पेदोल्क सवल्क पूसि किय्वल
20
1 उंदि दिया मंदिर्ता आव्रतगा येसु पर्जतुन बोदा वेह्चेर, चोकोट्ना कबुर पचर कीसेर मत्तोर.
अस्के वोन्गा डगुक कटोडलिर, सास्तिरिर अनि पेदोल्क वातेर.
2 अनि,
सास्तिरि येसुन सवल्क पूसि किय्वल
इद अदिकार नीकुन बोर सीतोर?
माकुन वेहा” इन्जेर येसुन पूसि कीतेर.
3 ते वोर, “नना मीकुन उंदि सवल पूसि किया सीम्ट.
4 बाप्तिस्मा सिय्वल अदिकार योहंतुन, बगवंतनल वाता कि, सेलेके माय्ननल वाता?
वेहट” इन्जेर पूसि कीतोर.
5 ते वूर, “मरट, ‘बगवंतनल’ इंद्कट्ते, ‘योहंतगा बारि बरोसा इर्मकि?’
इन्जेर पूसि कीनुर.
6 बति मोका, ‘माय्ननल’ इंद्कट्ते, माकुन सम्दिर बंडने पानिर.
बारितेके, योहन पर्वक्तल इन्जेर सम्दिर वोप्तेर” इन्जेर तम्वा तमा कुसा कुसा चर्चा कीतेर.
7 अदेन साटि वूर, “अद माकुन टावा सेले” इन्जेर जवब सीतेर.
8 ते येसु, “नना गिर बद अदिकार्दे इव कीसेर मंतोनो, मीकुन वेहोन” इन्जेर जवब सीतोर.
पेदोल्क सवल्क पूसि कियवल (20:1-8)
वायुट्नुर बटेय-दार्क्ना नमुना
9 अद आता पेजे येसु, पर्जतुन इद नमुना वेह्वल सुरु कीतोर: “वोरोर मायनल आङुर्क्ना वाडि तयर कियुसि, दुस्रुरकुन बटेय्ते सीतोर.
अनि रोन सुटि कीसि, दुस्रो देस्नगा यात्रा कीसेर, वेले जेल मत्तोर.
10 आङुर्क्ना पंटा कोय्वल कालम वाता पेजे, वोर मायनल तंवा ईसा तरा इन्जेर वोरोर सेव्कन बटेय-दार्क्नगा रोह्तोर.
बति वूर, वोर सेव्कन पासि, रिकम केय्क्ने सारि कीतेर.
11 ते वोर उंडे वोरोर सेव्कन रोह्तोर.
बति वूर वोन गिर पातेर.
वोना हिजत तेंड्सि, रिकम केय्क्ने सारि कीतेर.
12 अस्के वोर मायनल उंडे वोरोर सेव्कन रोह्तोर.
बति वूर वोन नेतुर वानल पासि, अद वाडितल बह्रि वाडि सीतेर.
13 ते अद वाडितोर माल्कल तंवा तना, ‘बतल कीका?
नना मिय्तोर लाड्नोर मरिने सारि कीका.
अस्के वूर मोका वोन चोकोट मानि कीनिर’ इन्जि मत्तोर.
14 बति बटेय्ते पिय्तुर वोर तम्गा वाय्वल सूड्सि तम्वा तमा, ‘इचुला, वेर माल्कनोर मरि आंदुर.
वेन जक्सि, वेना जाय्जतुन इस्का पाकट’ इन्जेर सोन्च कीतेर.
15 ते वूर वोन आङुर्क्ना वाडितल बह्रि डग्लि कीसि, वोना जीवा येत्तेर.
अद आता पेजे वोर आङुर्क्ना वाडितोर माल्कल वूर बटेय-दारकुन बतल कींतोर इंतिट?
16 तप्वक वोर माल्कल वासि, वूरकुन जकंतोर अनि अद आङुर्क्ना वाडितुन दुस्रुरकुन बटेय्ते सींतोर” इन्जेर वूरकुन वेह्तोर.
अद केन्चि पर्जा, “अहन बस्केन जर्ग्वा” इन्जेर इत्तेर.
