आक्रितङ दिवोस्क्ने जर्ग्वलिक गट्नङ
13
1 येसु मंदिर्तल बह्रि वानेके, वूर सिस्यलिर्गटल वोरोर इहिन इत्तोर.
“गुरुजि, अचुला!
पेरजति बंडने बातङ रोह्क दोह्तेरो सूडा!”
इन्जेर इत्तोर.
पेरजति बंडने सोबते दोह्ता मंदिर अनि मन्जिल्क
2 ते येसु, “निमे पेरजति बंडने दोह्तङ रोह्कुने सूड्सेर मंति बतलो, बति इव बंडङ उंदित पोरो उंदि निल्सि मंवक्ने सम्दि गिर उल्टे मानुङ” इन्जेर जवब सीतोर.
3 अगटल पेसिसि, येसु तंवुर सिस्यलिर पेतुरु, याकोबु, योहन अनि आंद्रेयन सङा मीरे मासि, अद मंदिरतुन मुने मंवल ओलिवा मरना गुटत पोरो सोन्जि उत्तोर.
4 ते येसु वोरोरे मनेके सिस्यलिर, “इव सम्दो बस्के जर्गंतङ माकुन वेहा?
अनि इव सम्दो जर्गन मुने माकुन बातल निसनि दिसर?”
इन्जेर पूसि कीतेर.
5 ते येसु, “मीकुन बोरे पसि किय्वक्ने सूडट.
6 बारितेके, ना पोरोडे वेलेटिर लोकुर मिह्गा वासि, ‘ननय किरिस्तुना* आंदुन’ इन्जेर वेलेटिरकुन पसि कींतेर.
7 लडेयकुन बारेते, मीकुन केन्जा वायर्ते, दड्कि तिन्मट.
इव तप्वक जर्गय लागर.
बति अस्केने सम्दोता मूरे माय्वल आक्रिता गट्का वायो.
8 उंदि देस्नुर उंडे उंदि देस्नुर सङा लडेय कींतेर.
उंदि राज्नुर उंडे उंदि राज्नुर सङा लडेय्क कींतेर.
वेले जागनगा बूकंप्क अनि करुङ गिर वांतङ.
अव सम्दो बालेंता आयन मुने वाय्वलिक नोपिन मोडि मंदंतङ इन्जेर करि कियना.
9 बति इव सम्दि जर्ग्नेके मिरट दिहंते मंट!
कहितुर माय्नलिर मीकुन पेदोलकुन मुने अनि अदिकारिर मुने केयुस्तेके अगा निला लागर.
अनि मीकुन सुनगोक्नगा वोसि चाटल्क्ने पायुसींतेर.
ना हिंदल राजलिर मुने, डगुकुन मुने ना बारेते गवा वेह्वल गट्का वांता.
10 इदेन मोदोले मिरट सम्दि देस्क्नगा सोन्जि, जाति पातिता तेडा सूड्वक सम्दिरकुन बगवंतना चोकोट्ना कबुडुन पचर किया लागर.
11 अद वकत्ने मीकुन पिय्सि, अदिकारिर्गा वोसि पूसि कींतेर.
बति मिरट, ‘इद सिक्सतल बहन वड्क्सि तपुसिकोम’ इन्जेर परेसन आय्मट.
बारितेके अद वकत्ने मीवा दिल्ते वासि बतल वड्कना अनि बहन वड्कना इंवल, बगवंतले तंवा पवित्रा आत्मता सक्तिते गोस्टिङ दया कींतोर.
12 उंडे बहन जर्गंतङ इत्तेके, माय्नलिर तम्वुर तादल-तमुन, अह्ने बाबुर तम्वुर मरकुन मरन आय्ले, हव्लि कींतेर.
अनि मरि-मियड तम्वुर अवल-बाबोन उल्टा आसि वूरा जीवा येतुसंतेर.
13 नावुर बक्तलिर आता काड्कि,* मीकुन सम्दिर पसंद कियुर.
बति आक्रि वेरि बोर्ते वोर्चि निलंतोरो, वोर बचे मांतोर.
14 “अदेन साटि दानियेल पर्वक्तल वेह्ता अद बे-सुदुड किय्वल बेय करेबल वस्तु पवित्रा जागतगा निल्सि मंवल+ मीकुन दिस्तेके, इदेन वाचि किय्वल गिर करि कियना.
अद वकत्ने यूदया येरियतगा मंवलिर गुटनेके परर आयना.
15 रोता मिदेतगा मंवल तंवा सामन तर्ले इन्जेर गिर बूड रेय्वा.
16 वाव्टे मंवल तंवङ कप्डिङ तर्का इन्जेर रोन सोंवा.
17 अय्यो!
अव दिवोस्क्ने, पीटे मंवलिक वेय्लोकुन अनि बालेंता वेय्लोकुन वेले कस्टम आंता.
