दहा जनिक कोरो पेकिक्ना नमुना
25
1 “स्वर्ग्ना राज, दहा जनिक कोरो पेकिङ तम्वङ डिवेङ पिय्सि, नोव्रन बेटे माय्ले सोंवडुन मोडि मंदंता.
2 इवेनल सियुङ जनिक गियन सेलेङ अव अनि सियुङ जनिक चतुर वालेक मत्तङ.
3 गियन सेलेङ अव डिवेङ पिय्सि सोत्तङ.
बति निय मार्तेके वेडिलेन तम्वा सङा निय वोय्मकि.
4 बति चतुर वालेक डिवेन बरोबर कोपनगा निय पिय्सि सोत्तङ.
5 नोव्रल वाय्वल कोरुम आता काड्कि, जप्ने अर्सि नरुम्तङ.
6 नड्डुम नर्का, ‘अचुला नोव्रल!
वोन मुनेत्क बेटे माय्ले वरट’ इंवल लेङ केन्जा वाता.
7 ते अव सम्दो कोरो पेकिङ तेच्चि, तम्वङ डिवेन सुद्रि कीतङ.
8 अस्के तम्वङ डिवेङ पिर्ले आय्वल सूड्सि, गियन सेलेङ अव कोरो पेकिङ, ‘मीवा निय्दल जरसि सीम्ट’ इन्जेर चतुर वालेकुन पूसि कीतङ.
9 ते अव पेकिङ, ‘माकुन अनि मीकुन इद निय येव्वो.
वोम्वलिर्गा सोन्जि येतट’ इन्जेर वेह्तङ.
10 ते अव येत्ले सोनेकेन नोव्रल वातोर.
अस्के डिवेङ पोच्चेर तयर मंवलिक चतुर वाले पेकिन तंवा सङा पिय्सि, रोपो मर्मिना जेवुन किय्ले सोत्तोर.
अद आता पेजे पाटक्ना कावड केह्तेर.
11 केह्ता पेजे मेय्तङ अव कोरो पेकिङ वासि, ‘माल्का!
माल्का!
ममोट वातोम.
कावड तेरिया’ इन्जेर पूसि कीतङ.
12 बति नोव्रल, ‘करल वेहना इत्तेके, मिरट बव आंदिटो नाकुन टावा सेले’ इन्जेर जवब सीतोर.
13 स्वर्ग्नोर मायनल वाय्वल दिवोसे आयि, गट्कय आयि मीकुन गिर टावा सेले.
अदेन साटि बस्केट तयर मंट.
मुविर सेव्कलिरा नमुना
14 “स्वर्ग्ना राज, वोरोर मायनल यात्रा किय्ले पेसिनेके, तंवुर सेव्कलिरकुन केय्सि, तंवा आस्तितुन हव्लि किय्वन मोडि मंदंता.
15 वोर, वूरा वाप्रि किय्वल सक्तितुन पिय्सि, वोरोर सेव्कन सियुङ हजर्क (5,000) कोतङ,* उंडे वोरोन रंड हजर्क (2,000) कोतङ अनि आक्रितोन उंदि हजर (1,000) कोतङ सीतोर.
अस्के वोर यात्रा किय्ले पेसितोर.
16 ते सियुङ हजर्क कोतङ येत्वल, अवेने बेपरि कीसि, उंडे सियुङ हजर्क कोतङ कमय कीतोर.
17 अदे तीर्दे, रंड हजर्क येत्वल गिर उंडे रंड हजर्क कोतङ कमय कीतोर.
18 बति तंवोर माल्कनल उंदि हजर सोनेतङ कोतङ येत्वल, उंदि डोड्डो ताड्सि अद दनमुन वोसि मिस्तोर.
19 “वेले जेल आता पेजे, वोर माल्कल मल्सि वासि, तना सेव्कलिरकुन सीता दनम्ना लेका सूड्तोर.
20 अस्के सियुङ हजर्क कोतङ येत्वल, ‘माल्का!
निमे नाकुन सियुङ हजर्क कोतङ सीति.
ते नना अवेने बेपरि कीसि, उंडे सियुङ हजर्क कमय कीतोन’ इन्जेर वेह्तोर.
21 वोर माल्कल, ‘अबा!
निमे बरोसतोर चोकोट्नोर सेव्कनि आंदि.
इचुर सीतेके गिर बति, अदेने बरोसते काम कीता काड्कि, नीकुन उंडे दुस्रोकुन पोरो गिर अदिकारिन दात नेमि कींतोन.
नीवोर माल्कन बरोबर मीरे मासि अनंद येता’ इन्जेर जवब सीतोर.
22 ते रंड हजर्क कोतङ येत्वल वासि, ‘माल्का!
निमे नाकुन रंड हजर्क कोतङ सीति.
अवेने नना बेपरि कीसि, उंडे रंड हजर्क कोतङ कमय कीतोन’ इन्जेर वेह्तोर.
23 ते वोर माल्कल, ‘अबा!
निमे बरोसतोर चोकोट्नोर सेव्कनि आंदि.
इचुसा सीतेके गिर बति, अदेने बरोसते काम कीता काड्कि, नीकुन उंडे दुस्रोकुन पोरो गिर अदिकारिन दात नेमि कींतोन.
नीवोर माल्कन बरोबर मीरे मासि अनंद येता’ इन्जेर वेह्तोर.
24 “आक्रित उंदि हजर कोतङ येत्वल सेव्कल वासि, ‘माल्का!
निमे विजा वीत्मकि अगा पंटा कोय्वनि अनि विजा उर्स्मकि अगा पंटा मीरि किय्वल बेय मेंड गुन वालेनि इंवल नाकुन टावा.
