मत्तयि 21

किरिस्तु येरुसलेम सोंवल

(मार्क 11:1-11; लूका 19:28-38; योहन 12:12-19)

1-2 अहन चले मासि, वूर सम्दिर येरुसलेमुन करुम येव्तेर.

अगा मंवल ओलिवा मरक्ना गुटत पोरोडा बेत्पगे इंवल नाटुन करुम येव्नेके, येसु तंवुर सिस्यलिर्गटल इविरकुन मुने सारि कीसेर, “इचुला!

अद मुने दिस्वल नाटे सोंट.

अगा सोनेकेन उंदि गादि अनि ताना पिला दोह्‍चि मंवल मीकुन दिसंता.

अवेन सुटि कीसि, नह्‍गा पिय्सि वरट.

3 बोरे मीकुन बतय इंदनुर्ते, ‘पर्बुन इव पह्‍जे अले’ इन्जि वेहट.

अस्के येंटने वोर अवेन रोहंतोर” इन्जेर वेह्‍तोर.

4 पर्वक्तना तोड्दे बगवंतल वेहुस्ता अद गोस्टि पूरे माय्ले इहिन जर्ग्ता.

5 “‘सूडा!

नी राजल वजन वोह्‍वल गादित पोरो उच्चि, वासेर मंतोर!

तंवा तना चुडुर-पान कीसि, चुडुसि गादितगा उच्चि वासेर मंतोर!’

⁺ इन्जि सियोन नगुडुरकुन वेहट”⁺ इन्जेर लिहि कीसि मंता.

6 ते वूर इविर सिस्यलिर सोन्जि, येसु हुकुम सीता तीर कीतेर.

7 अद गादितुन अनि ताना पिलतुन पिय्सि वासि, तान पोरो तम्वङ साल्वङ वाट्तेर.

ते येसु अव पाङुकुन पोरो उत्तोर.

8 अगा मंवलिर बेय वेले मांदि तमा पोरो मुच्वलिक पाङुक सरित पोरो तार्तेर.

उंडे कहितुर सींदि मरक्नङ कांदङ उरुसि अद सरित पोरो तार्तेर.

9 येसुन मुने ताक्वल अनि पेजेय वाय्वल मांदि,

“जेय जेय कार!

^* दाविद्ना कांदांतोने डगुर-पान वायि!

पर्बुना अदिकार्दे^* वाय्वन बगवंतल आसिर्वाद सियिर!

स्वर्ग्नगा मंवल बगवंतने डगुर-पान वायि!”

⁺

इन्जेर किलिसेर मत्तेर.

10 अहन येसु येरुसलेम्नगा नेङ्ता पेजे, अगटुर सम्दिर गिर, “वेर बोर आंदुर बेहे?”

इन्जेर परेसन आसेर पूसि कीतेर.

11 ते येसुन सङा वाता मांदि, “वेना पोरोल येसु.

गलिलया येरियता नजरेत चहर्तोर पर्वक्तल आंदुर” इन्जेर जवब सीतेर.

बेपरिदारकुन मंदिर्तल तेंड्सि पूड्वल

(मार्क 11:15-19; लूका 19:45-48; योहन 2:13-22)

12 येसु मंदिर्ता आव्रतगा नेङ्तोर अनि अगा बेपरि किय्वलिर सम्दिरकुन बह्‍रि पेसुस्तोर.

कोतङ बद्लि किय्वलिरङ टेबलकुन अनि पारेवङ वोम्वलिरङ कुतुलकुन उल्टि कीसि वाड्तोर.

13 अनि वूर सङा, “‘इद ना मंदिरतुन पार्तना किय्वल मंदिर इन्जेर केयंतेर.

बति मिरट तेन कलिर मक्वल बुयरित दात तयर कीतिट’ इन्जि दर्मा-ग्रंत्नगा लिहि कीसि मंता” इन्जेर वेह्‍तोर.

14 अद आता पेजे, मंदिरतगा मंवल येसुनगा गुड्डिर, कूटलिर वातेर.

ते वूरकुन वोर चोकोट कीतोर.

15 ते वोर कीतङ अव मय्मतङ कामकुन डगुक कटोडलिर अनि सास्तिरिर सूड्तेर.

अनि अगा मंदिरतगा मंवलिर चुडुक कांडिर, “जेय जेय कार!

दाविद्ना कांदांतोन डगुर-पान वायि!”

इन्जेर किलिवल गिर केन्ज्तेर.

अस्के वूर सोङ्ने,

16 येसुन सङा, “वीर चुडुक कांडिर बतल इन्जेर किलिसेर मंतेरो, निमे केन्चेर मंति कि?”

इन्जेर पूसि कीतेर.

ते येसु, “हो केन्ज्तोन” इन्जेर वेह्‍तोर.