17 ते वूरकुन नीटम सूड्सेर, “‘रोन दोह्वलिर बततुने कामि सियो इन्जेर पास्क्ता बंडा, सम्दिनल मुके बंडा आसि निल्ता’+ इंवल दर्मा-ग्रंत्ना इद वचंता अर्तम बतल इंतिट?
18 अद बंडत पोरो अर्वलिर सम्दिर टुक्डेङ आंतेर.
उंदि मोका अद बंडा बोन पोरोन अर्तेके गिर, वोन दुबत दात नुया नुया कींता” इन्जेर वेह्तोर.
19 अद केन्चि वूर डगुक कटोडलिर, सास्तिरिर तम्वा बारेतेन इद नमुना वेह्तोर इन्जेर करि कीतेर.
अनि अदे गट्कते वोन पिय्ले सूड्तेर बति पर्जतुन वेरितेर.
वायुटनुर बटेय-दार्कना नमुना (20:9-19)
महा राजन टेक्सा दोह्वल गोस्टि
20 अद तीर्दे वोन पोरो वूर नदुर वाट्सि इर्तेर.
वोनङ गोस्टिनगा तप साप्डि कीसि, वोन रोमतोर महा राजन हव्लि कियना इंवल वूरा पिलन मत्ता.
वोर महा राजन सिक्सा वाट्वल अदिकार मत्ता.
ते वूर कटोडलिर अनि सास्तिरिर बेय चोकोट्नुर दात तोह्वलिरकुन मक्डिते येसुनगा सारि कीतेर.
21 ते वूर वोन्गा वासि, “गुरुजि!
निमे वड्क्वल अनि बोदा किय्वल सतेम आंद.
बोनय बेद-बाव सूड्वनि आय्वि.
बगवंतना सते मारग बाता अहन वेह्वनि आंदि इन्जेर माकुन टावये.
22 बति इंके, ममोट सम्दिर सीजर महा राजना रोम सर्कारतुन टेक्सा दोह्वल नायम आंद कि आयो?”
इन्जेर पूसि कीतेर.
23-24 ते तना वड्क्वडगा तप कोंडि किय्ले सूड्सेर मंतेर इंवल येसु करि कीसि, “नाकुन उंदि कूरता बिला तोहट” इन्जि पूसि कीतोर.
वूर अद बिला सीता पेजे, “तेन्गा बोना पोरोल अनि बोना मोकोटता मोर मंता?”
इन्जेर वूरकुन पूसि कीतोर.
ते वूर, “सीजर महा राजना” इन्जेर वेह्तेर.
25 अस्के येसु, “सीजर महा राजनङ महा राजन सीम्ट, अनि बगवंतनङ बगवंतन सीम्ट” इन्जेर वेह्तोर.
26 इहिन वेह्ता काड्कि, वूर अदिकारिर पर्जतुन मुने वोन तप्नगा कोंडि किया पर्मकि.
अदे आय्वा, वोर वेह्ता जवब केन्चि गुल आसि, उंडे बतय पूसि किया पर्मकि.
महा राजन टेक्सा दोह्वल गोस्टि (20:20-26)
सासि-नेंड्वल गोस्टि
27 अद आता पेजे बोरे सासि-नेंडुर इंवलिर सदुकयुल्क येसुनगा वातेर.
28 अनि, “गुरुजि!
दर्मा-ग्रंत्क्नगा मोसे, ‘तादल मरि-मियड आय्वके सातेके, वोनोर तमुर तङेन तुङ्सि, तंवोर तादन साटि मरि-मियड आया लागर.
वूर मरि-मियड तादना संतांदा लेकते वांतेर’+ इन्जेर लिहि कीतोर.
29 उंदि नाटे येड्विर तादल-तमुर मत्तेर इंट.
वूर्गटल मडनोर वाले मर्मिङ आतोर बति, मरि-मियड आय्वक्नेन वोर मार्तोर.
30 अह्ने वोन पेजेटोर डगुर नट्पे, वोन पेजेय चुडुर नट्पे गिर तान तुङ्तेर.
बति मरि-मियड आय्वक्नेन मार्तेर.
