पार्कतुन बारेते
10
1 येसु कपेर्नहोमनल पेसितोर अनि योर्दन लविडुन वीड्सि यूदया येरियतगा सोत्तोर.
अस्के पर्जा गुब्डङ गुब्डङ वासि, येसुन सिर्मुट मीरे मातेर.
ते तनकुन आदत मत्ता तीर वूरकुन बोदा वेह्तोर.
2 अस्के कहितुर परिसयुल्क येसुनगा वातेर.
अनि वोन तप्नगा अट्कि कियना इन्जि, “वोरोर मायनल तंवा बाय्कोन पार्कत सिय्वल नायम आंद कि आयो?”
इन्जेर पूसि कीतेर.
3-4 ते येसु, “पार्कतुन बारेते, कानुंतगा मी तोत्तुरकुन मोसे पर्वक्तल बद हुकुम सीतोर?”
इन्जेर पूसि कीतोर.
अस्के वूर, “‘माड्सो पार्कत सिय्वडा कारंतुन उंदि चिटितगा लिहि कीसि, बाय्कोनगा सीसि रोतल सारि किया वचो’ इन्जि लिहि कीतोर” इन्जेर जवब सीतेर.
5 इद केन्चि येसु, “मीवङ दिल्क्ना मूजोर-पांदुन पिय्सिने, वोर पर्वक्तल अद आगे लिहि कीतोर.
6 बारितेके, बगवंतल कलि गडि कीता पेजे, माय्नन अनि वेय्लोन आड-माड्सो आसि मंले, निव्डि कीतोर.
7 अदेन साटिने मायनल, तंवुर अवल-बाबोनल वेगोरा आसि, तंवा बाय्कोन सङा जोड आसि, पिसंतोर.
8 वूर इविर अलग अलग आयो बति, उंदि मेंदोल आसि, मंदंतेर.
9 अहन बगवंतल जोडि कीतुरकुन बोरे मायनल पाकि किय्वा” इन्जेर परिसयुलकुन वेह्तोर.
10 इदेन बारेते सिस्यलिर येसु रोन वाता पेजे उंडे उंदि जोका पूसि कीतेर.
11 ते, “तंवा बाय्कोन पार्कत सीसि दुस्रोतुन तुङ्वल मायनल तान सङा पीर किय्वल आंतोर.
12 अह्ने तंवोर माड्सोन पार्कत सीसि दुस्रोन तुङ्वल वेय्लो, वोन सङा पीर किय्वल आंता” इन्जेर येसु वेह्तोर.
येसु चुडुर मरि-मियडुन आसिर्वाद सिय्वल
13 उंदि दिया कहितुर लोकुर, तम्वुर मरि-मियडुन पोरो येसु तंवङ केय्क इर्सि आसिर्वाद सियना इन्जेर पिय्सि वातेर.
बति सिस्यलिर वूरकुन दम्कि सीतेर.
14 अद सूड्सि येसु सिस्यलिर सङा सोङ्ने, “वूर मरि-मियडुन नह्गा वाया सीम्ट, वूरकुन आपुसिय्मट.
वूर दात्नुरये बगवंतना राज आंद” इन्जेर वेह्तोर.
15 “इद सतेम आंद.
बूर्ते मरि-मियडुन दात तम्वङ दिल्क्नगा बगवंतल राज ताकुस्ले वोपुरेय, वूर बस्केन अद राज्नगा नेङा परुर” इन्जेर वेह्तोर.
16 वूर मरि-मियडुन तंवा कोरते येच्चेर, हर वोरोन पोरो केय्क इर्सि आसिर्वाद सीतोर.
दनेवंतना नमुना
17 येसु अगटल पेसिसि सरिय सोन्जेर मनेके, वोरोर मायनल विच्चेर वासि, येसुन मुने मुर-टोङ्रङ कोट्सि मांदे, “चोकोट्नोर गुरुजि!
नाकुन बस्केट मंवल जीवा पुटना इत्तेके, नना बतल कियना?”
इन्जेर पूसि कीतोर.
18 ते येसु, “नाकुन बारि ‘चोकोट्नोर गुरुजि’ इंति?
बगवंतन तपुसीसि, दुस्रोर बोरे चोकोट्नोर आयोर” इन्जेर इत्तोर.
19 “बोनय जीवा येत्वा, पीर किय्वा, बतय कल्वा, लबड गवा वेह्वा, उंडे वोरोन पसि किय्वा अनि अवल-बाबोन मान सियना इंवलिक बगवंतनङ आगेङ टावय कि!”
इन्जेर येसु वेह्तोर.
20 ते वोर मायनल इद केन्चि, “गुरुजि!
