अपोस्तुलकुन येसु सारि किय्वल
10
1 अनि येसु तंवुर बारा (12) जन्क सिस्यलिरकुन केय्सि, बे-सुदुड वालेक बूतकुन तेंड्सि पूड्ले, हरियेक बेमरिने अनि येड्कि-दुक्ने मंवलिरकुन चोकोट किय्ले अदिकार सीतोर.
2 वूर बारा जन्क सिस्यलिर आय्वलिर अपोस्तुल्क्नङ पोरोल्क:
सीमोन, वेन पेतुरु इन्जेर केय्ंदिर.
अनि वेनोर तमुर आंद्रेयल.
याकोब अनि वेनोर तमुर योहन, वीर इविर्ते जेबेदयिनुर मर्क आंदिर.
3 पिलिपु,
बर्तलोमयि,
तोमल,
टेक्सा वसुलि किय्वल मत्तयि,
आल्पयिनोर मरि याकोबु,
तदयि इन्जेर केय्वल लेबयि.
4 कननियतोर सीमोन,
अनि येसुन दोका सिय्वल इस्करियोत नाट्नोर यूदल.
5 वीर बारा (12) जन्क सिस्यलिरकुन पर्जतगा सोंट इन्जि येसु सारि कीसेर इहिन बोदा वेह्तोर: “दुस्रोक जातिनङ येरियनगन आयि, समरया येरियतङ चहर्क्नगन आयि सोन्मट.
6 अवेन बद्लि, तप्सि सोत्तङ गोरेन मोडि मंवलिर इज्रयेल पर्जतगन सोंट.
7 वूर्गा सोन्जि, स्वर्ग्ना राज करुम वाता इन्जेर बोदा वेहट.
8 अनि येड्कि-दुक्ने मंवलिरकुन चोकोट कीम्ट, सातुरकुन नेंडुसट, पेर्सा नोपिते मंवलिरकुन सुदुड कीम्ट अनि बूतकुन तेंड्सि पूडट.
मीकुन पुकोट पुड्ता अदेन पुकोटे सीम्ट.
9 सोने, कूरतङ कोतङे आयि, सेलेके तमतङ कोतङे आयि, मीवङ कीसनगा इर्सि वोय्मट.
10 मिरट यात्रा कीनेके, तेय्लय आयि, दुस्रोक पाङुक आयि, चेपुल्क आयि, बेड्डेय आयि मी सङा वोय्मट.
बारितेके काम किय्वलिरकुन बूति तप्वक पुटा लागर.
11 “अनि मिरट बदे चहर्देन आयि, बदे नाटेन आयि सोत्तेके, मीकुन करुम कीनल बोर मंतोर इंवल करि कीसि, अगटल सोनल वेरि वोनय रोन मंदना.
12 अद रोत रोपो कोजि वाटन मुने, ‘सांति वायि’ इन्जेर अद रोतुरकुन दंडोस दोसना.
13 अद रोतुर मीकुन करुम कीनल मंदनिर्ते, मिरट वेह्ता सांति वूरकुन पुटंता.
सेलेते अद सांति मिह्गा मल्सि वांता.
14 बति बोरे मीकुन करुम किय्वेकेन आयि, सेलेके मिरट वेह्वलिक केन्ज्वेकेन आयि, वोर आतोना रोतल सेलेके, वूर आतुरा नाटनल पेसिनेके, मीवङ कालकुन तुंड्ता दुबा जडि कीसि* वरट” इन्जेर सिस्यलिरकुन येसु वेह्तोर.
15 “तस्वा किय्वल दिवोसुन नेटि, सोदोमा अनि गोमोरा नगुक्नुरकुन वाता सिक्सा+ वोर्चनल मंदर बति, अद नाटुन वाय्वल सिक्सा, वोर्चा पर्वक मंदंता.
इद सतेम आंद इन्जि, मीकुन वेह्चेर मंतोन” इन्जेर इत्तोर.
सिस्यलिरकुन येसु हिमत वेह्वल
16 “केन्जट!
लांडिगलिकुन नड्डुम गोरेन सारि कीतपिनय मीकुन आतुर माय्नलिर नड्डुम सारि कीसेर मंतोन.
अदेन साटि तरसकुन दात गियंते अनि पारेवत दात कपट सेल्वक मंदना.
17 बति आतुर माय्नलिर बारेते दिहंते मंट.
वूर मीकुन अदिकारिरङ कचुरिनगा हव्लि कींतेर अनि तम्वङ सुनगोक्नगा मीकुन चाटल्क्ने पायुसंतेर.
18 मिरट ना सिस्यलिर आता काड्कि, मीकुन राजलिर मुने, अदिकारिर मुने येरिसेर वोसि निपुसंतेर.
अस्के मोका पुड्ता इन्जि, राजलिरकुन अनि दुस्रोक जातिनुरकुन ना बारेता चोकोट्ना कबुर वेहना.
19 अचोरे बति वूर मुने बतल वड्कना अनि बहन वड्कना इन्जेर परेसन आय्मट.
अद गट्कते बतल वड्कना इंवल मीकुन अंदंता.
20 बारितेके, अद गट्कते वड्क्वलिर मिरट आय्विट बति, मी बाबो बगवंतले तंवा आत्मते मी सङा वड्कुसंतोर.
