सत्तर इविर सिस्यलिरकुन येसु रोह्वल
10
1 अद आता पेजे पर्बु, उंडे दुस्रुर सत्तर इविर (72) सिस्यलिरकुन नेमि कीतोर.
अनि तना सोंवल हर नाटे, तनकुन तेर मुने इविर-इविरकुन सारि कीतोर.
2 सारि कियन मुने वूरकुन इहिन वेह्तोर: “बेय वेले पंटा कोय्लेन वाता.
* बति कोय्वलिर बूय्तलिर कमि मंतेर.
अदेन साटि पंटा कोयुस्वल माल्कन, ‘पंटा कोय्ले बूय्तलिरकुन रोहा’ इन्जि कोरट.
3 इचुला केन्जट!
लांडिगलिकुन नड्डुम गोरेन सारि कीतपिनय, नना मीकुन सारि कीसेर मंतोन.
मिरट सोंट.
4 मी सङा कोतना चन्चिय आयि, तेय्लय आयि, चेपुल्के आयि वोय्मट.
सरिय सोनेके बेटे मातुरकुन वड्कुसिय्मट.
बारितेके वकत मीकुन येव्वो.
5 “उंदि नाटे बोरे मीकुन केयनुर्ते, वोना रोन नेङन मुने, ‘इद रोतुरकुन सांति वायि’ इन्जेर इंदना.
6 अद रोतगा बोरे सांति कोर्वल मत्तेके, अद सांति रोतगा निलंता.
बोरे सेल्वेके, मी सांति मीकुने मल्सि वांता.
7 काम किय्वलिरकुन बूति तप्वक पुटा लागर.
मिरट गिर सेवा कीनेके, मोदोल सोत्ता अदे रोन मन्जेर, वूर सीता तिंट-उंट.
दुस्रोक रोह्क्नगा सोन्जि मन्मट.
8 “मिरट बद नाटे दाकिट अद नाट्नुर मीकुन करुम कीनिर्ते, वूर बतल दोसनिर अदेन तिंट.
9 अद नाटे बेमरिते मंवलिरकुन चोकोट कीसि, ‘बगवंतल मीवङ दिल्क्नगा राज ताकुस्वल वकत करुम वासि मंता’ इन्जेर वूरकुन वेहट.
10-11 उंदि मोका बदे नाट्नुर मीकुन करुम किय्वेके दानिर्ते, अद नाट्नङ गलिनगा सोन्जि, ‘मा गोस्टि मिरट वोप्मकि.
अदेना निसनि आसि मंले, मा कालकुन तुंड्ता मी नाट्ना दुबतुन जडि कीसेर मंतोम.
बति बगवंतल मीवङ दिल्क्नगा राज ताकुस्वल वकत करुम वासि, मंता इन्जि करि कीम्ट’ इन्जेर वेहट.
12 तस्वा किय्वल दिवोसुन नेटि अद नाटुन वाय्वल सिक्सा, सोदोमा नगुडुन वाय्वल सिक्सतुन तेर+ वेरिनल मंदंता इन्जेर मीकुन वेह्चेर मंतोन.
बरोसा कियुर वूरकुन दम्कि सिय्वल
13 “रेय!
कोरजीन अनि बेत्सयिदा चहर्क्नुर्निट!
मीकुन सिक्सा तपो.
मी नड्डुम कीतङ मय्मतङ काम्क, तूरु अनि सीदोन चहर्क्ने किय्मड इत्तेके, वूर बस्केयो तम्वङ पाप्कनल चुक चुके मासि, बुय्लि पोतेङ गूंडि कींदिर अनि उच्चि, तलत पोरो नीर वाट्ंदिर.*
14 बति तस्वा कियन नेटि, मीकुन वाय्वल सिक्सतुन तेर तूरु अनि सीदोंतुरकुन वाय्वल सिक्सा सोसि कीनल मंदंता.
15 रेय!
कपेर्नहोम चहर्तुर्निट!
मीकुन स्वर्ग्नगा मान पुटंता इन्जेर सोन्च किय्मट.
बूड साना लोकम्नगा अरंतिट.
16 “ना सिस्यलिर्निट!
मी गोस्टि केन्ज्वलिर नावा गोस्टि केन्ज्तपे.
मीकुन वोप्वेके नाकुन वोप्मकि इत्तपे.
