योहन तंवुर सिस्यलिरकुन येसुनगा सारि किय्वल
11
1 येसु तंवुर बारा जन्क सिस्यलिरकुन अहन आगे सिय्वल आता पेजे, अद येरियतङ सम्दो चहर्क्ने बोदा वेह्ले अनि पचर किय्ले अगटल पेसितोर.
2-3 टानेतगा कोंडे मासि मंवल बाप्तिस्मा सिय्वल योहन अव किरिस्तु किय्वलिक कामकुन बारेते केन्ज्तोर.
अनि तंवुर सिस्यलिर सङा, “‘वाय्ले मंवल बचि किय्वनि* निमेय आंदि कि?
सेलेके ममोट उंडे वोरोन साटि सूड्सेर मंदा लागर?’
इन्जेर वोन पूसि कीम्ट” इन्जि येसुनगा रोह्तोर.
4-5 ते येसु वूर सङा, “गुड्डिर सूड्सेर मंतेर.
लेङ्डलिर ताक्सेर मंतेर.
पेर्सा नोपिनुर चोकोट आसेर मंतेर.
चेव्डिर केन्जा पर्सेर मंतेर.
सातुर नेंड्सेर मंतेर.
गरिब्क चोकोट्ना कबुर केन्चेर मंतेर.
इहिन कड्क्ने सूड्तन अनि केव्क्ने केन्ज्तन मिरट मल्सि सोन्जि, योहंतुन वेहट.
6 अह्ने ना बारेते अनमिना आयोर वोर आसिर्वाद येतंतोर इन्जि, वोन वेहट” इन्जेर वूरकुन जवब सीतोर.
7 योहन सारि कीतुर वूर मल्सि सोत्ता पेजे, येसु अगा मंवल मांदितुन सङा योहंतुन बारेते, “बोडि गुटनेके मिरट बातोन सूडन साटि सोत्तिट?
वडिदे हिके-हके मेलिवल जाडिता गुंतुन दात्नोन सूड्लेते सोन्मकि कि?
8 आतोन सूड्ले आय्वेके उंडे बातोन सूड्कोम इन्जेर सोत्तिट?
सोबतङ पाङुक पोंड्तोन सूड्ले सोत्तिट कि बतल?
सेले, सुक-बोग्ने पिसेर सोबतङ कप्डिङ केर्वलिर राजलिर मंवलिक महल्क्नगा मंदंतेर!
9 ते बततुन साटि सोत्तिट?
मिरट पर्वक्तन सूडन साटिने सोत्तिट इन्जेर नना इंतोन.
वोर पर्वक्तन तेर डगुर आंदुर.
10 वेर योहंतुन बारेते ग्रंत्नगा, ‘इचुला!
नावोर कब्रियन नीकुन तेर मुने रोहंतोन.
वोर नी साटि सरि तयर कींतोर’+ इन्जेर लिहि कीसि मंता.
11 “दुनियतुर सम्दिर्गटल* बाप्तिस्मा सिय्वल योहंतुन तेर डगुर बोरे सेलोर.
बति स्वर्ग्ना राजुन रोपो चुडुर आसि मंवल,* योहंतुन तेर डगुर आंतोर.
इद सतेम आंद.
12 बाप्तिस्मा सिय्वल योहन पचर किय्वल सुरु कीतोर.
अगटल नेंड वेरि बाव-बक्ति वालिर जुल्मते स्वर्ग्ना राज्नगा नेङ्ले, कोसिद कीसेर मंतेर.
13 मोसेना कानुंतगा अनि तोत्तुर पर्वक्तलिर सम्दिर गिर इद गट्कतुन बारेते योहन वानल वेरि वेह्तेर.
14 नना वेह्वडुन बरोसा कीकोम इंद्किट्ते, बविसत्ने वाय्ले मंवल येलिया पर्वक्तल वेर योहने आंदुर.
15 इदेन अर्तम कियना इंद्किट्ते, चोकोट केन्चि तेन बारेते सोन्च कीम्ट!
16-17 इद पिडितुरकुन बातुर सङा निपुसि बेद-बाव तोह्का?
वूर बोन दात मंतेर?
इत्तेके बाजर्ते उच्चि,
‘ममोट मी साटि सुलुडि उह्क्तोम.
बति मिरट येंद्मकि.
ममोट सातोन साटि पाटा वार्तोम.
