मर्मिना जेवुंता नमुना
22
1-2 येसु नमुनङ येच्चि वूरकुन उंडे इहिन वेह्वल मोदोल कीतोर: “स्वर्ग्ना राज, वोरोर राजल तंवोर मरिना मर्मिना जेवुन सीतपिनय मंदंता.
3 वोर राजल मर्मि जेवुंतुन बारेते कबुर अंद्तुर वूरकुन केय्ले, तंवुर सेव्कलिरकुन सारि कींतोर बति, वूर वाय्ले वोप्मकि.
4 ते वोर राजल उंडे कहि जन्क सेव्कलिरकुन सारि कीसेर, बोन बोंते कबुर अंद्तयो वूर सङा, ‘“कोंदन अनि चोकोट ताज्यलिक पड्डन कोय्सि अट्तोम.
मर्मिना जेवुन पूरो तयर आसि मंता.
वरट!”
इन्जि, वूरकुन केयट’ इन्जेर वेह्तोर.
5 बति अद कबुडुन बोरे पटि किय्मकि.
वूर्गटल वोरोर तंवा वाव्टे सोत्तोर.
उंडे वोरोर तंवा बेपरि सूड्ले सोत्तोर.
6 मेय्तुर वूर, राजनुर सेव्कलिरा हिजत तेंड्सि जक्तेर.
7 अदेन बारेते वोर राजल केन्चि, बेय सोङुन वासि, तंवुर सिपायिरकुन वूर्गा सारि कीतोर.
ते वूर जक्वलिरकुन जक्सि, वूरा नगुडुन डुंडुसि वाटुस्तोर.
8 “अद आता पेजे तंवुर सेव्कलिर सङा, ‘मर्मिना जेवुन तयर मंता.
बति तिंले वरट इंवल कबुर अंद्ता वूर बोरे गिर कामि सियुर.
9 अदेन साटि, बाजर्क्नगा सोन्जि, मीकुन दिस्तुर वूरकुन मर्मि जेवुन किय्ले वरट इन्जि केयट’ इन्जेर वेह्तोर.
10 ते वूर सेव्कलिर अव बाजर्क्नगा सोन्जि, तमकुन दिस्तुर वूर चोकोट्नुर-वायुट्नुर सम्दिरकुन मीरि कीसि तत्तेर.
अद तीर्दे वूर वेर्तलिर हिंदल मर्मि मंडोप निंता.
11 “ते राजल वूर वेर्तलिरकुन सूडना इन्जेर रोपो वातोर.
अस्के वूर्गटल वोरोर मर्मिना कार्यत साटि बातङ्ते पाङुक पोंड्सि वायनयो, आतङ पाङुक पोंड्सि दिस्मकि.
12 ते वोर राजल वोन सङा, ‘सोप्ता!
निमे मर्मिता कार्यत साटि पोंड्वलिक पाङुक पोंड्सि वाय्वक्ने बहन वाति?’
इन्जेर पूसि कीतोर.
ते वोर मायनल बतय जवब सिया पर्मकि.
13 अस्के वोर राजल तंवुर सेव्कलिर सङा, ‘वोनङ केय्क-काल्क दोह्चि बह्रि मंवल सिकटितगा वाटट.
अगा आड्वल अनि पल्क कोर्क्वल मंदंता’ इन्जेर वेह्तोर.
14 इद नमुनतुन बारेते, ‘बगवंतल केय्वलिर वेलेटिर मंतेर बति, वोर नेमि किय्वलिर कहितुरे मंतेर’” इन्जेर येसु मह्तोर.
येसुन गल्तितगा साप्डि किय्ले पिलन वाट्वल
15 जुलुक आता पेजे, परिसयुल्क येसुन्गटल सोन्जि, वोर वेह्वडगा तप साप्डि कियना इन्जेर पिलन वाट्तेर.
16-17 अनि तम्वुर कहितुर सिस्यलिरकुन अनि कहितुर हेरोद्ना बाज्नुरकुन इहिन पूसि कीम्ट इन्जेर वेह्चि, येसुनगा सारि कीतेर.
ते वूर, “गुरुजि!
निमे वड्क्वल अनि बोदा किय्वल सतेम आंद.
बोनय बेद-बाव सूड्वनि आय्वि.
बगवंतना सते मारग बाता अहन वेह्वनि आंदि इंवल माकुन टावये.
बति इंके ममोट सीजर महा राजना रोम सर्कारतुन टेक्सा दोह्वल नायम आंद इंति कि आयो इंति?”
इन्जेर पूसि कीतेर.
18 बति येसु, वूरा करेबल गुंतुन करि कीसि, “कपेटलिर्निट!
नाकुन बारि परिक्सा कीसेर मंतिट?
19 मिरट नाकुन उंदि कूरता बिला तोहट” इन्जेर पूसि कीतोर.
ते वूर उंदि कूरता बिला वोन्गा तचि सीतेर.
20 अस्के वोर, “तेन्गा बोना पोरोल अनि बोना मोकोटता मोर मंता?”