21 माय्नलिर तम्वुर तादल-तमुन, अह्ने बाबुर तम्वुर मरकुन मरन आय्ले हव्लि कींतेर.
अनि मरि-मियड तम्वुर अवल-बाबोन उल्टा आसि वूरा जीवा येतुसंतेर.
22 नावुर बक्तलिर आता काड्कि,* मीकुन सम्दिर पसंद कियुर.
बति आक्रि वेरि सोसि किय्वन बगवंतल बचि कींतोर.
23 वूर मीकुन उंदि चहर्ते तक्लिब सीतेके, उंडे उंदि चहर्ते परर आसि सोंट.
इज्रयेल देस्नङ सम्दो चहर्क तिरिसि ना बारेते वेह्वक मनेकेन, स्वर्ग्नोर माय्नल आय्वना नना मल्सि वांतोन.
इद सतेम आंद इन्जि, वेह्चेर मंतोन” इन्जेर इत्तोर.
24 “सिस्यल तंवोर गुरुन तेर डगुर आया परोर.
अह्ने दासि माल्कन तेर डगुर आया परोर.
25 ते सिस्यल तंवोर गुरुन मोडि, अह्ने दासि तंवोर माल्कन मोडि, आतेके गिर मस्त आंता.
रोतोर माल्कल आय्वल नाकुने बूत्क्नोर राजल आय्वल बयल-जेबुल इन्जेर केयंतेर.
ते, अद रोतुर आय्वलिर मीकुंते उंडे वेले करब्नङ पोरोल्क्ने केयंतेर.
बगवंतन वेरिसि ताकट
26 “अदेन साटि मिरट वूरकुन वेरिमट.
मुच्चि इर्तङ अव अनि मकुसि इर्तङ अव सम्दो गिर तात्कर दिसनल उंदि वकत वासेर मंता.
27 नना मी सङा सिकटिते वेह्वलिकुन वेड्चिते सम्दिरकुन वेहट.
मीकुन कुसये वेह्तङ अवेन रोह्क्नङ चतकुन पोरो तेर्ग्सि पचर कीम्ट.
28 अनि परंतुन जका पर्वा सोन्जि, मेंदोडुन जक्वलिरकुन मिरट वेरिमट.
बति परंतुन अनि मेंदोडुन गिर पातडतगा वाट्सि, नासेडम किया पर्वल बगवंतन वेरियट.
29 रंड कोट्का पिटेन उंदि कोतत साटि वोमुरिय?
तप्वक वोमंतेर!
तेर बति अवेनल उंदि गिर मी स्वर्ग्नोर बाबोना आगे सेल्वक दर्तुरित पोरो अरो.
30 अनि मीवा तलतगा मंवलिक सम्दो केल्क गिर कह्चि मंतङ.
31 बेय वेले कोट्का पिटेन तेर बगवंतना नदुडे मिरट अदिक विलुवतुर आंदिट.
अदेन साटि वेरिवक्ने मंट.
दुस्रुर मुने येसुन बारेते वोप्वल
32 “पर्जत मुने ना बारेते वोप्वन, स्वर्ग्नगा मंवल ना बाबोन मुने नना गिर वोन वोपंतोन.
33 बति पर्जत मुने, ना बारेते वोपोर वोन, स्वर्ग्नगा मंवल ना बाबोन मुने नना गिर वोपोन.
येसुनोर बक्तल तक्लिबकुन वोर्चा लागर
34 “नना दर्तुरित पोरो सांति सियन साटि वातोन इन्जेर सोन्च किय्मट.
सांतितुन बद्लि तल्वर इंवल तक्लिबुने पिय्सि वातोन.
35-36 इत्तेके, मरि बाबोन उल्टा, मियड अवन उल्टा अनि कोर्यड पोरडुन उल्टा आनल कींतोन.
+ वोरोर माय्नन वोना रोतुरे वेले पगा-दार्क आंतेर.
37 तंवुर अवल-बाबोने आयि, तंवुर मरि-मियडुने आयि, नाकुन तेर अदिक पेर्मा कीनुर्ते, वोर ना पेजेय वाय्ले काम सियोर.
38 तंवा तना दुक्सङ-तक्लिब्क इंवल मोदुन कान्चि, ना सङा वायोर वोर नाकुन कामि सियोर.
39 तंवा जीवतुन बचि कीका इंवल, तान सुटि किया लागर.
बति ना साटि तंवा जीवतुन सुटि किय्वल, तान दकुसा परंतोर.
नियत्नोन पुट्वल पंडि
40 “मीकुन करुम किय्वल, नाकुन गिर करुम कींतोर.
नाकुन करुम किय्वल, नाकुन रोह्तोर वोर बाबोन गिर करुम कींतोर.
41 वोरोर मायनल पर्वक्तन मानि कीसि करुम कीनुर्ते, वोर पर्वक्तन पुट्वल पंडिय वेन गिर पुटंता.
अनि बोरे आयि नियत्नोन मानि कीसि करुम कीनुर्ते, वोर नियत्नोन पुट्वल पंडिये, वेन गिर पुटंता.
42 अनि बोरे आयि, ना सिस्यलिर इन्जेर मीकुन चंबुमेन किनन येर सीनुर तेर, वोन तप्वक ताना पंडि पुटंता.
इद सतेम आंद” इन्जेर वूरकुन वेह्तोर.