बति मिरट आड्मकि’
इन्जेर वड्क्वलिर चुडुक कांडिर दात मंतेर.
18 बारितेके योहन वासि, तिंवक अनि उंवक मत्ता काड्कि, ‘वोन बूत सोप्रे माता’ इन्जेर मिरट इंतिट.
19 अनि स्वर्ग्नोर माय्नल तिन्जेर अनि उन्जेर वाता काड्कि, ‘इचुला वेर पुदेलल, कल-पिदेडल, टेक्सा वसुलि किय्वलिरोर अनि पापिरोर सोप्तल’ इन्जेर मिरट इंतिट.
बति बगवंतना बुदि-गियंतुन पिय्सि ताक्वलिर, अद बुदि-गियन सतेम आंद इन्जि, निरुपन कींतेर” इन्जेर येसु वेह्तोर.
बगवंतल तस्वा किय्वल दिनमुन नेटि वाय्वल सिक्सा
20 येसु बचोङ मय्मतङ काम्क कीतेके गिर बति, चहरतगा मंवलिर कहितुर तम्वङ पापकुन बारेते चुक चुके माय्मकि अनि तम्वा मंदुन मार्युस्मकि.
ते वूरकुन इहिन दम्कि सीतोर:
21 “रेय!
कोरजीन अनि बेत्सयिदा चहर्क्नुर्निट!
मीकुन सिक्सा तपो.
मी नड्डुम कीतङ मय्मतङ काम्क, तूरु अनि सीदोन चहर्क्ने किय्मड इत्तेके, वूर बस्केयो तम्वङ पाप्कनल चुक चुके मासि, वूर तम्वा मेंदोडगा बुय्लि पोतेङ गूंडि कींदिर अनि तलत पोरो नीर वाट्ंदिर.*
22 नना वेह्वल बतल इत्तेके, तस्वा कियन नेटि, मीकुन वाय्वल सिक्सतुन तेर तूरु अनि सीदोंतुरकुन वाय्वल सिक्सा सोसि कीनल मंदंता.
23 रेय!
कपेर्नहोम चहर्तुर्निट!
मीकुन स्वर्ग्नगा मान पुटंता इन्जेर सोन्च किय्मट.
बूड साना लोकम्नगा अरंतिट.
मिह्गा किय्वलिक मय्मतङ काम्क सोदोमा इंवल नगुडे किय्मड इत्तेके, अद नेंड वेरि गिर निल्सि मंदु.
24 तस्वा कियन नेटि मीकुन वाय्वल सिक्सतुन तेर, सोदोमा नगुडुन वाता सिक्सा+ सोसि कीनल मंदंता इन्जि, मीकुन वेह्चेर मंतोन” इन्जेर इत्तोर.
अवितुर वूरकुन आरम सिय्वल
25-26 अद गट्कते येसु, “बाबा!
निमे दर्तुरित अनि हाबडुन माल्कनि आंदि.
नीकुन सम्दोत पोरो अदिकार मंता.
निमे तेलिवि अनि गियन वालिरकुन इव गोस्टिङ बह्रि अरुस्वक्ने, चुडुर-कांडिर दात मंवलिरकुन इवेन वेह्चि तोह्ति.
ये बाबा!
अहन किय्वले नीवा इचा आंद.
अदेन साटिने नीकुन पार्तना-विंति कीसेर मंतोन.
27 ना बाबो सम्दोतुन ना केय्दे सीतोर.
बाबोन तपुसि मरि आय्वल ना बारेते बर्पुर बोने टावा सेले.
अह्ने मरिना आय्वल नाकुन तपुसि, बाबो बोर इंवल बोने टावा सेले.
अनि मरि आय्वल नना बाबोन बारेते बोंते वेह्चि-तोह्ले पसंद कींतोनो, वूरकुन गिर बाबो टावये” इन्जेर वेह्तोर.
28 अस्के येसु, “वेले तक्लिब्ने वजन तोच्चि ताक्वलिर दुनियतुर लोकुर्निट!
मिरट सम्दिर नह्गा वरट.
नना मीकुन आरम सींतोन.
29-30 नावा जुवा मिरट कान्चि, नह्गटल करियट.
नना सांति वालेना अनि चुडुर-पांदे मंवना आंदुन.
बारितेके नावा जुवा हल्को मंदंता.
अनि ताना वजन गिर वेले कमि मंदंता.
इदेन हिंदल मीकुन आरम पुटंता” इन्जेर वेह्तोर.