अनि नाकुन रोह्तोर वोर बाबोन गिर, वोप्मकि इत्तपे” इन्जेर वेह्तोर.
17 अद आता पेजे, वूर सत्तर इविर (72) जन्क सिस्यलिर, नार-नाटे सोन्जि, तमकुन वेह्ता काम मह्चि, कुसिते मल्सि वातेर.
अनि, “पर्बु!
नी पोरोल वेह्तेके, बूत्क गिर मा गोस्टि केन्चेर मंतङ” इन्जेर वेह्तेर.
18 ते येसु, “हाबडगा मिड्च्तपिनय बेय सप्ने सय्तन बूड अर्वल नना सूड्तोन.
19 इचुला केन्जट!
तरस्क, मिचोन काल्क्ने दिव्सनल अनि पगा-दारल सय्तंदा सक्तित पोरो मीकुन सम्दो अदिकार सीतोन.
बदे मीकुन नोमुर कियो.
20 बति बूत्क मी गोस्टि केन्जंतङ इन्जेर कुसि आय्वडुन तेर, मीवङ पोरोल्क स्वर्ग्नगा लिहि कीसि मंतङ इन्जेर आनंद येतट” इन्जेर वूरकुन वेह्तोर.
येसु बाबोन पार्तना किय्वल
21 अनि पवित्रा आत्मतगा आनंद येच्चेर येसु, “बाबा!
दर्तुरित अनि हाबडुन माल्कनि आंदि.
नीकुन सम्दोत पोरो अदिकार मंता.
निमे गियन अनि तेलिवि वालिरकुन इव गोस्टिङ बह्रि अरुस्वक्ने इर्सि, चुडुर-कांडिर दात मंवलिरकुन वेह्चि तोह्ति.
ये बाबा!
अहन किय्वले नीवा इचा आंद.
अदेन साटिने, नीकुन पार्तना-विंति कीसेर मंतोन.
22 ना बाबो सम्दोतुन ना केय्दे सीतोर.
बाबोन तपुसि मरि आय्वल ना बारेते, बर्पुर बोने टावा सेले.
अह्ने मरिना आय्वल नाकुन तपुसि, बाबो बोर इंवल बोने टावा सेले.
अनि मरि आय्वल नना बाबोन बारेते, बोंते वेह्चि-तोह्ले पसंद कींतोनो, वूरकुन गिर बाबो टावये” इन्जेर वेह्तोर.
23 अहन वेह्चि, येसु सिस्यलिर बाजुन तिरिसि, “मिरट सूड्सेर मंतिट इव गट्नन सूड्वलिरकुन बगवंतल करलेन आसिर्वाद सीतोर.
24 नना मीकुन बतल वेहंतोन इत्तेके, मिरट सूड्वलिकुन सूडना इन्जेर अनि केन्ज्वलिकुन केन्जना इन्जेर वेलेटिर तोत्तुर पर्वक्तलिर अनि राजलिर आसा कीतेर.
बति वूर इव सम्दोन सूड्मकि अनि केन्ज्मकि” इन्जेर तंवा सङा सिरिप सिस्यलिर मनेके, वूरकुन वेह्तोर.
बस्केट जीवते मंदना इत्तेके बतल कियना?
25 उंदि दिया येसु बोदा कीसेर मनेके, वोरोर दर्मा गुरु वासि, “गुरुजि!
बगवंतन सङा बस्केट जीवते मंदना इत्तेके नना बतल कियना?”
इन्जेर येसुन तप्नगा साप्डि किय्ले पूसि कीतोर.
26 ते येसु, “मोसेना कानुंतगा बतल लिहि कीसि मंता?
निमे वाचि कीता पेजे, नीकुन बतल अर्तम आता?”
इन्जेर उल्टा वोन पूसि कीतोर.
27 ते वोर, “‘नी पर्बु आय्वल बगवंतन नीवा बर्पुर दिल्ते, बर्पुर मंदे, बर्पुर सक्तिते, बर्पुर बुदि-गियंते पेर्मा कियना’+ अनि ‘नीवा निमे पेर्मते सूड्तपे, नी आजु-बाजुतुरकुन पेर्मते सूडना’+ इन्जि दर्मा-ग्रंत्नगा लिहि कीसि मंता” इन्जेर वेह्तोर.
28 ते येसु, “निमे बरोबर वेह्ति.
अव आगेन पिय्सि ताका.
अस्के निमे बस्केट जीवते मंदंति” इन्जेर वेह्तोर.
