बेमरि वालेन येसु चोकोट किय्वल
14
1-2 उंदि आरम्ना दिवोसुन नेटि परिसयुल्क्ना बाज्नोर वोरोर अदिकारिना रोन जेवुन किय्ले, येसु सोत्तोर.
अगा मंवलिर वोन दिहंते सूड्सेर मत्तेर.
इचुला केन्जट!
अगा वोरोर मेंदोल तोय्वल बेमरिते मत्तोर.
3 ते येसु अगा मंवलिर दर्मा गुरुर अनि परिसयुलकुन सूड्सि, “दर्मता कानुंतुन पिय्सि, आरम्ना दिवोसुन नेटि बेमरि वालेन चोकोट किय्वल नायम इंतिट कि नायम आयो इंतिट?”
इन्जेर पूसि कीतोर.
4 बति वूर दब मत्तेर.
ते येसु वोर तोय्वल बेमरि वालेन इट्सि, चोकोट कीतोर.
अनि अगटल वोन सारि कीतोर.
5 अस्के येसु, “आरम्ना दिवोसुन नेटि मीवोर मरिय आयि, कोंदय आयि कुहितगा अर्तेके, पोरो तेंड्विटिय?”
इन्जेर वूरकुन पूसि कीतोर.
6 अदेन वूर बतय जवब सिया पर्मकि.
बस्के डगुर-पान पुटंता?
7 अद जेवुंतगा केयुस्तुर वेर्तलिर उद्वलिक चोकोट्नङ जागन आगुटि किय्वल सूड्सि, येसु वूरकुन इद नमुना वेह्तोर:
8 “बोरे नीकुन मर्मि जेवुंतगा केय्तेके, डगुक उद्वल जागतगा उद्मा.
बारितेके रोतोर नीकुन तेर डगुकुन केय्सि मंदा वचो.
9 अहन उद्किते, सम्दिरकुन केयुस्वल मायनल निह्गा वासि, ‘इगे वेन उदा सीम’ इन्जेर इंदा वचो.
अस्के निमे सिर्मिंदिङ आसि, आक्रि मंवल जागतगा उदा लागर.
10 अदेन साटि नीकुन बोरे केयुस्तेके, आक्रि मंवल जागतगा उदा.
अस्के नीकुन केयुस्वल निह्गा वासि, ‘ना सोप्ता!
अद डगुक उद्वल चोकोट्ना जागतगा सोन्जि उदा’ इन्जेर वेहंतोर.
अद गट्कते नी बरोबर उद्वलिर मुने नीकुन डगुर-पान पुटंता.
11 “तंवा तना डगुर-पान किय्वन चुडुर-पान सिय्वल जर्गंता अनि तंवा तना चुडुर-पान किय्वन डगुर-पान सिय्वल जर्गंता” इन्जेर वेह्तोर.
12 अस्के येसु तनकुन केयुस्तोर वोन सङा, “नर्का आयि, पियल आयि जेवुन किय्ले, नी सोप्तलिर्कुने आयि, नी तादल-तमुने आयि, नी चुटल-बंदुने आयि, दनेवंतलिर आय्वलिर नी आजु-बाजुतुर्कुने आयि केय्मा.
उंदि मोका वूर तान बद्लि नीकुन केयंतेर.
अस्के निमे दोस्ता अदेना बर्पेय आंता.
13 बति निमे जेवुन सीनेके गरिबकुन, लेङ्डलिर-पेङ्डलिरकुन, गुड्डि-गूनलिरकुन केया.
14 वूर नीकुन मल्सि तिंडि दोस्वा काड्कि, बगवंतना इचा तीर ताक्वलिर बरोबर नेंड्नेके, निम दोस्ता अदेन बगवंतल बर्पेय कीसि, नीकुन आसिर्वाद सींतोर” इन्जेर वेह्तोर.
डगुर जेवुंता नमुना
15 अस्के येसुन बरोबर उच्चि मंवल वोरोर अव गोस्टिङ केन्चि, “बगवंतना राज्नगा जेवुन किय्वल बेय वेले आसिर्वाद येत्मड मंदर” इन्जेर इत्तोर.
16 ते येसु वोन सङा, “वोरोर मायनल जेवुन तयर कियुसि, वेलेटिरकुन केयुस्तोर.
17 अनि जेवुंता येला आनेके, कबुर वेह्चि मत्तुरकुन, ‘वरट!