इन्जेर वूरकुन पूसि कीतोर.
रोमा राज्ना कोता
21 ते वूर, “सीजर महा राजना” इन्जेर वेह्तेर.
अस्के येसु, “सीजर महा राजनङ महा राजन सीम्ट, अनि बगवंतनङ बगवंतन सीम्ट” इन्जेर वेह्तोर.
22 अद केन्चि वूर बेय गुल आसि, येसुन सुटि कीसि अगटल सोडितेर.
सासि-नेंड्वलिर बारेते सवल
23 सातुर वूर नेंडुर इन्जेर जट-पट लाग्वलिर सदुकयुल्क अद नेटि येसुनगा वासि, इहिन सवल पूसि कीतेर:
24 “गुरुजि!
‘बोरे वोरोर मरि-मियड आय्वके सातेके, वोनोर तमुर अद तङेन तुङ्सि, तंवोर तादन साटि मरि-मियड आयना.
वूर मरि-मियड तादना संतांदा लेकते वांतेर’ इन्जेर मोसे पर्वक्तल दर्मता कानुंतगा लिहि कीतोर.
25 “ते नमुनतुन मा नड्डुम उंदि कुटुंबतगा येड्विर तादल-तमुर मत्तेर इंट.
वूर्गटल मडनोर वाले मर्मिङ आतोर बति, मरि-मियड आय्वक्नेन वोर मार्तोर.
अदेन साटि तान वोनोर तमुर तुङ्तोर.
26 इद तीर्दे डगुर नट्पे, चुडुर नट्पे, उंडे चुडुर नट्पे इहिन वूर येड्विर जन्क गिर तान तुङ्सि, मरि-मियड आय्वक्नेन मार्तेर.
27 आक्रित वूर पेजेय अद वेय्लो गिर मार्ता इंट.
28 ते वूर येड्विर सासि-नेंड्ता पेजे, अद वेय्लो वूर येड्विर्गटल बोना बाय्को आंता?”
इन्जेर येसुन पूसि कीतेर.
29 बति येसु, “मिरट इंवल बेय डगुर तप आंद.
मीकुन दर्मा-ग्रंत्नगा लिहि कीसि मंवलिके आयि, बगवंतना सक्तितुन बारेतेन आयि, टावा सेले.
30 बारितेके सासि-नेंड्ता पेजे वेय्लो-मायनल मर्मिङ आयुर.
वूर सम्दिर गिर स्वर्ग्नुर दूतलिर दात मंदंतेर.
31-32 अनि सासि-नेंड्वलिर बारेते, ‘नना मी तोत्तुर अब्राहम, इसक अनि याकोब सेवा किय्वल बगवंतना आंदुन’ इन्जेर मोसेना केय्दे लिहि कियुस्तोर.
अद वाचि किय्मकि कि बतल?
वोर सानलिरोर बगवंतल आयोर बति, जीवते मंवलिरोरे आंदुर” इन्जेर येसु वेह्तोर.
33 इद बोदा केन्चि पर्जा बेय गुल आतेर.
सम्दो आगेनल बद आगे मुके आंद?
34 अहन वड्क्सि, सदुकयुलकुन वड्क्वक्ने येसु कीतोर इन्जि, परिसयुल्क मीरे मासि वोन्गा वातेर.
35-36 वूर्गटल मोसेना कानुंतुन वेह्वल दर्मा गुरु, “गुरुजि!
दर्मा-ग्रंत्नगा मंवलिक सम्दो आगेनल बद आगे मुके आंद?”
इन्जेर येसुन पूसि कीतोर.
37 ते वोन, “‘नी पर्बु आय्वल बगवंतन नीवा बर्पुर दिल्ते, बर्पुर मंदे, बर्पुर बुदि-गियंते पेर्मा कियना’
38 इदे सम्दिन तेर मुके अनि मोदोडा आगे आंद.
39 अनि, ‘नीवा निमे पेर्मते सूड्तपे, नी आजु-बाजुतुरकुन पेर्मते सूडना’ इंवल रेंडवा आगे गिर आतले आंद.
40 इव रंड आगेङे पूरो मोसेना कानुंतुन अनि पर्वक्तलिर लिहि कीतङ सम्दोन आदर आसि मंतङ” इन्जेर वूरकुन वेह्तोर.
किरिस्तु बोनोर मरि आंदुर?
41 परिसयुल्क उंदि जागा मीरे मासि मनेके, येसु वूर्के सूड्सि,
42 “किरिसतुन बारेते मिरट बतल सोन्च कींतिट?
वोर बोना कांदांतोर इंतिट?”
इन्जेर पूसि कीतोर.
ते वूर, “दाविद्ना कांदांतोर” इन्जेर जवब सीतेर.
43-44 अस्के वूर सङा, “इद गोस्टितुन दाविद राजले,
‘नावोर पर्बुन सङा बगवंतल,
नी सङा लडेय्क किय्वलिरकुन नना मेय्सि,
नी कालकुन बूड वूरकुन दाबि कीनल वेरि,
नावा तिना बग्ला* वासि उदा’+