हुंडितगा रांडे वेय्लो वाड्तङ कोतङ
21
1 अहन वेह्ता पेजे येसु, हुंडितगा दनेवंतलिर तम्वङ कोतङ वाट्वडुन नेह्ना सूड्तोर.
2 उंदि गरिब रांडे वेय्लो गिर रंड तमतङ कोतङ वाट्वल सूड्तोर.
3-4 अस्के येसु, “इंके वेरि वूर दनेवंतलिर तम्वा वेले दन-दव्लतनल इचुसि बागम तचि वाड्तेर.
रांडे वेय्लो कोतङ वाट्वल
अवेन पोरोन ताना पिसगति आदर आसि मत्ता.
तेर बति, अव रंड कोतङ गिर वाड्ता.
अदेन साटि बगवंतना नदुडे, इद वेय्लो वाड्तना विलुवा, मेय्तुर सम्दिर वाट्तनल तेर अदिक आंता.
इद सतेम आंद” इन्जेर वेह्तोर.
हुनडितगा रानडे वेय्लो वाड्तंग कोतंग (21:1-4)
बविसत्ने जर्ग्वलिक निसनिन बारेते येसु वेह्वल
5 अद आता पेजे, वोनुर सिस्यलिर्गटल कहितुर, पेरजति बंडने अनि पर्जा अर्पना कीतङ चीज्क्ने दोह्ता मंदिर्तुन बारेते, वड्क्सेर मत्तेर.
6 अस्के येसु, “मिरट सूड्वलिक इव सम्दो वस्तुङ अनि बंडङ उंदित पोरो उंदि निल्सि मंवक्ने, नासेडम आय्वल दिवोस वांता” इन्जेर वेह्तोर.
7 ते वूर सिस्यलिर, “इव सम्दो बस्के जर्गंतङ माकुन वेहा?
अनि इव सम्दो जर्गन मुने माकुन बातल निसनि दिसर?”
इन्जेर पूसि कीतेर.
8 ते येसु, “मीकुन बोरे पसि किय्वक्ने सूडट.
बारितेके ना पोरोडे वेलेटिर मिह्गा वासि, ‘ननय किरिस्तुना आंदुन’ अनि ‘आक्रिता गट्का वाता’ इन्जेर पसि किय्ले सूडंतेर.
बति मिरट वूर पेजेय सोन्मट.
9 लडेय्क अनि जग्डङ आय्वडुन बारेते, मीकुन केन्जा वायर्ते, दड्कि तिन्मट.
मोदोल इव तप्वक जर्गा लागर.
बति सम्दोता मूरे माय्वल आक्रिता गट्का अस्केने वायो” इन्जेर वेह्तोर.
10 “उंदि देस्नुर दुस्रो देस्नुर सङा लडेय्क कींतेर.
उंदि राज्नुर दुस्रो राज्नुर सङा लडेय्क कींतेर.
11 वेले जागनगा बूकंप्क अनि करुङ वांतङ.
अह्ने बेमरिङ गिर वांतङ.
हाबडगा बेय वेरिनल मंवलिक निसनिङ अनि चमत्कार्क दिसनुङ.
12 बति इव सम्दि जर्गन मुनेने, कहितुर यूदुल्क मीकुन जुल्मते पिय्सि, दुक्सा सींतेर.
ना पोरो बरोसा इर्ततुन हिंदल, मीकुन सुनगोक्नगा हव्लि कीसि, जेल्क्नगा वाटुसंतेर.
अह्ने राजलिर अनि अदिकारिर मुने गिर निपुसंतेर.
13 अद तरिकते, ना बारेता चोकोट्ना कबुर वूरकुन वेह्ले, मीकुन मोका पुटंता.
14 बति वूर मुने बतल वड्कना अनि बहन वड्कना इंवडुन बारेते, मुनेने सोन्च किय्मट.
15 बारितेके वड्क्ले गोस्टिना गियन मीकुन ननय सींतोन.
अव केन्चि, मीवुर पगा-दार्क मीकुन उल्टा वड्कुर अनि उल्टा निला परुर.
16 मीवुर अवल-बाबो, तादल-तमुर, चुटल-बंद, सोप्तलिर गिर मीकुन पगा-दार्क्ना केय्दे हव्लि कींतेर.
मिह्गटल कहितुरा जीवा गिर वूर येतंतेर.
17 नावुर बक्तलिर आता काड्कि,* वेलेटिर मीकुन मेचुर.
18 बति नह्गा मिरट इर्ता बरोसतल मीकुन बतय गिर अलदि किया परो.*
19 मिरट ना पोरो बरोसा इर्सि, वोर्चि ताककिट्ते, बस्केट मंले, मी जीवतुन बचि कींतिट” इन्जेर येसु वेह्तोर.
