पट पिय्सि कोर्वल रांडे वेय्लोना नमुना
18
1 वीटुन वाय्वक्ने बस्केट पार्तना कीसेर मंदना इन्जेर वेह्ले, येसु सिस्यलिरकुन इद नमुना वेह्तोर.
2 अद बतल इत्तेके: “उंदि चहर्ते तस्वा किय्वल वोरोर अदिकारि मत्तोर.
बगवंतल इत्तेके वोन वेरे सेले.
अनि पर्जतुन मानि किय्वेके सोंदुर.
3 अदे चहर्ते उंदि रांडे वेय्लो मत्ता.
अद रांडे वेय्लो, वोर अदिकारिनगा गडि गडि वासेर, ‘साब!
नाकुन अनि ना पगा-दारना गोस्टितुन तस्वा कीम’ इन्जेर कोर्सेर मंदु.
4-5 कहि रोज्क वेरि, वोर ताना गोस्टितुन वोप्मकि.
बति आक्रित, ‘नाकुन बगवंतल इत्तेके वेरे सेले.
अनि पर्जा इत्तेके मान सेले.
तेर बति, इद रांडे वेय्लो नह्गा वासि, जुल्मा कीसेर मंता.
अदेन साटि, इद वेय्लो नह्गा गडि गडि वाय्वक्ने, तस्वा कीका’ इन्जेर वोर तंवा मंदे इत्तोर” इन्जेर पर्बु वेह्तोर.
6 अहन वेह्ता पेजे पर्बु, “बगड-नियत्ने ताक्वल वोर तस्वा किय्वल अदिकारि इत्तङ गोस्टिङ केन्ज्तिट.
7 ते बगवंतल तना नेमि कीतुर नर्का-पियल तनकुन पार्तना कीसेर मत्तेके, वूरकुन तप्वक नायम जर्गुसोरिय?
वोर कोरुम कीनुरिय?
8 वूर साटि बगवंतल येंटने नायम जर्गुसंतोर इन्जेर मीकुन वेह्चेर मंतोन.
बति स्वर्ग्नोर माय्नल बगवंतनल मल्सि वानेके, वोन्गा बरोसा इर्तुर बोरे दर्तुरित पोरो दिसनिरिय?”
इन्जेर पूसि कीतोर.
कमि-पान कीसि बगवंतन पार्तना किय्वल
9 अनि तमो नियत्नुर इन्जेर तम्गा बरोसा इर्सेर, दुस्रुरकुन चुडुर-पांदे सूड्वलिर बारेते येसु इद नमुना वेह्तोर.
10 अद बतल इत्तेके, “पार्तना कियन साटि इविर माय्नलिर मंदिर्तगा सोत्तेर.
वूर इविर्गटल वोरोर परिसयुल्क्ना वर्गतोर अनि उंडे वोरोर टेक्सा वसुलि किय्वल.
11 वोर परिसयुल्क्ना बाज्नोर सम्दिर्गटल अलग निल्सि, ‘बगवंता!
पसि किय्वलिर दात, बगड-नियत्ने ताक्वलिर दात, पीर किय्वलिर दात अनि वेर टेक्सा वसुलि किय्वन दात नाकुन इर्वा काड्कि, नीकुन दनेवाद वेह्चेर मंतोन.
12 नना वारमुन रंड जोकङ उपस पियंतोन.
नाकुन वाय्वल सम्दो लाबमनल नूटल दहा ईसङ सीसेर मंतोन’ इन्जेर पार्तना कीतोर.
13 बति वोर टेक्सा वसुलि किय्वल वोन्गटल लङ निल्सि, हाबडेके सूड्ले दर्यम आय्वा सोन्जि, तंवा सातितुन पासेर, ‘बगवंता!
नना पापिना आंदुन.
ना पोरो दया तोहा’ इन्जेर पार्तना कीतोर.