29 ते वोर दर्मा गुरु, तना नायम्ने ताक्सेर मंतोन इन्जेर तोह्ले, “ना आजु-बाजुतुर इत्तेके बूर?”
इन्जि येसुन पूसि कीतोर.
मीकुन मेचुर वूरकुन गिर पेर्मते सूडना
30 ते येसु वोन जवब सिय्ले इहिन उंदि नमुना वेह्तोर: “वोरोर यूदुल्क्ना जातितोर येरुसलेमनल रेय्सि, येरिको चहर्तेके सोन्जेर मत्तोर.
अस्के कलिर वोन पोरो मुच्लि अर्सि, वोनङ पाङुक ऊंतेर अनि सबुड जह्चि, डुक डुक आनेके, सुटि कीसि सोत्तेर.
31 अहन जर्ग्ता पेजे वोरोर कटोडल अद सरिय वातोर.
वोन सूड्सि, कटोडल हंदा बाजुन आसि वीड्तोर.
32 अह्ने लेविना कांदांतोर वोरोर वातोर.
वोर गिर अर्सि मंवल माय्नन सूड्सि, हंदा बाजुन आसि वीड्तोर.
33 बति यूदुल्क मेचुर वूर समरया येरियतोर वोरोर मायनल यात्रा कीसेर अगा वातोर.
अस्के अगा अर्सि मंवल यूदुल्क्ना जातितोर माय्नन सूड्सि, वोन बेय किवुल लाग्ता.
34 ते वोर माय्ननगा सोन्जि, लाग्तङ दन्कनगा ‘निय अनि आङुर रसा’* सोक्सि, कट दोह्तोर.
अस्के वोन तह्चि तंवा जंवरतुन पोरो मींडुसि, सम्दिरा मान-पान किय्वल किरेय्ता रोतगा वोतोर.
इद तीर्दे वोना चोकोट-वायुट सूड्तोर.
35 इमुन नेटि अद रोतोर माल्कन रंड कूरतङ बिलङ* सीतोर.
अनि ‘वेना चोकोट-वायुट सूडा.
उंडे गिर वोन साटि अदिक कर्चा लागर्ते, नना मल्सि वानेके नीकुन सींतोन’ इन्जेर वेह्चि, अगटल सोत्तोर.
36 कलिरा केय्दे दन्कङ तिन्जि, अर्सि मंवन वूर मुव्विर लोकुर्गटल आजु-बाजुतोन मोडि बोर मंतोर?”
इन्जेर येसु पूसि कीतोर.
37 ते वोर, “बोंते वोर माय्नन पोरो किवुल लाग्तयो वोरे” इन्जेर इत्तोर.
ते येसु, “निम गिर सोन्जि, अह्ने कीम” इन्जेर वेह्तोर.
समरया जातितोर चोकोटनोर माय्नाना नमुना (10:23-37)
पर्बुना वचन केन्ज्वल सम्दिन चोकोट्ना काम
38 अनि अहन यात्रा कीसेर सोनेके, उंदि नाटे येव्तेर.
अद नाटे मार्ता इंवल वेय्लो मत्ता.
अद वेय्लो येसुन मांदे, तंवा रोन केय्ता.
39 अद वेय्लोन मरिया इंवल सेलड गिर मत्ता.
अद मरियल पर्बुनङ कालकुन करुम उच्चि, वोर वेह्वल बोदा केन्चेर मत्ता.
पर्बुनङ काल्क्नगा उच्चि वचन केन्ज्वल मरियल
40 बति मार्तल सर्बरेय्तङ काम्क्ने कटिन आता काड्कि, सिरा-वरा आसेर, “पर्बु!
नाकुन वोरोने कटिन आसेर मंता.
ना सेलड सम्दो काम्ना वजन ना पोरो वाड्ततुन हिंदल नीकुन दया लाग्सेर सेले कि?
नाकुन मदत कीम इन्जि तान वेहा” इन्जेर येसुन इत्ता.
41 ते पर्बु, “मार्ता बायि!
आयनच्चोर काम्ना वजन तोच्चि, वटि आगयेन रंदि कीसेर, परेसन आसेर मंति.
42 बति बद्ते जुरत मंतयो, मरियल अद चोकोट्नतुन आच्चि कीसेर मंता.
मरियनगटल अदेन तेंडवायो” इन्जेर वेह्तोर.