जकयना रोन येसु मुकम किय्वल
19
1 येसु येरिको नगुडे नेङ्सि, वीड्सेर मत्तोर.
2 इचुला केन्जट!
अद नगुडे जकया इंवल वोरोर मायनल मत्तोर.
वोर टेक्सा वसुलि किय्वलिरोर अदिकारि आंदुर अनि वोन्गा वेले जाय्जत मत्ता.
3 अद गट्कते, ‘येसु बोर आंदुर बेहे?’
इन्जेर सूड्ले कोसिद कीतोर.
बति वोर वेले टुग्रि मत्ता काड्कि, मांदित रोपो मंवल येसुन सूडा पर्मकि.
4 ते
मरतगा तेर्ग्सि मंवल जकयन सूड्वल
अनि तोया मरा तेर्ग्सि, सूड्सेर मत्तोर.
5 ते येसु अद जागतगा येव्ता पेजे, पोरो सूड्तोर.
अनि वोन सङा, “जकया वेय्ने बूड रेया!
नेंड नीवा रोन नना मुकम किया लागर” इन्जेर इत्तोर.
6 अस्के, येंटने जकयल मरतल रेय्सि, बेय आनंद्ने येसुन तंवा रोन वोतोर.
7 ते पर्जा सम्दिर सूड्सि, “पापेस्तना+ रोन बारि सोन्जेर मंतोर बेहे!”
इन्जेर येसुन बारेते गोल्ग्तेर.
8 बति रोन वाता पेजे, जकयल निल्सि, “इचुला पर्बु!
नावा आस्तितल अर्दो ईसा गरिबुन सींतोन.
नना बोने पसि कीसि बततुने येच्चि मंद्कते, वोन नालुङ ईसङ अदिक मल्सि सींतोन” इन्जेर येसुन वेह्तोर.
9 ते येसु, “नेंड निमे अनि नीवा रोतुर पापनल बचे मातिट.
बारितेके, निमे गिर अब्राहमुन मोडि बगवंतन पोरो बरोसा कीति.
10 बगवंतना सर्दल बूले मासि मंवलिरकुन बचि किय्लेने स्वर्ग्नोर माय्नल वातोर” इन्जेर वेह्तोर.
जकयाना रोन येसु मुकम कियवल (19:1-10)
दहा सोनेतङ बिलना नमुना
11 पर्जा सम्दिर इव गोस्टिङ केन्चेर मत्तेर.
येसु येरुसलेमुन करुम वाता काड्कि, पर्जा सम्दिर बगवंतना राज वाय्वल वेले करुम मंता* इन्जेर सोन्च कीसेर मत्तेर.
12-13 अदेन साटि, येसु वूरकुन इद नमुना वेह्तोर: “राजलिरा कांदांतोर वोरोर मायनल महा राजना केय्दे तना राजल आसि, तंवा देस्ने मल्सि वाय्ले, लङ्ना देस सोंले तयर आसेर मत्तोर.
अस्के तंवुर दहा जन्क सेव्कलिरकुन केय्सि, माय्नन उंदि हजर (1,000) कोतङ* सीसि, ‘नना मल्सि वानल वेरि, बेपरि कीम्ट’ इन्जेर वेह्चि सोत्तोर.
14 बति वोनुर पर्जा वोन मेच्वेके सोंदिर.
अदेन साटि, ‘वेर मा पोरो राज ताकुस्वल माकुन इस्टम सेले’ इन्जेर महा राजनगा वोन पेजेय कबुर सारि कीतेर.
15 तेर बति, वोर राजल आसि मल्सि वातोर.
अस्के, तना सीता दनम्ने बोर बतल कमय कीतेरो, करि कियना इन्जेर वूर सेव्कलिरकुन केयुस्तोर.
16 ते मोदोडोर वासि, ‘माल्का!
निमे सीति अव कोतने मेह्नत कीसि, अवेन बरोबर दहा पाल्क अदिक कोतङ कमय कीतोन’ इन्जेर इत्तोर.