14 बगवंतना नदुडे परिसयुल्क्ना बाज्नोन तेर, वेर टेक्सा वसुलि किय्वल नियत्नोर आसि, रोन सोत्तोर इन्जि मीकुन वेहंतोन.
बारितेके तंवा तना डगुर-पान किय्वन बगवंतल चुडुर-पान सींतोर.
अनि बोर्ते चुडुर-पान कींतोरो, वोन डगुर-पान सींतोर” इन्जेर वेह्तोर.
टेक्सा वसुलि कियवल अनि परिसया वर्गतोन बारेते नमुना (18:9-14)
येसु चुडुर मरि-मियडुन आसिर्वाद सिय्वल
15 उंदि दिया कहितुर लोकुर, ‘येसु केय्क इर्सि आसिर्वाद सियन’ इन्जेर तम्वुर मरि-मियडुन पिय्सि वातेर.
अद सूड्सि वोनुर सिस्यलिर वूरकुन राङि सीतेर.
16 बति येसु वूरकुन तन्गा केयुसि,
येसु चुडुर मरि-मियडुन करुम किय्वल
वूर दात्नुरये बगवंतना राज आंद.
17 इद सतेम आंद.
बूर्ते मरि-मियडुन दात तम्वङ दिल्क्नगा बगवंतल राज ताकुस्ले वोपुरो, वूर बस्केन अद राज्नगा नेङा परुर” इन्जेर वेह्तोर.
दनेवंतलिर बगवंतना राज्नगा नेङ्वल वेले कस्टम
18 यूदुल्क्नोर अदिकारि वोरोर येसुन, “चोकोट्नोर गुरुजि!
नाकुन बस्केट मंवल जीवा पुटना इत्तेके, नना बतल कियना?”
इन्जेर पूसि कीतोर.
19 ते येसु, “नाकुन बारि, ‘चोकोट्नोर गुरुजि’ इंति?
बगवंतन तपुसीसि, दुस्रोर बोरे चोकोट्नोर आयोर.
20 अनि, ‘पीर किय्वा, बोनय जीवा येत्वा, बतय कल्वा, लबड गवा वेह्वा, अवल-बाबोन मान सियना’ इंवलिक बगवंतनङ आगेङ टावय कि?”
इन्जेर येसु वोन पूसि कीतोर.
21 अस्के वोर दनेवंतल, “नावा चुडु-गादल इव सम्दो आगेन पिय्सि ताक्सेरेन मंतोन” इन्जेर वेह्तोर.
22 अद केन्चि येसु, “निमे उंडे उंदि काम कीम.
अद बतल इत्तेके, निह्गा मंवल जाय्जत सम्दो वोम्सि, अव कोतङ गरिबुन तूसि सीम.
अस्के नी साटि स्वर्ग्नगा दन मंदंता.
अद आता पेजे, नावा चर्ना पिय्सि ताका” इन्जेर वेह्तोर.
23 बति वोर डगुर दनेवंतल आता काड्कि, अद गोस्टि केन्ज्ता बरोबर नारज आसि, अगटल सोत्तोर.
24 वोन बाज सूड्सि येसु, “दंतुन पोरो बरोसा इर्वलिर बगवंतना राज्नगा नेङ्वल वेले कस्टम.
25 उंदि हूटड, *कोट्वल सुय्दा गदितल कड्सि सोंदना इत्तेके वेले कस्टम.
अह्ने वोरोर दनेवंतल बगवंतना राज्नगा नेङना इत्तेके, उंडे इचुर वेले कस्टम” इन्जेर वेह्तोर.
26 ते अद केन्ज्तुर वूर, “अहन बेहेते, बोर बचे मासि, नेङा परनुर?”
इन्जेर पूसि कीतेर.
27 अस्के येसु, “नरिमन्कना केय्दे ईतल काम आया परो, बति सिरिप बगवंतले ईतल काम किया परंतोर” इन्जेर वेह्तोर.
28 ते पेतुरु, “इचुला!