नना चुडु-गादले इव सम्दो आगेन पिय्सि मान-मर्यदते ताक्सेर मंतोन” इन्जेर इत्तोर.
21 ते वोर माय्नन सङा येसु पेर्मते, “निमे उंडे उंदि काम कीम.
बतल इत्तेके, निह्गा मंवल जाय्जत सम्दो वोम्सि, अव कोतङ गरिबुन तूसि सीम.
अस्के नी साटि स्वर्ग्नगा दन मंदंता.
अद आता पेजे, नावा चर्ना पिय्सि ताका” इन्जेर येसु वेह्तोर.
22 अद केन्चि वोर डगुर दनेवंतल आता काड्कि, नारज आसि अगटल सोत्तोर.
23 ते येसु सिर्मुट सूड्सि सिस्यलिर सङा, “दनेवंतल बगवंतना राज्नगा नेङ्वल वेले कटिन” इन्जेर वेह्तोर.
24-25 इद केन्चि सिस्यलिर निप्ने आतेर.
“सिस्यलिर्निट!
दंतुन पोरो बरोसा इर्वलिर बगवंतना राज्नगा नेङ्वल वेले कटिन.
उंदि हूटड, कोट्वल सुय्दा गदितल, कड्सि सोंदना इत्तेके वेले कस्टम.
अह्ने वोरोर दनेवंतल बगवंतना राज्नगा नेङना इत्तेके, उंडे इचुर वेले कस्टम” इन्जेर येसु वेह्तोर.
26 इद केन्चि सिस्यलिर वेले निप्ने आसि “अहन बेहेते, बोर बचे मासि स्वर्ग्नगा नेङा परनुर?”
इन्जेर तम्वा तमा वड्क्तेर.
27 ते येसु वूर बाजुन सूड्सि, “नरिमन्कना केय्दे ईतल काम आया परो बति, सिरिप बगवंतले ईतल काम किया परंतोर” इन्जेर इत्तोर.
28 ते पेतुरु, “नीवा चर्ना पिय्सि ताक्ले, ममोट सम्दो सुटि कीसि वातोम” इन्जेर इत्तोर.
29-30 ते येसु, “नना वेह्वल इद सतेम आंद.
ना साटि अनि चोकोट्ना कबुडुन साटि, तंवा रोन रचतुन, तमुर तादन, सेलड-तककुन, अवल-बाबोन, मरि-मियडुन अनि बोमिन सुटि कीतोर वोन, इंके इद वकत्नेने नूर पाल्क अदिक रोन-रचता, तमुर-तादलिरा, सेलड-तकक्ना, अवल-बाबोना, मरि-मियडा अनि बोमिना पंडि पुटंता.
इवेन बरोबर वूर दुक्सङ बोगे माया लागर.
अस्केन स्वर्ग्नगा वूरकुन बस्केट गिर पिस्वल जीवा पुटंता.
31 अह्ने डगुर-पांदे मुने मंतोम इंवलिर कहितुर आक्रि आसि दांतेर.
चुडुर-पांदे पेजे मंतोम इंवलिर कहितुर मुने आसि दांतेर” इन्जेर गिर बोदा वेह्तोर.
येसु तंवा मरंता गोस्टित उंडे उंदि जोका वेह्वल
32 येसु अनि वोन सङा मंवलिर सम्दिर, येरुसलेम सोन्जेर मत्तेर.
येसु सम्दिरकुन तेर मुने, ताक्सेर मत्तोर.
वोनुर सिस्यलिर दुक्सते अनि वोना चर्ना पिय्वलिर पेजेय वेरेङ वेरेङ ताक्सेर मत्तेर.
अद वकत्ने तंवुर बारा जन्क सिस्यलिरकुन बग्ला केय्सि, तनकुन मुने जर्ग्वडुन बारेते इहिन वेह्तोर:
33 “मरट येरुसलेम पोरो वर्सि सोन्जेर मंतट.
ते अगा स्वर्ग्नोर माय्नन दोका सींतेर.
डगुक कटोडलिरकुन अनि सास्तिरिर्कुन वोन हव्लि कींतेर.
वूर सम्दिर वोन मरंता सिक्सा वाट्सि, यूदुल्क आयुर वूरकुन वोन हव्लि कींतेर.
34 ते वूर स्वर्ग्नोर माय्नन चेडि कींतेर.
वोन पोरो उस्कंतेर.
चाटल्क्ने पांतेर अनि आक्रित वोन जकंतेर.
बति वोर मल्सि मूंद रोज्क्ने नेंडंतोर” इन्जेर वेह्तोर.
याकोब अनि योहंता विनंति
35 अह्ने सोन्जेर मनेके, जेबेदयिनुर मर्क याकोब अनि योहन, येसुनगा वासि, “गुरुजि!