17 अस्के राजल, ‘अबा!
निमे चोकोट्नोर सेव्कनि आंदि.
निमे इचुसितगा गिर बरोसते मत्ता काड्कि, दहा नगुकुन पोरो अदिकारिनि आसि मन’ इन्जेर सेव्कन वेह्तोर.
18 दहा जन्कनल उंडे वोरोर वासि, ‘माल्का!
निमे सीता अव कोतने सियुङ पाल्क अदिक कोतङ कमय कीतोन’ इन्जेर वेह्तोर.
19 ते वोन सङा, ‘निमे सियुङ नगुकुन पोरो अदिकारिनि आसि मन’ इन्जेर वेह्तोर.
20 अस्के उंडे वोरोर सेव्कल वासि, ‘माल्का!
इचुला नीवङ कोतङ.
इवेन नना दस्तितगा गूंडि कीसि इर्तोन.
21 बारितेके, निमे वेले कटिंतोनि आंदि.
इर्मकि अदेन तह्वनि अनि विजा वीत्मकि अगा पंटा कोय्वनि आंदि.
अदेन साटिने निमे इत्तेके नाकुन बेय वेरे’ इन्जेर वेह्तोर.
22 अस्के वोर राजल, ‘गह्लल अनि करेबल सेव्का!
नी तोड्दल वाता गोस्टितुन पिय्सिने नीकुन तस्वा कींतोन.
नना कटिंतोना आंदुन.
इर्मकि अदेन तहंतोन.
नना विजा वीत्मकि अगा पंटा कोय्वना इंवल नीकुन टावय.
23 ते कम्सेकम निमे नावङ कोतङ वोसि, साव्करनगा बारि इर्मकि?
अहन इर्मड इत्तेके, नना वाता पेजे वड्डित अरिक नावङ कोतङ तेर वांदुङ’ इन्जेर इत्तोर.
24 अनि करुम निल्सि मंवलिर सेव्कलिर सङा, ‘वेन्गटल इव कोतङ येच्चि, दहा पाल्क अदिक कोतङ कमय कीतोना केय्दे सीम्ट’ इन्जेर वेह्तोर.
25 *[ते वूर सेव्कलिर, ‘बति माल्का!
वोन्गा दहा पाल्क अदिक कोतङ मंतङ कि!’
इन्जेर इत्तेर.]
26 अदेन साटि राजल, ‘बोन्गते वेले मंदंतयो, उंडे इचुर वेले बगवंतल वोन सींतोर.
अस्के वोन्गा बर्पुर मंदंता.
बति इचुसि मंवनगटल मत्ता अदेन गिर तेंड्सि वाटंतोर’ इन्जेर वेह्तोर.
27 अनि, ‘नना राज ताकुस्वल इस्टम सेले वूरकुन तचि, ना मुने जकट’ इन्जि इत्तोर” इन्जेर येसु वेह्तोर.
येसु येरुसलेम नेङ्ले तयरि किय्वल
28 येसु इद नमुना वेह्चि, येरुसलेम्नगा वर्सि सोंले पेसितोर.
29-30 ओलिवा मरक्ना गुटत पोरोडङ नह्क, बेत्पगे अनि बेतनियतुन करुम येव्तेर.
अस्के येसु तंवुर सिस्यलिर्गटल इविरकुन मुने सारि कीसेर, “इचुला!
अद दिस्वल नाटे नेङ्नेकेन, अगा उंदि चुडुसि गादि दोह्चि मंवल मीकुन दिसंता.
तान पोरो इंके वेरि, बोरे उद्मकि.
तान सुटि कीसि तरट” इन्जेर वेह्तोर.
31 “अद गादितुन सुटि कीनेके, ‘बारि सुटि कीसेर मंतिट?’
इन्जेर बोरे पूसि कीनुर्ते, ‘इद पर्बुन जुरत मंता’ इन्जि वेहट” इन्जेर वेह्तोर.
32 वोर सारि किय्वलिर सोन्जि सूड्तेके, येसु वेह्ता तीर अद दोह्चि दिस्ता.