31 इहिन वूर येड्विर्ते जन्क तान तुङ्सि, मरि-मियड आय्वक्नेने मार्तेर.
32 आक्रित अद वेय्लो गिर मार्ता इंट.
33 मार्तुर वूर सम्दिर नेंड्ता पेजे, अद वेय्लो वूर येड्विर्गटल बोना बाय्को आंता?”
इन्जेर येसुन पूसि कीतेर.
34 येसु वूरकुन जवब सीसेर, “इद दुनियतगा पेडिन सिय्वल अनि कांडिन मर्मिङ किय्वल जर्गंता.
35 बति स्वर्ग्नगा सोंवलिरा अनि सासि-नेंड्वलिरा लेकते वाय्वलिर बोरे गिर मर्मिङ आयुर अनि मर्मिङ कियुर.
36 सासि-नेंड्तुर वूर, बगवंतनुर मरि-मियड आंतेर.
वीर उंडे उंदि जोका मरन आयुर.
बति वूर स्वर्ग्नगा मंवलिर दूतलिर दात मंदंतेर.
37 सातुर वूर नेंड्वडुन बारेते मोसेना केय्दे, ‘नना अब्राहम, इसक अनि याकोब सेवा किय्वल पर्बु आय्वल बगवंतना आंदुन’+ इन्जेर पोत्वल पोदेलता गट्नतगा बगवंतल लिहि कियुस्तोर.
38 वूर सम्दिर बगवंतना नदुडे पिसि मत्ता लेकतेन वांतेर.
ते वोर सानलिरोर बगवंतल आयोर बति, जीवते मंवलिरोरे आंदुर” इन्जेर येसु वेह्तोर.
39 अहन वेह्ता पेजे, कहितुर सास्तिरिर, “गुरुजि, चोकोट वेह्ति” इन्जेर येसुन इत्तेर.
40 अद गट्कतल बोरे वोन सवल्क पूसि किय्ले दर्यम किय्मकि.
किरिस्तु दाविद्नोर मरि कि बतल?
41 अद आता पेजे येसु वूर सङा, “किरिसतुन दाविद्ना कांदांतोर इन्जेर बारि इंतेर?
42-43 इद गोस्टितुन दाविद राजले,
‘नावोर पर्बुन सङा बगवंतल,
नी सङा लडेय्क किय्वलिरकुन मेय्सि दाबि कीनल वेरि,*
नावा तिना बग्ला* वासि उदा’+
इन्जेर कीर्तन्क्ना पुस्तक्नगा लिहि कीतोर.
44 अनि दाविद राजले वोन, ‘नावोर पर्बु’ इन्जेर केय्तोर.
ते वोर किरिस्तु, दाविद्ना कांदांतोर बहन आंतोर?”
इन्जेर वूरकुन पूसि कीतोर.
पर्जतुन पसि किय्वलिर पेदोल्क
45 पर्जा सम्दिर केन्चेर मनेके, तंवुर सिस्यलिरकुन येसु इहिन वेह्तोर:
46 “सास्तिरिर बारेते दिहंते मंट!
वूर पोरोडल्ते बूड वेरि लह्क कोट्क केर्सि, बाजर्क्ने तिरिवल अनि पर्जा तमकुन मानि कीसि, दंडोस दोस्वल कोरंतेर.
सुनगोक्नगा अनि जेवुन्क्नगा तम्वा डगुर-पान तोहन साटि, वूर सास्तिरिर मुके माय्नलिर उद्वलिक जागनगा उद्ले पसंद कींतेर.
47 रांडे वेय्लोकुन पसि कीसि, अवेक्ना दन-दव्लतुन लूटि कींतेर.
इदेन मकुसन साटि पोरो पोरो बक्ति तोह्चेर, मांदितुन मुने वेले जेल पार्तनङ कीसेर मंदंतेर.
इव ईतन हिंदल वूरकुन, बगवंतल उंडे डगुर सिक्सा वाट्सि, नाय्दा तस्वा कींतोर.
बति मिरट वूर दात मन्मट” इन्जेर सिस्यलिरकुन येसु वेह्तोर.