इंके जेवुन किय्ले, सम्दो तयर मंता’ इन्जेर वेहा इन्जि सेव्कन सारि कीतोर.
18 बति वूर सम्दिर जेवुंतगा सोंवल तपुस्ले, उंदि तीर वटि आगयेन इहिन वेह्वल मोदोल कीतेर: वूर्गटल मोदोडोर, ‘नना वावुर येत्तोन.
सोन्जि सूडा लागर.
नाकुन मापि कीम’ इन्जेर वोर कोर्तोर.
19 उंडे वोरोर, ‘नना सियुङ जोडिङ कोंदङ येत्तोन.
अव बहन काम कींतङो सोन्जि, सूडा लागर.
नाकुन मापि कीम’ इन्जेर कोर्तोर.
20 उंडे वोरोर, ‘नावङ इंकेने मर्मिङ आतङ.
नना वाया परोन’ इन्जेर इत्तोर.
21 “अस्के वोर सेव्कल तंवोर माल्कनगा मल्सि वासि, वूर सम्दिर वेह्तङ गोस्टिङ वेह्तोर.
ते वोर माल्कल सोङुन वासि, सेव्कन सङा, ‘निमे येंटने नगुडङ संदिङ-गोंदिनगा सोन्जि, गरिबकुन, लेङ्डलिर-पेङ्डलिरकुन अनि गुड्डिरकुन केय्सि पिय्सि वरा’ इन्जेर वेह्तोर.
22 ते वोर सेव्कल माल्कनगा मल्सि वासि, ‘माल्का निमे आगे सीता तीरे नना कीतोन.
तेर बति रोन उंडे गिर निंद्लेके मंता’ इन्जेर इत्तोर.
23 अस्के वोर माल्कल सेव्कन सङा, ‘नावा रोन पूरो मांदिते निंदय लागर.
अदेन साटि निमे नगुडुन बह्रि सोन्जि, सरिनगा अनि मारक्नगा मंवलिरकुन जुल्मा कीसि तरा.
24 इदेन मुने कबुर येव्ता वूर्गटल वोरोर गिर, नना सिय्वल जेवुंता सवद सूडोर’ इन्जेर वोर मायनल इत्तोर” इन्जि येसु वेह्तोर.
बातोर येसुनोर सिस्यल आया परंतोर?
25-26 वेलेटिर मांदि येसुन पेजेय वासेर मत्तेर.
ते येसु वूर बाजुन मल्सि, “बोर्ते ना चर्नते वांतोरो, वोर तंवुर अवल-बाबोन, तंवा वेय्लोन, मरि-मियडुन, तादल-तमुन, सेलड-तककुन अनि तंवा परंतुन तेर अदिक नाकुन पेर्मा कियोर वोर, नावोर सिस्यल आया परोर.
27 तंवा तना दुक्सङ-तक्लिब्क इंवल मोदुन कान्चि ताकोर वोर,* नावोर सिस्यल आया परोर.
28-30 मिह्गटल बोरे उंदि बुरुज दोहना इन्जेर मत्तोर इंटु.
ते वोन्गा तान दोह्चि मह्ले, पह्जे मत्ता अचोर मंता कि सेले इन्जेर लेका कीसि सूडोरिय?
तप्वक सूडंतोर.
उंदि मोका सूड्वक्ने बुनदि वाट्सि, वोर तान पूरो दोहा परोर.
अदेन सूड्सि, ‘वेर दोह्ले मोदोल कीतोर.
बति तान पूरो किया पर्मकि’ इन्जेर वोन चेडि कींतेर.
31 अदे आय्वा, वोरोर राजल उंडे वोरोर राजन सङा लडेय किय्ले, वीसा हजर्क (20,000) सिपायिर सङा वासेर मंतोर.
इत्तेके वोन सङा लडेय किय्ले सोंवल, तन्गा मंवल दहा हजर्क (10,000) सिपायिर येवंतेर कि सेले इन्जेर सोन्च कियोरिय?
तप्वक वोर सोन्च कींतोर.
32 येवुर इन्जेर करे मातेके, वोर राजल वेले लङ मनेकेन, ‘लडेय वटिन, सांति पह्जे’ इन्जेर वेह्ले, कब्रियन वोन्गा सारि कींतोर.
33 अह्ने मिह्गटल गिर बोरे आयि ना सिस्यल आयना इत्तेके, वोर दिहंते सोन्च कीसि, तन्गा मंवल सम्दोतुन सुटि कीसि वायना.
कामि सियो अद सोवोर