33 अद चुडुर गादितुन सुटि कीनेके, तानुर माल्कलिर, “मिरट बारि गादितुन सुटि कींतिट?”
इन्जेर पूसि कीतेर.
34 ते वूर, “इद पर्बुन जुरत मंता” इन्जेर जवब सीतेर.
35 अस्के अद चुडुर गादितुन येसुनगा पिय्सि वातेर.
अनि तान पोरो तम्वङ साल्वङ तार्सि, येसुन उपुस्तेर.
36 येसु अहन सरिय सोन्जेर मनेके, पर्जा तम्वङ साल्वङ अद सरिये तार्तेर.
37 अहन येसु ओलिवा मरक्ना गुटत पोरोडल बूड रेय्तोर.
वोन पेजेय वाय्वलिर सम्दिर गिरे तमो सूड्तङ मय्मतङ कामकुन बारेते आनंद्ने जोर्ते बगवंतन,
38 “पर्बुना अदिकार्दे* वाय्वल राजने बगवंतल आसिर्वाद सियिर!
+
पोरो स्वर्ग्नगा सांति वायि!
अनि बगवंतन डगुर-पान वायि!”
इन्जेर पार्तना-विंति कीतेर.
येसु येरुसलेम नेंगले तयरि कियवल (19:28-38)
39 अस्के अद मांदितगा मंवलिर कहितुर परिसयुल्क, “गुरुजि!
नीवुर सिस्यलिरकुन दब मंट इन्जि राङि सीम” इन्जेर वेह्तेर.
40 ते येसु, “नना वेह्वल बतल इत्तेके: मोका वीर दब मंदनिर्ते, तम्वा तमा बंडङ गिर किलिवल सुरु कींतङ” इन्जेर वेह्तोर.
41-42 येसु येरुसलेम नगुडुन करुम येव्ता पेजे आड्सेर, “येरुसलेम्नुर लोकुर्निट!
सांतिता सरदुन करि किय्मड इत्तेके, मीकुन चोकोट मंदु.
बति इंके अदेन मिरट करि किया पर्विट.
43 मीवुर पगा-दार्क मी नगुडुन सिर्मुट गेर-पासि, मीकुन आगुटि किय्वलिक दिवोस्क वांतङ.
44 इव गोडन नड्डुम मंवलिर मीकुन अनि मीवुर मरि-मियडुन चेच्रि कींतेर.
बंडत पोरो बंडा मंवक्ने मी नगुडुन उल्टि कीनल वूर सुटि कियुर.
बारितेके, बगवंतल मीकुन बचि किय्ले वाता दिवोसुन मिरट करि किय्मकि” इन्जेर इत्तोर.
येरुसलेमुन सूडसि येसु आड्वल (19:41-44)
येरुसलेम्ना मंदिरतगा येसु सोंवल
45-46 अनि येरुसलेम्ना मंदिर्तगा सोन्जि, अगा बेपरि किय्वलिर सङा, “‘इद मंदिर नावा रोन आंद अनि पार्तना किय्वल जागा आंद’ इन्जेर दर्मा-ग्रंत्नगा लिहि कीसि मंता.
बति तान कलिर मक्वल बुयरित दात कीतिट”+ इन्जेर वूर सम्दिरकुन बह्रि पूड्वल सुरु कीतोर.
47 अद आता पेजे, वोर हर दिवोस मंदिरतगा सोन्जि, पर्जतुन बोदा वेह्चेर मंदुर.
बति डगुक कटोडलिर, सास्तिरिर अनि डगुक वोन बहन जकना इंवल पिलन वाट्वल मोदोल कीतेर.
48 बति पर्जा सम्दिर येसु वेह्वलिक गोस्टिङ दिहंते केन्ज्वल कीनेके, येसुन मक्डिते बहन जकनयो वूरकुन सोन्च वाय्मकि.
मनदिरतल बेपरिदार्कुन येसु पूडि सिय्वल (19:45-48)