येरुसलेम नासेडम आंता इन्जेर वेह्वल
20 अद आता पेजे येसु, “बस्केते येरुसलेम नगुडुन सिर्मुट सिपायिर गेर-पासि मंवल सूडंतिटो, अस्के ताना नासेडम करुम वाता इन्जेर करि कीम्ट.
21 अद वकत्ने यूदया येरियतगा मंवलिर गुटनेके परर आयना.
इद नगुडगा मंवलिर बह्रि सोंदना.
बह्रि मंवलिर सम्दिर इद नगुडुन रोपो नेङ्वा.
22 बारितेके बगवंतल सिक्सा किय्वलिक अव दिवोस्क आंदुङ.
दर्मा-ग्रंत्नगा लिहि कीतङ वचन्क पूरे मानल इव जर्गंतङ.
23 अय्यो!
अव दिवोस्क्ने पीटे मंवलिक वेय्लोकुन अनि बालेंता वेय्लोकुन वेले कस्टम आंता.
बारितेके, देस्नगा बेय तक्लिब वांता.
बगवंतल इद देस्नुर पोरो तंवा सोङुन तोहंतोर.
24 वूर्गटल कहितुरकुन पगा-दार्क लडेय कीसि, तल्वर्क्ने जकंतेर.
अनि वेलेटिरकुन दासि-पान कियुस्ले, दुस्रो देस्क्ने पिय्सि वोंतेर.
बगवंतल यूदुल्क आयुर वूर दुस्रोक जातिनुरकुन सीता वकत वेरि, येरुसलेमुन अनि इज्रयेल देसुन तम्वा अदिकारतुन बूड इरंतेर” इन्जेर वेह्तोर.
स्वर्ग्नोर मायनल मल्सि वाय्वल
25 अनि उंडे गिर येसु, “पोड्द, नेलेन्ज अनि सुकुक्नगा बस्केन जर्ग्मकि आतङ गट्नङ जर्गंतङ.
दर्तुरित पोरो सम्दुर्ता आवज अनि तानङ हेल्वङ बडे माय्वडुन हिंदल सम्दो देस्क्नुर वेरिसि, दुक्सते तकपिका आंतेर.
26 अस्के हाबडङ सम्दो सक्तिङ हाले माय्वडुन हिंदल, दुनियतगा मुने जर्ग्वलिक गट्नना वेरेते लोकुर केलि सेल्वक आंतेर.
27 अद वकत्ने स्वर्ग्नोर माय्नल सक्तिते अनि मय्मता वेड्चिते टेपन पोरो उच्चि वाय्वल सम्दिर सूडंतेर.
28 बस्केते इव गट्नङ सुरु आंतङो, अस्के दर्यम्ने निल्सि मंट.
बारितेके बगवंतल मीकुन बचि किय्वल वकत वासेर मंदंता” इन्जेर वेह्तोर.
अन्जुरि मरतल करिवल गियन
29 अद वेह्ता पेजे, येसु इद नमुना वेह्तोर: “अन्जुरि मरतुन अनि दुस्रोक मरकुन दिहंते सूडट.
30 अद मरतङ कांदङ कोड्स्वल सूड्सि, ‘इङे पिर गालुम वाय्वल मंता’ इन्जेर मिरट करि कींतिट.
31 अदे तीर्दे, इव गट्नङ जर्ग्वल सूड्सि, बगवंतना राज करुम वासेर मंता इन्जेर करि कीम्ट.
32-33 इव सम्दो जर्गनल वेरि, इद इंके मंवल नरिमन्कना जनोबा मूरे मासि सोनो.
इद हाबर अनि दर्तुरि सम्दि मूरे मासि दानुङ बति, नावङ वचन्क बस्केट गिरे निल्सि मंदनुङ.
इद सतेम आंद.
34-35 “दिहंते मंट!
मीवा टेमुन सिरिप करब काम्क कियन साटि, कल-पिदेडलिर आयन साटि अनि बहन पिस्कोमो इन्जेर रंदि कीसेर मंदन साटिने वाडकम कीकिट्ते, मीवा दिल बह्के मांता.
अनि बोमितगा पिस्वलिर मी सम्दिर पोरो डाप्कतुन दात अचनक नना वाय्वल दिवोस मंदंता.
36 मुने जर्ग्वलिक इव सम्दो गंडम्कनल मिरट तपुसीसि, स्वर्ग्नोर माय्नन मुने नितन साटि कामि सीनल, दिहंते मन्जि, पार्तना कीसेर मंट” इन्जेर येसु वूरकुन वेह्तोर.
37 अहन येसु हर रोज मंदिरतगा बोदा वेह्ंदुर.
अनि रात्ने ओलिवा मरक्ना गुटतगा सोन्जि, आरम कीसेर मंदुर.
38 पर्जा सम्दिर वोर वेह्वल बोदा केन्जना इन्जेर बेय सक्रेन मंदिरतगा वांदिर.