तपे, नी आजु-बाजुतुरकुन पेर्मते सूडना’ इवेन तेर अदिक मुके वालेक हुकुम्क सेलेङ” इन्जेर वेह्तोर.
32 वोर सास्तिरि, “गुरुजि!
बगवंतल वोरोर तपुसि दुस्रोर बोरे सेलुर इन्जेर करल वेह्ति.
33 बगवंतन मावा बर्पुर दिल्ते, बर्पुर मंदे, बर्पुर सक्तिते, बर्पुर बुदि-गियंते पेर्मा कियना अनि मावा मरट पेर्मते सूड्तपे, मा आजु-बाजुतुरकुन पेर्मते सूडना इंवल हुकुम सम्दो तीर्क्ना डुंडुसि अर्पना सिय्वल अनि सेसङ तर्वडुन तेर मुके आंद” इन्जेर इत्तोर.
34 अहन वोर गियंते जवब सिय्वल केन्चि, “निमे बगवंतना राजुन वेले लक सेल्वि” इन्जेर इत्तोर.
अद आता पेजे येसुन उंडे सवल्क पूसि किय्ले बोरे दर्यम किय्मकि.
किरिस्तु बोनोर मरि आंदुर?
35 येसु मंदिर्ता आव्रतगा बोदा वेह्चेर “किरिसतुन दाविद्ना कांदांतोर इन्जेर सास्तिरिर बारि वेह्चेर मंतेर?”
इन्जेर सवल पूसि कीतोर.
36 “इद गोस्टितुन दाविद राजले पवित्रा आत्मता सक्तिते,
‘नावोर पर्बुन सङा बगवंतल,
नी सङा लडेय्क किय्वलिरकुन मेय्सि
नीवङ कालकुन बूड तचि वाटनल वेरि,
नावा तिना बग्ला* वासि उदा’
इन्जेर इत्तोर.
37 ते दाविद राजले वोन, ‘नावोर पर्बु’ इन्जेर केय्तोर.
ते वोर किरिस्तु, दाविद्ना कांदांतोर बहन आंतोर?”
इन्जेर वूरकुन उल्टा पूसि कीतोर.
अद मंदिरतगा मंवलिर पर्जा उंडे इचुर केवि सीसि अद बोदतुन केन्ज्तेर.
सास्तिरिरा गुंतुन बारेते येसु वेह्वल
38 येसु सूचना सीसेर, “सास्तिरिर बारेते दिहंते मंट!
पोरोडल्ते बूड वेरि लह्क कोट्क केर्सि बाजर्क्ने तिरिवल अनि पर्जा तमकुन मानि कीसि दंडोस दोसना इन्जेर कोरंतेर.
बति मिरट वूर दात मन्मट.
39 सुनगोक्नगा अनि जेवुन्क्नगा तम्वा डगुर-पांदुन तोहन साटि वूर सास्तिरिर मुके माय्नलिर उद्वलिक जागनगा उद्ले सूडंतेर.
40 रांडे वेय्लोकुन पसि कीसि, अवेक्ना दन-दव्लतुन लूटि कींतेर.
इदेन मकुसन साटि पोरो पोरो बक्ति तोह्चेर, मांदितुन मुने वेले जेल पार्तनङ कीसेर मंदंतेर.
इव ईतन हिंदल वूरकुन, बगवंतल उंडे डगुर सिक्सा वाटंतोर” इन्जेर वेह्तोर.
हुंडितगा रांडे वेय्लो वाड्तङ रंड कोतङ
41 अद आता पेजे, येसु मंदिर्ता हुंडितगा करुम उच्चि, मांदि तम्वङ कोतङ वाट्वल अनि वेलेटिर दनेवंतलिर वेलेक वेलेक सोम वाट्वल गिर सूड्तोर.
42 बति उंदि गरिब रांडे वेय्लो वासि रंड तमतङ कोतङ वाट्ता.
अवेना विलुवा बेय कमि मत्ता.
43-44 येसु तंवुर सिस्यलिरकुन करुम केय्सि, “इंके वेरि वूर दनेवंतलिर तम्वा वेले दन-दव्लतनल इचुसि बागम तचि वाड्तेर.
बति इद गरिब रांडे वेय्लोनगा सिरिप रंडे कोतङ मत्तङ.
अवेन पोरोन ताना पिसगति आदर आसि मत्ता.
तेर बति, अव रंड कोतङ गिर हुंडितगा वाड्ता.
अदेन साटि, बगवंतना नदुडे, इद वेय्लो वाड्तना विलुवा, मेय्तुर सम्दिर वाट्तनल तेर अदिक आंता.
इद सतेम आंद” इन्जेर वेह्तोर.