अनि, “‘चुडुर मरि-मियड अनि पसि-बाललिर नीकुन डगुर-पान सीनल कीति’ इन्जेर दर्मा-ग्रंत्नगा लिहि कीसि मंता.

इदेन मिरट बस्केन वाचि किय्मकि कि बतल?”

इन्जेर पूसि कीतोर.

17 अनि वूरकुन सुटि कीसि नगुडुन बह्‍रि मंवल बेतनिया इंवल नाटे सोन्जि, अद रातुन अगा मुकम कीतोर.

अन्जुरि मरा वत्वल

(मार्क 11:12-14, 20-24)

18 सक्रे मल्सि नगुडेके सोन्जेर मनेके, येसुन कर्वस्ता.

19 अस्के वोन सरदुन बग्ला उंदि अन्जुरि मरा दिस्ता.

बति तान्गा करुम सोन्जि सूड्तेके, आकिङ तपुसीसि दुस्रोक बतङे वोन दिस्मकि.

ते वोर अद मरतुन सङा, “इङेडल निमे बस्केन साद्वि” इन्जेर इत्तोर.

ते येंटने अद मरा वत्ता.

20 सिस्यलिर अद सूड्सि गुल आसि, “अरे!

इद अन्जुरि मरा इचोर सप्ने बहन वत्ता?”

इन्जेर पूसि कीतेर.

21 ते येसु, “बगवंतन पोरो बरोसते अनमिना आय्वक्ने, इद अन्जुरि मरतुन कीता अदेन मिरट गिर किया परंतिट.

इदे आय्वा, इद गुटतुन सूड्सि, तान सङा, ‘निमे ताच्चि सोन्जि, सम्दुरतगा अरा’ इन्जेर इत्तेके, अद अरंता.

इद सतेम आंद.

22 अदेन साटि मिरट पार्तना कीनेके, बतङ तल्कंतिटो, अवेन बगवंतल माकुन सींतोर इन्जेर बरोसा कीम्ट.

अस्के अव सम्दो मीकुन पुटंतङ” इन्जेर वूरकुन वेह्‍तोर.

येसुना अदिकारदुन बारेते पूसि किय्वल

(मार्क 11:27-33; लूका 20:1-8)

23 बस्केते येसु मंदिरतगा सोन्जि बोदा वेह्‍चेर मत्तोरो, अस्के डगुक कटोडलिर अनि पेदोल्क वोन्गा वासि, “निमे बद अदिकार्दे इव काम्क कीसेर मंति?

इद अदिकार नीकुन बोर सीतोर?”

इन्जेर पूसि कीतेर.

24 ते येसु, “नना गिर मीकुन उंदि सवल पूसि कींतोन.

मिरट अदेन जवब सीतेके, बद अदिकार्दे इव काम्क कींतोनो मीकुन वेहंतोन” इन्जेर इत्तोर.

25 अनि, “बाप्तिस्मा सिय्वल अदिकार योहंतुन, बगवंतनल वाता कि सेलेके माय्ननल वाता?

वेहट” इन्जेर पूसि कीतोर.

ते वूर, “मरट, ‘बगवंतनल’ इंद्कट्ते, ‘योहंतगा बारि बरोसा इर्मकि?’

इन्जेर पूसि कीनुर.

26 बति मोका, ‘माय्ननल’ इंद्कट्ते, माकुन सम्दिर बंडने पानिर.

बारितेके योहन पर्वक्तल इन्जेर सम्दिर वोप्तेर” इन्जेर वेरसि तम्वा तमा कुसा कुसा चर्चा कीतेर.

27 अनि वूर, “अद माकुन टावा सेले” इन्जेर जवब सीतेर.

ते येसु, “नना गिर बद अदिकार्दे इव कीसेर मंतोनो, मीकुन वेहोन” इन्जेर इत्तोर.

इविर मर्क्ना नमुना

28 अनि उंडे वूर सङा, “नना वेह्‍वडुन बारेते बतल सोन्च कींतिट?

वोरोर माय्नन इविर मर्क मत्तेर.

वोर तंवोर डगुर मरिनगा सोन्जि, ‘कोको!

नेंड निमे ना आङुर्क्ना वाडितगा सोन्जि काम कीम’ इन्जेर इत्तोर.

29 ते वोर मरि, ‘नन सोनोन’ इत्तोर.

बति जरसि आता पेजे, तंवा मंदुन मार्युसि सोत्तोर.

30 अद आता पेजे वोर बाबो तंवोर चुडुर मरिनगा सोन्जि, अदे गोस्टि वेह्‍तोर.

ते वोर, ‘हो, दांतोन बाबा’ इन्जेर इत्तोर.

बति वोर सोन्मकि.

31 वीर इविर्गटल बाबो कोर्ता तीर बोर कीतोर इंतिट?”

इन्जेर वूरकुन पूसि कीतोर.

ते वूर, “मोदोडोर” इन्जेर वेह्‍तेर.

