बगवंतल माय्नलिरकुन बद तरिकते इनम सींतोर
20
1 “बारितेके स्वर्ग्ना राजुन बारेते, उंदि रोतोर माल्कना नमुना येच्चि, इहिन वेहा वचो: वोर माल्कल तंवा आङुर्क्ना वाडितगा काम किय्ले, बूय्तलिरकुन केयना इन्जेर सक्रेन तेच्चि सोत्तोर.
2 अनि वूर सङा उंदि दियता बूतिता विलुवा मंवल कूरता उंदि बिला* सींतोन इन्जेर वोप्सिकुन आङुर्क्ना वाडितगा काम किय्ले रोह्तोर.
3 अनि वोर उंडे उंदि जोका सक्रे लग-बग नोव बजे बह्रि सोत्तोर.
अगा बाजर्क्नगा कहितुर काम पुट्वा, आगम निल्सि दिस्तेर.
4 अस्के वूर सङा, ‘नावा आङुर्क्ना वाडितगा काम कीम्ट.
बचोर बूति सियनयो अचोर सींतोन’ इन्जेर इत्तोर.
5 वूर अदेन वोप्सि, सोत्तेर.
अस्के वोर बारा बजे अनि उंडे दुपरि मूंद गंटङ नेक्नेके गिर बह्रि सोन्जि, अह्ने कीतोर.
6 अनि लग-बग पोद्रेक सियुङ नेक्नेके उंडे उंदि जोका बह्रि सोत्तोर.
ते उंडे कहितुर काम पुट्वा आगम निल्सि दिस्तेर.
अस्के वूर सङा, ‘मिरट बारि दिवोस पूरो आगम निल्सि मंतिट?’
इन्जेर पूसि कीतोर.
7 ते वूर, ‘माकुन बोरे बूतित केय्वा काड्कि, निल्सि मंतोम’ इन्जेर जवब सीतेर.
अस्के वोर, ‘मिरट गिर नावा आङुर्क्ना वाडितगा सोन्जि काम कीम्ट’ इन्जेर वेह्तोर.
8 “पोड्द सोंवल येलते अद आङुर्क्ना वाडितोर माल्कल कारोबारिन केय्सि, ‘बूय्तलिरकुन बूति सीम.
आक्रि वातुरकुन मोदोल सीम अनि मोदोल वातुरकुन आक्रि सीम’ इन्जेर वेह्तोर.
9 अस्के पोद्रेक लग-बग सियुङ गंटना येलते वातुर सोन्जि, कूरता उंदि बिला बूति येत्तेर.
10 ते सक्रे मोदोल वातुर वूर बूय्तलिर माकुन वेले बूति सिय्मड मंदर इन्जेर आसा कीतेर.
बति वूरकुन गिर कूरता उंदि बिलय बूति पुड्ता.
11 ते अद बूति येच्चि मोदोल वातुर बूय्तलिर माल्कन पोरो गोल्ग्तेर.
12 अनि माल्कन सङा, ‘आक्रि वातुर वीर, उंदि गंटये काम कीतेर अनि ममोट सकेडल्ते इंके वेरि येदितुन सोसि कीसि, काया-कस्टम कीतोम.
तेर बति वूरकुन माकुन बरोबरे बूति सीति’ इन्जेर इत्तेर.
13 बति वोर माल्कल बूय्तलिर सङा, ‘ना सोप्तलिर्निट!
मीकुन नना बतय वायुट किय्मकि.
उंदि दियता बूति कूरता उंदि बिला सिय्वल इन्जेर नना अनि मिरट मुनेने वोप्तट.
14 अदेन साटि मीवा बूति मिरट येच्चि सोंट.
मीकुन सीता अचोर बूतिये आक्रि वातुरकुन गिर सियना इन्जेर ना मंदे वाता.
15 नावङ कोतने नना इस्टम वाता तीर किय्ले नाकुन हक सेले कि बतल?
नना दुस्रुर पोरो दया तोह्ता काड्कि, मीवङ कड्क वेसेर मंतङ कि बतल?’
इन्जेर इत्तोर.
16 इद तीर्दे आक्रि मंवलिर कहितुर मुने आंतेर.
अनि मुने मंवलिर कहितुर आक्रि आंतेर” इन्जेर इत्तोर.
येसु तनकुन वाय्वल मरंतुन बारेते वेह्वल
17-19 येसु तंवुर बारा जन्क सिस्यलिरकुन बोरे मनुर अद जागतेके वोसि, “केन्जट!
मरट पोरो वर्सि येरुसलेम सोन्जेर मंतट.