18 ईतङ कस्टा-कालम्नङ दिवोस्क, पीनि गालुम्ने वाय्वा इन्जेर बगवंतन पार्तना कीम्ट.
19 ईतङ कस्टा-कालम्नङ दिवोस्क, बगवंतल कलितुन गडि कीतोर अगटल्ते नेंड वेरि बस्केन वाय्मकि.
अनि उंडे मुने बस्केन ईतल गति वायो.
20 बति बगवंतल तना नेमि कीतुर वूर माय्नलिर साटि, इव कस्टा-कालम्नङ दिवोसकुन वेले कमि कीतोर.
अहन कमि किय्वक इत्तेके, दर्तुरित पोरो बोरे पिसि मन्जि मनुर.
21 “अव दिवोसकुन रोपो बोरे आयि, ‘इचुला!
किरिस्तु इगे मंतोर’ सेलेते ‘अचुला!
अगा मंतोर’ इन्जेर बोरे वेह्तेके गिर बरोसा किय्वा.
22 बारितेके, ना पोरोडे लबड किरिस्तुर, लबड पर्वक्तलिर तम्वा केय्दे आता अचोर बगवंतल नेमि कीतुरकुन पसि किय्ले, चमत्कार्क अनि मय्मतङ काम्क गिर कींतेर.
23 अदेन साटि, दिहंते ताकनिर इन्जेर, मीकुन मुनेने इवेन बारेते वेह्चेर मंतोन.
24 बति इव कस्टा-कालम्नङ दिवोस्क वीड्ता पेजे,
पोड्द सिकटि आसि दांता अनि नेलेन्ज तंवा वेड्चि सिय्वक आंता.
25 हाबडङ सुकुक सम्दो बूड अर्सि दानुङ,
इहिन हाबडङ सम्दो सक्तिङ हाले मासि दांतङ.
26 “अद वकत्ने स्वर्ग्नोर माय्नल सक्तिते अनि मय्मता वेड्चिते हाबडङ टेपन पोरो वाय्वल माय्नलिर सूडनिर.
27 वोर तंवुर दूतलिर सङा, ‘दर्तुरितङ नालुङ कोन्क्नगा, हाबडा काट वेरि पग्रे मासि मंवलिर बगवंतल नेमि कीतुरकुन मीरि कीसि तरट’ इन्जेर सारि कींतोर.
येसुना मल्सि वाय्वडुन बारेते
28 “इंके मिरट मरकनल उंदि गोस्टि करियना इन्जेर अवेन बारेते मीकुन वेहंतोन.
बतल इत्तेके, अवेनङ कांदङ कोड्स्वल सूड्सि, पिर गालुम करुम वाता इन्जेर मिरट करि कींतिट.*
29 अदे तीर्दे, इव गट्नङ जर्ग्वल सूड्सि, वोर वेले करुम मंतोर, कावडुन करुमे मंतोर इंवल करि कीम्ट.
30-31 इव सम्दो जर्गनल वेरि, इद इंके मंवल नरिमन्कना जनोबा मूरे मासि सोनो.
इद हाबर अनि दर्तुरि सम्दि मूरे मासि दानुङ बति, नावङ वचन्क बस्केट गिर निल्सि मंदनुङ.
इद सतेम आंद.
मल्सि वाय्वल वकत बोने टावा सेले
32 “अद दिवोस, अद गट्कतुन बारेते सिरिप बाबो बगवंतने टावा.
अचोरे बति, स्वर्ग्नुर दूतलिर्कुने आयि, बगवंतनोर मरिने आयि बोने गिर टावा सेले.
33 अद दिवोस, अद वकत बस्के वांतयो बोने टावा सेले.
अदेन साटि, मिरट दिहंते चेतो मन्जि पार्तना कीम्ट.
34 वोरोर मायनल, तंवुर सेव्कलिरकुन, बोना वोन काम हव्लि कीसि, रोता डेरोटतगा केप्सेर मंवल सेव्कन सङा, ‘नना मल्सि वानल वेरि दिहंते केप्सेर मन’ इन्जेर हुकुम सीतपिनय स्वर्ग्नोर माय्नना आय्वल नावा मल्सि वाय्वल मंदंता.
35 अहन रोतोर माल्कल पोड्द सोनेके वांतोरो, नड्डुम नर्का वांतोरो, गोग्डिङ कूस्नेके वांतोरो, पोड्द पेसिनेके वांतोरो, बस्के वांतोरो बोने टावा सेले.
अदेन साटि मिरट दिहंते मंट.
36 वोर माल्कल वेह्वक्ने अचनक वातेके, मिरट चेतो मनल सूडट.
37 इद गोस्टि मीकुन वेह्तोन अनि हरियेक माय्नन गिर वेह्चेर मंतोन.
इद गट्कतुन साटि तयर मंट” इन्जेर येसु वेह्तोर.