अस्के येसु, “टेक्सा वसुलि किय्वलिर अनि बोगम-सानिक मीकुन तेर मुने बगवंतना राज्नगा नेङंतङ.

इद सतेम आंद.

32 बारितेके योहन नियत्ना सरि-मारग पिय्सि मिह्‍गा वातोर.

मिरट वोन नंमकि.

बति टेक्सा वसुलि किय्वलिर अनि बोगम-सानिक वोन नम्तङ.

इव सम्दि सूड्ता पेजे गिर, मीवा मंदुन पापनल मिरट मार्युस्मकि अनि वोन नंमकि” इन्जेर वेह्‍तोर.

बटेय्ते पिय्तुरा नमुना

(मार्क 12:1-12; लूका 20:9-19)

33 “उंडे उंदि नमुना केन्जट.

वोरोर मायनल तंवा वाडितगा आङुर्क उर्स्तोर.

अद वाडित सिर्मुट गोडा दोह्‍पुसीतोर.

आङुर्क्ना रसा तेंड्ले बंडतुन नार्युस्तोर.

अनि जाग्लि किय्ले, उंदि डङल मंडा गिर वाटुस्तोर.

सम्दो आता पेजे, अद वाडितुन बटेय-दारकुन सीसि, यात्रा कीसेर दुस्रो देस्ने सोत्तोर.

आङुर्क्ना वाडित नड्डुम मंवल जाग्लि मंडा

34 आङुर्क्ना पंटा कोय्वल कालम वाता पेजे, वोर मायनल, ‘नावा ईसा तरट्’ इन्जेर सेव्कलिरकुन बटेय-दार्क्नगा रोह्‍तोर.

35 बति वूर बटेय-दार्क माल्कनुर सेव्कलिर्गटल वोरोन पिय्सि पातेर.

उंडे वोरोन जक्तेर अनि उंडे वोरोन जीवा सोनल बंडङ बिर्किडि कीतेर.

36 वोर माल्कल उंडे उंदि जोका मोदोल सारि कीतुर सेव्कलिर्गटल तेर अदिक जनकुन वूर्गा सारि कीतोर.

बति वूर बटेय-दार्क मोदोडुरकुन कीतपे वीरकुन गिर कीतेर.

37 तेर बति वोर माल्कल, ‘ना मरिन तेर वूर चोकोट मानि कीनिर’ इन्जि, वूर्गा रोह्‍तोर.

38 बति वूर बटेय-दार्क वोर मरि तम्गा वाय्वल सूड्सि, ‘इचुला, वेर इद जाय्जतुन ईसदारल आंदुर.

वेन जक्सि, वेना जाय्जतुन इस्का पाकट’ इन्जेर तम्वा तमा इत्तेर.

39 अनि वोन गटा-गिटा पिय्सि वाडितल बह्‍रि वाट्सि जक्तेर.

40 ते इंके अद वाडितोर माल्कल वानुर्ते वूरकुन बतल कींतोर इंतिट?”

इन्जेर येसु वूर कटोडलिरकुन अनि पेदोलकुन पूसि कीतोर.

41 अस्के वूर, “करेबलिर वूर बटेय-दारकुन जक्सि, अद वाडिता पंटा कालम्नगा तंवा ईसा सिय्वलिर दुस्रुर बटेय-दारकुन सींतोर” इन्जेर जवब सीतेर.

42 ते येसु वूरकुन सूड्सेर,

“‘रोन दोह्‍वलिर बततुने कामि सियो इन्जेर पास्क्ता बंडा,

सम्दिनल मुके बंडा आसि निल्ता.

इद सिरिप बगवंतन हिंदले जर्ग्ता.

इद मा कडकुन नमवस्वक मंता’⁺

इंवल गोस्टितुन दर्मा-ग्रंत्नगा मिरट वाचि किय्मकि कि बतल?”

इन्जेर पूसि कीतोर.

43 “अदेन साटि नना वेह्‍वल बतल इत्तेके, बगवंतल तंवा राजुन मिह्‍गटल तेंड्सि, अद राज्नगा नेङ्ले बूर्ते कामि सीनल मंतेरो, वूर दुस्रोक जातिनुरकुन सींतोर.

44 अनि इद बंडत पोरो अर्वलिर सम्दिर टुक्डेङ आंतेर.

उंदि मोका इद बंडा बोन पोरोन अर्तेके, वोन दुबत दात नुया नुया कींता” इन्जेर वेह्‍तोर.

45 इद केन्चि वूर डगुक कटोडलिर अनि परिसयुल्क तम्वा बारेतेन इद नमुना वेह्‍तोर इन्जेर करि कीतेर.

46 अनि अदे गट्कते वोन पिय्ले सूड्तेर.

बति मांदि सम्दिर वोरोर पर्वक्तल इन्जेर येसुन मानि कीता काड्कि, वूरकुन सूड्सि वेरितेर.