अगा स्वर्ग्नोर माय्नन दोका सींतेर.
डगुक कटोडलिर्गा अनि सास्तिरिर्गा वोन हव्लि कींतेर.
वूर सम्दिर वोन मरंता सिक्सा वाट्सि, यूदुल्क आयुर वूरा केय्दे हव्लि कींतेर.
वूर वोन चेडि कीसि, चाटल्क्ने पांतेर.
आक्रित वोन मोद्नगा टाङि कीसि, जकंतेर.
बति मूंद रोज्क्ने नेंडंतोर” इन्जेर वेह्तोर.
तंवुर मरकुन आसिर्वाद सीम इन्जेर अवल कोर्वल
20 अद आता पेजे, जेबेदयिना बाय्को तंवुर इविर मरकुन पिय्सि येसुन मुने वाता.
अनि मुर-टोङ्रङ कोट्सि, तनकुन मदत कीम इन्जेर कोर्ता.
21 ते येसु, “नीकुन बतल पह्जे?”
इन्जेर पूसि कीतोर.
ते अद वेय्लो, “नीवा राज्नगा वीर इविर मरकुन डगुर-पान सिय्ले, नीवा डेमा बग्ला वोरोन अनि तिना बग्ला वोरोन उदा सीम” इन्जेर इत्ता.
22 अस्के येसु, “मिरट पूसि किय्वडुन बारेते मीकुने टावा सेले.
दुक्सङ इंवल कोजता रसा नना उंले तयर मंतोन.
मिरट उंले तयर मंतिटिय?”
इन्जेर वूरकुन पूसि कीतोर.
ते “हो, तयर मंतोम” इन्जेर वेह्तेर.
23 ते येसु, “नना दुक्सङ बोगे मातपिनय मिरट बोगे माया पर्मड मंदर.
बति नावा डेमा बग्ला अनि तिना बग्ला उद्ले, नेमि किय्वल अदिकार ना केय्दे सेले.
इव जागङ ना बाबो बगवंतल बोन साटि राकि कीसि इर्तोरेय वूरकुन अव पुटंतङ” इन्जेर वेह्तोर.
24 इव गोस्टिङ केन्चि, मेय्तुर दहा जन्क सिस्यलिर, वूर इविर तादल-तमुन पोरो सोङुन वातेर.
25 ते येसु वूरकुन केय्सि, “इद दुनियतुर राजलिर पर्जत पोरो राज ताकुसंतेर.
अनि मुके अदिकारिर तम्वा बूड्नुर पोरो अदिकार तोहंतेर.
26 बति मिरट अहन मंवा.
मिह्गटल डगुर-पान येतना इन्जेर कोर्वल, मी सम्दिरा मदत किय्वल सेव्कन दात आया लागर.
27 अनि मिह्गटल मुके मायनल आका इंवल मी सम्दिरोर दासि-मायनल आया लागर.
28 बारितेके, स्वर्ग्नोर मायनल तंवा सेवा कियुस्ले वाय्मकि.
बति तनय दुस्रुरा सेवा किय्ले वातोर.
अचोरे आय्वा, सम्दिर कीतङ पापकुन कंडि किय्ले, सम्दिर बद्लि तंवा जीवता अर्पना सिय्ले वातोर” इन्जेर वेह्तोर.
इविर गुड्डिरकुन येसु नदुर सिय्वल
29 येसु अनि वोनुर सिस्यलिर येरिको चहर्दल पेसिनेके, वेले मांदि वूर पेजेय सोत्तेर.
30 अद गट्कते सरदुन बग्ला इविर गुड्डिर उच्चि मत्तेर.
तम्वा करुम्नले येसु वीड्सि सोन्जेर मंतोर इन्जेर केन्चि, “पर्बु!
दाविद्ना कांदांतोनि!
मा पोरो दया तोहा!”
इन्जेर जोर्ते किलितेर.
31 ते मांदितल कहितुर, “दब मंट!”
इन्जेर दम्कि सीतेर.
तेर बति, वूर उंडे इचुर जोर्ते, “पर्बु!
दाविद्ना कांदांतोनि!
मा पोरो दया तोहा” इन्जेर किलितेर.
32 अस्के येसु आग्सि, “मी साटि नना बतल कियना इंतिट?”
इन्जेर पूसि कीतोर.
33 ते वूर, “पर्बु!
माकुन नदुर पह्जे” इन्जेर इत्तेर.
34 अस्के येसुन, वूर पोरो किवुल लाग्सि, वूरङ कडकुन इट्तोर.
ते येंटने वूरकुन नदुर वाता.
अनि वूर येसुन पेजेय सोत्तेर.