25 अदेन साटि नना वेरिसि, निमे सीति अव कोतन वोसि, बोमितगा ताड्सि मिसि इर्तोन.
इचुला!
नीवङ निमे येता’ इन्जेर इत्तोर.
26 ते वोर माल्कल, ‘गह्लल अनि करेबल सेव्का!
नना विजा वीत्मकि अगा पंटा कोय्वना अनि विजा उर्स्मकि अगा पंटा मीरि किय्वना इंवल नीकुन टावय.
27 ते कम्सेकम निमे नावङ कोतङ वोसि, साव्करनगा इरा मत्ता.
नना वाता पेजे वड्डित अरिक नावङ कोतङ तेर वांदुङ’ इन्जेर इत्तोर.
28 अनि ‘वेन्गटल हजर कोतङ येच्चि, दहा हजर्क कोतङ वालेनगा सीम’ इन्जेर दुस्रोर सेव्कन आगे सीतोर.
29 बारितेके बोन्गते वेले मंदंतयो, उंडे इचुर वेले बगवंतल वोन सींतोर.
अस्के वोन्गा बर्पुर मंदंता.
बति इचुसि मंवनगटल मत्ता अदेन गिर तेंड्सि वाटंतोर.
30 अनि, ‘बततुने कामि सियोर वोर सेव्कन वोसि, सिकटितगा वाटट.
अगा वोर पल्क कोर्क्सेर, आड्सेर दुक्सा बोगे मांतोर’ इन्जि वेहंतोर” इन्जेर येसु नमुना वेह्तोर.
आक्रिता तस्वा जर्ग्वल
31 “बति बस्केते स्वर्ग्नोर माय्नल तंवा मय्मते राजन मोडि तंवुर दूतलिरकुन पिय्सि वांतोरो, अस्के तंवा मय्मा वाले राजा-गादितगा उदंतोर.
32 अस्के वोन मुने सम्दो जातिनल पर्जा सम्दिर्कुन* मीरि किय्वल जर्गंता.
गाय्कि हेरेनल गोरेन बहन पाकि कींतोरो, अहन वूरकुन वोर पाकि कींतोर.
33 अनि तंवा तिना बाजुन नियत्नुर्कुन* अनि कड्मतुर्कुन* डेमा बाजुन निपुसंतोर.
34 “अस्के वोर राजल तंवा तिना बाज्नुर सङा, ‘ना बाबोना केय्दे आसिर्वाद येत्तुर वूर्निट, वरट!
इद परिपन्चम गडे मातगटल, मी साटि तयर इर्ता राजुन येतट.
35 बारितेके नना करुते मनेके, नाकुन काने दोस्तिट.
येर वट्क्सि मनेके, नाकुन येर सीतिट.
पर्देसिन मोडि मिह्गा वातोन अस्के, नावा मान-पान कीतिट.
36 नना डूंड्कोला मनेके, नाकुन पाङुक सीतिट.
बेमरिते मनेके, नावा चाकोरा कीतिट.
नना जेलतगा मनेके, नाकुन सूड्ले वातिट’ इन्जेर इंतोर.
37 अस्के नियत्नुर, ‘पर्बु!
निमे करुते मनेके, ममोट बस्के काने सीतोम?
निमे येर वट्किसि मनेके, ममोट बस्के येर सीतोम?
38 निमे बस्के पर्देसिन मोडि वाति अनि ममोट बस्के नीवा मान-पान कीतोम?
निमे बस्के डूंड्कोला मत्ति अनि ममोट बस्के नीकुन पाङुक सीतोम?
39 निमे बेमरिते मनेके सेलेके जेलतगा अर्सि मनेके नीकुन सूड्ले बस्के वातोम?’
इन्जेर पूसि कीतेर.
40 अद केन्चि वोर राजल, ‘वेले कमि-पान वालिर वीर ना तादल-तमुनगटल बोन मदत कीतेके गिर बति, नाकुन मदत कीता लेकते वांता.
इद सतेम आंद’ इन्जेर जवब सीतोर.
41 “अस्के वोर राजल तंवा डेमा बाजुन मंवलिर सङा, ‘सापेना लाक्तुर्निट!
इगेटल सोडियट!
सय्तंतुन साटि अनि वोनुर दूतलिर साटि तयर इर्ता बस्केट पोच्चेर मंवल तड्मितगा सोन्जि अरट.
42 बारितेके नना करुसासि मनेके, मिरट नाकुन काने सिय्मकि.
येर वट्क्सि मनेके, मिरट नाकुन येर सिय्मकि.
43 मुसपरिना आसि मनेके, मिरट नाकुन करुम किय्मकि.
डूंड्कोला मनेके मिरट नाकुन पाङुक सिय्मकि.
जेलतगा मनेके, सेलेके बेमरिते मनेके, मिरट नाकुन मदत किय्मकि’ इन्जेर इंतोर.
44 अस्के वूर गिर, ‘पर्बु!
निमे करुसासि मंवल आयि, येर वट्क्सि मंवल आयि, मुसपरिनि आसि मंवल आयि, डूंड्कोला मंवल आयि, बेमरिते मंवल आयि, जेलतगा मंवल आयि बस्केन सूड्मकि.
ते ममोट बहन मदत कीकोम?’
इन्जेर इंतेर.
45 अस्के वोर, ‘वेले कमि-पान वालिर वीर ना तादल-तमुनगटल बोने आयि मिरट मदत किय्वेके, नाकुन गिर किय्मकि इत्ता लेकतेन वांता.
इद सतेम आंद’ इन्जेर जवब सीतोर.
46 अनि वीर बस्केट मंवल सिक्सा बोगे माया लागर बति, नियत्ने ताक्वलिर बस्केट जीवते मंदंतेर” इन्जेर वेह्तोर.