मह्गा मंवल सम्दो सुटि कीसि, नीवा चर्ना पिय्सि ताक्सेर मंतोम” इन्जेर इत्तोर.
29-30 अस्के येसु, “इद सतेम आंद.
बगवंतना राजुन साटि, तंवा रोतुन, बाय्कोन, तादल-तमुन, अवल-बाबोन अनि मरि-मियडुन सुटि कीसि ताक्वल हर वोरोर, इद दर्तुरितगा वेले पाल्क आसिर्वाद्ना वेले पंडि येच्चेरेन मंदंतोर.
अनि बविसत्ने वोन बस्केट मंवल जीवा गिर पुटंता” इन्जेर वेह्तोर.
येसु तंवा मरंतुन बारेते वेह्वल
31 येसु तंवुर बारा जन्क सिस्यलिरकुन बग्ला केय्सि, “इचुला केन्जट!
मरट पोरो वर्सि येरुसलेम सोन्जेर मंतट.
अगा स्वर्ग्नोर माय्नन बारेते तोले पर्वक्तलिर लिहि कीतङ सम्दो वचन्क बर्पुर जर्गंतङ.
32 बहन इत्तेके, वोन यूदुल्क आयुर वूरा केय्दे हव्लि कींतेर.
वूर वोन चेडि कीसि, वोना हिजत वोंतेर.
वोन पोरो उस्कंतेर.
33 वोन चाटल्क्ने पांतेर.
आक्रित वोन जकंतेर.
बति मूंद रोज्क्ने नेंडंतोर” इन्जेर वेह्तोर.
34 बति वूर सिस्यलिरकुन वोर वेह्ता जरा गिर अर्तम आय्मकि.
अद गोस्टितुन मक्डिते इर्ता काड्कि, वूरकुन अद सम्जे माय्मकि.
येसु तन्वा मरनतुन बारेते वेह्वल (18:31-34)
गुड्डिन येसु चोकोट किय्वल
35 येसु येरिको नगुडुन करुम येव्नेके, अगा सरदुन बग्ला वोरोर गुड्डि बिचेम तल्क्सेर उच्चि मत्तोर.
36 मांदि वीड्सि सोंवल चपुड केन्चि, “बतल जर्ग्सेर मंता?”
इन्जेर पूसि कीतोर.
37 ते वूर, “नजरेत चहर्तोर येसु सरिय सोन्जेर मंतोर” इन्जेर वेह्तेर.
येसु गुड्डिन चोकोट किय्वल
38 अस्के वोर गुड्डि, “येसु, दाविद्ना कांदांतोनि!
ना पोरो दया तोहा!”
इन्जेर जोर्ते किलितोर.
39 ते वोन मुनेतल वीड्वलिर, “दब मन!”
इन्जेर राङि सीतेर.
बति वोर उंडे इचुर जोर्ते, “दाविद्ना कांदांतोनि!
ना पोरो दया तोहा!”
इन्जेर किलितोर.
40 ते येसु आग्सि, “वोन नह्गा पिय्सि वरट” इन्जेर आगे सीतोर.
41 ते वोर गुड्डिन वूर तत्ता पेजे, “नना नी साटि बतल कियना इंति?”
इन्जेर येसु वोन पूसि कीतोर.
अस्के वोर, “पर्बु!
नाकुन नदुर पह्जे” इन्जेर इत्तोर.
42 ते येसु, “नी कड्क्ने सूडा!
नीवा बरोसये नीकुन चोकोट कीता” इन्जेर वेह्तोर.
43 अस्के येंटने वोनङ कड्क चोकोट आतङ.
ते वोर बगवंतन दनेवाद वेह्चेर, येसुन पेजेय सोत्तोर.
पर्जा सम्दिर अद सूड्सि, बगवंतन डगुर-पान सीतेर.
बर्तिमयि इन्वल गुड्डिन येसु चोकोट कियवल (18:35-43)