ममोट पूसि किय्वडुन, मा साटि कीम इन्जेर कोर्सेर मंतोम” इन्जेर इत्तेर.
36 ते येसु, “नना मी साटि बतल कियना इंतिट?”
इन्जेर पूसि कीतोर.
37 “निमे मय्मते राज ताकुस्नेके, मा इविरकुन डगुर-पान सिय्ले, नीवा डेमा बग्ला वोरोन अनि तिना बग्ला वोरोन उदा सीम” इन्जेर पूसि कीतेर.
38 बति येसु, “मिरट बतल पूसि कींतिटो अद मीकुने टावा सेले” इन्जेर इत्तोर.
“नना दुक्सङ बोगे मातपिनय मिरट बोगे माया पर्किट कि?
नना जीवा सीतपिनय मिरट सिया पर्किट कि?”
इन्जेर पूसि कीतोर.
39 ते, “हो, सिया परंतोम” इन्जेर इत्तेर.
ते येसु “नना दुक्सङ बोगे मातपिनय मिरट बोगे माया पर्मड मंदर अनि नना जीवा सीतपिनय मिरट सिया पर्मड मंदर.
40 बति नावा डेमा बग्ला अनि तिना बग्ला उदन साटि, नेमि किय्वल अदिकार ना केय्दे सेले.
इव जागङ बोन साटि बगवंतल इर्तोरेयो, सिरिप वूरे उदंतेर” इन्जेर वेह्तोर.
41 इद गोस्टितुन केन्ज्ता पेजे, मेय्तुर दहा जन्क सिस्यलिर याकोब अनि योहंतुन पोरो वेले सोङुन वातेर.
42 येसु वूर सिस्यलिरकुन केय्सि, “इद दुनियता पर्जा वोरोन पोरो अदिकार ताकुस्ले सूडंतेर.
अनि मुके अदिकारिर तम्वा बूड्नुर पोरो अदिकार तोहंतेर इंवल मीकुन टावय.
43 बति मिरट अहन ताक्वा.
मी सम्दिर्गटल बोर्ते डगुर-पान कोर्सेर मंतोरो, वोर सेव्कन दात सम्दिरा मदत किया लागर.
44 अनि मिह्गटल मुके मायनल आका इंवल, मी सम्दिरोर दासि-मायनल आया लागर.
45 बारितेके, स्वर्ग्नोर मायनल गिर तंवा सेवा कियुस्ले वाय्मकि.
बति तनय दुस्रुरा सेवा किय्ले वातोर.
अचोरे आय्वा सम्दिर कीतङ पापकुन कंडि किय्ले, सम्दिर बद्लि तंवा जीवता अर्पना सिय्ले वातोर” इन्जेर वेह्तोर.
बर्तिमयिन नदुर वाय्वल
46 अद आता पेजे, येसु अनि वोनुर सिस्यलिर, येरिको इंवल चहर्ते सोत्तेर.
अनि अगटल पेसिनेके, वेलेटिर मांदि वूर बरोबर पेसितेर.
तिमयिनोर मरि बर्तिमयि इंवल गुड्डि बिचेगांडल सरदुन बग्ला उच्चि मत्तोर.
47 नजरेत्नोर येसु वासेर मंतोर इन्जेर वोर करि कीसि, “येसु, दाविद्ना कांदांतोनि!
ना पोरो दया तोहा!”
इन्जेर जोर्ते किलिवल सुरु कीतोर.
48 अद केन्चि वेलेटिर “दब मन!”
इन्जेर वोन दम्कि सीतेर.
तेर बति वोर, “दाविद्ना कांदांतोनि!
ना पोरो दया तोहा!”
इन्जेर उंडे इचुर जोर्ते किलिवल सुरु कीतोर.
49 अस्के येसु आग्सि, “वोर माय्नन केयट” इन्जेर वेह्तोर.
ते वूर, “येसु नीकुन केय्सेर मंतोर.
दर्यम कीसि कुसिते सोन!”
इन्जेर वोन वेह्तेर.
50 ते वोर गुड्डि वाले तना मुच्चि मत्ता अद साल्वा तेरिसि चङ्ने तेच्चि येसुनगा वातोर.
51 वोर गुड्डि मायनल तन्गा वाता पेजे येसु, “नी साटि नना बतल कियना इंति?”
इन्जेर पूसि कीतोर.
ते “गुरुजि* नाकुन नदुर पह्जे” इन्जेर इत्तोर.
52 ते येसु, “इगेटल सोन.
नीवा बरोसये नीकुन चोकोट कीता” इन्जेर वेह्तोर.
अस्केन वोनङ कडकुन नदुर वाता अनि वोर गिर येसुन पेजेय सोत्तोर.